Karoa 42

Guba Matamatana Bona Tanobada Matamatana

ANERU ese hari matahanai hairaina ena anina ia hahedinaraia noho, bona Lagani 1,000 Lohia Negana ena matamanai idia vara gaudia be Ioane dekenai ia gwauraia. Dahaka ia herevalaia? “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. Davara danu be ia ore vadaeni.” (Apokalupo 21:⁠1) Vadaeni, laulau namona ia hedinarai!

² Ioane ena nega ia do ginidae lasi lagani handred momo gunanai, Iehova be Isaia dekenai ia gwau: “Badina lau ese guba matamatana bona tanobada matamatana lau karaia noho; gau gunadia do idia laloatao lasi bona edia kudouna dekenai do idia vara lou lasi.” (Isaia 65:17; 66:22) Babulono dekenai idia guidia lagani 70 murinai, Iuda taudia be lagani 537 B.C.E. ai, Ierusalem dekenai idia giroa lou neganai, unai peroveta herevana be nega ginigunanai ia guguru. Unai neganai, idia be “tanobada matamatana” ena bese goevana bamona, gavamani matamatana bona “guba matamatana” ena henunai. To, aposetolo Petero ese unai peroveta herevana ena anina ma ta ia hahedinaraia, ia gwau: “To Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Ioane ia hahedinaraia Lohiabada ena dina lalonai unai peroveta hereva ena anina do ia vara momokani. Satana ena tanobada ena oreadia, mai edia gavamani Satana bona iena demoni henunai, “guba gunana bona tanobada gunana,” do idia ore. Ia hurehure momo ‘davarana,’ kara dika bona gwau-edeede taudia unai, do idia ore. Edia gabu ai do idia gini gaudia be “guba matamatana bona tanobada matamatana”​—⁠anina be tanobada besena matamatana gavamani matamatana, Dirava ena Basileia, henunai.​—⁠Apokalupo 20:⁠11 itaia.

³ Ioane be ma ia gwau: “Bona Hanua Helagana, Ierusalema matamatana lau itaia, guba dekena amo ia diho mai noho, Dirava dekena amo. Inai Hanua Helagana be headava matamata kekeni bamona, ia heraherea namo herea, dabua namona ia karaia, iena adavana totona ia hegaegae vadaeni.” (Apokalupo 21:⁠2) Ierusalem Matamatana be Keriso ena headava matamata kekenina. Unai orea taudia be horoa Keristen taudia, idia gini goada ela bona mase, bena idia toreisi lou Iesu ida pavapava gaukarana bona hahelaga gaukarana do idia karaia hebou totona. (Apokalupo 3:12; 20:⁠6) Tanobada dekenai idaunegai Ierusalem be gavamani ena hedikwota. Unai hegeregerena, Ierusalem Matamatana bona iena Headava Matamata Tauna ese nega matamata ena gavamani lalonai idia noho. Unai gavamani be guba matamatana. ‘Headava matamata kekeni be guba dekena amo ia diho mai’ momokani lasi, to tanobada ia laloa momo. Mamoe ena Natuna ena headava matamata kekeni be mai ena abidadama danu do ia durua, kara maoromaoro gavamani amo taunimanima do idia biagua totona. Unai be hahenamo badana tanobada matamatana dekenai!

⁴ Ioane be ma ia gwau: “Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao.’ ” (Apokalupo 21:⁠3) Iehova ese Taravatu ena gwauhamata be bese matamatana Israel danu ia karaia neganai ia gwau: “Egu tomadiho kalaga be emui ihuanai do lau atoa, bona egu lalona ai umui do lau inai henia lasi. Emui ihuanai do lau raka bona do lau hamomokania lau be emui Dirava bona do umui hamomokania umui be lauegu orea taudia.” (Levitiko 26:​11, 12) Unai gwauhamata hegeregerena Iehova ese abidadama taudia ia gwauhamata henidia. Lagani 1,000 Kota Badana Dinana lalonai, unai taudia be iena orea hereadaena ai do idia lao.

⁵ Lagani 1,000 Lohia Negana lalonai, Iehova be taunimanima ida do ia “noho.” Iena Natuna, pavapava Iesu Keriso, ese Iehova ena gaukara do ia karaia neganai, Iehova totona do ia gini. To Lagani 1,000 Lohia Negana dokona ai, Iesu ese Basileia be iena Tamana dekenai do ia henia lou neganai, herohemaino pavapavana bamona ia gaukara be anina lasi. Lauma dalana ai Iehova be “iena bese taudia” danu do ia noho hanaihanai bona idia danu do ia noho momokani. (Ioane 4:​23, 24 itaia.) Do idia goevadae lou tanobada taudia dekenai unai be hahenamo bada herea!

⁶ Ioane be ma ia gwau: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:⁠4) Unai hereva dainai peroveta hereva gunadia ita laloa lou diba. Isaia danu ese mase bona taitai idia ore negana ia naria, unai negai lalohisihisi do ia ore bona taunimanima ese moale bada do idia davaria. (Isaia 25:8; 35:10; 51:11; 65:19) Ioane ia hamomokania, unai gwauhamata be lagani 1,000 Kota Badana Dinana lalonai do idia guguru. Gau ginigunana be hutuma bada herea taudia ese unai hahenamo do idia abia. “Mamoe ena Natuna, helai gabuna badana ena huanai ia noho” ese unai taudia do ia naridia noho, bona ia “ese mauri ranuna, ia lohilohi gauna, dekenai idia do ia hakaua lao. Bona Dirava ese edia taitai ranu ibounai edia matana dekena amo do ia dahua ore.” (Apokalupo 7:​9, 17) To gabeai do idia toreisi lou taudia bona Iehova ena heduru do idia abidadama henia taudia iboudiai ese unai hahenamo idia abia, bona lauma paradaisona bona paradaiso korikorina danu do idia moalelaia.

⁷ Isaia ia gwau: “Unai neganai matakepulu taudia edia matana do idia kehoa, bona taia kudima taudia edia taiana do idia kehoa.” Oibe, “unai neganai aena dika tauna do ia raka daekau dia bamona, bona mu tauna ena malana do ia boiboi mai ena moale ida.” (Isaia 35:​5, 6) Unai negai danu, “idia ese ruma do idia haginia, bena do idia noholaidia bona idia ese vain umadia do idia hadoa, edia anina do idia ania. Ruma do idia haginia, bena idauna ta ese do ia noholaia lasi; bona do idia hadohado, bena idauna ta ese do ia ania lasi. Badina be au ena mauri dinadia hegeregeredia lauegu taunimanima edia mauri dinadia danu unai bamona; bona lau abia hidi taudia ese edia imana edia gaukara ena anina ibounai do idia abia.” (Isaia 65:​21, 22) Vadaeni, Dirava ese idia be tanobada amo do ia kokidia lasi.

⁸ Unai gwauhamata ita laloa neganai, laulau namo hereadia be iseda darana lalonai ita itaia bamona! Guba ena lalokau gavamani henunai, kamonai taudia ese hahenamo namo hereadia do idia abia. Unai gwauhamata namo hereadia be koikoi gaudia, a? Idia be Patamo motumotuna dekenai ia noho tau burukana ena nihi sibona, a? Iehova ia haere, ia gwau: “Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ Ma ia gwau, ‘Ia ore vadaeni! Lau be Matamana bona Dokona, lau be gau ibounai edia badina bona lau karaia gau ibounai be do lau haorea.’ ”​—⁠Apokalupo 21:​5, 6a.

⁹ Unai be hegeregere Iehova ese kamonai taudia totona gwauhamata pepana ia sainia, nega vairai unai hahenamo do idia abia totona. Daika ese unai Gwauhamata Tauna ia hakoikoia toho diba? Ta lasi, ani? Unai gwauhamata idia momokani dainai, Iehova ia hereva hegeregere unai gwauhamata idia vara momokani vadaeni, ia gwau: “Ia ore vadaeni!” Iehova be “Alepa bona Omega, Matamana bona Dokona,” “harihari ia noho, gunaguna ia noho, bona gabeai do ia mai tauna, Siahu Ibounai Diravana,” ani? (Apokalupo 1:⁠8) Ia sibona ia gwau: “Lau be ginigunana bona ginigabena, Dirava ma ta be lasi.” (Isaia 44:⁠6) Unai dainai, ia be iena lauma helaga amo peroveta herevadia ia gwauraia, bona unai hereva iboudiai ia hagugurudia diba. Unai ese iseda abidadama ia hagoadaia bada! Unai dainai ia gwauhamata, ia gwau: “Harihari be gau ibounai lau karaia matamata inai”! Namona be ita daradara lasi bona ita laloa lasi sedira unai gwauhamata do idia vara momokani eiava lasi. To namona be sibona ita nanadaia: ‘Dahaka lau karaia be namo, unai hahenamo do lau abidia totona?’

Ranu Mase Taudia Edia “Ranu”

¹⁰ Iehova ia gwau: “Bema tau ta ia ranu mase, lau be ranu do lau henia, davana lasi. Inai ranu be lohilohi gabuna dekena amo ia daekau noho mauri ranuna.” (Apokalupo 21:6b) Ranu mase tauna ese ranu ia inua totona, namona be ia lalo-parara lauma gaudia ia abia be namo, bona unai “ranu,” Iehova ese ia henia gauna, ia abia dae. (Isaia 55:1; Mataio 5:⁠3) Dahaka “ranu”? Iesu be Samaria dekenai ranu guri badinai ia helai hahinena ia haroro henia neganai, unai henanadai ena haere ia henia. Ia gwau: “Lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai sinavai bamona do ia aru noho, bona mauri ranuna do ia henia. Ma mauri hanaihanai danu do ia henia.” Unai ranu, “lohilohi gabuna dekena amo ia daekau noho mauri ranuna,” be Dirava ena amo ia aru mai, bona Keriso amo ia siaia. Unai be Dirava ena heduru gauna, taunimanima be mauri goevadaena dekenai do ia hakaua lou totona. Namona be Samaria hahine bamona ita ura dikadika unai lohilohi ranuna do ita inua! Bona namona be unai hahine hegeregerena iseda lalona ai ita hegaegae anina lasi karadia ita rakatanidia bona sivarai namona be ma haida dekenai do ita harorolaia totona!​—⁠Ioane 4:​14, 15, 28, 29.

Idia Kwalimu Taudia

¹¹ Iehova ena hereva hegeregerena, unai “ranu” namona idia inua taudia danu idia kwalimu be gau badana. Ia gwau: “Kwalimu tauna ena kwalimu ahuna be inai: Lau be iena Dirava do lau lao, bona ia be lauegu natuna.” (Apokalupo 21:⁠7) Unai gwauhamata be kongregesen 7 dekenai ia siaia hadibaia herevadia bamona; unai dainai unai hereva be mai anina bada horoa hadibaia taudia dekenai. (Apokalupo 2:​7, 11, 17, 26-​28; 3:​5, 12, 21) Idia hanai laganidia momo lalonai, lauma dalanai Keriso ena tadikaka be mai edia ura dikadika danu helaro idia dogoatao Ierusalem Matamatana lalonai do idia vareai. Bema Iesu bamona idia kwalimu, edia helaro namona do idia abia.​—⁠Ioane 16:⁠33.

¹² Hutuma bada herea taudia bese iboudiai amo ese unai gwauhamata idia laloa danu. Gau badana be idia kwalimu danu, bona mai edia kamonai danu Dirava idia hesiai henia ela bona hisihisi bada herea negana amo idia roho mauri. Unai neganai, edia hahenamo tanobada dekenai do idia abia, anina be ‘basileia do idia abia, Dirava ese tanobada ia karaia neganai ia ese ia karaia hegaegae, idia edia.’ (Mataio 25:34) Unai taudia, bona Lohiabada ena mamoe ma haida tanobada dekenai, be lagani 1,000 dokonai hetoho idia hanaia neganai, idia gwauraidia “helaga taudia.” (Apokalupo 20:⁠9) Edia Havaraia Tauna, Iehova Dirava, danu helaga dalanai do idia hetura namonamo bona Iehova ena natudia bamona do idia noho, iena guba bona tanobada oreana lalonai.​—⁠Isaia 66:22; Ioane 20:31; Roma 8:⁠21.

¹³ Iehova ena Witness taudia ese unai helaro namona idia abia dainai, gau badana be Satana ena tanobada ena miro karadia amo idia gini siri bona idia goeva noho! Namona be ita gini goada bona iseda lalona ita hadaia, Diabolo ese ita do ia veria garina bona Iehova be inai bamona ia gwauraia taudia ida do ita hebamo: “To gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salifa idia araia noho gabunai do idia lao. Inai be mase iharuana.” (Apokalupo 21:⁠8) Oibe, ia ura hahenamo do ia abia tauna ese inai nega dikana ena kara mirodia amo ia gini siri be gau badana. Namona be hekwakwanai bona hedibagani iboudiai idia vara neganai ia gini goada bona ia kwalimu.​—⁠Roma 8:​35-​39.

¹⁴ Ena be Kerisendom ia gwau ia be Keriso ena headava matamata kekenina, to Ioane be unai siri lalonai ia gwauraia kara bodagadia be nega momo ia karaia. Unai dainai do ia ore hanaihanai, Babulono Badana ena orena kahana ida. (Apokalupo 18:​8, 21) Unai hegeregerena, horoa taudia haida eiava hutuma bada herea taudia, bema unai bamona kara dikana idia karaia noho, eiava kara dika idia durua, vadaeni, idia mase hanaihanai diba. Bema edia kara idia rakatania lasi, gwauhamata namodia edia anina do idia davaria lasi. Bona tanobada matamata lalonai, unai kara dikadia idia hamatamaia toho taudia do idia mase haraga; mase iharuana dekenai do idia lao, do idia toreisi lou lasi.​—⁠Isaia 65:⁠20.

¹⁵ Kwalimu taudia badadia be Mamoe ena Natuna, Iesu Keriso, bona iena headava matamata kekeni oreana, 144,000 taudia, Ierusalem Matamatana. Unai dainai, Apokalupo bukana ena hereva dokona lalonai Ierusalem Matamatana ena toana hereadaena idia gwauraia be maoro! Hari, Ioane be matahanai ginigabena ta ia gwauraia.

[Study Questions]

 1. Aneru ese Lagani 1,000 Lohia Negana ena matamana ia gwauraia lou neganai, Ioane ese dahaka ia herevalaia?

 2. (a) Isaia ese guba matamatana bona tanobada matamatana ia perovetalaidia; lagani 537 B.C.E. ai, iena hereva be edena bamona ia guguru idia lou Iuda taudia dekenai? (b) Edena bamona ita diba Isaia ena peroveta herevana ena anina ma ta ia noho, bona unai gwauhamata be edena bamona ia guguru?

 3. (a) Ioane ese dahaka ia gwauraia, bona Ierusalem Matamatana be dahaka? (b) Edena dala ai Ierusalem Matamatana be “guba dekena amo ia diho mai”?

 4. Dirava ese dahaka gwauhamata ia karaia, ia be Israel besena matamatana danu ia karaia gwauhamatana hegeregerena?

 5. (a) Lagani 1,000 Lohia Negana lalonai, Dirava be edena bamona taunimanima ida do ia noho? (b) Lagani 1,000 Lohia Negana murinai Dirava be edena bamona taunimanima ida do ia noho?

6, 7. (a) Ioane ese dahaka gwauhamata namodia ia gwauraidia, bona daidia ese unai hahenamo do idia abia? (b) Isaia be edena bamona lauma paradaisona bona paradaiso korikorina ia gwauraia?

 8. Unai gwauhamata gaudia do idia vara ia hamomokania totona Iehova be dahaka ia gwau?

 9. Dahaka dainai ita diba unai hahenamo, nega vairai do idia vara gaudia, do idia vara momokani?

10. Iehova ese dahaka “ranu” ia henia, bona unai ranu ena anina be dahaka?

11. Iehova ese dahaka gwauhamata ia karaia, bona iena hereva be mai edia anina bada daidia dekenai?

12. Iehova ena gwauhamata Apokalupo 21:7 lalonai be edena bamona do ia guguru hutuma bada herea taudia dekenai?

13, 14. Dirava ena gwauhamata namodia edia anina do ita abia totona, namona be dahaka karadia amo ita gini siri momokani, bona dahaka dainai?

15. Daidia idia kwalimu momokani, bona Apokalupo bukana lalonai dahaka matahanai hairaina ia hedinarai?

[Pictures on page 302]

Tanobada matamatana lalonai taunimanima iboudiai ese gaukara bona hebamo namodia do idia moalelaia