Karoa 23

Dika Iharuana​—⁠Hosi Guia Tuari Taudia

LAGANI 1919 amo, kwadi oreana ese Kerisendom idia tuari henia negana amo, dubu gunalaia taudia idia hisihisi bada. Kwadi idia hadikaia ore toho, to kwadi idia goada idia lao. (Apokalupo 9:⁠7) Bona unai sibona lasi! Ioane ia gwau: “Dika ta ia ore vadaeni. Rua be idia do noho.” (Apokalupo 9:12) Kerisendom ese ma dika haida do ia abia.

² Dika iharuana be edeseni amo ia mai? Ioane ia gwau: “Aneru namba 6 ese iena kibi ia hiriria. Vadaeni gado ta lau kamonai golo pata helagana ena kona 4 dekena amo. Inai pata helagana be Dirava ena vairanai ia noho. Unai gado ese aneru namba 6 ia hamaoroa, ia gwau, ‘Aneru 4, Eufrate sinavai badana ena isena dekenai idia guia noho, be do oi ruhaia.’ ” (Apokalupo 9:​13, 14) Aneru ese lai 4 idia ruhaia ena badina be golo pata helagana ena kona 4 amo ia mai gadona dainai. Unai pata be golo patana, bonana namo gabua patana unai. Nega rua unai pata idia gwauraia vadaeni, bona unai neganai ia ese helaga taudia edia guriguri ia laulaulaia. (Apokalupo 5:8; 8:​3, 4) Unai dainai, unai gado tamona ese tanobada dekenai idia noho helaga taudia iboudiai edia guriguri ia laulaulaia. Iehova idia noia do idia roho mauri, mai edia goada ida Iehova ena hesiai gaukara do idia karaia totona, iena “gwaukau taudia” bamona. Unai siri ena Greek gado herevana ta be Motu gado ai idia hahanaia “aneru.” Unai hereva ena anina korikorina be “gwaukau taudia.” Dahaka dainai unai aneru edia namba be 4? Unai namba be laulau ta bamona, ia hahedinaraia edia gaukara idia hegaegaelaia namonamo dainai, unai gaukara be tanobada ibounai dekenai idia karaia diba.​—⁠Apokalupo 7:1; 20:⁠8.

³ Edena bamona unai aneru be “Eufrate sinavai badana ena isena dekenai idia guia”? Idaunegai, Iehova be Abraham dekenai ia gwauhamatalaia tanona ena not ist hetoana be Eufrate sinavai. (Genese 15:18; Deuteronomi 11:24) Dirava ese tano, tanobada dekenai idia karaia karadia unai, be aneru dekenai ia henia. Toana be, unai tano ena hetoana dekenai aneru idia koua, Dirava be idia totona ia hegaegaelaia hesiai gaukarana lalonai do idia vareai garina. Danu, Eufrate sinavai be Babulono hanuana ena sinavai badana, bona lagani 607 B.C.E. ai Ierusalem ia moru murinai, lagani 70 lalonai Israel korikori taudia be Babulono dekenai idia guia, “Eufrate sinavai badana ena isena dekenai idia guia” unai. (Salamo 137:⁠1) Unai hegeregerena, lagani 1919 ai, lauma Israel taudia idia guia. Idia lalohisihisi bona Iehova ena heduru totona idia noinoi.

⁴ Mai moale ida, Ioane ia gwau: “Vadaeni unai aneru 4 be ia ese ia ruhaia. Unai aneru 4 be idia abia hegaegae, unai hora, unai dina, unai hua, unai lagani, gaukara ta do idia karaia totona. Edia gaukara be inai: Tanobada ena taunimanima orea toi dekena amo orea ta be do idia alaia mase.” (Apokalupo 9:15) Iehova be Nega Ia Duahia Namonamo Tauna. Ia be mai ena sediual bona ia badinaia noho. Unai dainai unai gwaukau taudia be nega korikori ai idia ruhaia bona unai dainai edia nega ia hegeregere, edia gaukara do idia karaia guguru totona. Lagani 1919 ai, idia ruhaia murinai, edia lalona idia hegaegaelaia gaukara do idia karaia totona. Idia be mai edia maduna, taunimanima do idia hahisidia sibona lasi, to nega dokonai, “tanobada ena taunimanima orea toi dekena amo orea ta be do idia alaia mase.” Unai kara be kibi ginigunadia 4 idia harorolaia hahisia gaukarana danu idia karaia hebou, unai hisihisi ese tanobada, davara, davara ena mauri gaudia, lohilohi ranudia, sinavai, bona guba diari gaudia, edia kahana toi amo kahana ta idia hadikaia ore. (Apokalupo 8:​7-​12) Unai aneru 4 ese unai gaukara idia habadaia. Idia ese orea ta idia “alaia mase,” anina be idia hahedinaraia goevagoeva Kerisendom be lauma dalana ai ia mase. Lagani 1922 amo ema bona hari, hadibaia herevadia kibina idia hiriria neganai, unai idia karaia.

⁵ Guba aneruna ese kibi namba 6 ia hiriria vadaeni. Unai hegeregerena, Bible Student taudia ese hebouhebou badana namba 6 idia karaia, Toronto, Ontario, Canada dekenai. Sunday, July 24, 1927 ai, hebouhebou ena hereva be reidio steiseni 53 dekenai idia halasia. Guna, reidio steiseni be nega tamona idia gaukaralaia neganai, edia namba be unai bamona ia bada lasi. To, unai neganai unai hadibaia herevana idia kamonai taudia be milion momo reana. Guna, gwaubou hereva aukana ta amo idia hahedinaraia Kerisendom be lauma dalanai ia mase vadaeni, bona taunimanima be inai bamona idia hagoadaia: “Hari daradara negana lalonai Iehova Dirava ese bese iboudiai ia hamaorodia, ‘Kerisendom’ eiava ‘Keristen dubu edia orea’ idia rakatania bona idia dadaraia ela bona hanaihanai, bona ia amo idia gini siri vaitani . . . ; [namona be] bese iboudiai be mai edia kudou ibounai ida Iehova Dirava, ena Pavapava bona ena basileia idia lalokau henia bona idia kamonai henia namonamo.” Unai murinai, pablik tok idia karaia. Iena ladana be “Taunimanima Iboudiai Edia Mauri Namona Abia Dalana.” J. F. Rutherford be vaia ena kara mai lalo-goada ida unai pablik tok ia henia, bona ena kara be Ioane ese ia itaia gauna, “lahi bona kwalahu, bona salifa,” bamona.

⁶ “Idia edia tuari taudia, hosi dekenai idia guia taudia be ibounai 200 milioni. Edia momo be gado ta ese lau ia hamaoroa. Vadaeni, lauegu matahanai lalonai unai hosi, mai edia guia taudia lau itaia. Unai taudia ese kemena auri edia kemena dekenai idia atoa. Unai auri edia kala be kakakaka, lahi bamona, bona bulu bona labora, salifa nadi bamona. Hosi edia kwarana be leona edia kwarana bamona, bona edia uduna dekena amo lahi bona kwalahu bona salifa idia mai murimuri kahanai. Inai dika badadia toi dainai tanobada taudia ibounai kahana toi dekena amo kahana ta idia mase. Inai lahi bona kwalahu, bona salifa, unai hosi ese edia uduna dekena amo idia negea gaudia ese unai taudia idia alaia mase.”​—⁠Apokalupo 9:​16-18.

⁷ Unai hosi guia tuari taudia idia heau lao neganai, aneru 4 ese idia hakaudia. Unai be hagaria gauna! Bema oi dekenai idia heau lao, dahaka oi karaia? Edia toana dainai do oi gari dikadika. To, oi itaia, unai hosi guia tuari taudia edia toana be guna idia vairanai idia lao kwadi bamona, ani? Unai kwadi be hosi bamona; to unai tuari taudia ese hosi korikoridia idia guia. Unai amo ia hedinarai, kwadi bona tuari taudia be Dirava ena ura hegeregerena idia tuari. (Aonega Herevadia 21:31) Kwadi edia isena be leona edia isena bamona, tuari taudia edia hosi edia kwarana be leona edia kwarana bamona. Anina be kwadi bona hosi guia tuari taudia ese gari lasi tauna, Iuda iduhuna ena Leona, Iesu Keriso, idia badinaia, ia be edia Gunalaia Tauna, edia Biaguna bona edia Haheitalai Namo Tauna.​—⁠Apokalupo 5:5; Aonega Herevadia 28:⁠1.

⁸ Kwadi bona hosi guia tuari taudia ese Iehova ena hahemaoro gaukarana idia karaia. Kwadi be kwalahu amo idia daekau. Unai kwalahu ena anina be Kerisendom ese dika do ia davaria bona lahi ese do ia araia ore. Hosi edia uduna amo lahi, kwalahu, bona salifa idia mai. Kwadi be mai edia kemena tuari auri dabua. Edia kudouna lalonai kara maoromaoro idia ura henia dikadika ia laulaulaia. Hosi guia tuari taudia edia kemena auri dabua be kakakaka, bulu, bona laboralabora. Unai be Iehova ena hahemaoro auka herevadia edia lahi, kwalahu, bona salifa, edia kala hegeregeredia. Unai hahemaoro herevadia be hosi edia uduna amo idia mai. (Genese 19:​24, 28; Luka 17:​29, 30 itaia danu.) Kwadi edia iuna be doadoa edia iuna bamona, taunimanima idia hahisia totona; hosi edia iuna be gaigai bamona, taunimanima do idia alaia mase totona! Toana be kwadi ese guna idia hamatamaia gaukarana be hosi guia tuari taudia ese idia karaia mai edia goada bada herea ida, bena unai gaukara idia karaia guguru.

⁹ Vadaeni, hosi guia tuari taudia ese dahaka idia laulaulaia? Ioane oreana horoa taudia ese Iehova ena hahemaoro aukana Kerisendom dekenai idia harorolaia, kibi idia hiriria bamona. Idia be mai edia siahu, taunimanima ‘idia koria bona idia hahisia’ totona. Unai dainai, unai orea ese taunimanima idia ‘alaia mase’ danu be maoro, anina be, idia hahedinaraia Kerisendom bona ena dubu gunalaia taudia be lauma dalanai idia mase vaitani, Iehova ese ia negea oho vadaeni, bona “lahi badana dekenai” do idia lao, anina be do idia mase ela bona hanaihanai. Momokani, Babulono Badana ena kahana iboudiai do idia ore. (Apokalupo 9:​5, 10; 18:​2, 8; Mataio 13:​41-​43) To idia do hadikaia ore lasi neganai, Ioane oreana taudia ese “Lauma Helaga ena tuari kaia . . . Dirava ena hereva” idia gaukaralaia, bona idia hahedinaraia Kerisendom be lauma dalanai ia mase vadaeni. Lauma dalanai, “tanobada ena taunimanima orea toi dekena amo orea ta” idia alaia mase neganai, aneru 4 bona hosi guia taudia ese unai kara idia biagua. (Efeso 6:17; Apokalupo 9:​15, 18) Unai ia hahedinaraia, Basileia idia harorolaia gari lasi taudia be tuari dekenai idia heau lao neganai, Iesu ese edia gaukara ia hegaegaelaia namonamo bona Dirava ena oda hegeregerena unai gaukara ia biagua bona ia naria.

Milion Handred Rua

¹⁰ Dahaka dainai unai hosi guia tuari taudia edia namba be 200 milion?a Hari, taunimanima milion haida ese Basileia idia harorolaia, to idia be 200 milion lasi! To, Mose ena hereva Numera 10:36 dekenai oi laloatao be namo, ia gwau: “Iehova e, Israel taudia milion milion dekenai oi lou mai.” (Genese 24:60 itaia danu.) To, Mose ena negai Israel taudia be milion rua o toi sibona. Unai dainai Mose ena hereva ena anina be dahaka? Reana ia diba, gabeai Israel taudia edia namba do ia bada momokani, “guba dekenai noho hisiu, bona kone dekenai noho miri bamona.” Taunimanima ese edia namba do idia duahia diba lasi. (Genese 22:17; 1 Sivarai 27:23) Unai dainai Mose be ena hereva “milion milion” ia gwauraia neganai ia ese namba badana ta sibona ia gwauraia. Unai dainai, Buka Helaga lalonai, unai siri ia gwau: “Iehova e, Israel taudia gerebu gerebu ba lou henidia.” “Gerebu” ena anina be tausen ta nega ten amo habadaia bona “gerebu gerebu” ena anina be tausen tausen momo. Unai dainai, Buka Helaga lalonai Numera 10:36 idia hahanaia dalana be Greek gado bona Heberu gado diksenari edia hereva hegeregerena. Unai diksenari lalonai “gerebu” ena anina iharuana be inai bamona idia gwauraia: “Taunimanima hutuma, edia namba idia duahia diba lasi,” “taunimanima hutuma.”​—⁠The New Thayer’s Greek-English Lexicon of the New Testament; Gesenius ese ia torea bukana, A Hebrew and English Lexicon of the Old Testament, Edward Robinson ese ia hahanaia gauna.

¹¹ To tanobada dekenai idia do noho Ioane oreana taudia be momo lasi. Idia iboudiai be “gerebu” ta ena namba idia davaria lasi. Edena bamona idia be hosi guia tuari taudia milion milion bamona? Laulau dalana ai, unai bamona ai do idia lao totona, namona be tuari taudia ma haida ese idia durudia, ani? Oibe, bona Iehova ena hebogahisi dainai, tuari taudia ma haida ese unai taudia idia durua vadaeni! Idia be edeseni amo idia mai?

¹² Lagani 1918 ia lao 1922, Ioane oreana taudia be noho dika taudia dekenai helaro namona idia gwauraia matamaia, idia gwau: “Hari idia mauri noho taudia milion milion be do idia mase lasi.” Lagani 1923 ai, idia hahedinaraia danu Mataio 25:​31-​34 lalonai ia gwauraia mamoedia ese tanobada do idia abia Dirava ena Basileia henunai. Lagani 1927 ai, intenesenel hebouhebou idia karaia neganai, buklet ta, Freedom for the Peoples, idia halasia. Unai buklet danu lalonai unai helaro idia gwauraia. Lagani 1931 bamona ai, idia hahedinaraia kara maoromaoro Iehonadab oreana taudia bona Kerisendom ena dika lauma dalanai ‘idia ganaganalaia bona idia taitailaia’ taudia be unai laulau mamoedia, bona tanobada dekenai mauri hanaihanai helarona idia abia taudia hegeregerena. (Esekiela 9:4; 2 King Taudia 10:​15, 16) The Watchtower, August 15, 1934, ese unai bamona taudia ia hagoadaia, hari inai negai idia noho “heau mauri hanuadia” dekenai do idia heau lao. Unai magasin ia gwau: “Ionadab orea taudia ese Dirava ena kibi ena regena idia kamonai vadaeni, bona ena hadibaia herevana idia kamonai henia dainai, Dirava ena orea dekenai idia heau mai bona Dirava ena orea taudia ida idia hebamo, bona gau badana be unuseniai idia noho.”​—⁠Numera 35:⁠6.

¹³ Lagani 1935 ai, Ionadab taudia idia boiridia, Iehova ena Witness taudia edia hebouhebou Washington, D.C., U.S.A., dekenai do idia mai totona. Unuseniai, Friday, May 31 ai, J. F. Rutherford ese pablik tok badana ia karaia, ena ladana be “Hutuma Bada Herea Taudia.” Unai hereva lalonai ia hahedinaraia goevagoeva Apokalupo 7⁠:9 dekenai ia gwauraia hutuma bada herea taudia bona Mataio 25:33 dekenai ia gwauraia mamoedia be orea tamona​—⁠idia be gwauhamata oreana, edia helaro be tanobada dekenai do idia mauri hanaihanai. Unai hebouhebou lalonai kamonai matamata Witness taudia 840 be idia bapatiso, idia momo herea be hutuma bada herea taudia.b

¹⁴ Lagani 1922 ai, hosi guia tuari taudia idia heau matamaia. Lagani 1927 ai, Toronto dekenai edia hebouhebou lalonai, unai heau idia gwauraia momo. Unai hutuma bada herea taudia be unai heau lalonai idia vareai, a? Aneru 4, Ioane oreana taudia, ese idia hakaua neganai, unai heau lalonai idia vareai momokani! Lagani 1963 ai, tanobada ibounai lalonai, “Mia Hanaihanai Sivarai Namona” Hebouhebouna idia karaia. Unai hebouhebou lalonai, hutuma bada herea taudia bona Ioane oreana taudia ese gwaubou herevana idia karaia. Unai hereva lalonai idia gwauraia hedinarai inai tanobada ese “hekwakwanai bada herea, tano mareremarere bamona, do ia davaria. Guna unai bamona hekwakwanai ia davaria lasi. Ena politikol oreadia iboudiai bona ena Babulono tomadihona do idia hadikaia ore.” Edia lalohadai aukana be inai: “Taunimanima iboudiai dekenai ‘noho hanaihanai sivarai namona’ do ai harorolaia noho. Unai sivarai ese Dirava ena Mesia basileiana bona ena hahemaoro auka herevadia ia gwauraia. Unai sivarai be hisihisi dikadia bamona Dirava ena inai taudia dekenai, to unai hahemaoro do ia karaia, inai taudia iboudiai, idia ura mai lauma bona mai momokani ida gau ibounai ia havaraia Diravana do idia tomadiho henia taudia, do ia ruhadia totona.” Tanobada ibounai dekenai hebouhebou 24 ai, taunimanima 454,977 ese unai gwaubou herevana idia karaia, mai edia moale bada ida. Unai taudia 100 100 iboudiai amo, 95 95 bona ma haida be hutuma bada herea taudia.

¹⁵ Hutuma bada herea taudia be idia gwau noho Ioane oreana taudia ida idia lalo-tamona, Kerisendom dekenai hisihisi idia bubua hebou noho neganai. Lagani 2005 ai, Iehova ese haroro gaukara lalonai ia gaukaralaidia taudia iboudiai amo 99.8 pesen be hutuma bada herea taudia. Unai hutuma bada herea taudia be mai edia kudouna ibounai ida Ioane oreana taudia ida idia lalo-tamona. Ioane 17:​20, 21 dekenai Iesu ese Ioane oreana taudia totona ia guriguri neganai, ia gwau: “Idia sibona totona lau noinoi lasi, to edia hereva dekena amo lau do idia abidadama henia taudia totona danu lau noinoi oi dekenai. Egu Tamana e, lau ura ibounai be do idia tamona, oi be lauegu lalona dekenai oi noho bona lau be oiemu lalona dekenai lau noho hegeregerena, idia danu iseda lalona dekenai do idia noho. Unai dekena amo tanobada ese do ia abia dae oi ese lau oi siaia.” Iesu ena kwarana dagina henunai, horoa Ioane oreana taudia ese hesiai gaukara idia gunalaia, bona unai neganai lalo-goada hutuma bada herea taudia be idia ida idia gaukara hebou, guna tanobada ena sivarai ibounai lalonai hosi guia tuari taudia edia heau be unai bamona lasi!c

¹⁶ Namona be hosi guia tuari taudia ese tuari kohu idia abia. Hoa dalana ai Iehova ese unai kohu ia henia vadaeni! Ioane ese ia herevalaia, ia gwau: “Hosi edia siahu be edia uduna bona edia iuna dekenai. Edia iuna be gaigai bamona, mai edia kwarana, bona unai kwarana dekena amo taunimanima idia hahisia.” (Apokalupo 9:19) Iehova ese ena gwauhamata bona bapatiso hesiai taudia ia abia hidi unai hesiai gaukara do idia karaia totona. Haroro Sikuli bona kongregesen hebou bona sikuli ma haida edia amo, haroro gaukara karaia dalana dekenai idia ia hadibaia vadaeni, “idia hadibaia taudia edia malana amo” do idia haroro totona, gari lasi. Iena hereva be edia uduna dekenai ia atoa bona idia ia siaia lao, “taunimanima vairanai bona ruma ta ruma ta dekenai” ena hahemaoro herevadia do idia harorolaia totona. (2 Timoteo 4:2; Isaia 50:4; 61:2; Ieremia 1:​9, 10; Kara 20:​20, NW ) Lagani momo lalonai, Ioane oreana taudia bona hutuma bada herea taudia ese Baibel, buka, buklet, bona magasin milion momo idia hariharilaia. Unai gaudia amo hahisia herevana, “iuna” unai, idia halasia. Edia inai taudia idia sisiba henia, idia gwau Iehova ese unai taudia do ia “hahisia.” Idia dekenai, unai hosi guia tuari taudia be milion 200 bamona.​—⁠Ioela 2:​4-6 itaia danu.

¹⁷ Unai hosi guia tuari oreana ena kahana be mai lalo-goada bada ida idia gaukara. Gavamani ese Iehova ena Witness taudia edia gaukara idia koua tanodia dekenai idia noho. Uda sisia huanai idia noho mamoe bamona, gau badana be idia “aonega, gaigai bamona,” bona idia “dagedage lasi, pune bamona.” Iehova idia kamonai henia dainai, idia itaia bona idia kamonaia gaudia idia hunia diba lasi. (Mataio 10:16; Kara 4:​19, 20; 5:​28, 29, 32) Idia dekenai, idia hariharilaia diba buka, buklet bona magasin be momo lasi. Unai dainai, ita gwau diba hosi guia tuari taudia edia heau lalonai idia vareai lasi, a? Lasi vaitani! Idia be mai edia uduna bona Iehova ese siahu ia henidia vadaeni edia uduna amo Baibel ena hereva momokani idia gwauraia totona. Unai idia karaia, nega idauidau bona gabu idauidau ai, bona taunimanima edia lalona idia veria. Baibel stadi matamatadia idia hamatamaia bona “taunimanima hutuma idia hakaua mai kara maoromaoro dekenai.” (Daniela 12:⁠3) Ena be edia iuna amo taunimanima idia hahisia dalana be buka bona magasin mai hereva aukana idia henidia lasi, to, mai edia aonega ida idia harorolaia gauna be Iehova ena kwalimu dinana badana be ia kahirakahira bona unai neganai, laulau dalana ai, lahi, kwalahu, bona salifa be edia uduna amo idia mai.

¹⁸ Ma gabu haida dekenai, Basileia gwauraia bukadia ese Kerisendom ena Babulono hahediba herevadia edia dika bona edia kara edia dika idia gwauraia hedinarai noho. Unai amo lauma dalana ai Kerisendom idia hahisia noho, unai be ena davana korikorina. Printa masini bona printa daladia matamatadia idia gaukaralaia dainai, lagani 1937 ia lao 2005 ai, unai hosi guia tuari taudia ese Baibel, buka, magasin, bona buklet bilioni momo idia hariharilaia gado idauidau 450 bona ma haida lalonai. Unai namba be 200 milion ia hanaia vaitani. Hisihisi bada idia havaraia vadaeni!

¹⁹ Iehova ena ura be, unai hahisia hadibaia hereva ese “tanobada ena taunimanima orea toi dekena amo orea ta be do idia alaia mase.” Unai dainai, Kerisendom dekenai unai hereva idia siaia. To ma tano momo dekenai ia lao danu. Unai tano momo lalonai taunimanima be Kerisendom ena koikoi idia diba namonamo. Unai tano idia noholaia taudia ese Kerisendom idia hahisia herevadia idia kamonai dainai, Iehova kahirakahira dekenai idia mai, a? Oibe, idia momo idia karaia vadaeni! Kerisendom ese ia biagua lasi tanodia dekenai, lalo-manau taudia momo idia kamonai namonamo. To, taunimanima momo edia kara be Ioane ese ia gwauraia inai bamona: “Tanobada taudia oredia, inai hisihisi ese ia hamasea lasi taudia, be edia lalona idia giroa lasi, bona edia imana idia karaia gaudia dekena amo idia raka siri lasi. Idia ese lauma dikadia tomadiho henia karana idia rakatania lasi. Golo bona siliva bona kapa bona nadi bona au dekena amo idia karaia kaivakuku tomadiho henia kara idia hadokoa lasi. Inai kaivakuku gaudia be idia itaia diba lasi, idia kamonai diba lasi, bona idia raka diba lasi gaudia. Oibe, edia ala-ala bona edia babalau bona edia heudahanai, bona edia henaoa karadia danu dekena amo edia lalona idia giroa lasi.” (Apokalupo 9:​20, 21) Helalo-kerehai lasi taudia tanobada ibounai dekenai be edia dika amo do idia giroa lasi. Edia kara dika idia rakatania lasi taudia iboudiai be Iehova ena kwalimu dinana badana lalonai ena hahemaoro aukana do idia abia. To “Iehova ena ladana idia noinoi henia taudia iboudiai be mauri do idia davaria.”​—⁠Ioela 2:32; Salamo 145:20; Kara 2:​20, 21.

²⁰ Dika iharuana ena kahana sibona ita kikilaia vadaeni. To, karoa gabedia amo do ita itaia unai dika ia do ore lasi neganai, ma gau haida danu do idia vara.

[Footnotes]

[Study Questions]

 1. Ena be dubu gunalaia taudia ese kwadi idia hadikaia ore toho, to dahaka ia vara, bona dika ma rua idia mai ena anina be dahaka?

 2. (a) Aneru namba 6 ese ena kibi ia hiriria neganai dahaka ia vara? (b) “Gado ta . . . golo pata helagana ena kona 4 dekena amo” ese dahaka ia laulaulaia? (c) Dahaka dainai aneru 4 ia gwauraidia?

 3. Edena bamona unai aneru 4 be “Eufrate sinavai badana ena isena dekenai idia guia”?

 4. Aneru 4 edia gaukara be dahaka, bona unai gaukara be edena bamona idia karaia guguru?

 5. Lagani 1927 ai, kibi namba 6 idia hiriria ena regena be edena bamona idia habadaia, bona ena anina Kerisendom dekenai be dahaka?

 6. Ioane ese hosi guia tuari taudia ia itaia neganai, edena bamona ia gwauraidia?

7, 8. (a) Hosi guia tuari taudia idia heau lao neganai daika ese idia ia hakaua? (b) Edena dala amo, unai hosi guia tuari taudia edia toana be guna idia lao kwadi edia toana bamona?

 9. Hosi guia tuari taudia ese dahaka idia laulaulaia?

10. Hosi guia tuari taudia be 200 milion. Unai 200 milion ena anina be dahaka?

11. Laulau dalana ai Ioane oreana taudia edia namba ia daekau ia lao milion milion totona, dahaka heduru idia abia be namo?

12, 13. Lagani 1918 amo ia lao 1935 ai, dahaka ese unai heduru gaudia edia badina ia hahedinaraia?

14. Hutuma bada herea taudia be hosi guia tuari taudia edia heau lalonai do idia vareai, a? Bona lagani 1963 ai idia gwau edia lalohadai aukana be dahaka?

15. (a) Lagani 2005 ai, Iehova ese haroro gaukara lalonai ia gaukaralaidia taudia iboudiai amo pesen hida be hutuma bada herea taudia? (b) Iesu ena guriguri Ioane 17:​20, 21 lalonai be edena bamona hutuma bada herea taudia bona Ioane oreana taudia edia lalo-tamona ia hahedinaraia?

16. (a) Ioane be laulau hosi edia uduna bona iuna edena bamona ia gwauraidia? (b) Iehova ena orea taudia edia uduna be edena bamona idia hegaegaelaia hesiai gaukara idia karaia totona? (c) “Edia iuna be gaigai bamona” ena anina be dahaka?

17. Tano haida dekenai Iehova ena Witness taudia edia gaukara idia taravatua dainai, buka bona magasin idia hariharilaia diba lasi. Unai tano lalonai, Iehova ena Witness taudia be hosi guia tuari taudia edia heau lalonai idia vareai, a? Mani oi herevalaia sisina.

18. Gado idauidau hida lalonai, bona buka, magasin, bona buklet hida amo, hosi guia tuari taudia ese hahisia herevadia idia hariharilaia?

19, 20. (a) Ena be hahisia hadibaia herevadia be Kerisendom totona idia siaia, to Kerisendom ese ia biagua lasi tanodia dekenai, taunimanima haida ese dahaka idia karaia unai hahisia hadibaia herevadia dainai? (b) Ioane ia gwau taunimanima momo herea ese dahaka idia karaia?

[Picture on page 149]

Kibi namba 6 idia hiriria neganai, dika iharuana ia hamatamaia

[Pictures on page 150, 151]

Aneru 4 ese hosi guia tuari taudia edia heau idia biagua, guna tanobada sivaraina ibounai lalonai hosi guia taudia edia heau dalana be unai bamona lasi

[Pictures on page 153]

Hosi guia tuari taudia be ita duahia diba lasi; idia ese Baibel gwauraia buka, buklet bona magasin milion milion idia hariharilaia vadaeni

[Pictures on page 154]

Tanobada taudia oredia idia helalo-kerehai lasi