Karoa 26

Dirava Ena Palani Hehunina​—⁠Ena Hagugurua Negana Badana!

ANERU goadana ena boiboi badana Apokalupo 10:​1, 6, 7 lalonai oi laloatao, a? Ia gwau: “Nega ena dokona be ia kahirakahira momokani. Dirava ese ma nega sisina do ia naria lasi. Aneru namba 7 ese iena kibi do ia hiriria gwauraia neganai, Dirava ese iena palani, hunia gauna, do ia karaia haorea. Dirava ese guna inai palani ena anina, iena hesiai taudia peroveta taudia, dekenai ia hamaoroa.” Iehova ia abia hidi negana ia ginidae, aneru ese unai kibi ginigabena do ia hiriria totona! Vadaeni, Dirava ena palani hehunina be edena bamona idia hagugurua? Mai moale bada ida, Ioane ese ita ia hadibaia! Ia gwau: “Aneru namba 7 ese iena kibi ia hiriria. Vadaeni gado badadia guba dekenai idia hereva, idia gwau, ‘Tanobada biagua siahuna be iseda Lohiabada bona ena Keriso idia abia vadaeni. Bona ia ese tanobada do ia biagua momokani ela bona hanaihanai.’ ” (Apokalupo 11:15) Unai aneru idia hereva badabada, guba ena boiboi bamona, be mai badina! Badina edia hereva be mai anina bada herea guba bona tanobada ibounai dekenai. Idia mauri noho taudia bona anerudia iboudiai dekenai unai hereva be mai anina bada.

² Mai moale danu Dirava ese ena palani hehunina ia hagugurua! Mai hairai bada herea danu, lagani 1914 ai ia kwalimu. Unai lagani ai, Lohiabada Iehova ese ena Keriso be pavapava ai ia halaoa, ia be ena Pavapava bamona. Ena Tamana ena ura do ia karaia totona, Iesu Keriso ia pavapava matamaia, tanobada taudia be ena inai taudia bamona idia noho neganai, idia bogaragidiai ia pavapava noho. Gwauhamata Garana hegeregerena, Basileia siahuna ia abia, Gaigai bona ena garana do ia hadikaia ore bona inai tanobada be maino ena paradaiso ai do ia halaoa lou totona. (Genese 3:15; Salamo 72:​1, 7) Mesia Pavapava bamona, Iesu ese Iehova ena Hereva do ia hagugurua, bona ena Tamana ena ladana do ia hamomokania, “Noho Hanaihanai King,” Atai Herea Lohiabadana, gau iboudiai do ia lohiaia “harihari ia lao bona hanaihanai.”​—⁠1 Timoteo 1:⁠17.

³ To “tanobada biagua siahuna be iseda Lohiabada” Iehova edena bamona ia abia? Iehova be gunaguna hanaihanai ia Pavapava noho, ani? Momokani, Levi tauna Asaf be ane lalonai ia gwauraia hegeregerena: “Gunaguna amo Dirava be lauegu Pavapava.” Bona salamo torea tauna ma ta ia gwau: “Iehova be pavapava ai ia lao vadaeni! . . . Gunaguna oi ese emu terona oi haginia auka; oi be idaunega amo oi noho.” (Salamo 74:12; 93:​1, 2) To, ena aonega hegeregerena, Iehova ese dala ia koua lasi dainai, ma basileia haida be tanobada dekenai idia noho. Unai dala amo Eden dekenai ia vara henanadai badana idia haerelaia toho diba. Unai henanadai be, bema Dirava ese taunimanima ia durudia lasi, idia ese sibodia idia lohiaia diba, eiava lasi? Taunimanima ese sibodia idia lohiaia toho dainai, dika bada ia vara. Momokani, Dirava ena peroveta tauna ena hereva be maoro, ia gwau: “Iehova e, lau diba vadaeni, tanobada tauna ese sibona ena raka dalana ia abia hidi diba lasi. Taunimanima be ena raka ai sibona ia hakaua diba lasi.” (Ieremia 10:23) Iseda tama sina ginigunadia idia kara dika negana amo, “idaunegai gaigaina,” Satana, ese tanobada ibounai ia lohiaia. (Apokalupo 12:9; Luka 4:⁠6) Hari be nega namona unai idia haidaua! Iehova ese ena dagi ena maoro do ia hahedinaraia goevagoeva totona, ia ese ena lohia dalana tanobada dekenai be dala matamatana, iena Mesia Basileiana, ena amo ia gaukaralaia.

⁴ Lagani 1922 ai, Bible Student taudia ese hebouhebou badana, Cedar Point, Ohio, dekenai idia karaia. Unai neganai, kibi 7 idia hiriria hamatamaia. J. F. Rutherford, ese hereva ta ia karaia. Inai Baibel siri ia kikilaia momo: “Guba Basileia kahirakahira ia mai vadaeni.” (Mataio 4:17) Ena hereva ia hadokoa neganai ia gwau: “Vadaeni, Atai Herea Diravana ena natudia e, umui haroro lou! Emui tuari dabua umui atoa! Umui aonega, umui gima, umui gaukara, umui gari lasi. Mai emui kamonai bona momokani ida Lohiabada ena hereva umui gwauraia. Umui tuari karaia noho ela bona Babulono ena kahana maragimaragi iboudiai idia moru. Sivarai namona umui harorolaia tanobada ena kahana ibounai dekenai. Gau badana be tanobada taudia idia diba Iehova be Dirava bona Iesu Keriso be pavapava edia Pavapava bona lohia edia Lohia. Hari be dina iboudiai edia dina badana. Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro; Pavapava bona iena basileia umui harorolaia.” Dirava ena Basileia Iesu Keriso amo ia harorolaia hedinarai, bona unai murinai Basileia harorolaia gaukarana badana ia matamaia. Unai haroro lalonai aneru 7 ese idia hiriria kibidia iboudiai edia hahemaoro herevadia idia gwauraia.

⁵ Bible Student taudia be Detroit, Michigan, July 30 ia lao August 6, 1928 ai, idia hebouhebou neganai, aneru namba 7 ena kibi ena regena idia kamonai. Unai neganai, hebouhebou ena hereva be reidio steiseni idauidau 107 dekenai idia halasia nega tamona. The New York Times ia gwau, ‘guna, reidio steiseni idauidau be nega tamona ai idia gaukaralaia neganai, edia namba be unai bamona ia bada lasi bona davana be unai bamona ia bada lasi.’ Hebouhebou taudia be mai moale danu gwaubou hereva aukana ta idia karaia, ena ladana be “Satana Dadaraia Bona Iehova Abia Dae Herevana.” Unai hereva lalonai idia hahedinaraia, Aramagedono dekenai Satana bona ena kara dika oreana do idia moru bona kara maoromaoro idia ura henia taudia iboudiai do idia ruhaia. Unai hebouhebou dekenai rau 368 bukana Government idia halasia neganai, Dirava ena Basileia henunai idia noho kamonai taudia idia moale. Unai buka ia hahedinaraia goevagoeva “lagani 1914 ai, Dirava ese ena Horoa Pavapavana be terona dekenai ia hahelaia.”

Iehova ese Iena Siahu Ia Gaukaralaia

⁶ Keriso be Dirava ena Basileia lalonai ia lohia​—⁠unai hadibaia herevana dainai taunimanima momo idia moale! Ioane ia gwau: “Vadaeni badana [elda] taudia 24, Dirava ena vairanai edia helai gabudia dekenai idia helai taudia, ese idia tui diho, Dirava idia tomadiho henia, idia gwau, ‘Lohiabada e, Siahu Ibounai Diravana, harihari oi noho, gunaguna oi noho. Ai ese oi ai tanikiu henia. Oi ese oiemu siahu bada oi gaukaralaia vadaeni. Bona oiemu Basileia oi biagua hamatamaia vadaeni.’ ”​—⁠Apokalupo 11:​16, 17.

⁷ Elda taudia 24 ese Iehova idia tanikiu henia unai. Idia ese Keriso ena horoa tadikakadia guba dekenai idia noho neganai idia laulaulaia. Lagani 1922 amo, unai horoa taudia 144,000 edia orena taudia tanobada dekenai be kibi ese ia hamatamaia gaukarana lalonai idia vareai. Mataio 24:3–25:46 ena toa ena anina korikori dekenai lalo-parara idia abia. To, Lohiabada ena dina ena nega matamana ai, edia witness bamodia, ‘idia gini goada ela bona idia mase’ taudia, idia toreisi lou vadaeni, guba dekenai edia gaukara do idia karaia totona. Unai dainai, Iehova idia tomadiho henia totona idia tui diho neganai, idia ese 144,000 taudia iboudiai idia laulaulaia. (Apokalupo 1:10; 2:10) Idia moale bada badina edia Atai Herea Lohiabada ia naria lasi, to ena palani hehunina ia hagugurua vadaeni!

⁸ To, kibi namba 7 idia hiriria neganai, tanobada ena bese badadia idia moale lasi. Nega ia ginidae vadaeni idia ese Iehova ena badu do idia mamia totona. Ioane ia gwau: “Dirava diba lasi taudia idia badu dikadika. Badina be oiemu badu ena nega ia ginidae vadaeni. Mase taudia edia kota henia nega danu ia ginidae vadaeni, oiemu hesiai taudia, peroveta taudia, be harihari edia davana namona do oi henia. Oi idia gari henia taudia ibounai, badadia bona maragidia, edia davana namona do oi henia ena nega danu ia ginidae vadaeni. Harihari be tanobada idia hadikaia vadaeni taudia do oi alaia ore.” (Apokalupo 11:18) Lagani 1914 amo, tanobada ena bese badadia idia badu heheni, bona Dirava ena Basileia dekenai idia badu. Iehova ena witness taudia rua dekenai idia badu dikadika danu.​—⁠Apokalupo 11:⁠3.

⁹ Idaunega amo ema bona hari, bese badadia be edia tuari bona kara kereredia amo tanobada idia hadikaia. To, lagani 1914 murinai, tanobada idia hadikaia bada herea. Taunimanima edia mataganigani bona kara gagevagageva amo tanobada ena tano gagaedia idia habadaia, bona tanobada ena uma tanodia idia hamaragia. Muramura dikana be medu lalonai ia noho bona ori lalonai radioactive siahuna ia noho. Unai gaudia ese tano momo idia hadikaia. Aniani idia havaraia gabudia idia hamiroa. Hodahoda bona ranu lalonai muramura dikadia idia noho. Faktori ese edia momoru idia negea neganai, mauri gaudia tano dekenai bona davara dekenai idia hadikaia. Bese badadia be edia niuklia tuari gaudia amo taunimanima iboudiai idia hadikaia ore gwauraia. To gau namona be Iehova ‘ese tanobada idia hadikaia taudia do ia alaia ore’; Iehova ese tanobada idia hadikaia heagi taudia, Dirava idia dadaraia taudia unai, do ia hahemaoro auka henidia. (Deuteronomi 32:​5, 6; Salamo 14:​1-3) Unai dainai, Iehova ese dika ihatoina ia hegaegaelaia, unai kara dika taudia edia davana do ia henia totona.​—⁠Apokalupo 11:⁠14.

Kara Dika Taudia ese Dika Idia Davaria!

¹⁰ Vadaeni, dika ihatoina ia mai inai. Ia mai haraga! Unai dika amo Iehova ese iena “aena atoa gauna,” iseda noho gabuna, inai tanobada hairaina, idia hadikaia taudia do ia alaia mase. (Isaia 66:⁠1) Mesia Basileiana​—⁠Dirava ena palani hehunina​—⁠ese unai dika ihatoina ia hamatamaia. Kwadi bona hosi guia tuari taudia dainai, dika ginigunadia rua ese Dirava ena inai taudia idia hahisidia, bona Kerisendom ena gunalaia taudia idia hahisidia bada. To dika ihatoina, Iehova ena Basileia ese ia havaraia gauna, ese taunimanima ia hahisidia sibona lasi. (Apokalupo 9:​3-​19) Taunimanima dikadia bona edia lohia taudia ia kokia vaitani, ia hamasedia. Iehova ena hahemaoro karana ena hagugurua negana, Aramagedono ai, unai do ia vara. Unai be Daniel ena peroveta herevana hegeregerena, ia gwau: “Unai pavapava [tanobada idia hadikaia lohia taudia] edia negai guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi bese idauna ta dekenai. Unai basileia iboudiai do ia hamakohidia maragimaragi bona do ia haoredia, bena ia sibona do ia gini ela bona hanaihanai.” Ororo badana ta bamona Dirava ena Basileia be tanobada hairaina do ia lohiaia, bona unai ese Iehova ena lohia siahuna do ia abia isi, bona moale be taunimanima dekenai do ia mailaia, ela bona hanaihanai.​—⁠Daniela 2:​35, 44; Isaia 11:9; 60:⁠13.

¹¹ Dika ihatoina ia vara neganai, moale gaudia be Lohiabada ena dina ai idia vara danu. Nega ia ginidae vadaeni, ‘mase taudia do idia kota henia totona bona Dirava be iena hesiai taudia, peroveta taudia bona iena ladana idia gari henia taudia edia davana namona do ia henia totona.’ Unai anina be mase taudia do idia toreisi lou! Idia mase vadaeni horoa helaga taudia be Lohiabada ena dina ena matamanai idia toreisi lou. (1 Tesalonika 4:​15-​17) Bena, helaga taudia oredia idia mase neganai kara haraga idia toreisi lou. Ma taunimanima haida danu ese davana namona do idia abia. Idia be Dirava ena hesiai taudia, idaunegai peroveta taudia unai, bona Iehova ena ladana idia gari henia taudia ma iboudiai danu. Herevana idia be hutuma bada herea taudia, hisihisi bada herea amo idia roho mauri taudia unai, eiava idia be Keriso ena Lagani 1,000 Lohia Negana ai idia toreisi lou “mase taudia . . . badadia bona maragidia,” to davana namona do idia abia. Dirava ena Mesia Pavapava ese mase ena ki bona mase taudia edia gabu ena ki ia dogoatao dainai, iena Basileia ese dala ia kehoa, idia tahua taudia iboudiai dekenai mauri hanaihanai do ia henia totona. (Apokalupo 1:18; 7:​9, 14; 20:​12, 13; Roma 6:22; Ioane 5:​28, 29) Herevana ia be doko diba lasi guba maurina eiava ia be mauri hanaihanai tanobada dekenai, to unai mauri hanaihanai be hebogahisi harihari gauna Iehova ena amo, bona idia abia taudia ta ta iboudiai do idia tanikiu henia ela bona hanaihanai!​—⁠Heberu 2:⁠9.

Itaia! Iena Gwauhamata Maua Helagana!

¹² Iehova ia lohia noho! Iena Mesia Basileiana ena amo taunimanima ia lohiaia dala hereadaena lalonai. Ioane ese ia itaia gaudia ese unai idia hamomokania, ia gwau: “Vadaeni Dirava ena dubu helaga guba dekenai be ia kehoa, bona Dirava ena taravatu mauana be dubu helaga lalonai ia hedinarai. Unai neganai kevaru, bona guba ena boiboi, bona tano mareremarere badana, bona medu, aisi nadi bamona, idia vara.” (Apokalupo 11:19) Apokalupo bukana lalonai unai siri sibona lalonai Dirava ena gwauhamata maua helagana ia gwauraia. Maua Helagana ese Iehova be ena bese taudia Israel ida ia noho ia laulaulaia. Tomadiho kalagana lalonai, bena gabeai Solomon ese ia haginia dubuna lalonai, maua helagana be Helaga Herea Gabuna dekenai idia atoa. To lagani 607 B.C.E. ai, Israel taudia be Babulono dekenai idia abia lao neganai, gwauhamata maua helagana ia boio. Unai neganai, David besena taudia be ‘Iehova ena terona ai pavapava bamona idia helai’ lasi.​—⁠⁠1 Sivarai 29:23.a

¹³ Lagani 2,600 bona ma haida murinai, Maua Helagana ia hedinarai lou inai. To Ioane ena matahanai lalonai, unai Maua Helagana be tanobada ena dubu ta lalonai ia noho lasi. Ia be Dirava ena guba dubu helagana lalonai ia noho. David ena pavapava besena tauna ena amo Iehova ia lohia lou. To hari, Pavapava Keriso Iesu be guba Ierusalem dekenai terona ia abia. Unai atai gabu amo ia ese Iehova ena hahemaoro ia karaia. (Heberu 12:22) Apokalupo bukana ena karoa gabedia ese unai hahemaoro do idia hahedinaraia ita dekenai.

¹⁴ Idaunegai Ierusalem hanuana dekenai, Israel taudia momo herea bona dubu dekenai idia gaukara hahelaga taudia ese Maua Helagana idia itaia lasi, badina ia be Helaga Herea Gabuna dekenai ia noho, bona koua dabuana ta ese Helaga Herea Gabuna bona Helaga Gabuna ia hapararaia. (Numera 4:20; Heberu 9:​2, 3) Lagani ta ta iboudiai, Kara Dika Boubouna Dinana ai, Hahelaga Tauna Badana be Helaga Herea Gabuna lalonai ia vareai. Unai neganai, ia mo sibona ese Maua Helagana ia itaia. To, guba dubu helagana ia kehoa neganai, Iehova ena Hahelaga Tauna Badana, Iesu Keriso, sibona lasi, to ena hahelaga taudia 144,000, Ioane danu, ese lauma maua helagana idia itaia diba danu.

¹⁵ Guba dekenai idia toreisi lou taudia ginigunadia ese unai lauma maua helagana idia itaia namonamo diba, badina idia be elda taudia 24 edia orea lalonai idia noho bona idia be Iehova ena terona kahirakahira dekenai idia gini. Bona Iehova ena lauma ese edia lalona ia hadiaria dainai, Ioane oreana taudia tanobada dekenai idia lalo-parara Iehova be Ena lauma dubuna ai Ia noho. Toa haida ese taunimanima idia hadibaia unai hoa gauna namona ia vara. Ioane ena matahanai lalonai kevaru, gado regedia, guba ena boiboi, tano mareremarere bona medu, aisi nadi bamona, ia gwauraia. (Apokalupo 8:5 itaia.) Unai gaudia ese dahaka idia laulaulaia?

¹⁶ Lagani 1914 amo, tanobada oreadia ese hekwakwanai momo idia davaria. Unai “tano mareremarere” ia vara neganai, gwauhamata taudia edia gado idia gaukaralaia Dirava ena Basileia sivaraina idia gwauraia goevagoeva totona. Baibel amo ‘guba’ ena boiboi idia halasia. Edia lalo-parara Dirava ena peroveta Herevana dekenai ese edia lalona ia hadiaria kevaru bamona bona unai lalo-parara be taunimanima dekenai idia hadibaia. Dirava ena hahemaoro herevadia be “medu, aisi nadi bamona,” Kerisendom bona tomadiho koikoi iboudiai idia botaia. Bema taunimanima ese unai idia laloa idia namo diba. To madi, taunimanima momo herea​—⁠Iesu ena negai idia noho Ierusalem taudia hegeregerena⁠​—⁠​be Apokalupo bukana ena toa edia hagugurua dalana dekenai idia lalo-parara lasi.​—⁠Luka 19:​41-​44.

¹⁷ Aneru 7 ese edia kibi idia hiriria noho, bona idia hahedinaraia, tanobada dekenai mai anina bada gaudia idia vara. Gwauhamata Keristen taudia be mai edia maduna unai hadibaia herevadia be taunimanima dekenai do idia harorolaia totona. Mai edia moale bada ida unai maduna idia huaia namonamo noho! Unai ia hedinarai badina lagani 20 lalodiai, lagani 1986 ia lao 2005 dekenai, tanobada ibounai lalonai edia haroro horadia be nega rua amo idia habadaia​—⁠hora 680,837,042 idia habadaia ia lao hora 1,278,235,504. Momokani, “Dirava ena palani hehunina, sivarai namona gauna,” be “tanobada ena dokona momokani dekenai” idia harorolaia.​—⁠Apokalupo 10:​7, NW; Roma 10:⁠18.

¹⁸ Dirava ena ura iena Basileia dekenai idia hahedinaraia negana lalonai, ma matahanai haida do ita itaia.

[Footnote]

[Study Questions]

 1. (a) Ioane be edena bamona ita ia hadibaia, Dirava ena palani hehunina ia hagugurua vadaeni? (b) Badina be dahaka aneru idia hereva badabada?

 2. Edena negai bona dahaka ia vara murinai, Dirava ese iena palani hehunina mai kwalimu danu ia hagugurua?

 3. Ena be hanaihanai Iehova Dirava be Pavapava, to dahaka dainai ia ese dala ia koua lasi ma basileia haida be tanobada dekenai idia lohia gwauraia neganai?

 4. Lagani 1922 ai, kibi idia hiriria neganai, dahaka idia harorolaia hedinarai? Anina herevalaia sisina.

 5. Lagani 1928 ai, Bible Student taudia edia hebouhebou dekenai ia ese kibi namba 7 ena regena ena anina ia hahedinaraia goevagoeva neganai, dahaka ia vara?

 6. Ioane be edena bamona ia gwauraia hedinarai Keriso ese terona ia abia Dirava ena Basileia lalonai?

 7. (a) Elda taudia 24 edia orea ena orena taudia tanobada dekenai be edena bamona Iehova Dirava idia tanikiu henia? (b) Elda taudia 24 oreana taudia, guba dekenai idia toreisi lou vadaeni taudia, ese Iehova Dirava edena bamona idia tanikiu henia?

 8. (a) Kibi namba 7 idia hiriria neganai, bese badadia edia mamina be edena bamona? (b) Bese badadia be daika dekenai idia badu?

 9. Bese badadia be edena bamona tanobada idia hadikaia, bona unai dainai Dirava ese dahaka do ia karaia?

10. (a) Dika ihatoina be dahaka? (b) Edena dala ai dika ihatoina ese taunimanima ia hahisia sibona lasi to ma gau haida danu ia karaia?

11. (a) Unai peroveta herevana lalonai dahaka moale gaudia idia vara? (b) Dahaka hebogahisi kara badana ia vara, edena bamona ia vara, bona daika daika ese idia davaria?

12. (a) Apokalupo 11:​19 ena hereva hegeregerena, Ioane ese dahaka ia itaia guba dekenai? (b) Gwauhamata maua helagana ese dahaka ia laulaulaia, bona Israel be Babulono dekenai idia abia lao murinai, dahaka ia vara unai maua dekenai?

13. Dirava ena gwauhamata maua helagana be guba dubu helagana ai ia hedinarai dainai, dahaka ita diba?

14, 15. (a) Idaunegai Ierusalem lalonai, daika sibona ese gwauhamata maua helagana ia itaia diba, bona dahaka dainai? (b) Guba ena dubu helagana lalonai, daika daika ese Dirava ena gwauhamata maua helagana idia itaia?

16. Edena dala ai, kevaru, gado regedia, guba ena boiboi, tano mareremarere, bona medu badana, aisi bamona, idia vara?

17, 18. (a) Aneru 7 edia kibi edia regena ese dahaka maduna be gwauhamata Keristen taudia dekenai ia henia? (b) Keristen taudia be edena bamona edia maduna idia huaia namonamo noho?

[Box on page 173]

Iehova Ena Hahemaoro Herevadia Haida, Kibi Hiriria Bamona

 1. 1922 Cedar Point, Ohio: Witness taudia ese Kerisendom gunalaia taudia tomadiho oreana lalonai, politikol oreadia lalonai, bona bisinesi badadia lalonai idia noidia, namona be maino, noho namona, bona moale idia havaraia lasi ena badina idia gwauraia. Mesia Basileiana sibona ese namo do ia mailaia diba.

 2. 1923 Los Angeles, California: Pablik tok, “Bese Iboudiai be Aramagedono Dekenai Idia Raka Lao, to Hari Idia Noho Taudia Milion Momo Do Idia Mase Lasi,” ese maino idia ura henia “mamoedia” ia boiridia, mase ia havaraia tanobada besedia idia rakatania totona.

 3. 1924 Columbus, Ohio: Tomadiho taudia idia samanidia, badina sibodia edia ladana idia abia isi bona Mesia Basileiana idia harorolaia lasi dainai. Keristen momokani taudia ese Dirava ena davana karaia negana bona lalohisihisi taudia edia lalona hagoadaia herevana idia harorolaia be gau badana.

 4. 1925 Indianapolis, Indiana: Helaro namona sivaraina ta. Idia hahedinaraia, Kerisendom ena dibura lauma dalanai be namo lasi, to Basileia ena diari sivaraina, maino, noho namona, goada, mauri, ruhaia mauri namona, bona moale ela bona hanaihanai edia sivarai be namo herea.

 5. 1926 London, England: Hereva aukadia amo Kerisendom bona ena gunalaia taudia idia hahisidia, kwadi ese taunimanima idia hahisidia hegeregerena. Idia hahedinaraia Kerisendom bona ena gunalaia taudia ese Dirava ena Basileia idia dadaraia, bona guba gavamani ia gini vadaeni idia gwauraia hedinarai.

 6. 1927 Toronto, Canada: Hosi guia tuari taudia bamona, taunimanima iboudiai idia boiridia Kerisendom do idia rakatania bena mai edia kudou ibounai ida Iehova Dirava bona iena Pavapava bona iena Basileia do idia abia dae totona.

 7. 1928 Detroit, Michigan: Satana dadaraia bona Iehova abia dae herevana idia karaia. Unai hereva lalonai idia hahedinaraia goevagoeva Dirava ena horoa Pavapavana be lagani 1914 ai ena terona ia abia, Satana ena orea dikana do ia hadikaia ore, bona taunimanima do ia ruhaia.

[Box on page 175]

Tanobada Idia Hadikaia

“Sekeni toi toi iboudiai, tanobada ena gunika ena kahana ia boio, ena bada be futbol gadara gabuna ena bada bamona. . . . Au gabudia idia boio dainai, tubutubu gaudia bona animal tausen momo idia hadikaia ore.”​—⁠Illustrated Atlas of the World (Rand McNally).

“Idia hanai lagani 200 lalonai, [Great Lakes] idia hamiroa bada dainai, tanobada ena mei aru lao gabu badana bamona ai idia lao.”​—⁠The Globe and Mail (Canada).

April 1986 dekenai Chernobyl, guna idia gwauraia U.S.S.R., dekenai niuklia faktori ia pou bada bona lahi bada ia vara. “Niuklia bomu be Hiroshima bona Nagasaki ai idia hapoua negana amo, Chernobyl ena niuklia pou be mai anina bada,” bona “tanobada ena hodahoda, tano bona ranu gabudia ai ia negea radiation siahuna be bada, ia ese idia hapoua niuklia bomu ma iboudiai ese idia halasia radiation siahuna ena bada ia hanaia.”​—⁠JAMA; The New York Times.

Minamata, Japan dekenai, muramura faktori ta ese muramura ta, methylmercury, be davara ai idia negea. Unai muramura ese gwarume bona roku ia hamiroa. Bema taunimanima ese idia ania, Minamata gorerena (MD) idia abia. “Unai gorere ese tauanina ena varovaro ia hadikaia. . . . Ema bona [1985], idia davaria, taunimanima 2578 Japan dekenai ese MD gorerena idia abia vadaeni.”​—⁠International Journal of Epidemiology.

[Box on page 176]

Hadibaia hereva aukadia Apokalupo 11:​15-​19 dekenai ese gabeai do idia vara matahanai idia hahedinaraia. Apokalupo karoa 12 ese Apokalupo 11:​15, 17 ena hereva ena anina ia hahedinaraia goevagoeva. Karoa 13 ese Apokalupo 11:​18 ena anina ia hahedinaraia, badina unai karoa lalonai ia hahedinaraia Satana ena politikol oreana, tanobada ia hadikaia oreana unai, be edena dala amo ia vara. Karoa 14 bona 15 lalonai Basileia hahemaoro herevadia, kibi namba 7 idia hiriria neganai bona dika ihatoina ia vara neganai idia vara gaudia, idia herevalaia.

[Pictures on page 174]

Iehova ese ‘tanobada idia hadikaia taudia do ia alaia ore’