Karoa 16

Idia Tuari Heheni King Edia Dokona be Kahirakahira

LAGANI 1835 ai, France ena aonega tauna bona histori torea tauna Alexis de Tocqueville ese United States bona Russia edia politikol daladia ia laloa neganai, ia gwau: “Ta ese ura-kwalimu ena dala ia gaukaralaia, ma ta ese biagua auka dalana ia gaukaralaia. Edia . . . dala [be] idau; to, toana be Dirava ese idia ta ta ia abia hidi, nega ta lalonai tanobada ena kahana ta edia mauri idia biagua totona.” Tanobada Ibounai Tuarina Iharuana dainai idia vara gaudia dekenai unai hereva ena anina ia vara momokani, a? Histori torea tauna J. M. Roberts ia gwau: “Tanobada Ibounai Tuarina Iharuana murinai, toana be momokani, lohia goadadia rua, edia dala be idau, ese tanobada do idia lohiaia, ta be guna idia gwauraia Russia ena kahana ai, ma ta be United States of America dekenai.”

² Tanobada ibounai tuaridia ruaosi lalonai, Germany be not kahana ena king, bona ia be saut kahana ena king​—⁠Tanobada ena Basileia Badana Anglo-America​—⁠ena inai tauna badana. To, Tanobada Ibounai Tuarina Iharuana murinai, unai bese ia parara. West Germany be saut kahana ena king ida ia gaukara hebou, bona East Germany be siahu bada oreana ma ta​—⁠Soviet Union ese ia gunalaia Komiunis besedia​—⁠ida ia gaukara hebou. Unai lohia siahuna, eiava politikol oreana, be not kahana ena king ai ia lao, ia ese Anglo-America ena kahana ai idia noho besedia ia inai henia bada. Bona unai king rua edia heai ladana Cold War be lagani 1948 ia lao 1989 lalonai idia karaia. Guna, not kahana ena Germany king ese “Dirava ena taudia korikori” ia tuari henia. (Daniela 11:​28, 30) Komiunis besedia ese unai taudia be edena bamona do idia kara henia?

KERISTANI TAUDIA MOMOKANIDIA IDIA HEKWAKWANAI TO IDIA GOADA

³ Dirava ena aneru ia gwau: “Lalona ania karadia dainai, haida ese edia guriguri karana do idia rakatania, bona idia ese unai king [not kahana ena king] ena ura do idia karaia.” Aneru be ma ia gwau: “To edia Dirava idia diba taudia be do idia goada . . . Unai neganai gunalaia taudia mai edia aonega ese do idia toreisi, taunimanima momo do idia durua, bona laloa kehoa do idia henidia. To . . . kaia dekenai do idia alaia mase, ma haida be lahi dekenai do idia gabua mase [“dainai idia hekwakwanai,” NW ]. . . . Edia kohu do idia henaoa, bona dibura ruma lalonai do idia koua.”​—⁠Daniela 11:​32, 33.

⁴ Ia hedinarai, ‘edia guriguri karana idia rakatania’ taudia be Kerisendom ena gunalaia taudia, sibona idia gwauraia Keristani taudia to edia kara amo Keristani dalana idia hadikaia. Walter Kolarz be ena buka ladana Religion in the Soviet Union lalonai ia gwau: “[Tanobada Ibounai Tuarina Iharuana lalonai] Soviet Gavamani ese Dubu idauidau ia hagoadaia, moni dalanai bona edia hereva amo edia tano idia durua totona.” Tuari murinai, ena be not kahana ena king ai ia lao lohia siahuna ese Dirava ia noho lasi lalohadaina ia abia dae, to dubu gunalaia taudia idia ura unai hetura karana do idia hagoadaia noho. Unai dala ai, Kerisendom be inai tanobada ena kahana ai ia lao momokani​—⁠Iehova ena matana ai unai be hereva momokani negea karana mai ena dika bada.​—⁠Ioane 17:16; Iamesi 4:⁠4.

⁵ To Keristani taudia korikoridia​—⁠“edia Dirava idia diba” bona idia be “mai edia aonega” taudia​—⁠be edena bamona? Ena be not kahana ena king ena lohia siahuna henunai idia noho Keristani taudia ese dala maorona ai ‘gavamani idia kamonai henia,’ to idia be inai tanobada ena lasi. (Roma 13:1; Ioane 18:36) Idia ese ‘Kaisara ena gau be Kaisara dekenai idia henia,’ to danu, idia ese ‘Dirava ena gau be Dirava dekenai idia henia.’ (Mataio 22:21) Unai dainai edia Dirava badinaia karana tohoa gaudia idia davaria.​—⁠2 Timoteo 3:⁠12.

⁶ Unai dainai, Keristani taudia momokanidia idia “hekwakwanai” bona idia “goada.” Idia hekwakwanai, badina dagedage bada idia davaria, bona idia haida idia hamasedia danu. To idia goada, badina idia momo idia abidadama noho. Idia ese tanobada idia halusia, Iesu ia karaia bamona. (Ioane 16:33) Danu, haroro gaukara idia hadokoa lasi, dibura rumadia bona dibura kamepadia lalonai danu idia haroro noho. Unai idia karaia dainai, ‘taunimanima momo idia durua bona laloa kehoa idia henidia.’ Ena be not kahana ena king ese ia lohiaia tanodia momo dekenai, Iehova ena Witnes taudia idia dagedage henia, to edia namba ia bada ia lao. Unai “mai aonega” taudia edia kamonai karana dainai unai tano iboudiai dekenai “hutuma bada herea” taudia momo herea idia noho bona edia namba ia bada ia lao.​—⁠Apokalupo 7:​9-14.

IEHOVA ENA TAUNIMANIMA IA HAGOEVAIA

⁷ Aneru ia gwau: “Unai ala-ala idia karaia noho neganai, tau haida ese unai aonega taudia [Dirava ena taunimanima] do idia durua.” (Daniela 11:34a) Tanobada Ibounai Tuarina Iharuana lalonai, saut kahana ena king ia kwalimu dainai, ia tuari henia king ena siahu henunai idia noho Keristani taudia edia mauri ia namo ia lao sisina. (Apokalupo 12:​15, 16 itaia.) Unai hegeregerena, not kahana ena king ai ia lao lohia siahuna matamatana ese ia dagedage henia taudia edia mauri be nega haida ia namo sisina danu. Cold War ia ore ia lao lalonai, lohia taudia momo idia itaia abidadama Keristani taudia ese gavamani idia inai henia lasi, bena taravatu hegeregerena idia rejista. Bona heduru idia abia danu, badina horoa taudia edia haroro herevana idia abia dae hutuma bada herea taudia edia namba ia bada ia lao bona idia ese idia durudia.​—⁠Mataio 25:​34-40.

⁸ Cold War lalonai Dirava hesiai henia urana idia hahedinaraia taudia ibounai amo haida edia lalohadai be maoro lasi. Aneru ese sisiba ia henia, ia gwau: “Haida ese do idia durudia koikoi, bona sibodia edia namo mo idia tahua dainai, edia orea lalonai do idia vareai kava.” (Daniela 11:34b) Hereva momokani ese momo edia lalona ia veria, to idia ura lasi Dirava dekenai edia mauri idia gwauhamatalaia. To ma haida, toana be sivarai namona idia abia dae taudia, be siahu taudia ese idia siaia spai taudia. Tano ta amo ia mai sivaraina ta ia gwau: “Unai kara dika taudia haida be Komiunis taudia goadadia, bona idia be Lohiabada ena orea lalonai idia vareai, lalo-goada idia hahedinaraia koikoi, bona hesiai gaukara ena dagi badadia idia abia danu.”

⁹ Aneru be ma ia gwau: “Unai gunalaia aonega taudia haida idia mase [“hahekwakwanaia,” NW ] dainai, edia taudia sibona ese edia kara do idia laloa bona tohoa [“hagoevaia bona hakurokuroa,” NW ], bona taunimanima momo ese edia laloa do idia giroa. Inai bamona kara do ia vara noho ela bona dokona negana ia ginidae, negana unai Dirava ese ia gwauraia vadaeni.” (Daniela 11:35) Vareai koikoi taudia edia kara dainai siahu taudia ese abidadama taudia haida idia dogoatao. Iehova ese unai bamona kara ia koua lasi, ena taunimanima do idia goeva totona. Iesu be “hisihisi ese Dirava kamonai henia dalana ia hadibaia” hegeregerena, unai kamonai taudia ese edia abidadama tohoa karadia amo haheauka idia dibaia. (Heberu 5:8; Iamesi 1:​2, 3; mani Malaki 3:3 itaia.) Unai dainai, hari ‘idia goeva, bona idia kurokuro.’

¹⁰ Iehova ena taunimanima do idia hahekwakwanaia bona idia hagoevaia “ela bona dokona negana ia ginidae.” Oibe, idia diba dagedage do idia davaria ela bona inai tanobada ena oromana dikana ia ore. To, not kahana ena king ena dagedage dainai Dirava ena taunimanima ia hagoevaia bona hakurokuroa karana be ‘Dirava ese ia gwauraia negana’ lalonai do ia vara. Unai dainai, Daniela 11:35 lalonai inai hereva “dokona negana” ena anina be Dirava ena taunimanima hagoevaia totona ia atoa negana ena dokona, unai nega lalonai idia ese not kahana ena king ena dagedage karana idia haheaukalaia. Ia hedinarai unai hahekwakwanaia karana be Iehova ese ia gwauraia negana ai ia ore.

KING ESE SIBONA IA HABADAIA

¹¹ Aneru ese not kahana ena king ia herevalaia, ia gwau: “Unai king [not kahana ena king] ese iena ura hegeregere do ia karaia. Sibona do ia habadaia dikadika, do ia gwau ia ese dirava ibounai ia hereaia. Ia ese [Iehova ena lohia siahuna ia abia dae lasi karana amo] dirava ibounai edia Dirava dekenai danu do ia hereva dika momo. Unai bamona ia karaia lao diba, ela bona unai nega, Dirava ese ia gwauraia vadaeni negana. Badina be Dirava ese ia gwauraia gaudia be do idia vara. Unai king ese iena sene taudia edia dirava bona hahine idia ura henia diravana be do ia laloa lasi. Io, dirava ibounai do ia negea, badina ia laloa ia ese dirava ibounai ia hereaia.”​—⁠Daniela 11:​36, 37.

¹² Not kahana ena king ese unai peroveta herevana ia hagugurua bona “iena sene taudia edia dirava,” hegeregere Kerisendom ena Toi Tamona diravana, ia dadaraia. Komiunis besedia ese Dirava ia noho lasi lalohadaina idia hahedinaraia. Unai dala ai not kahana ena king ese sibona dirava ai ia halaoa, sibona ia habadaia “dirava ibounai” ataiai. King ese “hahine”​—⁠North Vietnam bamona ena siahu henunai idia noho tanodia, ena hesiai hahinedia bamona idia gaukara tanodia​—⁠edia ura ia laloa lasi, to ‘iena ura hegeregerena ia karaia.’

¹³ Aneru ese peroveta herevana ia gwauraia noho, ia gwau: “Tuari gima kohorona ia naria dirava dekenai do ia tomadiho henia. Golo bona siliva, bona nadi namodia, bona gau namo herea, be ia ese iena sene taudia idia guriguri henia lasi dirava dekenai do ia henia.” (Daniela 11:38) Oibe, not kahana ena king ese hari inai negai saiens taudia idia havaraia tuari gaudia, “tuari gima kohorona ia naria dirava,” ia abidadama henia. Ia ese unai “dirava” amo hahemauri ia tahua, bona ena boubou patana dekenai kohu bada ia henia.

¹⁴ “Idau dirava idia guriguri henia taudia be do ia gaukaralaia. . . . [“Kohoro goadadia ia tuari henia neganai do ia kwalimu, idau dirava ta ida,” NW ]. Ia idia durua taudia dekenai be dagi badana do ia henidia. Bona edia gaukara namo ena davana, tano, be do ia henidia.” (Daniela 11:39) Not kahana ena king ese “idau dirava ta,” iena tuari kohu diravana, ia abidadama henia neganai “ia kwalimu,” bona ‘dokona negana’ lalonai tuari totona ena siahu be bada. (2 Timoteo 3:⁠1) Iena lalohadai idia abia dae taudia be politikol dalanai, moni amo, bona nega haida tuari lalonai ia durudia danu.

DOKONA NEGANA LALONAI “IA TUARI HENIA”

¹⁵ Aneru ese Daniela ia hamaoroa: “Dokona neganai [saut kahana] ena king ese [not kahana ena king] do ia tuari henia.” (Daniela 11:40a) Momokani saut kahana ena king ese “dokona neganai” not kahana ena king “ia tuari henia,” a? (Daniela 12:​4, 9) Oibe. Tanobada Ibounai Tuarina Ginigunana murinai, unai nega ena not kahana ena king​—⁠Germany⁠—​ida idia karaia maino gwauhamata aukana be “tuari henia” karana ta, bona ia dainai ia ura davana do ia henia. Saut kahana ena king be Tanobada Ibounai Tuarina Iharuana ai ia kwalimu murinai, ia heai henia king dekenai niuklia tuari gaudia ia poinia bona ena kara koua totona idia tuari hebou besedia edia orea badana, North Atlantic Treaty Organization (NATO), ia haginia. Britain ena histori torea tauna ta ese NATO ena gaukara ia herevalaia, ia gwau: “Ia be idia gwauraia Europe ai maino ia hadikaia diba gauna badana, USSR, ena kara ‘koua’ gauna mai anina bada. Lagani 40 lalonai ia gaukara, bona ia kwalimu momokani.” Cold War laganidia idia lao lalonai, saut kahana ena king ena “tuari” karana lalonai gau matamatadia amo spai karadia hehunidia idia karaia, bona politikol dalanai bona tuari dalanai ia heai henia danu.

¹⁶ Not kahana ena king be dahaka ia karaia? “[Not] kahana ena king ese mai siahu danu unai tuari do ia haloua, guba bada ia toa bamona. Unai tuari dekenai be kariota bona hosi bona kada momo herea do ia gaukaralaia.” (Daniela 11:40b) Dina gabediai not kahana ena king ese ena siahu ia habadaia. Tanobada Ibounai Tuarina Iharuana lalonai, Nazi “king” be abata bamona kahirakahira idia noho tanodia dekenai ia vareai. Unai tuari murinai, ena gabu ai ia lohia “king” ese basileia goadana ia haginia. Cold War negana lalonai, not kahana ena king be saut kahana ena king ia tuari henia badina Africa, Asia, bona Latin America dekenai idia ese idia tuari heheni tanodia idia durua. Not kahana ena king ese Keristani taudia momokanidia ia dagedage henia, edia gaukara ia koua toho, to ia koua momokani diba lasi. Bona tuari bona politikol dalanai ia karaia karadia dainai tano momo be ena siahu henunai idia vareai. Unai be aneru ese ia perovetalaia hegeregerena, ia gwau: “[Not kahana] ena king danu be Hairai Bada Herea tanona [lauma dalanai Iehova ena taunimanima edia noho] dekenai do ia lao, bona taunimanima momo herea do ia alaia mase [“tano momo be do idia hekwakwanai,” NW ].”​—⁠Daniela 11:41a.

¹⁷ To, not kahana ena king ese ena siahu henunai tanobada ibounai ia abia vareai lasi. Aneru ia peroveta, ia gwau: “To Edoma taudia bona Moaba taudia bona Amono bese taudia edia tano dekenai idia do noho taudia be iena imana dekena amo do idia mauri.” (Daniela 11:41b) Idaunegai, Edoma, Moaba, bona Amono be saut kahana ena Aigupito king bona not kahana ena Suria king idia lohiaia gabudia huanai idia noho. Hari inai negai idia ese not kahana ena king ese ia abia toho to ia abia diba lasi besedia bona oreadia idia laulaulaia.

AIGUPITO IA HEAU MAURI LASI

¹⁸ Iehova ena aneru be ma ia gwau: “Tuari dekena amo tano momo do ia abia, bona Aigupito taudia danu be iena [not kahana ena king ena] siahu dekena amo do idia heau mauri lasi. Aigupito dekenai ia noho golo bona siliva gaudia bona mai davana bada gaudia do ia abia lao. Libia tano bona Etiopia tano danu do ia halusia.” (Daniela 11:​42, 43) Saut kahana ena king, “Aigupito,” ese not kahana ena king ena siahu habadaia karadia amo ia roho mauri lasi. Hegeregere, Vietnam dekenai saut kahana ena king ia halusia momokani. Bona “Libia tano bona Etiopia tano” be edena bamona? Unai idaunegai Aigupito ena dekena besedia ese hari inai negai “Aigupito” (saut kahana ena king) ena gabu kahirakahira idia noho besedia idia laulaulaia diba. Nega haida, idia ese not kahana ena king idia badinaia​—⁠ia ese idia “ia halusia.”

¹⁹ Not kahana ena king ese “Aigupito dekenai ia noho golo bona siliva gaudia bona mai davana bada gaudia” ia biagua, a? Oibe, saut kahana ena king ese ena moni ia gaukaralaia dalana dekenai, not kahana ena king ena siahu be bada. Saut kahana ena king ese ia heai henia king ia gari henia dainai, ami, neivi, bona tuari peleini edia orea badadia haginia totona moni bada ia atoa. Unai dala ai, not kahana ena king ese saut kahana ena king ena moni ia “abia lao,” eiava ia biagua.

TUARI GINIGABENA

²⁰ Not kahana ena king bona saut kahana ena king edia heai heheni karana​—⁠herevana tuari, moni, eiava dala ma haida ai idia karaia​—⁠be kahirakahira do ia ore. Iehova ena aneru ese do ia vara tuarina ia herevalaia neganai, ia gwau: “Unai neganai dina ia daekau kahana dekena amo bona mirigini kahana dekena amo hereva ia mai dainai, gari [o lalo-hekwarahi] badana do ia [not kahana ena king ia] abia, vadaeni mai badu dikadika danu do ia raka lao lou, taunimanima momo do ia hadikaia bona hamasea ore gwauraia. Vadaeni davara badana ena kone, bona ororo helagana, Dubu Helaga ia noho gabuna edia huanai, unai [not kahana ena] king ese iena palai ruma namo herea do ia haginia. Unai neganai iena mase negana do ia ginidae, bona tau ta ese do ia durua lasi.”​—⁠Daniela 11:​44, 45.

²¹ December 1991 ai, Soviet Union ia parara neganai, not kahana ena king ese bero badana ia abia. Daniela 11:​44, 45 do ia guguru neganai, daika be not kahana ena king? Soviet Union gunana ena tano ta be unai king ai do ia lao, a? Eiava do ia idau momokani, guna nega momo ia idau bamona? Tano ma haida ese niuklia tuari gaudia do idia karaia dainai, tuari kohu edia bada do idia habadaia matamaia bona unai dainai tano ta be unai king ai do ia lao, a? Gabeai unai henanadai edia haere do idia hedinarai. Unai ita gwauraia kava lasi be aonega dalana. Not kahana ena king ese ena tuari ginigabena do ia karaia neganai, Baibel amo lalo-parara idia abia taudia ese unai peroveta herevana ena guguru dalana do idia itaia goevagoeva.​—⁠Rau 284 dekenai “King Taudia Daniela Karoa 11 Ai” itaia.

²² To, not kahana ena king ese kahirakahira do ia karaia gauna ita diba. “Dina ia daekau kahana dekena amo bona mirigini kahana dekena amo hereva ia mai dainai,” tuari do ia karaia ‘taunimanima momo ia hamasea ore’ totona. Daika do ia tuari henia? Bona edena “hereva” dainai unai ia karaia?

IA KAMONAI HEREVANA DAINAI IA LALO-HEKWARAHI

²³ Apokalupo bukana ese Babulonia Badana, tanobada ena tomadiho koikoi ibounai, ena dokona ia gwauraia herevana mani oi laloa. “Siahu Ibounai Diravana ena Dina Badana” tuarina, Aramagedono, ia do vara lasi neganai, unai hereva momokani ena inai oreana badana be “lahi ese do ia araia ore.” (Apokalupo 16:​14, 16; 18:​2-8) Dirava ena badu ena disi namba 6 be Euperate sinavaina dekenai idia bubua karana ese unai orea hadikaia ore karana ia laulaulaia. Unai sinavai idia hakaukaua “dina daekau kahana dekena amo king do idia mai dalana ia kehoa” totona. (Apokalupo 16:12) Unai king be daidia? Idia be Iehova Dirava bona Iesu Keriso!​—⁠Isaia 41:2; 46:​10, 11 itaia.

²⁴ Babulonia Badana do idia hadikaia karana be Apokalupo bukana ese ia gwauraia goevagoeva, ia gwau: “Bona dagedage gauna [United Nations] mai ena doana 10 [dokona negana lalonai idia lohia king taudia], oi itaia vadaeni gaudia, ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” (Apokalupo 17:16) Dahaka dainai lohia taudia ese Babulonia Badana do idia hadikaia ore? Badina ‘Dirava ese iena palani be edia lalona dekenai do ia atoa.’ (Apokalupo 17:17) Unai lohia taudia ta be not kahana ena king. Reana “dina ia daekau kahana dekena amo” ia kamonai herevana be Iehova ena kara ta, lohia taudia edia lalona dekenai tomadiho ariara hahine badana hadikaia lalohadai ia atoa karana, ia hahedinaraia.

²⁵ To not kahana ena king ese haida ia badu henia mai goada ida. Aneru ia gwau: “Davara badana ena kone, bona ororo helagana, Dubu Helaga ia noho gabuna edia huanai, unai [not kahana ena] king ese iena palai ruma namo herea do ia haginia.” Daniela ena negai davara badana be Meditereinien bona ororo helagana be Siona, guna Dirava ena dubu helaga ia noho gabuna. Unai dainai, peroveta herevana ia guguru neganai, ia badu dikadika not kahana ena king ese Dirava ena taunimanima ia tuari henia. Lauma dalanai, ‘davara badana ena kone, bona ororo helagana edia huanai’ ia noho gabuna ese Iehova ena horoa hesiai taudia edia noho lauma dalanai ia laulaulaia. Idia be Dirava amo idia noho daudau ‘davara bamona’ taunimanima amo idia raka siri bona edia helaro be Siona Ororona ai, guba dekenai, Iesu Keriso ida do idia lohia.​—⁠Isaia 57:20; Heberu 12:22; Apokalupo 14:⁠1.

²⁶ Esekiela, Daniela ena negai ia noho tauna, ese “vaira neganai” Dirava ena taunimanima idia tuari henia karana ia perovetalaia. Ia gwau Magoga tauna Goga, Satani Diabolo, ese unai tuari karana do ia hamatamaia. (Esekiela 38:​14, 16) Laulau dalanai, Goga be edena kahana amo ia mai? Iehova ese Esekiela amo ia gwau: “Mirigini kahana [o not kahana] dekena amo.” (Esekiela 38:15) Herevana unai tuari be dika herea, to Iehova ena taunimanima do ia hadikaia ore lasi. Unai tuari be Iehova ese Goga ena tuari taudia ia hadikaia totona ia karaia palani dainai ia vara. Unai dainai, Iehova be Satani dekenai ia gwau: “Lau ese . . . kimai be oiemu aukina dekenai do lau atoa, vadaeni oi do lau veria mai.” “Lau ese . . . mirigini kahana, gabu daudauna dekena amo oi do lau mailaia. Oi do lau hakaua, Israela ena ororo gabudia do oi tuari henia totona.” (Esekiela 38:4; 39:⁠2) Unai “mirigini kahana dekena amo” ia mai herevana, not kahana ena king ia habadua herevana, be Iehova amo ia mai. To unai “dina ia daekau kahana dekena amo bona mirigini kahana dekena amo” idia mai herevadia ese dahaka idia hahedinaraia be Dirava sibona ese do ia abia hidi bona gabeai do ia hedinarai.

²⁷ Goga ese unai tuari badana ia karaia badina be “Dirava ena Israela” ena noho namona dainai, idia bona “mamoe idaudia” taudia ‘hutuma bada herea’ be tanobada ena lasi. (Galatia 6:16; Apokalupo 7:9; Ioane 10:16; 17:​15, 16; 1 Ioane 5:19) Goga ese ‘bese idauidau edia huana amo idia hebou taudia, bona edia kohu momo [lauma dalanai]’ ia itaia dainai ia moale lasi. (Esekiela 38:12) Goga ia laloa Keristani taudia edia noho lauma dalanai be “magu lasi hanuadia” bamona do ia hadikaia haraga, bena tanobada ibounai ia lohiaia diba totona ena tuari badana amo unai koua gauna ginigabena ia kokia toho. To ia kwalimu lasi. (Esekiela 38:​11, 18; 39:⁠4) Tanobada ena king taudia, not kahana ena king danu, ese Iehova ena taunimanima idia tuari henia neganai, ‘edia mase negana do ia ginidae.’

‘KING ENA MASE NEGANA IA GINIDAE’

²⁸ Not kahana ena king ena tuari ginigabena lalonai, saut kahana ena king ia tuari henia lasi. Unai dainai, ia heai henia king ese not kahana ena king do ia hadikaia ore lasi. Unai hegeregerena, not kahana ena king ese saut kahana ena king do ia hadikaia ore lasi. Saut kahana ena king ena dokona be “taunimanima edia siahu dekena amo lasi” to Dirava ena Basileia ese do ia hadikaia ore.a (Daniela 8:25) Momokani, Aramagedono ena tuari lalonai, Dirava ena Basileia ese tanobada ena king taudia ibounai do ia hadikaia ore, bona ia hedinarai unai be not kahana ena king dekenai do ia vara danu. (Daniela 2:44) Daniela 11:​44, 45 ese unai tuari ia do vara lasi lalonai idia vara gaudia ia herevalaia. Unai dainai ita hoa lasi not kahana ena king ia mase neganai, “tau ta ese do ia durua lasi”!

[Footnote]

DAHAKA OI DIBAIA?

• Tanobada Ibounai Tuarina Iharuana murinai not kahana ena king be edena bamona ia idau?

• Dokonai not kahana ena king bona saut kahana ena king dekenai be dahaka do ia vara?

• Daniela ena peroveta herevana lalonai idia heai king ruaosi edia sivarai oi laloa namonamo neganai dahaka namo oi abia?

[Study Questions]

1, 2. Tanobada Ibounai Tuarina Iharuana murinai, not kahana ena king be edena bamona ia idau?

3, 4. ‘Edia guriguri karana idia rakatania’ taudia be daidia, bona edia hetura karana not kahana ena king ida be edena bamona?

5, 6. “Edia Dirava idia diba taudia” be daidia, bona not kahana ena king ena siahu henunai edia noho be edena bamona?

 7. Not kahana ena king ena siahu henunai idia mauri noho horoa Keristani taudia ese dahaka ‘heduru’ idia abia?

 8. Edena dala ai haida ese Dirava ena taunimanima “idia durudia koikoi”?

 9. Dahaka dainai vareai koikoi taudia ese abidadama Keristani taudia haida idia “hahekwakwanaia” karana be Iehova ese ia koua lasi?

10. Inai hereva “ela bona dokona negana ia ginidae” ena anina be dahaka?

11. Aneru ia gwau not kahana ena king ese Iehova ena lohia siahuna be edena bamona do ia laloa?

12, 13. (a) Edena dala ai not kahana ena king ese “iena sene taudia edia dirava” ia dadaraia? (b) Not kahana ena king ese edia “ura” ia laloa lasi “hahine” taudia be daidia? (c) Not kahana ena king ese edena “dirava” ia tomadiho henia?

14. Edena dala ai not kahana ena king “ia kwalimu”?

15. Saut kahana ena king ese dahaka gaudia amo not kahana ena king “ia tuari henia”?

16. Saut kahana ena king ena “tuari” karadia dainai, not kahana ena king be dahaka ia karaia?

17. Not kahana ena king ese ena siahu ia habadaia to dahaka ia karaia diba lasi?

18, 19. Edena dala haida ai saut kahana ena king ese ia heai henia king ena siahu ia mamia?

20. Edena dala ai aneru ese not kahana ena king ena tuari ginigabena ia gwauraia?

21. Not kahana ena king dekenai dahaka gaudia be gabeai do ita dibaia?

22. Not kahana ena king ese ia karaia tuari ginigabena dainai edena henanadai idia vara?

23. (a) Aramagedono ia do vara lasi neganai, dahaka mai anina bada gauna do ia vara guna? (b) “Dina daekau kahana dekena amo” idia mai king taudia be daidia?

24. Iehova ena kara ta, not kahana ena king ese ia lalo-hekwarahilaia, be dahaka?

25. (a) Not kahana ena king ese daidia ia badu henia mai goada ida? (b) Not kahana ena king ese “iena palai ruma namo herea” be edeseniai ia haginia?

26. Esekiela ena peroveta herevana hegeregerena, reana “mirigini kahana dekena amo” ia mai herevana be daika amo ia mai?

27. (a) Dahaka dainai Goga ese bese idauidau, not kahana ena king danu, ia hagoadaia Iehova ena taunimanima idia tuari henia totona? (b) Goga ena tuari karana lalonai dahaka do ia vara?

28. Not kahana ena king bona saut kahana ena king edia vaira negana be edena bamona?

[Chart/Picture on page 284]

KING TAUDIA DANIELA KAROA 11 AI

Daniela 11:​7-9 Seleucus Namba 2 Ptolemy Namba 3

Daniela 11:​10-12 Antiochus Namba 3 Ptolemy Namba 4

Daniela 11:​13-19 Antiochus Namba 3 Ptolemy Namba 5

Daniela 11:20 Augusto

Daniela 11:​21-24 Tiberio

[Footnote]

[Full-page picture on page 271]

[Pictures on page 279]

Saut kahana ena king ena “tuari” karana lalonai gau matamatadia amo spai karadia hehunidia idia karaia, bona tuari karaia herevadia amo gari idia havaraia