Dirava Ia Abia Dae Tomadiho Dalana

 1. Bema dala maorona ai Dirava ita tomadiho henia, dahaka namo do ita abia?

IEHOVA DIRAVA be ita ia laloa bada bona ia ura ena lalokau hakaua dalana amo namo ita abia. Bema dala maorona ai ia ita tomadiho henia, mai moale ida do ita noho bona hekwakwanai idauidau do ita davaria lasi. Bona ena hanamoa bona heduru do ita abia. (Isaia 48:17) To, tomadiho handred momo idia gwau idia ese Dirava ena hereva momokani idia hadibaia. To, edia lalohadai Dirava be daika bona ia ura ita karaia gauna dekenai be idauidau.

 2. Iehova tomadiho henia dalana maorona be edena bamona ita dibaia diba, bona edena haheitalai ese ita ia durua unai ita lalopararalaia totona?

² Iehova tomadiho henia dalana maorona be edena bamona oi dibaia diba? Tomadiho ibounai edia hadibaia herevadia oi stadilaia bona oi hahegeregerea be gau badana lasi. To, Baibel ese tomadiho momokanina ia herevalaia dalana sibona oi dibaia be namo. Haheitalai ta be inai: Tano momo dekenai taunimanima ese moni koikoidia idia gaukaralaia bona unai be hekwakwanai badana. Bema oi dekenai gaukara idia henia moni koikoidia oi makaia totona, unai gaukara be edena bamona do oi karaia? Moni koikoi ibounai edia toana do oi laloatao, a? Lasi. Aonega karana be moni korikorina do oi stadilaia. Unai amo moni korikorina bona moni koikoina edia idau oi itaia haraga diba. Unai hegeregerena, bema tomadiho momokanina ita dibaia vadaeni, tomadiho koikoi ena idau danu do ita dibaia.

 3. Iesu ia hereva bamona, Dirava ena lalonamo ita abia totona, dahaka ita karaia be namo?

³ Iehova ese ia abia dae dalanai ia ita tomadiho henia be mai anina bada. Taunimanima momo idia laloa Dirava ese tomadiho ibounai ia moalelaia, to Baibel be unai ia gwauraia lasi. Bema ta ia gwau ia be Keristani tauna, unai sibona be hegeregere lasi. Iesu ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.” Unai dainai, Dirava ena lalonamo ita abia totona, namona be Dirava ena ura ita dibaia bona karaia. Iesu ese Dirava ena ura idia karaia lasi taudia ia gwauraia, “dika karaia taudia.” (Mataio 7:​21-23) Moni koikoina bamona, tomadiho koikoi ese ta do ia durua diba lasi. Bona unai bamona tomadiho ese ta ia hadikaia diba.

 4. Edena dala ai Iesu ese dala rua ia herevalaia, bona unai dala ta ta be edeseni idia lao?

⁴ Iehova be taunimanima ibounai dekenai dala ia kehoa mauri hanaihanai idia abia totona. To, Paradaiso dekenai mauri hanaihanai ita abia totona, namona be dala maorona ai Dirava ita tomadiho henia bona ia abia dae mauri dalana ita badinaia. To madi, momo be unai bamona idia karaia lasi. Unai dainai Iesu ia gwau: “Iduara maragina dekenai do umui raka vareai. Badina be lahi gabuna, hel, ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” (Mataio 7:​13, 14) Tomadiho momokani idia badinaia taudia ese mauri hanaihanai do idia abia. To tomadiho koikoi idia badinaia taudia ese dika bada do idia davaria. Iehova ia ura lasi ta ia mase, unai dainai dala ia karaia taunimanima ibounai ese ia do idia dibaia totona. (2 Petero 3:9) Dirava ita tomadiho henia dalana be mai anina bada, badina mauri eiava mase do ita abia.

 5. Tomadiho momokani idia badinaia taudia be edena bamona do ita dibaia?

⁵ ‘Mauri ia lao henia dalana’ be edena bamona ita davaria diba? Iesu ia gwau tomadiho momokani idia badinaia taudia edia kara ese unai do ia hahedinaraia. Ia gwau: “Edia huahua dekena amo do umui diba idia be namo o dika. . . . Au namona ena huahua be ia namo.” (Mataio 7:​16, 17) Anina be tomadiho momokani idia badinaia taudia be edia kara bona idia abia dae gaudia amo do ita dibaia. Ena be idia be goevadae lasi bona kerere idia karaia, to orea ta bamona idia hekwarahi Dirava ena ura idia karaia totona. Tomadiho momokani idia badinaia taudia be inai gaudia siks amo do ita dibaia, mani ita itaia.

6, 7. Dirava ena hesiai taudia ese Baibel be edena bamona idia laloa, bona unai kara dekenai Iesu ese edena bamona haheitalai ia hahedinaraia?

⁶ Dirava ena hesiai taudia edia hahediba herevadia be Baibel amo idia abia. Baibel ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai, Dirava ena tau [bona hahine] ena goada be hegeregere momokani, vadaeni kara namodia ibounai do ia karaia diba, mai kwalimu danu.” (2 Timoteo 3:​16, 17) Aposetolo Paulo be ena Keristani tadikaka dekenai ia gwau: “Dirava ena hereva ai mailaia neganai, umui kamonai henia, bona umui abia dae. Oibe, umui abia dae momokani. Umui dekenai ia be taunimanima edia hereva lasi, to ia be Dirava ena hereva momokani.” (1 Tesalonika 2:13) Unai dainai, tomadiho momokani ese ia abia dae gaudia bona karaia karadia be taunimanima edia lalohadai bona sene karadia amo idia abia lasi. To Dirava ena Hereva, Baibel amo idia abia.

⁷ Iesu Keriso ena hahediba herevadia be Dirava ena Hereva amo ia abia, unai kara dekenai haheitalai namona ia hahedinaraia. Ena guba Tamana ia guriguri henia, ia gwau: “Oiemu hereva be hereva momokani.” (Ioane 17:17) Iesu ese Dirava ena Hereva ia abidadama henia bona ena hahediba hereva ibounai be Baibel ida ia hegeregere. Nega momo Iesu ia gwau: “Buka Helaga lalonai ia torea vadaeni.” (Mataio 4:​4, 7, 10) Bena siri ta ia gwauraia. Unai hegeregerena, hari Dirava ena taunimanima be sibodia edia lalohadai idia gwauraia lasi. Idia abia dae Baibel be Dirava ena Hereva, bona idia hadibaia herevadia be Baibel amo idia abia.

 8. Iehova tomadiho henia ena anina be dahaka?

⁸ Tomadiho momokani idia badinaia taudia ese Iehova sibona idia tomadiho henia bona ena ladana idia gwauraia hedinarai. Iesu ia gwau: “Lohiabada oiemu Dirava do oi tomadiho henia, ia sibona dekenai hesiai gaukara do ia karaia.” (Mataio 4:10) Unai dainai Dirava ena hesiai taudia be Iehova sibona idia tomadiho henia. Bona taunimanima dekenai Dirava momokani ena ladana bona ena kara idia gwauraia. Salamo 83:18 ia gwau: “Oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” Iesu ese taunimanima ia durua Dirava idia dibaia totona, unai kara dekenai haheitalai namona ia hahedinaraia, guriguri lalonai ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai.” (Ioane 17:6) Unai hegeregerena, hari tomadiho momokani taudia be ma haida dekenai Dirava ena ladana, ena ura, bona ena kara idia hadibaia.

9, 10. Edena dala ai Keristani taudia momokanidia ese idia hahedinaraia idia be ta ta idia lalokau henia?

⁹ Dirava ena taunimanima be ta ta dekenai lalokau idia hahedinaraia bona sibodia edia namo idia tahua lasi. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Keristani taudia ginigunadia danu ese ta ta dekenai lalokau idia hahedinaraia. Dirava ia gwau unai bamona lalokau do ita hahedinaraia herevana taunimanima edia kopina kala bona tano be idauidau, bona unai lalokau ese taunimanima ia hatamonaia tadikaka korikorina bamona. (Kolose 3:14) Tomadiho koikoi taudia dekenai unai bamona lalokau tadikaka oreana ia noho lasi. Edena bamona unai ita diba? Tano eiava iduhu idauidau taudia idia inai heheni dainai edia tomadiho tamona taudia idia alaia mase. Keristani taudia momokanidia ese tuari gaudia idia gaukaralaia lasi edia Keristani tadikaka bona ma haida idia alaia mase totona. Baibel ia gwau: “Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi. . . . Ibounai ta ta dekenai do ita lalokau henia. Kaino ena kara bamona do ita karaia lasi, ia be Satani ena tau, bona ia ese iena tadina Abela ia alaia mase.”​—1 Ioane 3:​10-12; 4:​20, 21.

¹⁰ Lalokau dainai ma haida ita alaia mase lasi, to unai sibona lasi. Keristani taudia momokanidia ese edia nega, goada bona moni idia gaukaralaia ta ta idia durua bona hagoadaia totona. (Heberu 10:​24, 25) Lalohisihisi negadiai ta ta idia durua, bona mai momokani ida ma haida idia kara henia. Edia mauri dekenai inai Baibel ena sisiba idia badinaia ia gwau, “taunimanima ibounai dekenai kara namodia do ita karaia.”​—Galatia 6:10.

11. Dirava ese Iesu Keriso ia gaukaralaia taunimanima ia hamauria totona, dahaka dainai unai ita abia dae be gau badana?

¹¹ Keristani taudia momokanidia idia abia dae Dirava ese Iesu Keriso amo hamauria dalana ia karaia. Baibel ia gwau: “Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.” (Kara 4:12) Karoa 5 dekenai ita itaia bamona, Iesu ese mauri davana ia henia kamonai taudia hamauria totona. (Mataio 20:28) Bona, Dirava ese Iesu ia abia hidi guba Basileiana ena King ai ia lao totona, bona unai Basileia ese tanobada ibounai do ia lohiaia. Bona Dirava ia ura Iesu ita kamonai henia bona ena hadibaia herevadia ita badinaia, bema ita ura mauri hanaihanai ita abia. Unai dainai Baibel ia gwau: “Dirava ena Natuna ia abidadama henia tauna ese mauri hanaihanai do ia abia, to iena Natuna ia kamonai henia lasi tauna be mauri do ia itaia lasi.”​—Ioane 3:36.

12. Tanobada ena lasi ena anina be dahaka?

¹² Tomadiho momokani taudia be tanobada ena lasi. Iesu be Roma ena lohia tauna Pilato vairanai ia gini neganai, ia gwau: “Lauegu Basileia be inai tanobada gauna lasi.” (Ioane 18:36) Herevana Iesu murinai idia raka taudia momokanidia be tano idauidau dekenai idia noho, to idia be guba Basileia ena lohia siahuna henunai idia noho bona inai tanobada ena politikol karadia bona hepapahuahu lalonai idia vareai lasi. To, Iehova idia tomadiho henia taudia ese ma haida idia koua lasi politikol pati ta lalonai idia vareai, eleksen neganai idia gini eiava idia vouti totona. Oibe, Dirava idia tomadiho henia taudia momokanidia be politikol karadia lalonai idia vareai lasi, to idia noholaia tanona ena taravatu idia badinaia. Dahaka dainai? Badina Dirava ena Hereva ese idia ia hagania “gavamani do idia kamonai henia” totona. (Roma 13:1) Bema taunimanima ese tomadiho momokani taudia idia doria gavamani ena taravatu idia badinaia bona Dirava ena ura idia dadaraia, namona be aposetolo taudia edia haheitalai idia badinaia, idia gwau: “Dirava ai kamonai henia be namo, taunimanima ai kamonai henia be dika.”​—Kara 5:29; Mareko 12:17.

13. Iesu murinai idia raka taudia momokanidia ese Dirava ena Basileia be edena bamona idia laloa, bona unai dainai dahaka idia karaia?

¹³ Iesu murinai idia raka taudia momokanidia idia abia dae Dirava ena Basileia sibona ese hekwakwanai ibounai do ia haorea. Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Iesu Keriso murinai idia raka taudia ese taunimanima idia hagoadaia lasi tanobada lohia taudia idia tabekau henia totona. To Dirava ena guba Basileia idia harorolaia, badina unai sibona ese taunimanima edia hekwakwanai do ia haorea. (Salamo 146:3) Iesu ese ita ia hadibaia unai gavamani hereadaena do ita gurigurilaia, ia gwau: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) Baibel ia gwau unai guba Basileiana ese “basileia ibounai do ia hamakohia, bona haorea momokani, bona ia sibona do ia noho ela bona hanaihanai.”​—Daniela 2:44.

14. Edena tomadiho oreana ese tomadiho momokani ena kara ibounai ia hahedinaraia?

¹⁴ Ita herevalaia vadaeni gaudia mani oi laloa bona sibona oi nanadaia: ‘Edena tomadiho oreana ena hahediba hereva ibounai be Baibel amo ia abia bona Iehova ena ladana ia gwauraia hedinarai? Edena orea taudia ese lalokau idia hahedinaraia, Iesu idia abidadama henia, idia be tanobada ena lasi bona idia abia dae Dirava ena Basileia sibona ese hekwakwanai ibounai do ia haorea bona unai idia harorolaia? Tanobada dekenai idia noho tomadiho ibounai amo, edena tomadiho ese unai ibounai ia karaia? Hamomokania gaudia ese idia hahedinaraia unai orea be Iehova ena Witnes taudia.​—Isaia 43:​10-12.

15. Dirava ia noho ita abia dae sibona be hegeregere, a?

¹⁵ Dirava hamoalea totona, Ia noho ita abia dae sibona be hegeregere lasi. Baibel ia gwau lauma dikadia danu idia abia dae Dirava be ia noho. (Iamesi 2:19) To, idia ese Dirava ena ura idia karaia lasi bona ena lalonamo idia abia lasi. Dirava ese ita ia lalonamo henia totona, namona be ita abia dae Dirava be ia noho bona ena ura ita karaia. Namona be tomadiho koikoi ita rakatania bona tomadiho momokani ita badinaia.

16. Dahaka dainai tomadiho koikoi ena kara idauidau lalonai ita vareai lasi?

¹⁶ Aposetolo Paulo ese ia hahedinaraia namo lasi tomadiho koikoi ita durua. Ia gwau: “Lohiabada ma ia hereva, ia gwau: ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri, vadaeni umui do lau abia dae.’ ” (2 Korinto 6:17; Isaia 52:11) Unai dainai Keristani taudia momokanidia be tomadiho koikoi edia kara ibounai idia dadaraia.

17, 18. “Babulonia badana” be dahaka, bona dahaka dainai “ia dekena amo do [oi] raka siri” haraga be gau badana?

¹⁷ Baibel ese ia hahedinaraia tomadiho koikoi idauidau be “Babulonia badana” ena kahana ta.a (Apokalupo 17:5) Unai ladana dainai idaunega Babulonia ita laloa, Noa ena negai ia vara Abatana murinai, tomadiho koikoi be unuseniai ia matamaia. Hari inai negai tomadiho koikoi momo ese idia hadibaia herevadia bona idia karaia karadia momo be idaunega Babulonia amo idia mai. Hegeregere, Babulonia taudia ese toi tamona diravadia idia tomadiho henia. Hari inai negai, tomadiho momo edia hahediba hereva badana be Toi Tamona. To Baibel ese ia hahedinaraia goevagoeva Dirava momokanina be tamona, iena ladana be Iehova, bona Iesu Keriso be iena Natuna. (Ioane 17:3) Babulonia taudia idia abia dae danu taunimanima idia mase neganai, edia lauma be ia mauri noho, bona lahi gabuna ta dekenai hisihisi bada idia mamia. Hari inai negai, tomadiho momo ese mase diba lasi laumana bona hel lahina dekenai hisihisi abia karana idia hahedibalaia.

¹⁸ Idaunega Babulonia ena tomadiho karana be tanobada ibounai dekenai ia lao dainai, ita gwau diba Babulonia Badana ese tanobada ena tomadiho koikoi ibounai ia laulaulaia. Bona Dirava ia gwau unai tomadiho koikoi ibounai be kahirakahira do ia ore. (Apokalupo 18:8) Babulonia Badana amo oi gini siri ena badina be hari oi diba, a? Nega ia do noho lalonai, Iehova Dirava ia ura Babulonia Badana “dekena amo do [oi] raka siri” haraga.​—Apokalupo 18:4.

19. Bema Iehova oi hesiai henia, dahaka gaudia do oi abia?

¹⁹ Tomadiho koikoi oi rakatania dainai, reana haida ese oi do idia tura henia lou lasi. To, Iehova ena taunimanima ida ia oi hesiai henia neganai, ena be gau momo oi haboioa, to Iehova ese oi do ia hanamoa. Iesu ena hahediba taudia ginigunadia bamona, ia idia bamoa totona gau momo idia haboioa, to lauma dalanai tadikaka bona taihu momo idia abia. Oi dekenai unai ia vara diba. Oi be tanobada hegegemadai idia noho Keristani taudia milioni momo edia ruma bese tauna ta ai do oi lao, bona oi idia lalokau henia bada. Bona “vaira neganai,” helaro namona mauri hanaihanai do oi abia. (Mareko 10:​28-30) Reana gabeai, oi abia dae gaudia dainai oi idia rakatania taudia ese Baibel do idia stadilaia bona Iehova tomadiho henia taudia ai do idia lao.

20. Nega vaira ai, tomadiho momokani idia badinaia taudia dekenai dahaka do ia vara?

²⁰ Baibel ia gwau Dirava ese kahirakahira inai tanobada oromana dikana do ia hadikaia ore bona Dirava ena Basileia ena lohia siahuna henunai kara maoromaoro tanobadana do ia havaraia. (2 Petero 3:​9, 13) Unai be nega namo hereana! Bona unai kara maoromaoro tanobadana ai, tomadiho momokani tamona sibona do ia noho. Unai dainai aonega karana be hari tomadiho momokani taudia oi bamoa.