Paradaiso

Anina: Septuagint Baibel be Greek gado ai idia torea neganai, gado hahanaia taudia ese Eden umana ena ladana idia hatoa “paradaiso” (pa·raʹdei·sos) be maoro, badina be unai uma be imea ta mai ena magu. Genese ena sivarai murinai, Baibel ena siri ma haida lalodiai paradaiso idia herevalaia. Unai hereva amo idia gwauraia gaudia be inai: (1) Eden umana, eiava (2) tanobada ibounai, Eden hegeregerena ai do idia halaoa neganai, eiava (3) Dirava ena hesiai taudia tanobada dekenai edia lauma nohona namo hereana, eiava (4) Eden hegeregerena hahenamodia guba lalonai.

“Taravatu Matamatana” ese tanobada ena paradaiso ta, gabeai do ia vara gauna, ia gwauraia a, eiava “Taravatu Gunana” mo sibona ese a?

Haida ese Baibel idia hapararaia kahana rua, bena paradaiso herevadia kahana “Gunana” lalonai bona paradaiso herevadia kahana “Matamatana” lalonai edia anina be dala idauidau amo idia gwauraia. To unai be Baibel ese ia gwauraia dalana hegeregerena lasi. Timoteo Iharuana 3⁠:16 ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.” Revareva Helagadia gunadia, Keriso be tanobada dekenai ia do mai lasi neganai idia torea, be Roma 15⁠:4 ese ia gwauraia, ia gwau: “Buka Helaga dekenai idia torea hereva be ita dekenai hadibaia totona idia torea.” Unai dainai, inai henanadai ena haere maorona davaria totona Baibel ibounai ita tahua be namo.

Genese 2:⁠8 ia gwau: “Iehova Dirava ese uma [pa·raʹdei·son, Greek gado ai] ta dina ia daekau kahana dekenai ia karaia, ladana Eden, bona unai gabu dekenai ia karaia vadaeni tauna [Adam] ia atoa.” Unuseniai be animal idauidau bona au bona ava idauidau, taunimanima ese idia moalelaia gaudia. Iehova ese taunimanima ginigunadia ruaosi, tau mai ena hahine, ia hanamodia, ia gwau: “Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua. Davara ena gwarume bona atai manudia, bona mauri gaudia tanobada dekenai idia marere gaudia umui biagua.” (Gen. 1⁠:28) Matamana neganai Dirava ena palani be, tanobada ibounai be paradaiso ai do ia lao bona iena taravatu idia badinaia taudia ese do idia noholaia; unai palani ena anina be momokani do ia havaraia. (Isa. 45⁠:18; 55⁠:​10, 11) Unai dainai Iesu ia gwau: “Dagedage lasi taudia be idia namo, badina tanobada do idia abia,” bona ena hahediba taudia ia hadibadia inai bamona do idia guriguri: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mat. 5⁠:5; 6⁠:​9, 10) Unai hegeregerena, Efeso 1⁠:​9-11 ese ia hahedinaraia Dirava ena palani ena anina be, “Ia karaia gaudia ibounai, gubai bona tanobadai, be Keriso ese do ia biagua.” Heberu 2⁠:5 ese “tanobada matamata” ia gwauraia. Apokalupo 5⁠:10 ese Keriso ida do idia lohia hebou taudia ia gwauraidia, ia gwau “idia ese tanobada do idia gunalaia.” Apokalupo 21⁠:​1-5 bona Apok 22⁠:​1, 2 ese “tanobada matamatana” do idia noholaia taudia edia mauri namona idia gwauraia; unai mauri be Eden ena Paradaiso gunana, mauri auna ia noho gabuna, idia noholaia taudia edia mauri hegeregerena.​—⁠Gen. 2⁠:⁠9.

Danu, Iesu ese tanobada ena Paradaiso, gabeai do ia vara gauna, ia gwauraia neganai, inai Greek gado herevana paraʹdei·sos ia herevalaia. Kara dika tauna ta, ia badinai idia hasatauroa tauna ta, ese ena hereva amo ia hahedinaraia ia ese Iesu ena pavapava siahuna, gabeai do ia abia siahuna, ia abidadama henia. Bena Iesu ese ia hereva henia, ia gwau: “Momokani lau hamaoroa oi dekenai, . . . ita ruaosi Paradaisa dekenai do ita ginidae.”​—⁠Luka 23⁠:43.

Paradaiso, Iesu ese Luka 23⁠:43 dekenai kara dika tauna dekenai ia gwauhamatalaia gabuna, be dahaka?

Ia be Hades ena kahana ta, ‘kara maoromaoro taudia edia lauma be toreisi-lou negana idia naria gabuna,’ a?

Unai lalohadai be edena bamona ia vara? The New International Dictionary of New Testament Theology ia gwau: “Greek hahediba herevana, taunimanima edia lauma idia mase diba lasi herevana, idia abia dae neganai, idia gwau kara maoromaoro taudia idia mase murinai paradaiso idia noholaia ela bona mauri gabena do idia abia.” (Grand Rapids, Mich.; 1976, edited by Colin Brown, Vol. 2, p. 761) Iesu be tanobada dekenai ia noho neganai, Iuda taudia momo ese unai lalohadai, Baibel ena hereva hegeregerena lasi gauna, idia abia dae, eiava? Hastings’ Dictionary of the Bible ese ia hahedinaraia gau ta ese unai ia hamomokania lasi.​—⁠(Edinburgh, 1905), Vol. III, pp. 669, 670.

Ena be Iuda taudia momo Iesu ena negai idia noho be reana unai lalohadai idia abia dae, to Iesu ese ia hamomokania lasi, unai kara dika tauna ia gwauhamata henia neganai. Iesu ese Farisea taudia bona taravatu hadibaia taudia ia gwau henidia goadagoada, badina be Dirava ena Hereva idia utua, edia sene herevadia dainai.​—⁠Mat. 15⁠:​3-9.

Iesu ia mase neganai ia be mase taudia edia gabu dekenai ia lao, Kara 2⁠:​30, 31 ese ia hahedinaraia hegeregerena. (Unai siri ese idia hahedinaraia, aposetolo Petro ese Salamo 16⁠:10 ena hereva ia gwauraia neganai, Hades be Sheol ida ia hahegeregerea.) To Baibel ia gwau lasi mase taudia edia gabu (Sheol/Hades) eiava ena kahana ta be paradaiso ta, taunimanima ese idia moalelaia gabuna unai. Lasi, to Kohelete 9⁠:​5, 10 ia gwau unuseniai idia noho taudia be ‘gau ta idia diba lasi.’

Paradaiso, Luka 23⁠:43 ai ia gwauraia gabuna, be guba eiava guba ena kahana, a?

Haida idia laloa Iesu ese unai kara dika tauna ia hereva dinana ai idia ruaosi be guba dekenai idia lao, to Baibel ese unai lalohadai ia hamomokania lasi. Iesu be guna ia gwau, ia do idia hamasea murinai do ia toreisi lou lasi ela bona dina ihatoina. (Luka 9⁠:22) Unai dina toiosi lalodiai ia be guba dekenai ia noho lasi, badina be ia toreisi lou murinai ia ese Maria Magdala ia hamaoroa, ia gwau: “Tamana dekenai do lau daekau lasi.” (Ioane 20⁠:17) Iesu ia toreisi lou murinai dina 40 idia ore bena ena hahediba taudia ese idia itaia noho neganai, guba dekenai ia daekau lao ela bona ori ta ese ia koua bena idia itaia lou lasi.​—⁠Kara 1⁠:​3, 6-11.

Unai kara dika tauna ia hegeregere lasi guba dekenai do ia lao. Ia “vara lou” lasi​—⁠ranu lalonai ia bapatiso lasi bona Dirava ena lauma ese ia havaraia lou lasi. Iesu ese lauma helaga iena hahediba taudia latadiai ia bubua diho lasi ela bona unai tau ia mase murinai dina 50 idia ore. (Ioane 3⁠:​3, 5; Kara 2⁠:​1-4) Iena mase dinana ai, Iesu ese ‘ia idia hedibagani henia neganai ia dekenai idia noho auka masemase taudia’ ia gwauhamata henidia, ia gwau guba Basileiana do idia abia. Unai kara dika tauna ese Iesu unai bamona ia badinaia sivaraina be lasi, bona unai davana namona ia abia lasi.​—⁠Luka 22⁠:​28-30.

Dahaka ese ia hahedinaraia inai Paradaiso be tanobada gauna?

Heberu Revarevadia Helagadia ese Iuda taudia mai edia kamonai idia hadibadia lasi mauri be guba dekenai do idia abia. Unai Revareva Helagadia ese idia hahedinaraia Dirava ese Paradaiso do ia havaraia lou tanobada dekenai. Daniel 7⁠:​13, 14 ese ia hahedinaraia, ia ese ‘lohia siahuna bona hairai bona basileia danu’ Mesia do ia henia neganai, ‘bese idauidau bona basileia idauidau bona gado idauidau iboudiai ese iena hesiai gaukara do idia karaia’ tanobada dekenai. Unai kara dika tauna ese Iesu ia noinoi henia neganai, ena ura be Iesu ese do ia laloa, unai nega do ia ginidae neganai.

Vadaeni, edena dala amo Iesu be unai kara dika tauna ida do idia noho hebou? Dala be inai: Iesu ese mase amo do ia hatorea isi, bena tauanina dalanai do ia naria, bona ia vairanai dala do ia kehoa iena, Iehova ena taravatu do ia dibaia bona do ia badinaia, mauri hanaihanai do ia abia diba totona. (Ioane 5⁠:​28, 29) Unai kara dika tauna ia helalo-kerehai bona Iesu ia hereva henia mai ena hemataurai ida, unai dainai Iesu ia laloa mase amo do ia hatorea isi be namo. Ia ese unai tau bona ma taunimanima milion momo danu do ia hatoredia isi lou, tanobada dekenai do idia mauri totona. Iduara ta do ia kehoa edia, bena edia kamonai amo do idia hahedinaraia diba, idia be hegeregere Paradaiso do idia noholaia ela bona hanaihanai.

Edena negai kara dika tauna be Paradaiso lalonai do ia noho?

Luka 23⁠:43 ia duahia tauna ese ena anina ia lalohadailaia, gado hahanaia tauna ese koma unai siri lalonai ia atoa hegeregerena. Gunaguna Baibel ena hereva be Greek gado ai idia torea neganai, koma bona unai bamona maka maragidia ma haida idia torea lasi. The Encyclopedia Americana (1956, Vol. XXIII, p. 16) ia gwau: “Greek taudia edia buka gunadia lalodiai, maka maragidia be hereva padadiai idia torea lasi.” Unai maka idia gaukaralaia lasi ela bona lagani 800 C.E. murinai. Vadaeni, Luka 23⁠:43 be edena bamona idia torea be maoro? Inai bamona a: “Momokani lau hamaoroa oi dekenai, hari dina ita ruaosi Paradaisa dekenai do ita ginidae,” eiava inai bamona a: “Momokani lau hamaoroa oi dekenai hari dina, ita ruaosi Paradaisa dekenai do ita ginidae”? Edena be maoro? Inai ita lalohadailaia maoromaoro totona, namona be inai hereva be Iesu ena hahediba herevadia bona Baibel ena hereva oredia ida ita hahegeregerea; koma ta, Iesu be unai hereva ia gwauraia murinai lagani handred haida idia ore neganai revareva lalonai idia torea vareai makana unai, be ita laloa momo lasi be namo.

Nao gado Baibel ta, ladana The Emphasised Bible lalonai, gado hahanaia tauna J. B. Rotherham ese koma ia atoa, New World Translation Baibel lalonai koma idia atoa hegeregerena. Baibel be German gado ai ia hahanaia tauna ta ladana L. Reinhardt ese Luka 23⁠:43 inai bamona ia gwauraia: “Hari inai negai [gado hahanaia taudia momo] ese koma inai siri lalonai idia atoa dalana be kerere, Keriso bona kara dika tauna edia lalohadai hegeregerena lasi. . . . Momokani [Keriso] ia laloa lasi paradaiso be mase taudia edia gabu ena kahana ta, to ia laloa ia ese paradaiso be tanobada dekenai do ia havaraia lou.”

Edena negai Iesu ese ‘ena Basileia ia abia,’ iena Tamana ena palani hegeregerena tanobada be paradaiso ai do ia halaoa totona? Iesu be unai kara dika tauna ida idia hereva heheni bena lagani 63 bamona murinai Ioane ese ia torea bukana, Apokalupo, ese ia hahedinaraia unai gau be do vairai. (Rau 80-3 itaia, inai sinado “Dina bona Lagani Edia Namba” henunai, bona inai sinado badana “Dina Gabedia” danu.)