Mai Moale ida Abia​​—⁠Mai Kudouna ida Henia

ISEDA guba lalokau Tamana, Iehova, be ita ta ta ia laloa bada. Baibel ia gwau, Ia be ena hesiai taudia ibounai ia laloa bada. (1 Pet. 5:​7, NW ) Iehova ese ita ia laloa bada dalana ta be inai: Dala idauidau ai ita ia durua Ia ita hesiai henia noho totona. (Isa. 48:17) Hegeregere, hekwakwanai dainai ita lalometau neganai, Iehova ia ura ia henia durua gaudia amo namo ita abia. Mose ena Taravatu be unai ia hamomokania.

Mose ena Taravatu dekenai, Iehova be mai lalokau ida dala ia karaia “ogogami taudia,” hegeregere tama sina lasi maragidia, vabu, bona idau bese taudia ese heduru idia abia totona. (Lev. 19:​9, 10; Deu. 14:29) Ia diba, ena hesiai taudia haida be edia tadikaka edia heduru idia abia be namo. (Iam. 1:​27) Unai dainai, bema Iehova ese haida ia gaukaralaia heduru idia henia neganai, namona be iena hesiai taudia ese unai idia abia dae. To, unai bamona heduru ita abia neganai, ita ura lalohadai maorona ita hahedinaraia be gau badana.

Baibel ese ia hahedinaraia, Dirava ena taunimanima be henia karana idia moalelaia danu. Iesu ese Ierusalema ena dubu ai ia itaia “vabu ogogamina” ena sivarai mani oi laloa. (Luka 21:​1-4) Reana unai vabu be Mose ena Taravatu ai ia gwauraia vabu taudia durua karana amo heduru ia abia. Ena be unai vabu be ia ogogami, ita be iena abia karana ita laloatao lasi, to iena henia karana ita laloatao. Reana ia ese henia karana ia moalelaia badina Iesu ia gwau, “Henia kara ena moale be bada, abia kara ena moale be maragi.” (Kara 20:⁠35) Unai hereva ita laloa bona ita sibona ita nanadaia: Edena dala ai “henia kara ena moale” lau abia?​​—⁠Luka 6:​38.

“Lohiabada Dekenai Dahaka Do Lau Henia?”

Salamo torea tauna ia henanadai: “Lohiabada dekenai dahaka do lau henia, iena hariharibada ibounai lau dekenai ena davana?” (Sal. 116:12) Salamo torea tauna be dahaka hariharibada ia abia? “Gari bona laloa hekwarahi” negana ta ai, Iehova ese ia durua. Ma danu, Iehova ese “mase dekena amo [ia] hamauria.” Unai dainai, salamo torea tauna ia ura Iehova dekenai “davana” ia henia lou. Dahaka ia karaia diba? Ia gwau: “Egu gwauhamata ena anina do lau karaia, Lohiabada dekenai do lau henia.” (Sal. 116:​3, 4, 8, 10-​14) Oibe, ia ura Iehova dekenai ia karaia gwauhamata ibounai do ia badinaia noho bona Iehova ese ia henia gaukara ibounai do ia hagugurua.

Salamo torea tauna oi tohotohoa diba. Edena dala ai? Hanaihanai Dirava ena taravatu bona hakaua herevadia oi badinaia. Gau badana be, nega ibounai oiemu mauri lalonai Iehova tomadiho henia karana oi atoa guna, bona lauma helaga ese emu mauri dalana ia hakaua be namo. (Had. 12:13; Gal. 5:​16-​18) Momokani, Iehova ese ita totona ia karaia gaudia edia davana ibounai ita henia diba lasi. To, Iehova ita “hamoalea” bema Ia itaia ita be mai iseda kudouna ibounai ida iena hesiai gaukara ita karaia. (Aon. 27:⁠11, BHğ) Momokani, unai dala amo Iehova ita hamoalea be hahenamo badana, ani?

Kongrigeisen Oi Durua

Momokani, Keristani kongrigeisen be dala idauidau amo oi ia durua. Iehova be kongrigeisen amo lauma aniani momo herea ia henia. Kongrigeisen amo oi dibaia hereva momokanina ese oi ia durua tomadiho koikoi oi rakatania totona. (Ioa. 8:​32) “Hesiai tauna mai ena kamonai, bona mai ena kara maoromaoro” ese idia hegaegaelaia hebou maragidia bona badadia amo diba oi abia​​—⁠unai diba ese oi do ia hakaua lao hisihisi lasi tanobada matamatana ai mauri hanaihanai oi abia totona. (Mat. 24:​45-​47) Dirava ena kongrigeisen amo hari oi abia hahenamodia bona gabeai do oi abia hahenamodia be momo herea, ani? Kongrigeisen dekenai dahaka do oi henia?

Aposetolo Paulo ia gwau: “Tauanina ena kahana ibounai be . . . idia noho hebou bona idia gaukara hebou, bona kara ibounai be laloa tamona dekena amo idia karaia. Ta ta edia gaukara, edia gaukara korikori idia karaia noho. Unai dala dekenai tauanina be lalokau dekena amo ia tubu daekau noho.” (Efe. 4:​15, 16) Ena be unai siri be horoa taudia ibounai ia gwauraia, to iena hakaua herevana be hari Keristani taudia ibounai ese idia badinaia diba. Oibe, kongrigeisen ia tubu daekau noho totona, kongrigeisen taudia ta ta be durua idia henia be namo. Edena dala ai?

Nega ibounai ita hekwarahi ma haida ita hagoadaia Dirava idia hesiai henia noho totona. (Roma 14:​19) Danu, aniani amo “tauanina” ita durua “ia tubu daekau noho” hegeregerena, namona be eda tadikaka dekenai lauma helaga ena huahua ita hahedinaraia. (Gal. 5:​22, 23) Ma danu, “dala ita davaria negadiai, namona be taunimanima ibounai dekenai kara namo ita karaia, to gau badana be abidadama lalonai idia noho tadikaka bona taihu dekenai, kara namo ita hahedinaraia.” (Gal. 6:​10, NW; Heb. 13:⁠16) Kongrigeisen taudia ibounai​​—⁠tadikaka taihu matamatadia bona burukadia​​—⁠be durua idia henia diba, kongrigeisen eiava “tauanina be lalokau dekena amo ia tubu daekau noho” totona.

Danu iseda diba, goada bona kohu o moni amo kongrigeisen ita durua, hahemauri gaukarana ita karaia hebou totona. Iesu ia gwau: “Gau momo umui abia vadaeni, davana lasi.” Vadaeni, edena bamona ita kara be namo? Iesu ia gwau: “Gau momo do umui henia, davana lasi.” (Mat. 10:⁠8) Unai dainai, Basileia harorolaia bona hahediba taudia halaoa gaukarana ita durua be namo. (Mat. 24:14; 28:​19, 20) Oi be hegeregere unai gaukara ruaosi oi durua totona, a? Iesu ese ia kikilaia vabu oi laloatao. Ia henia gauna be bada lasi, to Iesu ia gwau ia henia gauna ese ma haida idia henia gaudia idia hereaia. Ia dekenai ia noho gauna ibounai ia henia.​​—⁠2 Kor. 8:​1-5, 12.

Lalohadai Maorona Bona Abia Karana

To, reana nega haida kongrigeisen ena heduru oi abia be namo. Inai tanobada dikana ai metau momo oi haheaukalaia totona, kongrigeisen ese ia henia heduru oi abia dae be namo. Iehova be lalokau tadikaka haida ia henia, ‘ena kongrigeisen do idia hakaua’​​—⁠idia ese hisihisi bona hahetoho lalonai oi idia durua diba. (Kara 20:​28, NW ) Hekwakwanai negadiai, elda bona kongrigeisen taudia ma haida idia ura oi idia hagoadaia, durua bona gimaia.​​—⁠Gal. 6:2; 1 Tes. 5:​14.

To kongrigeisen taudia amo heduru oi abia neganai, lalohadai maorona oi abia be namo. Nega ibounai mai moale ida unai bamona heduru oi abia dae. Namona be oi abia dae unai be Dirava ena hebogahisi karana. (1 Pet. 4:​10) Dahaka dainai? Badina ita ura lasi tanobada taudia edia kara ita tohotohoa​​—⁠Dirava amo gau idauidau idia abia to idia tanikiu lasi.

Lalohadai Maorona

Paulo be Filipi kongrigeisen ia tore henia neganai, Timoteo be inai bamona ia herevalaia: “Lau dekenai ta ia noho lasi Timoteo hegeregerena, ia ese umui do ia durua momokani.” Paulo ma ia gwau: “Badina ma haida be sibodia edia ura idia tahua noho, to Keriso Iesu ena ura idia tahua lasi.” (Fili. 2:​20, 21) Unai hereva ita laloa bona ita henanadai: Dahaka ita karaia diba “sibona eda ura” ita laloa momo lasi totona?

Bema haida ita noia edia nega idia henia eda hekwakwanai idia hamaoromaoroa totona, namona be idia ita doria lasi unai bamona idia karaia totona. Dahaka dainai? Inai haheitalai ita laloa: Bema hekwakwanai ta ita davaria dainai tadikaka ta be moni haida ia henia, ita be ia do ita tanikiu henia, ani? Momokani, ita be tadikaka do ita doria lasi moni ia henia haraga totona. Unai hegeregerena, nega momo iseda tadikaka haida be mai edia moale ida ita idia durua, to namona be lalohadai maorona ita abia, ita gwau lasi idia ese edia nega idia henia ita idia durua be maoro, lasi. Hekwakwanai negadiai iseda tadikaka taihu ese heduru idia henia neganai, ita ura idia be mai edia moale ida unai bamona idia karaia.

Namona be oi diba, emu tadikaka taihu be hanaihanai idia hegaegae, mai edia moale ida oi idia durua totona. To, nega haida idia henia heduru be emu ura hegeregerena lasi. Bema unai ia vara, namona be oi diba hahetoho idauidau lalonai Iehova be oi do ia durua, salamo torea tauna dekenai ia karaia bamona.​​—⁠Sal. 116:​1, 2; Fili. 4:​10-​13.

Unai dainai, metau bona hekwakwanai negadiai, namona be Iehova ia henia heduru gaudia ibounai be mai moale ida oi abia dae. (Sal. 55:22) Ia ura unai bamona oi karaia. To danu, Iehova ia ura oi be ‘mai moale danu oi henia tauna.’ Unai dainai, namona be ‘sibona emu laloa, emu laloa hegeregerena’ oi dekenai ia noho gauna ibounai oi henia, tomadiho momokani oi durua totona. (2 Kor. 9:​6, 7) Unai dala amo oi be nega tamona gau rua oi karaia diba​​—⁠mai moale ida abia bona mai kudouna ibounai ida henia.

[Box/Pictures on page 31]

“Lohiabada dekenai dahaka do lau henia, iena hariharibada ibounai lau dekenai ena davana?”​—⁠⁠Sal. 116:⁠12

▪ “Dala ita davaria negadiai, namona be taunimanima ibounai dekenai kara namo ita karaia”

▪ Ma haida oi hagoadaia Dirava idia hesiai henia noho totona

▪ Emu noho dalana hegeregerena hahediba taudia halaoa gaukarana oi durua