Dirava Ia “Noho Hegaegae Dika Gwauatao Totona”

1-3. (a) Salamo torea tauna Davida ese dahaka metau ia huaia, bona edena dala ai ena lalohisihisi kudouna hanamoa dalana ia davaria? (b) Ita kara dika neganai dahaka be metau gauna ta bamona ita huaia, to Iehova ese edena dala ai ita ia hagoadaia?

SALAMO torea tauna Davida, ia gwau: “Lau mamia lau karaia kereredia ese lau idia hadikaia noho. Idia be metau badana ta bamona, lau huaia diba lasi. Lau manoka bona egu hemami ia dika momokani.” (Salamo 38:4, 8) Davida be lalomamina dikana ena metau ia diba. To ena lalohisihisi kudouna hanamoa dalana ia davaria. Ia laloparara ena be Iehova ese kara dika ia inai henia, to Ia ese kara dika tauna ia inai henia lasi, bema unai tauna ia helalo-kerehai momokani bona ena dala kererena ia rakatania. Davida ia diba momokani, Iehova be mai ena ura ida helalo-kerehai taudia dekenai hebogahisi ia hahedinaraia. Ia gwau: “Iehova e, . . . oi noho hegaegae dika gwauatao totona.”​—Salamo 86:5.

² Kara dika ita karaia neganai, reana ita danu be unai kara dainai lalohisihisi ena metau ita huaia. Unai bamona mamina dikana be gau namona. Ita ia doria diba kara ta ita karaia iseda kerere ita hamaoromaoroa totona. To kara dika dainai ita lalohisihisi bada be mai ena dika. Iseda kudouna ese ita ia kota henia bamona, ita laloa Dirava ese eda dika ibounai do ia gwauatao lasi, herevana ita helalo-kerehai momokani. Bema ita “lalohisihisi” bada reana Satani ese unai do ia gaukaralaia, unai amo do ita lalomanoka bona Iehova ita rakatania, badina ita mamia Iehova ena matanai ita be anina lasi bona ita hegeregere lasi Ia ita hesiai henia totona.​—2 Korinto 2:5-11.

³ To Iehova be unai bamona ita ia laloa, a? Lasi! Iehova ese ena lalokau ia hahedinaraia dalana ta be iseda dika ia gwauatao. Iena Hereva lalonai ita ia hagoadaia, kerere ita gwauraia hedinarai bona ita helalo-kerehai neganai, mai ena ura ida iseda kara dika do ia gwauatao. (Aonega Herevadia 28:13) Bema ita laloa Iehova ese iseda kerere do ia gwauatao lasi, namona be kara dika ia gwauatao ena badina bona edena bamona unai ia karaia ita tahua.

 4. Iehova be dahaka ia diba, bona unai dainai edena dala ai ita ia kara henia?

⁴ Iehova ia diba iseda goada be mai ena hetoana. Salamo 103:14 ia gwau: “Ia be ita vara dalana ia diba namonamo, Ia laloatao ita be kahu sibona.” Iehova ia laloaboio lasi ita be kahu sibona, bona ita goevadae lasi dainai ita manoka. Inai hereva “Ia be ita vara dalana ia diba namonamo” ese ita ia hadibaia, Baibel ese Iehova be uro karaia tauna ida ia hahegeregerea bona ita be ia karaia uro bamona. (Ieremia 18:2-6) Uro Karaia Tauna Badana ese ita goevadae lasi taudia iseda manoka hegeregerena, bona ena hakaua dalana ita badinaia eiava badinaia lasi hegeregerena ai, ita ia kara henia.

 5. Kara dika ese ita ia dogoatao auka karana be Roma bukana ese edena bamona ia gwauraia?

⁵ Iehova ia laloparara kara dika be mai ena siahu. Iena Hereva ia gwau kara dika ena siahu ese taunimanima ia dogoatao auka. Kara dika ena siahu be edena bamona? Roma bukana lalonai, aposetolo Paulo ia gwau: Ita be “kara dika henunai ita noho,” tuari taudia be ofesa ta henunai idia noho hegeregerena (Roma 3:9); kara dika ese taunimanima ia “lohia” king bamona (Roma 5:21); iseda lalona ai ia “noho” (Roma 7:17, 20); ena “taravatu” be iseda lalona ai ia gaukara, ita ia biagua toho. (Roma 7:23, 25) Kara dika ena siahu iseda goevadae lasi tauanina dekenai be ia goada momokani!​—Roma 7:21, 24.

6, 7. (a) Edia kudouna amo idia sori momokani bona Iehova ena hebogahisi idia tahua taudia be Iehova ese edena bamona ia lalodia? (b) Dahaka dainai Dirava ena hebogahisi karana ita laloa maragi lasi be namo?

⁶ Unai dainai, Iehova ia diba kamonai karana goevadaena ita hahedinaraia diba lasi, herevana mai iseda kudouna ibounai ida ita ura Ia ita kamonai henia. Mai lalokau ida ita ia hadibaia bema iseda kudouna amo ita sori momokani neganai, iseda dika do ia gwauatao. Salamo 51:17 ia gwau: “Kudouna ia makohi karana be boubou gauna bamona Dirava ese ia abia dae, Dirava e, helalo-kerehai bona manau kudouna oi dadaraia lasi.” Iehova ese ena “kudouna ia makohi” bona ena kerere ia lalohisihisilaia tauna do ia negea eiava dadaraia lasi.

⁷ Unai ena anina be Dirava ena hebogahisi karana ita laloa maragi, bona hanaihanai ekskius ita karaia, ita gwau ita be goevadae lasi taudia dainai kara dika ita karaia, a? Lasi! Iehova ena hemami ese Ia ia biagua lasi. Iena hebogahisi be mai ena hetoana. Lalo-auka taudia, mai edia ura ida kara dika rohorohodia idia karaia bona idia helalo-kerehai lasi taudia unai, edia dika do ia gwauatao lasi. (Heberu 10:26) To, ia itaia ta be ena kara dika dainai ena kudouna amo ia sori momokani neganai, ia noho hegaegae ena dika ia gwauatao. Namona be Baibel ese Iehova ena lalokau karana hereadaena ia gwauraia dalana, mani ita laloa.

 8. Iehova ese iseda dika ia gwauatao neganai, inai be hegeregere dahaka ia karaia, bona unai dainai iseda hemami be edena bamona?

⁸ Ia helalo-kerehai tauna, Davida, ia gwau: “Vadaeni oi dekenai egu kara dika lau gwauraia hedinarai, Egu kerere lau hunia lasi. . . Bona oi ese egu kara dika oi gwauatao.” (Salamo 32:5) Inai hereva “gwauatao,” be Heberu gado herevana ta amo idia hahanaia, ena anina be “abia isi,” eiava “huaia.” Unai siri lalonai ena anina be “lalona ena hisihisi, kara dika, bona kara kerere” abia oho. Unai dainai, inai be hegeregere Iehova ese Davida ena kara dika ia abia isi bona ia huaia oho. Momokani, unai ese Davida ena lalohisihisi ia hamaragia. (Salamo 32:3) Iesu ena mauri davalaia boubouna idia abidadama henia kara dika taudia be Dirava ese edia kara dika do ia gwauatao, ita danu be unai ita abidadama henia momokani diba.​—Mataio 20:28.

 9. Iehova ese iseda kara dika be ita amo ia atoa siri ena daudau be edena bamona?

⁹ Davida ese dala ma ta ai Iehova ena dika gwauatao karana ia herevalaia: “Dina ia daekau kahana be dina ia diho kahana amo ia daudau hegeregerena, Ia ese iseda kara dika be ita amo ia kokia lao daudau.” (Salamo 103:12) Dina be ist kahana amo ia daekau bona west kahana ai ia diho. Ena daudau be edena bamona? Ita gwau diba dina ena daekau kahana be daudau herea dina ena diho kahana amo; unai kahana ruaosi idia hedavari diba lasi. Diba bada tauna ta ia gwau unai hereva ena anina be, “ia be daudau herea momokani; daudau masemase.” Davida be ia torea herevana amo ita ia hadibaia, Iehova ese iseda kara dika ia gwauatao neganai, ia be hegeregere iseda kara dika be ita amo ia kokia bona daudau herea momokani ia atoa.

10. Iehova ese iseda kara dika ia gwauatao neganai, dahaka dainai namo lasi ita laloa iseda kara dika ena miro be iseda mauri ibounai lalonai do ia noho?

¹⁰ Nega ta dabua kurokurona amo miro oi kokia toho, a? Herevana oi hekwarahi bada oi kokia totona, to miro ia do noho. Iehova ena hereva, dika gwauatao karana dekenai mani oi laloa: “Ena be emui kara dika be kakakaka momokani, to do ia kurokuro momokani, sinou bamona, eiava emui kara dika be dabua kakakakana bamona, to wulu goevana bamona do ia lao.”a (Isaia 1:18) Ita sibona eda goada amo kara dika ena miro ita kokia diba lasi. To, Iehova be ia hegeregere iseda dika, kakakaka momokani gaudia, be sinou kurokurona eiava mamoe ena huina kurokurona bamona ai ia halaoa diba. Iehova ese iseda kara dika ia gwauatao neganai, namo lasi ita laloa iseda kara dika ena miro be iseda mauri ibounai lalonai do ia noho.

11. Edena dala ai Iehova ese iseda kara dika be iena murina dekenai ia negea bamona?

¹¹ Hesekaia be gorere dikana amo ia namo murinai, ia ese tanikiu anena ta ia torea, unai ane amo Iehova ia hamaoroa: “Emu vairana amo egu kara dika ibounai oi kokia vadaeni.” (Isaia 38:17) Unai laulau herevana ia hahedinaraia, Iehova ese ia helalo-kerehai kara dika tauna ena dika ia abia bona Iena murina dekenai ia negea, unai amo Ia ese do ia itaia lasi bona ia laloa lou lasi. Buka ta ia gwau, unai siri ia hahedinaraia lalohadaina be inai: “Oi ese [egu kara dika] oi kokia bona ia be hegeregere kara dika ta lau karaia lasi bamona.” Unai be hagoadaia herevana, ani?

12. Peroveta tauna Mika ese edena dala ai ia hahedinaraia Iehova be iseda kara dika ia gwauatao neganai, Ia kokia momokani?

¹² Hanamoa lou gwauhamatana ai, peroveta tauna Mika ia diba momokani Iehova ese ena bese taudia huanai idia helalo-kerehai taudia edia dika do ia gwauatao, ia gwau: “Edena Dirava be oi bamona, Iena orena taudia, . . . edia dika ia laloaboio? . . . Oi ese edia kara dika ibounai be davara dekenai do oi negea.” (Mika 7:18, 19) Baibel negadia ai idia noho taudia dekenai unai hereva ena anina mani oi laloa. “Davara dekenai do oi negea” diho gauna be ta ese ia abia lou diba, a? Mika ena hereva ena anina be Iehova ese iseda kara dika ia gwauatao neganai, ia kokia momokani.

13. Iesu be dahaka haheitalai ia gaukaralaia bona ena anina be dahaka?

¹³ Iesu ese abitorehai bona henitorehai taudia edia kara amo Iehova ena gwauatao karana ia haheitalaia. Hegeregere, Iesu ia gwau namona be ita guriguri, ita gwau: “Mani emai kara dika oi gwauatao.” (Mataio 6:12, futnout) Unai dainai Iesu ia gwau kara dika be abitorehai bamona. (Luka 11:4) Ita kara dika neganai, Iehova dekenai ita be “abitorehai” taudia. Grik herevana iniseniai idia hahanaia “gwauatao,” ena anina be “abitorehai ia laloa lasi, ia rakatania, badina abia lou totona ia noia lasi.” Ita gwau diba, Iehova ese iseda dika ia gwauatao neganai, iseda abitorehai ia gwauatao bona unai kerere be iseda akaun dekenai ia noho lasi bamona. Unai dainai helalo-kerehai kara dika taudia edia lalona ia goada diba. Iehova ese ia gwauatao vadaeni abitorehai ena davana do ia noia lou lasi!​—Salamo 32:1, 2.

14. Inai hereva “emui kara dika do ia kokia” ese edena dala ai ita ia durua Iehova ena gwauatao karana ita lalopararalaia totona?

¹⁴ Iehova ena dika gwauatao karana be Kara 3:19 ese ma ia gwauraia: “Umui helalo-kerehai, bona Dirava dekenai umui giroa, unai amo emui kara dika do ia kokia.” Unai hereva “kokia” idia hahanaia Grik herevana ta amo, bona unai hereva ena anina be “idia dahua oho, . . . koua, eiava hadikaia.” Diba bada taudia haida idia gwau, ia hahedinaraia lalohadaina be hegeregere ta ese ia torea gauna ia kokia. Edena bamona unai ia vara diba? Idaunegai, ink be lahi ena guma, bona tubutubu gaudia edia ranu ida idia mikisia bena idia karaia. Tau ta be unai bamona ink ia gaukaralaia murinai, dabua pariparina amo ena toretore ia dahua oho diba. Unai ese Iehova be kerere gwauatao vaitani karana ia laulaulaia namo herea. Iseda kara dika ia gwauatao neganai, inai be hegeregere dabua pariparina ia abia bona ia dahua oho.

15. Iehova ia ura Ia dekenai dahaka ita diba?

¹⁵ Unai laulau hereva idauidau ita laloa neganai, ia hedinarai goevagoeva Iehova ia ura ita diba, ia noho hegaegae iseda kara dika ia gwauatao totona, bema ita helalo-kerehai momokani. Namo lasi ita laloa unai kara dika do ia laloa noho bona gabeai unai dika dainai ita do ia kota henia. Badina Baibel ese Iehova ena hebogahisi karana hereadaena ta ia hahedinaraia: Kara dika ia gwauatao neganai, unai kerere ia laloaboio.

16, 17. Baibel ia gwau Iehova ese iseda kara dika ia laloaboio neganai, unai ena anina be dahaka, bona dahaka dainai unai bamona oi haere?

¹⁶ Iehova ese gwaubou matamatana lalonai idia noho taudia ia gwauhamata henia, ia gwau: “Lau ese edia kerere do lau gwauatao, bona edia kara dika do lau laloatao lou lasi.” (Ieremia 31:34) Unai hereva ena anina be Iehova ese kerere ta ia gwauatao neganai unai kerere ia laloatao diba lasi, a? Lasi, ena anina be unai lasi. Idia kara dika bena Iehova ese edia dika ia gwauatao taudia momo edia sivarai be Baibel ese ia gwauraia, Davida ena danu. (2 Samuela 11:1-17; 12:13) Oibe, Iehova ese idia karaia kerere ia laloa diba. Edia kara dika, edia helalo-kerehai karana bona Dirava ese edia kerere ia gwauatao sivaraidia be idia torea iseda namo totona. (Roma 15:4) Vadaeni, Baibel ia gwau Iehova ese helalo-kerehai taudia edia kara dika ia “laloatao lou lasi” neganai, ena anina be dahaka?

¹⁷ Heberu herevana idia hahanaia “do lau laloatao lou lasi” ena anina be guna idia vara gaudia laloa lou karana sibona lasi. Buka ta (Theological Wordbook of the Old Testament) ia gwau ena “anina ma ta be kara ta karaia.” Unai dala ai, kara dika “laloatao” ena anina be kara dika taudia dekenai kara ta do ia karaia. (Hosea 9:9) To, Iehova ia gwau, “Lau ese edia kerere do lau gwauatao, bona edia kara dika do lau laloatao lou lasi” neganai, ita ia hadibaia helalo-kerehai tauna ena kara dika ia gwauatao murinai, vaira negana ta ai unai kara dika dainai do ia panisia lasi. (Esekiela 18:21, 22) Unai dainai Iehova ese kara dika ia laloatao lasi ena anina be, ia gwauraia loulou lasi, ita ia gwau henia eiava ia panisia loulou totona. Iseda Dirava be iseda dika ia gwauatao bona ia laloaboio karana ita diba dainai unai ese ita ia hagoadaia, ani?

18. Iehova ia noho hegaegae kara dika ia gwauatao ena anina be ia helalo-kerehai tauna ese ena kara kerere ena davana do ia abia lasi, a?

¹⁸ Iehova ia noho hegaegae kara dika ia gwauatao ena anina be ia helalo-kerehai tauna ese ena kara kerere ena davana do ia abia lasi, a? Kara dika ita karaia neganai anina dikana do ita davaria. Paulo ia gwau: “Tau ta ese ia hadoa gauna, unai gauna sibona do ia abia.” (Galatia 6:7) Reana iseda kara dika dainai hekwakwanai idauidau do ita davaria diba. To namo lasi ita laloa Iehova ese iseda kerere ia gwauatao murinai, ita ia hadikaia karana ta ia karaia. Hekwakwanai idia vara neganai, namo lasi Keristani tauna ta ia laloa, ‘Reana Iehova be egu kerere gunadia dainai lau ia panisia.’ (Iamesi 1:13) To, Iehova ese iseda kara kerere dainai idia vara dika ibounai amo ita ia gimaia lasi. Headava hadokoa, rogorogo kava, pokese goreredia, ma haida ese oi idia abidadama bona matauraia lasi karana—unai hekwakwanai ibounai be iseda kara dika dainai idia vara diba gaudia. Ita laloatao, ena be Iehova ese Davida ena kara dika Bataseba bona Uria dekenai be ia gwauatao, to unai murinai idia vara gau dikadia be Davida ena amo ia koua lasi.​—2 Samuela 12:9-12.

19-21. (a) Levitiko 6:1-7 ia herevalaia taravatuna be edena dala ai kara dika tauna bona ia hahisia tauna ia durua? (b) Bema iseda kara amo ma haida ita hahisia, Iehova do ia moale bema dahaka ita karaia?

¹⁹ Iseda kara dika dainai reana hekwakwanai ma haida idia vara diba danu, unai be momokani bema iseda kara amo ma haida ita hahisia. Hegeregere, Levitiko karoa 6 ai ia noho sivaraina mani oi laloa. Unuseniai, Mose ena Taravatu ese tau ta be kara dika badana ta ia karaia sivaraina ia gwauraia, hegeregere Israela tauna ma ta ena kohu be dagedage eiava koikoi karana amo ia henaoa. Bena unai kerere tauna ia hereva goada ia gwau unai ia karaia lasi, bona ena kerere ia hunia danu. Hamomokania gaudia be lasi dainai ia idia panisia lasi. To gabeai, unai kara dika tauna ena lalomamina ese ia samania bona ena kara dika ia gwauraia hedinarai. Dirava be iena kerere ia gwauatao totona, gau toi ia karaia be namo: ia abia gaudia ibounai ia henia lou, ia henaoa tauna dekenai atoa kau monina 20 pesen do ia henia, bona nanigosi tau, be kara koikoi boubouna ta bamona do ia henia. Bena taravatu ia gwau: “Hahelaga tauna ese Iehova ena vairanai unai tau ena kara dika davana do ia karaia, bona ia karaia kereredia be Dirava ese do ia gwauatao.”​—Levitiko 6:1-7.

²⁰ Unai taravatu be Dirava ena hebogahisi amo ia henia gauna. Taravatu ese ena kohu ia haboioa tauna ia durua ena kohu ia abia lou totona bona ia moale badina kerere tauna be ena kara dika ia gwauraia hedinarai. To danu, unai taravatu ese kara dika tauna ia durua dainai ena lalomamina ese ia doria bona ena kerere ia gwauraia hedinarai bona ia hamaoromaoroa. Momokani, bema unai ia karaia lasi, Dirava ese ena kerere do ia gwauatao lasi.

²¹ Ena be ita be Mose ena Taravatu henunai lasi, to unai ese ita dekenai Iehova ena laloa dalana, bona iena lalohadai gwauatao karana ia hahedinaraia. (Kolose 2:13, 14) Bema iseda kara ese ma haida ia hahisia, Dirava do ia moale bema kara ta ita karaia unai kerere ita hamaoromaoroa. (Mataio 5:23, 24) Unai ena anina be iseda kara dika ita gwauraia hedinarai, ita gwau ita kerere, bona ita hahisia tauna ita sori henia. Bena Iesu ena boubou dainai Iehova ita noia diba, bona do ita mamia Dirava ese iseda kerere ia gwauatao.​—Heberu 10:21, 22.

22. Iehova ese kara dika ia gwauatao neganai, dahaka ia karaia danu?

²² Lalokau tamana ta bamona, Iehova ese kerere do ia gwauatao neganai, matahakani do ia henia danu. (Aonega Herevadia 3:11, 12) Ia helalo-kerehai Keristani tauna ese reana elda, hesiai tauna ena maduna, eiava painia gaukarana do ia haboioa. Reana unai nega lalonai ia laloa bada hahenamo idauidau ia haboioa dainai do ia lalohisihisi. To namo lasi ita laloa Iehova ese ena kerere do ia gwauatao lasi. Namona be ita laloatao, unai matahakani karana ese ia hamomokania Iehova be ita ia lalokau henia. Unai ita abia dae bona ita badinaia neganai, namo do ita davaria.​—Heberu 12:5-11.

23. Dahaka dainai ita gwau lasi Iehova ese ita do ia hebogahisi henia lasi, bona dahaka dainai ena hebogahisi karana ita tohotohoa be namo?

²³ Ita diba iseda Dirava ia noho hegaegae iseda ‘kara dika ia gwauatao’ totona be moale gauna! Herevana kerere ita karaia, to namo lasi ita laloa Iehova be ita do ia hebogahisi henia diba lasi. Bema ita helalo-kerehai momokani, unai kerere ita hamaoromaoroa toho, bona Iehova ita noia Iesu ia bubua rarana amo iseda kerere ia gwauatao totona, ita diba momokani Iehova ese iseda kara dika do ia gwauatao. (1 Ioane 1:9) Ma haida ita kara henia lalonai, namona be Iehova ena gwauatao karana ita tohotohoa. Badina, bema Iehova, ia kara dika diba lasi tauna, be mai lalokau ida iseda kerere ia gwauatao diba, namona be ita gaukara goada ta ta ita gwauatao totona, ani?