Ita Laloparara Iesu be Dirava Ena Ura Ia Karaia Tauna Hereadaena

“Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.”​​—⁠IOA. 14:⁠6.

1, 2. Dahaka dainai Dirava ena ura ai Iesu ena gaukara hereadaedia ita laloa bada be namo?

LAGANI tausen momo lalonai, taunimanima momo idia ura ma haida amo idia idau, to haida sibona idia kwalimu. Ma haida be gaukara haida idia karaia bona idia gwau idia be hereadae. To, Iesu Keriso, Dirava ena Natuna, ena gaukara ibounai be hereadae.

² Dahaka dainai Iesu ena gaukara hereadaedia ita laloa bada be namo? Badina unai ese ita do ia durua iseda guba Tamana, Iehova ita tura henia totona! Iesu ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.” (Ioa. 14:6; 17:⁠3) Iesu ena gaukara hereadaedia haida mani ita itaia. Unai amo do ita laloparara Iesu be Dirava ena ura ia karaia tauna hereadaena.

“Natuna Tamona Sibona”

3, 4. (a) Dahaka dainai ita gwau diba Iesu be Dirava ena Natuna hereadaena? (b) Edena dala ai Iesu ena gaukara be hereadae?

³ Iesu be Dirava ena natuna sibona lasi. Baibel ia gwau, Iesu be Dirava ena “Natuna tamona sibona.” (Ioa. 3:​16, 18) Greek herevana idia hahanaia “tamona sibona” ena anina be “hereadae.” Iehova ena lauma natudia be milioni momo herea idia noho. To, edena dala ai Iesu be “hereadae”?

⁴ Iesu be ena Tamana sibona ese ia karaia dainai, ia be hereadae. Ia be vara guna Natuna. Momokani, Iesu be Dirava ese ia havaraia “gaudia ibounai edia roboana.” (Kol. 1:​15, BHğ) Ia be “Dirava ia karaia gaudia ena badina momokani.” (Apok. 3:​14) Iesu ia karaia gaudia be hereadae. To, ia be Havaraia Tauna do ita gwauraia lasi, badina Iehova ese ia gaukaralaia gau ibounai ia karaia totona. (Ioane 1:3 duahia.) Aposetolo Paulo ia gwau: “Ita be mai iseda Dirava tamona, ia be Tamana, gau ibounai ia dekena amo idia vara. Ia dainai ita mauri noho. Bona Lohiabada danu be tamona, Iesu Keriso. Ia ese gau ibounai ia karaia. Ia ese mauri ita dekenai ia henia noho.”​​—⁠1 Kor. 8:⁠6.

 5. Edena dala ai Baibel ese ia hahedinaraia Iesu sibona be hereadae?

⁵ To, gau ma haida dekenai danu Iesu be tau hereadaena. Baibel be Iesu ena dagi hereadaedia momo ia gwauraia, unai dagi ese idia hahedinaraia Iesu be Dirava ena ura ia karaia totona gaukara idauidau ia karaia. Hari, namona be Keristani Greek Revarevadia lalonai, Iesu ena dagi ladadia 5 edia anina ita itaia.

“Hereva”

 6. Dahaka dainai Baibel ai Iesu idia gwauraia “Hereva” be maoro?

⁶ Ioane 1:​14 duahia. Dahaka dainai Baibel ia gwau Iesu be “Hereva”? Iehova be aneru bona taunimanima ia karaia neganai, Iesu ese unai dagi gaukarana ia karaia matamaia. Hegeregere, Iehova be iena Natuna ia gaukaralaia guba taudia bona tanobada taudia dekenai Iena hakaua herevadia ia halasia totona. Iesu be Hereva, o Dirava ena gwaukau tauna. Unai dainai, ia ese Iuda taudia ia hereva henia neganai, ia gwau: “Lauegu hadibaia herevadia be lauegu lasi, to lau ia siaia Diravana ena. Tau ta bema ia ura Dirava ena ura ia karaia neganai, ia ese lauegu hadibaia herevadia do ia diba, Dirava dekena amo idia mai, o lau sibona dekena amo.” (Ioa. 7:​16, 17) Ena be Iesu be guba dekenai ia giroa lou, to unai dagi ladana “Dirava ena Hereva” ia dogoatao noho.​​—⁠Apok. 19:​11, 13, 16.

 7. Edena dala ai Iesu, “Hereva” unai, ena manau karana ita tohotohoa diba?

⁷ Iesu ena dagi, Hereva unai, mani ita laloa. Ena be Iehova ese ia havaraia gaudia ibounai huanai Iesu ena aonega be bada, to Iesu be iena aonega dekenai ia tabekau lasi. Ia be ena Tamana ese ia hadibaia hegeregerena ia hereva. Ia be sibona ena ladana ia abia isi lasi, to Iehova ia hanamoa. (Ioa. 12:50) Ia be haheitalai namona ita tohotohoa totona! Ita danu be sivarai namona ita harorolaia, bona unai be hahenamo badana. (Roma 10:15) To Iesu ena manau karana ita laloa be namo, badina unai ese ita do ia durua Iehova ena hereva sibona ita harorolaia totona. Baibel amo mauri herevadia ita herevalaia neganai, ita ura lasi Baibel ena hereva latanai hereva ma haida ita atoa kau.​​—⁠1 Kor. 4:​6, NW.

“Amen”

8, 9. (a) Inai hereva “amen” ena anina be dahaka, bona dahaka dainai Iesu idia gwauraia “Amen”? (b) Iesu be “Amen” dainai, edena dala ai iena maduna ia huaia?

⁸ Apokalupo 3:​14 duahia. Dahaka dainai Baibel ia gwau Iesu be “momokani tauna” o “amen”? Heberu gado herevana (ʼa·man) idia hahanaia “momokani” ena anina ta be “oibe” eiava “unai bamona do ia vara momokani.” Unai Heberu herevana (ʼa·man eiava ne·e·man) be idia gaukaralaia Iehova ena kara ta idia herevalaia totona. (Deu. 7:9; Isa. 49:⁠7) Bema Iesu be “Amen,” vadaeni edena dala ai unai be dagi hereadaena? Mani 2 Korinto 1:​19, 20 ena hereva ita itaia, ia gwau: “Iesu Keriso, Dirava ena Natuna umui dekenai ai harorolaia, be ‘oibe’ bona ‘lasi’ lasi, to ia be ‘oibe’ sibona. Badina Keriso be Dirava ena gwauhamata ibounai edia ‘oibe.’ Bona inai anina be, Dirava ita hanamoa neganai, ‘Amen’ ita gwauraia, inai be Iesu Keriso dainai.”

⁹ Iesu be Dirava ena gwauhamata ibounai edia “Amen.” Tanobada ai Iesu be kara namodia ia karaia bona ena mase amo ena mauri ia bouboulaia neganai, ia hamomokania ia be Iehova Dirava ena gwauhamata ibounai ia hagugurua. Iesu ese Dirava ia badinaia noho karana amo Satani ena hereva ia hakoikoia​—⁠badina Baibel bukana Iobu lalonai Satani ia gwau, Dirava ena hesiai taudia be hisihisi o hahetoho lalonai Dirava do idia badinaia lasi. (Iobu 1:​6-​12; 2:​2-7) Dirava ena Natuna ese aneru bona taunimanima ia hereaia, badina ia ese Satani ena hereva ia hakoikoia. Danu, Iesu ese iena Tamana ia durua bona ia hamomokania Iehova ese guba bona tanobada ia lohiaia be maoro.

10. Edena dala ai Iesu, “Amen” unai, ena kara hereadaena ita tohotohoa diba?

¹⁰ Edena dala ai Iesu, “Amen” unai, ena kara hereadaena ita tohotohoa diba? Namona be Iehova ita badinaia noho bona ita hahedinaraia Iehova ese guba bona tanobada ia lohiaia be maoro. Unai bamona ita karaia neganai, ita be Aonega Herevadia 27:11 ena hereva ita badinaia, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.”

“Taravatu Matamata Ia Havaraia Tauna”

11, 12. Edena dala ai Iesu be Taravatu Matamata Ia Havaraia Tauna hereadaena?

¹¹ Timoteo Ginigunana 2:​5, 6 duahia. Iesu be “Dirava bona taunimanima ia hakapudia tauna.” Ia be “taravatu matamata ia havaraia Tauna.” (Heb. 9:​15; 12:24) To danu, Baibel ia gwau Mose be “Taravatu ia mailaia” tauna. (Gal. 3:​19) Vadaeni edena dala ai Iesu be Taravatu Matamata Ia Havaraia Tauna hereadaena?

¹² Inai Greek herevana idia hahanaia “taravatu matamata ia havaraia tauna” (English, mediator) be kota taudia ese idia gaukaralaia herevana. Iesu be Taravatu Matamata Ia Havaraia Tauna dainai, ia ese dala ia kehoa bese matamatana ta ia vara bona “Dirava ena Israela” ai ia lao. (Gal. 6:​16) Unai taudia be lauma helaga ese ia horoa Keristani taudia, bona idia be guba ena “king ena hahelaga taudia.” (1 Pet. 2:9; Eso. 19:⁠6) Mose, Taravatu ia mailaia tauna, be unai bamona bese ia havaraia lasi.

13. Taravatu Matamata Ia Havaraia Tauna Iesu be edena bamona ena maduna ia gaukaralaia?

¹³ Iesu be Taravatu Matamata Ia Havaraia Tauna dainai, ena maduna be edena bamona ia gaukaralaia? Iehova ese Iesu ena rara amo, taravatu matamata lalonai idia vareai taudia ia hoia. Unai dala amo Iehova ese idia ia gwauraia kara maoromaoro taudia. (Roma 3:​24; Heb. 9:​15) Dirava ese gwauhamata matamatana lalonai idia ia boiria bona idia be guba ai king ena hahelaga taudia ai do idia lao! Iesu be Taravatu Matamata Ia Havaraia Tauna dainai, ia ese idia ia durua Dirava vairanai idia goeva noho totona.​​—⁠Heb. 2:​16.

14. Dahaka dainai Keristani taudia ibounai, herevana edia helaro be guba o tanobada ai, ese Taravatu Matamata Ia Havaraia Tauna Iesu ena maduna idia laloa bada be namo?

¹⁴ To taravatu matamata lalonai idia noho lasi taudia​​—⁠tanobada ai mauri hanaihanai do idia abia taudia​​—⁠be edena bamona? Herevana idia be taravatu matamata lalonai idia noho lasi, to unai taravatu matamata dainai namo do idia abia. Dirava be edia kara dika ia gwauatao, idia ia gwauraia kara maoromaoro taudia, bona ena turana ai ia halaodia. (Iam. 2:​23; 1 Ioa. 2:​1, 2) Herevana eda helaro be guba o tanobada ai, to badina namona dainai ita ta ta ese Taravatu Matamata Ia Havaraia Tauna Iesu ena maduna ita laloa bada.

“Hahelagaia Tauna Badana”

15. Edena dala ai Iesu be Hahelaga Tauna Badana hereadaena?

¹⁵ Idaunegai tatau momo be hahelaga tauna badana ena gaukara idia karaia, to Iesu be unai taudia ia hereaia. Edena dala ai? Paulo ia gwau: “Ia be Hahelagaia Taudia Badadia haida bamona lasi. Idia ese dina ibounai boubou gaudia idia henia, idia sibona edia kara dika totona guna, gabeai taunimanima edia kara dika totona. To Iesu be inai bamona ia karaia lasi. Ia ese boubou gauna tamona ia henia, nega tamona sibona. Badina be ia ese iena mauri be Dirava dekenai ia henia. Mose ena Taravatu ese mai edia manoka taudia ia abia hidi, Hahelagaia Tauna Badana ena dagi do idia karaia totona. To Dirava ena gwauhamata hereva helagana, Taravatu murinai ia hedinarai gauna, ese Dirava ena Natuna ia abia hidi inai dagi totona. Dirava ese iena Natuna ia hanamoa bada, unai dainai ia goeva momokani vadaeni, ela bona hanaihanai.”​​—⁠Heb. 7:​27, 28.a

16. Dahaka dainai Iesu ena boubou gauna be hereadae?

¹⁶ Iesu be goevadae tauna, guna Adamu ia goevadae hegeregerena. (1 Kor. 15:45) Unai dainai, Iesu sibona be ia hegeregere ena tauanina be nega tamona sibona ia bouboulaia totona. Mose ena taravatu henunai, dina ta ta ai taunimanima be boubou gauna idia henia. To, unai boubou gaudia bona hahelaga gaukara idia karaia taudia be Iesu ese do ia hagugurua gaudia idia laulaulaia. (Heb. 8:5; 10:⁠1) Iesu be helaga gaukaradia momo do ia karaia ela bona hanaihanai dainai, ia be Hahelaga Tauna hereadaena.

17. Dahaka dainai Hahelaga Tauna Badana Iesu ena maduna ita laloa bada, bona unai be edena bamona ita karaia diba?

¹⁷ Iesu be Hahelaga Tauna Badana bona ita ia durua noho Dirava ena lalonamo ita abia totona. Ia be Hahelaga Tauna Badana namona! Paulo ia gwau: “Ita be manoka dainai karadika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.” (Heb. 4:​15) Unai dainai, ‘ita sibona iseda mauri bona iseda ura do ita laloa lasi, to ita dainai ia mase, tauna ena ura do ita karaia.’​​—⁠2 Kor. 5:​14, 15; Luka 9:​23.

Gwauhamata “Garana”

18. Adamu ia kara dika murinai, Dirava be dahaka ia perovetalaia, bona Baibel ese edena dala ai ia hahedinaraia unai garana do ia mai?

¹⁸ Eden ai ia vara gauna murinai, toana be taunimanima ibounai be gau ibounai​—⁠Dirava tura henia karana, mauri hanaihanai, moale, bona Paradaiso​—⁠idia haboioa momokani dainai, Iehova Dirava be Hamauria Tauna ta ia gwauhamatalaia. Baibel ese ia gwauraia “garana.” (Gen. 3:​15, NW ) Lagani momo lalodiai, Baibel ese unai Garana ia perovetalaia. Ia be Aberahamo, Isako, bona Iakobo edia bese amo do ia mai. Danu, King Davida ena bese amo do ia mai.​​—⁠Gen. 21:12; 22:​16-​18; 28:14; 2 Sam. 7:​12-​16.

19, 20. (a) Gwauhamata Garana be daika? (b) Dahaka dainai ita gwau diba gwauhamata garana iharuana ia noho danu?

¹⁹ Unai gwauhamata garana be daika? Haere be Galatia 3:​16 ai ita davaria diba. (Duahia.) To, aposetolo Paulo be gabeai horoa Keristani taudia dekenai ia gwau: “Bema umui be Keriso ena taudia neganai, umui be Aberahamo ena natuna, bona Dirava ena gwauhamata gauna do umui davaria.” (Gal. 3:​29) Edena dala ai Keriso be gwauhamata garana, bona ma haida danu be unai garana taudia ai idia lao?

²⁰ Taunimanima milioni momo idia gwau idia be Aberahamo ena bese taudia, bona idia haida be peroveta taudia edia gaukara bamona idia karaia. Tomadiho orea haida idia gwau edia peroveta taudia be Aberahamo ena bese amo idia mai. To, idia ibounai be unai gwauhamata Garana taudia, a? Lasi. Aposetolo Paulo ese ia hahedinaraia bamona, Aberahamo ena bese amo idia mai taudia haida sibona be unai gwauhamata Garana taudia. Aberahamo ena natudia ma haida idia noho danu, to idia be unai gwauhamata Garana idia havaraia lasi. Isako ena bese sibona amo unai gwauhamata Garana ia vara. (Heb. 11:18) Iesu Keriso be unai gwauhamata Garana ginigunana, badina Baibel lalonai ia be Aberahamo ena bese taudia edia lista dekenai ia noho.b Aberahamo ena garana iharuana ai idia lao taudia ma haida be Baibel ese ia gwauraia “Keriso ena taudia.” Oibe, Iesu be peroveta herevadia ia hagugurua tauna hereadaena.

21. Dahaka dainai Iesu ese Iehova ena ura ia hagugurua daladia oi laloa bada?

²¹ Inai stadi lalonai ita itaia Iesu be Iehova ena ura ia karaia tauna hereadaena, bona unai amo dahaka ita dibaia? Idaunega amo ema bona hari, Iesu be tau hereadaena. Ia be hanaihanai mai manau ida iena Tamana ena ura ia karaia, bona ia sibona ena hairai ia laloa bada lasi. (Ioa. 5:​41; 8:​50) Ita dekenai ia be haheitalai namona! Iesu bamona, namona be ‘gau ibounai do ita karaia Dirava hanamoa totona.’​​—⁠1 Kor. 10:⁠31.

[Footnotes]

Oi Laloatao, A?

• Iesu ena dagi ladadia amo dahaka oi dibaia? (Rau 15 ai ia noho maua itaia.)

• Edena dala ai Iehova ena Natuna hereadaena ena haheitalai oi tohotohoa diba?

[Box/Picture on page 15]

Dirava Ena Ura Ia Karaia Tauna Hereadaena Ena Dagi Haida

◼ Natuna Tamona Sibona. (Ioa. 1:⁠3) Iesu be iena Tamana sibona ese ia karaia.

◼ Hereva. (Ioa. 1:​14) Iehova be iena Natuna ia gaukaralaia guba taudia bona tanobada taudia dekenai Iena hakaua herevadia ia halasia totona.

◼ Amen. (Apok. 3:​14; 2 Kor. 1:20) Tanobada ai Iesu be kara namodia ia karaia bona ena mase amo ena mauri ia bouboulaia neganai, ia hamomokania ia be Iehova Dirava ena gwauhamata ibounai ia hagugurua.

◼ Taravatu Matamata Ia Havaraia Tauna. (1 Tim. 2:​5, 6; Heb. 12:24) Iesu be Taravatu Matamata Ia Havaraia Tauna dainai, ia ese dala ia kehoa bese matamatana ta ia vara bona “Dirava ena Israela” ai ia lao. Unai taudia be lauma helaga ese ia horoa Keristani taudia, bona idia be guba ena “king ena hahelaga taudia.”​​—⁠Gal. 6:​16; 1 Pet. 2:⁠9.

◼ Hahelaga Tauna Badana. (Heb. 7:​27, 28) Iesu be goevadae tauna dainai, ia sibona be ia hegeregere ena tauanina be nega tamona sibona ia bouboulaia totona. Ia ese kara dika amo ita ia hagoevaia bona mase amo ita ia hamauria diba.

◼ Gwauhamata Garana. (Gen. 3:​15, NW ) Iesu Keriso be gwauhamata Garana ginigunana. Aberahamo ena garana iharuana ai idia lao taudia ma haida be Baibel ese ia gwauraia “Keriso ena taudia.”​​—⁠Gal. 3:​29.