Wole mer uns een situatsyoon foer xtele. Tuu pist een aarwayt am suuche fer tayn familye fersoriche. Tuu finst 2 aarwayte. Tuu tenkst iwer al ti informatsyoone: ti sort aarwayt, ti xtune, wii lang es nëmt fer pis te aarwayt hin khome, un soo wayter. Ti 2 aarwayte keen net keeche ti piiplixe funtamente. Fiilaycht host tuu een aarwayt liiper wii ti aner, weeche ti sort aarwayt orer wayl se peser petsaale. Awer foer een ëntxlus mache, must tuu aach anere phunkte noo kuke. Tsum payxpiil, meechte tiise aarwayte tich xteere tsu etliche fersamlunge keen? Meechte se tich mit weenicher tsayt lose fer mit tayn familye plaype un tëne helfe in kaystlich un emotsyonaal aat? Soo sorte frooche tuun tich helfe tich traan hale aan te “tinge [woo] wichticher sin” — es wil saan, tayn aanpeetung un ti neetichkheete fon tayn familye —, xtats aan mee kelt fertiine. Tan khanst tuu een ëntxlus mache woo Yeehoowa seechne tuut. (w25.01 s. 17-18 ap. 11-13)

Soo kaar wën anere tich xlecht pehantelt hon, tuu khanst tich sicher sin tas Yeehoowa tich liipt un weyert fer tich kept. Wëns tuu xpiirst tas tuu khee weyert host, eriner tich tas Yeehoowa tayn kwaliteete kesiin hot un tich tsu tëm ketsoo hot. (Yoo. 6:44) Tee is imer fërtich fer tich helfe, wayl eyer tich aarich fiil liipt. Meyer khene iwer Yeehoowa sayn xpiirunge lërne wën mer Yeesus sayn payxpiil noo kuke. Wii Yeesus uf te eyert waar, hot eyer liiplich pehantelt tii woo niter kextelt waare. (Mat. 9:9-12) Een mool hot een krank fraa tëm sayn tsaych aan kekrif wayl se wolt keheelt wëre. Yeesus hot se ketreest un keloopt weeche sayn klaape. (Mar. 5:25-34) Yeesus macht sayn Fater perfekt noo. (Yoo. 14:9) Soo khanst tuu tich sicher sin tas Yeehoowa tich weyert kept un tas tee mërkt tayn kuute kwaliteete, soo wii tayn klaape un tayn liip tsu tëm. (w24.10 s. 7 ap. 4-5)

Torich sayn leepe, must Tawi haufe xweyere situatsyoone mit mache woo tëm prile kemacht hon. Fiile layt hon tëm kehast un soo kaar etliche fon sayn tichte fraaynte un parente waare net troy un hon tëm hinerkang. (1 Sam. 19:10, 11; 2 Sam. 15:10-14, 30) Een mool hot eyer kexrip: “Ich sin aarich miit fon soo fiil krekse; ti kans nacht, lose ich mayn pet nas weeche mayn treene; mayn pet tuut weeche mayn krayxe iwerlaafe.” (Psal. 6:6) Opwool Tawi sayn leepe xweyer waar, waar eyer sich sicher tas Yeehoowa tëm keliipt hot. Tee hot kexrip: “Yeehoowa tuut mayn prile heere.” (Psal. 6:8) Ti wërter fom tekst fon hayt lose uns sicher tas Yeehoowa uns wërklich liipt un tas eyer sich khimere tuut mit unser xpiirunge. Tawi hot kesaat tas es waar wii wën Yeehoowa sayn treene in een leter sak samele teet orer tëne uf een puuch xraype teet. Tawi waar sich sicher tas Yeehoowa sayn phayn kemërkt hot un tas net ferkes hat. Tawi waar sich aach sicher tas sayn liipliche Fater im himel net ploos kemërkt hot ti propleeme woo eyer kelit hot, awer aach wii tas tëm petrof hot. (w24.12 s. 22 ap. 11-12)