Yeehoowa tiif respektiire, petayt tas mer tëm soo fiil liipe tas mer wole nii etwas mache woo tëm traurich lose khent. Meyer wole te unerxiit lërne tswixich was richtich un ferkheert is, un tswixich was woer un falx is, tas mer Yeehoowa kefale khene. (Xpr. 2:3-6; Hep. 5:14) Wën unser pang fon te mënxe kreeser wii unser tiif respekt tsu Yeehoowa is, khente mer fon te woerheet ap kelenkt wëre. Kuk mool tas payxpiil fon te 12 xëfe fon Israël woo tas Ferxprochne Lant xpekuliirt hon. Fer 10 fon te spyoone, sayn pang fon te kananiiter waar xtërker wii sayn liip tsu Yeehoowa. Tii hon fer ti anere israeliiter kesaat: “Meyer khene net keeche tiise folek keen, weeche tii sin xtërker wii meyer.” (Nuu. 13:27-31) Foer ti mënxe, hots wërklich aus kesiin tas ti kananiiter xtërker waare. Awer saan tas ti israeliiter khonte net ti kananiiter ap kewine, hot Yeehoowa aus te rechnung kelos. (w24.07 s. 9 ap. 5-6)

Khene mer uns wërklich sicher sin tas, wën Yeehoowa richt, macht eyer imer te richtich ëntxlus? Yawool! Soo wii Apraham kuut ferxtan hot, is Yeehoowa te perfekte, kluuch un parmhërtsliche “Richter fon te kans eyert”. Tee hot sayn Soon keiipt un tëm ti responsapiliteet kep fer ale layt richte. (Yoo. 5:22) Yeehoowa un Yeesus wise was yeete persoon tenkt un xpiirt. (Mat. 9:4) Soo, wën se yemant richte, mache se imer tas richtiches. Wole mer pextimt sin uf Yeehoowa un ale sayn ëntxlise traue! Meyer erkhëne tas mer net richte khene, awer Yeehoowa khan! (Isa. 55:8, 9) Tes weeche, lose mer ale kerichte in te hënt fon Yeehoowa un sayn Soon. Meyer erkhëne aach tas unser Kheenich Yeesus tuut Yeehoowa sayn kerechtichkheet un parmhërtslichkheet perfekt noo mache. (Isa. 11:3, 4) (w24.05 s. 7 ap. 18-19)

Meyer khene een lisyoon lërne iwer wii wichtich es is een eerlich hërts hon, mit was pasiirt is wii Fiilip sayn fraaynt Natanaël keprung hot fer Yeesus khëne lërne. Es waar tas eyerste mool woo Yeesus Natanaël kesiin hot. Awer Yeesus hot kesaat: “Kuk mool! Too khomt een echte israeliiter, aan weem khee falxheet is.” (Yoo. 1:47) Yeesus hot kesiin tas Natanaël een ekstra eerlichkheet hat. Soo wii meyer al, waar Natanaël imperfekt, awer tee waar net falx orer uneerlich kewees. Yeesus hot weyert fer tiise kwaliteet kep un tee hot Natanaël too teweeche keloopt. Ti meyerste tinge woo mer mache mise fer Kot kefale, woo im Psalm 15 xteen, hon se tuun mit te aat wii mer ti anere pehantele. Te wersikel 3 saat iwer Yeehoowa sayn inkelaatne: “Tee fertseelt net liie fer ti anere sayn naame fersaue. Tee tuut khee xaat fer sayn nochper mache un xprecht net xlechtes iwer sayn fraaynte.” Xlecht iwer ti anere xpreche, khan se wee mache. (Tya. 1:26) (w24.06 s. 10 ap. 7; s. 11 ap. 9-10)