Pwovèb

10 Pwovèb Salomon yo+.

Yon pitit ki gen sajès fè kè papa l kontan+,

Men, yon pitit ki sòt fè manman l gen lapenn.

 2 Trezò yon moun vin genyen nan fè sa ki mal pap itil li anyen,

Men, lè yon moun fè sa ki dwat, sa delivre l anba lanmò+.

 3 Jewova pap voye moun* ki dwat la ale tou grangou+,

Men, l ap anpeche mechan yo jwenn sa yo anvi a.

 4 Moun ki parese ap pòv+,

Men, moun ki travay di ap rich+.

 5 Pitit ki fè rekòt nan sezon chalè aji ak bon konprann,

Men, pitit k ap dòmi byen di pandan rekòt la rale lawont sou tèt li+.

 6 Moun ki dwat la rale benediksyon sou tèt li+,

Men, pawòl mechan an pa kite moun wè vyolans li gen lide fè.

 7 Repitasyon moun ki dwat la ap fè l jwenn benediksyon+,

Men, non mechan an ap disparèt+.

 8 Moun ki gen sajès nan kè l la ap aksepte lòd* yo ba l+,

Men, y ap kraze moun k ap pale bagay moun sòt anba pye+.

 9 Moun ki fidèl nan tout bagay la ap mache san anyen mal pa rive l+,

Men, y ap bare moun ki nan chemen kwochi a+.

10 Moun k ap touye je l pou l twonpe moun lakòz chagren+,

E y ap kraze moun k ap pale bagay moun sòt anba pye+.

11 Bouch moun ki dwat la se yon sous ki bay lavi+,

Men, pawòl mechan an pa kite moun wè vyolans li gen lide fè+.

12 Kote ki gen rayisman, gen diskisyon,

Men, lanmou kouvri tout kalite peche+.

13 Se nan bouch moun ki gen bon konprann pawòl ki gen sajès soti+,

Men, baton fèt pou do moun ki pa gen bonsans*+.

14 Moun ki gen sajès la konsève konesans tankou yon trezò+,

Men, moun ki sòt la rale malè sou tèt li ak bouch li+.

15 Richès* moun ki rich la genyen tankou yon vil ki byen pwoteje.

Lamizè ap fini ak moun ki malere a+.

16 Travay moun ki dwat yo bay lavi,

Men, sa mechan yo fè mennen nan peche+.

17 Moun ki koute lè yo ba l disiplin montre lòt moun wout lavi a*,

Men, moun ki pa aksepte yo korije l fè lòt moun pèdi wout la.

18 Moun ki kache lahèn li gen nan kè l se manti l bay+,

E moun k ap simaye move pawòl* se moun ki sòt.

19 Yon moun ki pale twòp ap fè peche kanmenm+,

Men, yon moun ki pridan kontwole bouch li+.

20 Lang moun ki dwat la tankou pi bon kalite ajan an+,

Men, kè moun ki mechan an pa gen anpil valè.

21 Pawòl nan bouch moun ki dwat la soulaje* anpil moun+,

Men, moun ki sòt la mouri paske l pa gen bonsans+.

22 Se benediksyon Jewova bay ki fè moun rich+,

E li pa bay okenn doulè* avè l.

23 Moun ki sòt la lage kò l nan fè vye bagay e li pran sa pou jwèt,

Men, se moun ki gen bon jijman an ki gen sajès+.

24 Sa mechan an pè a se sa k ap rive l,

Men, moun ki dwat la ap jwenn sa l vle a+.

25 Tankou yon van tanpèt k ap pase, se konsa mechan an pap la ankò+,

Men, moun ki dwat la tankou yon fondasyon kay ki la nètale+.

26 Menm jan vinèg sezi dan moun e lafimen fè je moun boule yo,

Se konsa moun ki parese a ye pou moun ki voye l la*.

27 Lakrentif pou Jewova fè moun viv pi lontan+,

Men, y ap retire sou kantite ane mechan an ap viv+.

28 Sa moun ki dwat la ap tann nan* bay kè kontan+,

Men, espwa mechan an genyen an ap disparèt+.

29 Chemen Jewova se yon pwoteksyon pou moun ki san repwòch+,

Men, li vle di destriksyon pou moun k ap fè sa ki mal+.

30 Yo pap janm ka fè moun ki dwat la tonbe+,

Men, mechan an pap ret sou tè a ankò+.

31 Se pawòl sajès ki sot* nan bouch moun ki dwat la,

Men, moun k ap pale pawòl kwochi ap peri.

32 Moun ki dwat la konnen pou l di sa k bon ak bouch li,

Men, se move pawòl ki sot nan bouch moun ki mechan an.