Jewova rekonpanse moun ki chèche l toutbonvre

1, 2. a) Ki rapò ki genyen ant lanmou ak lafwa? b) Ki kesyon nou pral egzamine nan atik sa a?

PAPA nou, Jewova, pwomèt l ap beni sèvitè fidèl li yo. Se youn nan fason Jewova montre jan l renmen nou, e nou renmen l “paske li te demontre lanmou pou nou an premye”. (1 Jan 4:19.) Tank n ap vin gen plis lanmou pou Jewova, se tank lafwa nou nan li ap vin pi solid e n ap gen plis konviksyon Jewova ap rekonpanse moun li renmen yo. — Li Ebre 11:6.

² Jewova se Sila a ki konn rekonpanse moun nan! Se yon aspè enpòtan nan pèsonalite l ak travay li fè. Se sa k fè lafwa nou nan Bondye pap total si nou pa gen konviksyon li se Sila a ki rekonpanse moun ki chèche l toutbonvre. Sa k fè sa? Se paske “lafwa se tann yon moun ap tann sa li espere a avèk asirans”. (Ebre 11:1.) Yon moun ki gen lafwa gen yon konfyans total Bondye ap beni moun ki fidèl avè l yo. Ebyen, lefètke n gen espwa n ap jwenn yon rekonpans, ki byenfè sa fè nou jwenn? Ki jan Jewova te rekonpanse sèvitè l yo nan tan lontan e ki jan l fè sa nan epòk nou an? Ann wè ki jan.

 3. Ki pwomès nou jwenn nan Malachi 3:10?

³ Jewova Dye pwomèt pou l rekonpanse sèvitè fidèl li yo. Li envite n ba li sa n genyen ki pi bon an e pou n gen konfyans l ap beni nou. Men sa Jewova di: “Tanpri, teste m.” Men sa l ajoute: “[Gade pou n] wè si m pap ouvri vàn ki nan syèl la pou nou pou m vide benediksyon sou nou jiskaske nou pa manke anyen.” (Malachi 3:10). Nou montre rekonesans nou pou envitasyon Jewova fè nou pou n teste l la lè nou aksepte envitasyon an.

 4. Poukisa nou ka gen konfyans nan pwomès Jezi te fè nan Matye 6:33 a?

⁴ Jezi te pwomèt disip li yo si yo met Wayòm nan an premye, Bondye t ap ede yo. (Li Matye 6:33.) Jezi te kapab di sa paske l te konnen pwomès Bondye yo toujou reyalize (Ezayi 55:11). Kidonk, nou menm tou, nou mèt gen asirans si nou montre nou gen yon lafwa total nan Jewova, l ap kenbe pwomès li lè l di: “Mwen pap janm kite w e mwen pap janm abandone w.” (Ebre 13:5). Pwomès sa a Jewova fè a ede n gen konfyans nan pawòl Jezi te di nou jwenn nan Matye 6:33 a.

 5. Poukisa repons Jezi te bay Pyè a ankourajan pou nou tout?

⁵ Men yon kesyon apot Pyè te poze Jezi yon lè: “Nou kite tout bagay pou nou suiv ou, ki sa n ap jwenn menm?” (Matye 19:27). Jezi pa t korije Pyè pou kesyon sa a. Okontrè, Jezi te di disip li yo y ap jwenn rekonpans pou sakrifis yo fè yo. Apot yo ak lòt moun ki fidèl yo pral dirije ansanm ak Jezi nan syèl la. Men, Jezi te fè konnen y ap jwenn rekonpans depi kounye a lè l te di: “Nenpòt moun ki kite kay, oswa frè, oswa sè, oswa papa, oswa manman, oswa pitit, oswa tè poutèt non mwen, l ap jwenn 100 fwa plis pase sa, e l ap resevwa lavi ki pap janm fini an.” (Matye 19:29). Jodi a, tout moun k ap suiv Jezi kapab jwenn papa, manman, frè, sè ak pitit nan kongregasyon an. Se sèten sa gen plis valè lontan pase nenpòt sakrifis nou fè pou Wayòm Bondye a.

 6. Poukisa Jewova pwomèt l ap rekonpanse sèvitè l yo?

⁶ Anplis de pakèt bèl benediksyon n ap jwi depi kounye a, n ap tann benediksyon ki menm pi gwo toujou alavni (1 Timote 4:8). Jewova pwomèt l ap rekonpanse sèvitè fidèl li yo, e piske n konn sa, sa ede n andire moman ki difisil. Piske nou gen yon konviksyon total Jewova “tounen Sila a ki rekonpanse moun k ap chèche l toutbonvre”, nou kapab ret fidèl. — Ebre 11:6.

 7. Sa k fè esperans tankou yon lank batiman?

⁷ Nan Diskou Jezi te bay sou mòn nan, men sa l te di: “Nou mèt rejwi e nou mèt kontan anpil, piske nou gen yon gwo rekonpans nan syèl la. Paske, se konsa yo te konn pèsekite pwofèt ki te la anvan nou yo.” (Matye 5:12). Gen kèk nan sèvitè Bondye yo ki pral jwenn yon rekonpans nan syèl la. Epi, gen lòt ki pral resevwa lavi ki pap janm fini an kòm rekonpans nan yon paradi sou tè a. Sa a se yon rezon pou n “rejwi e [pou] nou [...] kontan anpil”. (Sòm 37:11; Lik 18:30.) Men, pou nou tout, esperans nou kapab “yon lank batiman pou nanm nou, [ki] sèten e anmenmtan [ki] solid”. (Ebre 6:17-20.) Menm jan yon lank batiman kenbe batiman an fèm pandan yon tanpèt, esperans solid nou genyen an kapab ede n rete stab. Li ka ban nou fòs pou n andire moman difisil yo.

 8. Ki jan esperans nou an fè n vin gen mwens enkyetid?

⁸ Esperans nou an kapab fè n vin gen mwens enkyetid. Menm jan yon krèm kapab fè po nou vin swa, pwomès Bondye yo kapab kalme kè nou ki an boulvès. Sa rekonfòtan pou n konnen Jewova ap pran swen nou lè n lage chay nou sou li (Sòm 55:22). Nou ka gen yon konfyans total Bondye ka fè “pi plis lontan pase tout sa nou mande”. (Efezyen 3:20.) Jewova ap ede nou, li pap annik ede nou anpil oubyen anpil anpil, men l ap fè “pi plis lontan” pase sa!

 9. Ki jan n ka gen asirans n ap jwenn benediksyon Jewova?

⁹ Pou n jwenn rekonpans lan, nou bezwen gen yon lafwa total nan Jewova e n bezwen obeyi enstriksyon li bay. Men sa Moyiz te di nasyon Izrayèl la: “Jewova pap manke pa beni nou nan peyi Jewova, Bondye nou an, ap ban nou kòm eritaj la, depi nou toujou obeyi Jewova, Bondye nou an, e nou byen suiv tout kòmandman l yo m ap ban nou jodi a. Paske, Jewova, Bondye nou an, ap beni nou jan li te pwomèt nou sa a.” (Detewonòm 15:4-6). Èske w kwè toutbonvre Jewova ap beni w si w kontinye sèvi l fidèlman? Ou gen bonjan rezon pou w kwè sa.

10, 11. Ki jan Jewova te rekonpanse Jozèf?

¹⁰ Jewova te fè ekri Bib la pou byen nou. Ladan l, nou jwenn anpil egzanp ki montre ki jan Bondye te rekonpanse sèvitè fidèl nan tan lontan yo (Women 15:4). Jozèf se yon trè bèl egzanp nan sans sa a. Toudabò, frè l yo te vann li kòm esklav. Annapre, madanm mèt li te lage fo akizasyon sou do l e yo te mete l nan prizon ann Ejip. Èske lè Jozèf te nan prizon an li te separe ak Jewova? Non! Men sa Bib la di: “Jewova te toujou avèk Jozèf, li te kontinye montre lanmou ki fidèl li gen pou Jozèf”, e “Jewova te avèk Jozèf e Jewova te fè tout sa l fè reyisi.” (Jenèz 39:21, 23). Menm pandan moman difisil sa yo, Jozèf te tann Bondye l la avèk pasyans.

¹¹ Kèk ane annapre, Farawon te fè Jozèf sot nan prizon, e esklav sa a ki te gen imilite te vin dezyèm moun ki gen plis pouvwa ann Ejip (Jenèz 41:1, 37-43). Lè Jozèf te vin gen de pitit gason ak madanm li, “Jozèf te rele premye pitit li a Manase, paske li te di: ‘Bondye fè m bliye tout pwoblèm mwen ak tout moun lakay papa m.’ Li te rele dezyèm nan Efrayim, paske li te di: ‘Bondye fè m fè pitit nan peyi mizè m nan.’” (Jenèz 41:51, 52). Jewova te rekonpanse Jozèf pou fidelite l, e li te rive sove Izrayelit yo ak Ejipsyen yo anba grangou. Epi, Jozèf te konnen se Jewova ki te rekonpanse l e ki beni l. — Jenèz 45:5-9.

12. Ki jan Jezi te rete fidèl lè l te jwenn eprèv?

¹² Jezi Kris, bò kote pa l, te kontinye obeyi Jewova malgre l te jwenn anpil eprèv, e Jewova te rekonpanse l. Ki sa k te ede Jezi ret fidèl? Men sa Pawòl Bondye a esplike: “Poutèt kè kontan ki te rezève pou li a, li andire anba lanmò sou yon poto soufrans, li meprize lawont.” (Ebre 12:2). Se sèten Jezi te kontan dèske l te kapab fè non Bondye vin sen. Kòm rekonpans, Papa l te montre l dakò avè l e l te ba l anpil bèl privilèj. Bib la di li “chita adwat twòn Bondye a”. Mete sou sa, Bib la di: “Bondye leve l met nan yon pozisyon ki pi wo, e avèk bonte, li ba l non ki anlè tout lòt non an.” — Filipyen 2:9.

13, 14. Ki jan Jewova konsidere sa nou fè pou li?

¹³ Nou mèt gen asirans Jewova bay tout sa nou fè nan sèvis li anpil valè. Li konprann lè n pa fin twò kwè nan tèt nou oubyen lè n gen dout sou kapasite nou. Li gen anpil sousi pou nou lè n nan tètchaje akoz travay nou oswa akoz responsablite nou genyen pou n bay fanmi nou sa yo gen bezwen. Li konprann lè n pa kapab fè tout sa n te konn fè nan sèvis li akoz nou malad kounye a oubyen nou deprime. Nou mèt gen yon konfyans total Jewova bay fidelite nou anpil valè aktout nou gen pwoblèm. — Li Ebre 6:10, 11.

¹⁴ Epitou, sonje Jewova se Sila a ki “tande lapriyè” a. Nou mèt gen konfyans l ap koute nou lè n priye l (Sòm 65:2). “Papa ki gen kè sansib la, Bondye tout konsolasyon an” ap ban nou tout sa nou bezwen pou nou ret pwòch avè l. Pafwa, li ka sèvi ak frè ak sè n yo pou l fè sa (2 Korentyen 1:3). Jewova kontan lè nou gen konpasyon pou lòt moun. “Moun ki fè moun ki malere favè se Jewova li prete, e Bondye ap rekonpanse l pou sa l fè a.” (Pwovèb 19:17; Matye 6:3, 4). Se sa k fè, lè n montre nou donan ak frè ak sè n yo e nou ede yo, Jewova konsidere byen nou fè a kòmsi se prete nou prete l sa. Li pwomèt l ap rekonpanse nou pou byen nou fè a.

15. Ki rekonpans w ap tann pèsonèlman? (Gade foto ki nan kòmansman atik la.)

¹⁵ Jezi bay kretyen ki gen esperans pou y al nan syèl yo espwa y ap resevwa “kouwòn jistis la” kòm rekonpans (2 Timote 4:7, 8). Men, si w gen yon esperans ki diferan sa pa fè w gen mwens valè nan je Bondye. Plizyè milyon “lòt mouton” Jezi genyen yo ap tann ak tout fòs lavi pou toutan nan yon paradi sou tè a. Nan Paradi a, “y ap kontan anpil akoz yo pral viv nan yon lapè total”. — Jan 10:16; Sòm 37:11.

16. Ki konsolasyon nou jwenn nan 1 Jan 3:19, 20?

¹⁶ Pafwa, nou ka santi nou pa fè ase nan sèvis nou pou Jewova, oubyen nou ka ap mande tèt nou si Jewova pran plezi nan sa nou fè yo. Nou ka menm santi nou pa kalifye pou n resevwa okenn rekonpans. Men, nou pa dwe janm bliye “Bondye pi gran pase kè nou, e li konn tout bagay”. (Li 1 Jan 3:19, 20.) Lè n ap sèvi Jewova paske nou gen lafwa nan li e nou renmen l, nou kapab gen asirans l ap rekonpanse nou, menmsi sa nou fè a ta parèt piti nan je nou. — Mak 12:41-44.

17. Site kèk rekonpans nou deja jwenn jodi a.

¹⁷ Menm nan dènye jou sistèm Satan an, Jewova kontinye beni pèp li a. Li asire l nou resevwa yon pakèt konesans e nou gen lapè antanke moun ki fè pati yon fanmi entènasyonal frè ak sè (Ezayi 54:13). Wi, jan Jezi te pwomèt sa, depi kounye a, Jewova ban nou yon bèl fanmi frè ak sè sou tout kò tè a kòm rekonpans (Mak 10:29, 30). Mete sou sa, moun k ap chèche Bondye toutbonvre yo jwenn rekonpans yo paske lespri yo vin pi anpè, yo gen plis satisfaksyon ak kè kontan. — Filipyen 4:4-7.

18, 19. Ki jan sèvitè Jewova yo santi yo parapò ak rekonpans yo resevwa yo?

¹⁸ Nou menm k ap sèvi Jewova sou tout kò tè a, nou jwenn bèl rekonpans nan men Papa nou an. Pa egzanp, men sa Bianca ki moun peyi Almay di: “Mwen pap janm fin di Jewova mèsi pou fason li ede m ak tètchaje m yo e dèske l toujou ret bò kote m chak jou. Deyò a, monn nan tèt anba e li sanzespwa. Men, plis m ap travay pi pre Jewova, se plis mwen santi m an sekirite nan bra l. Chak lè mwen fè sakrifis pou li, li beni m san fwa plis.”

¹⁹ Yon lòt bò, ann pale de Paula ki gen 70 an, k ap viv Kanada, ki gen gwo limit akoz yon maladi li soufri ki rele spina bifida ki se yon pwoblèm grav nan kolòn vètebral. Li di se vre maladi l la limite mouvman l, men sa pa limite sèvis li. Men sa l ajoute: “Mwen pwofite patisipe nan divès kalite sèvis tankou predikasyon nan telefòn ak temwayaj enfòmèl. Pou m ka kontinye ankouraje tèt mwen, mwen gen yon kanè nòt ki gen vèsè ak panse mwen jwenn nan piblikasyon nou yo mwen kapab al gade detanzantan. Mwen rele l: ‘Kanè k ap ede m chape a.’ Dekourajman la pou yon ti toutan si nou fikse lespri n sou pwomès Jewova yo. Jewova toujou la pou l ede nou, kèlkeswa sitiyasyon nou.” Petèt, sitiyasyon w diferan anpil ak sitiyasyon Bianca ak Paula. Aktout sa, ou kapab reflechi sou fason Jewova rekonpanse w ansanm ak moun ki bò kote w. Se pa ti bon sa bon pou w reflechi sou fason Jewova ap rekonpanse w jodi a ak fason li pral fè sa alavni!

20. Ki sa k ap tann nou si nou kontinye fè tout sa n kapab pou n sèvi Jewova fidèlman?

²⁰ Pa janm bliye: priyè nou fè ak tout kè nou ap “fè nou jwenn yon gwo rekonpans”. Ou mèt gen asirans “lè [w] fin fè volonte Bondye”, w ap “resevwa sa l te pwomèt la”. (Ebre 10:35, 36.) Se sa k fè, ann kontinye fòtifye lafwa nou e ann fè tout sa n kapab pou n sèvi Jewova. Nou gen konfyans Jewova ap rekonpanse nou! — Li Kolosyen 3:23, 24.