Ki jan w ka vin zanmi Bondye?

1, 2. Bay non kèk nan zanmi Jewova te genyen.

KIYÈS ou vle kòm zanmi w? Yon moun ou renmen. Yon moun san w ale avè l e san l ale avè w. Yon moun ki gen yon bèl pèsonalite ak yon seri kalite ou apresye.

² Jewova Dye chwazi kèk moun pou vin zanmi l. Pa egzanp, Abraram se te youn nan zanmi Jewova te genyen (Ezayi 41:8; Jak 2:23). Jewova te renmen David tou. Li te di David se te ‘yon moun ki te fè l plezi’. (Travay 13:22.) E pwofèt Dànyèl te “gen anpil valè” pou Jewova. — Dànyèl 9:23.

 3. Sa k fè Abraram, David ak Dànyèl te vin zanmi Jewova?

³ Ki jan Abraram, David ak Dànyèl te fè vin zanmi Jewova? Men sa Jewova te di Abraram: ‘Ou koute vwa m.’ ​(Jenèz 22:18). Jewova vin zanmi moun ki obeyi l avèk imilite. Menm yon nasyon ka vin zanmi l. Men sa Jewova te di nasyon Izrayèl la: “Koute vwa m e m ap vin Bondye nou e nou menm n ap vin pèp mwen.” ​(Jeremi 7:23). Donk, ou menm tou ou bezwen obeyi Jewova si w vle vin zanmi l toutbonvre.

4, 5. Ki jan Jewova pwoteje zanmi l yo?

⁴ Labib fè konnen Jewova ap chèche “moun k ap sèvi l ak tout kè yo pou l ka itilize fòs li an favè yo”. (2 Kwonik 16:9.) Nan Sòm 32:8, men pwomès Jewova fè moun ki zanmi l: “M ap fè w gen bon konprann e m ap fè w konnen ki chemen pou w pran. M ap ba w konsèy toutpandan m ap fikse je m sou ou.”

⁵ Gen yon ènmi ki gen anpil fòs ki vle anpeche nou vin zanmi Bondye, men Jewova vle pwoteje nou. (Li Sòm 55:22.) Antanke zanmi Jewova, nou sèvi l ak tout kè nou. Nou fidèl avè l menm nan sitiyasyon ki difisil. E nou gen menm asirans Salmis lan te genyen an. Men sa l te ekri konsènan Jewova: “Piske li sou bò dwat mwen, mwen pap janm brannen.” ​(Sòm 16:8; 63:8). Ki jan Satan eseye anpeche nou vin zanmi Bondye?

 6. Ki sa Satan te pretann konsènan lèzòm?

⁶ Nan chapit 11 lan, nou te aprann Satan te akize Jewova kòmkwa li se yon mantè e li pa aji ak jistis lè l pa kite Adan ak Èv deside sa ki byen ak sa ki mal pou tèt yo. Liv Jòb la, yon liv ki nan Bib la, fè nou konnen Satan te akize moun ki vle vin zanmi Bondye yo tou. Satan te pretann se pou enterè y ap sèvi Bondye, se pa paske yo renmen l. Satan te menm pretann li ka fè nenpòt moun vire do bay Bondye. Ann gade ki sa nou ka aprann sou Jòb e ki fason Jewova te pwoteje l.

7, 8. a) Ki santiman Jewova te gen pou Jòb? b) Ki sa Satan te di konsènan Jòb?

⁷ Kiyès Jòb te ye? Se te yon bon moun ki t ap viv sa gen anviwon 3 600 ane. Jewova te di pa t gen pèsonn ki te tankou l sou tè a nan epòk sa a. Jòb te gen gwo respè pou Bondye, e li te rayi sa ki mal (Jòb 1:8). Wi, Jòb se te bon zanmi Jewova.

⁸ Satan te pretann Jòb t ap sèvi Bondye pou rezon egoyis. Satan te di Jewova: “Èske w pa fè yon lantouray pou pwoteje ni li menm, ni fanmi l, ni tout sa l genyen? Ou beni travay li fè, epi twoupo bèt li yo gaye nan peyi a. Men, kounye a, fè yon chanjman, lonje men w, detwi tout sa l genyen, e san mank, l ap ret nan figi w li manke w dega.” — Jòb 1:10, 11.

 9. Ki sa Jewova te pèmèt Satan fè?

⁹ Satan te akize Jòb kòmkwa se pou enterè sèlman l ap sèvi Jewova. Satan te pretann tou li ka fè Jòb sispann sèvi Jewova. Jewova pa t dakò ak Satan, men Li te bay Satan pèmisyon pou l teste si wi ou non Jòb te zanmi Jewova paske l renmen l.

10. Ki jan Satan te atake Jòb, e kòman Jòb te reyaji?

¹⁰ Pou kòmanse, Satan te pran tout bèt Jòb te genyen oswa li te detwi yo. Apre sa, li touye pifò sèvitè Jòb yo. Jòb te pèdi tout bagay. Nan yon dènye atak Satan te fè, li te touye dis pitit Jòb yo nan yon tanpèt. Men, Jòb te rete fidèl ak Jewova. “Malgre tout bagay sa yo, Jòb pa t peche, ni li pa t di Bondye fè anyen ki mal.” — Jòb 1:12-19, 22.

11. a) Ki lòt bagay Satan te fè Jòb? b) Kòman Jòb te reyaji?

¹¹ Satan pa t bay vag. Li te bay Bondye defi lè l te di l: “Frape l jis nan zo, e san mank, l ap ret nan figi w li manke w dega.” Se konsa, Satan te frape Jòb ak yon maladi ki te fè l soufri anpil (Jòb 2:5, 7). Malgre sa, Jòb te ret fidèl ak Jewova. Li te di: “Jiskaske m mouri, mwen pap sispann ret fidèl ak Bondye [oswa, mwen pap lage entegrite m]!” — Jòb 27:5.

12. Ki jan Jòb te montre Satan se yon mantè?

¹² Jòb pa t konn anyen sou akizasyon Satan te fè yo oswa rezon ki fè li t ap soufri anpil konsa. Li te panse se Jewova ki lakòz pwoblèm li yo (Jòb 6:4; 16:11-14). Malgre sa, Jòb te ret fidèl ak Jewova. Lè sa a, pa t gen okenn dout. Jòb pa t egoyis. Li te zanmi Bondye paske l te renmen l. Tout akizasyon Satan yo se te manti!

13. Ki rezilta sa te bay lefètke Jòb te ret fidèl?

¹³ Menm lè Jòb pa t konnen sa k t ap pase nan syèl la, li te ret fidèl ak Bondye e li te montre Satan mechan. Jewova te rekonpanse Jòb poutèt li se yon zanmi ki fidèl. — Jòb 42:12-17.

14, 15. Ki akizasyon Satan fè kont tout gason ak tout fi?

¹⁴ Nou ka aprann plizyè leson enpòtan nan sa k te rive Jòb. Jodi a, Satan akize nou kòmkwa se pou enterè n ap sèvi Jewova. Nan Jòb 2:4, Satan te fè konnen: ‘Yon moun ap bay tout sa l genyen pou l sove lavi l.’ Donk, se pa sèlman Jòb Satan te akize kòm moun ki egoyis, men se tout gason ak tout fi. Plizyè santèn ane apre lanmò Jòb, Satan te kontinye ap manke Jewova dega e l te kontinye akize sèvitè l yo. Pa egzanp, men sa nou li nan Pwovèb 27:11: “Pitit mwen, montre w saj e fè kè m kontan, pou m ka reponn moun k ap pwovoke m nan [oswa k ap manke m dega a].”

¹⁵ Ou ka chwazi obeyi Jewova e vin yon zanmi fidèl pou Li, konsa, w ap montre Satan se yon mantè. Menmsi ou bezwen fè gwo chanjman nan lavi w pou w vin zanmi Bondye, se pi bon desizyon ou kapab pran! Desizyon sa a se yon desizyon ki enpòtan anpil. Satan fè konnen ou pap ret fidèl ak Bondye lè w gen pwoblèm. Li eseye twonpe n pou l fè n pa ret fidèl ak Bondye. Kòman l fè sa?

16. a) Ki metòd Satan itilize pou l eseye anpeche moun sèvi Jewova? b) Ki jan Dyab la ka eseye fè w sispann sèvi Jewova?

¹⁶ Satan itilize divès metòd pou l eseye anpeche nou vin zanmi Bondye. Li atake “tankou yon lyon k ap gwonde, l ap chèche devore yon moun”. (1 Pyè 5:8.) Ou pa bezwen sezi lè zanmi w, moun nan fanmi w, oswa lòt moun ap eseye anpeche w etidye Labib e anpeche w fè sa ki dwat. Ou kapab santi kòmsi se atake y ap atake wa (Jan 15:19, 20). Satan konn fè tèt li pase tou “pou zanj limyè”. Se sa k fè li ka eseye twonpe nou pou l fè nou dezobeyi Jewova (2 Korentyen 11:14). Yon lòt metòd Satan itilize pou l eseye anpeche nou sèvi Jewova se lè l fè n panse nou pa janm bon ase pou n sèvi Bondye. — Pwovèb 24:10.

17. Poukisa nou obeyi Jewova?

¹⁷ Lè nou obeyi Jewova, nou montre Satan se yon mantè. Ki sa k ap ede nou rete obeyisan? Labib di: “Nou dwe renmen Jewova, Bondye nou an, ak tout kè nou, ak tout nanm nou e ak tout fòs nou.” (Detewonòm 6:5). Nou obeyi Jewova paske nou renmen l. Toutpandan lanmou nou gen pou Jewova ap grandi, n ap vle fè tout sa li mande nou fè. Apot Jan te ekri: “Men sa lanmou pou Bondye vle di: se pou nou obeyi kòmandman l yo. Epoutan, kòmandman l yo pa lou.” — 1 Jan 5:3.

18, 19. a) Site kèk bagay Jewova fè konnen ki pa bon. b) Ki jan nou fè konnen Jewova pa mande nou fè yon bagay nou pa ka fè?

¹⁸ Men, èske gen kèk bagay Jewova fè konnen ki pa bon? N ap jwenn kèk egzanp nan kare ki gen tit: “Rayi sa Jewova rayi.” Pou kòmanse, nou ka panse kèk nan bagay sa yo pa twò mal. Men, lè nou li vèsè yo nan Labib e nou byen reflechi sou yo, n ap konprann sajès ki genyen lè nou obeyi lwa Jewova yo. Ou ka santi tou li nesesè pou w fè kèk chanjman nan lavi w. Menmsi sa ka difisil pafwa, si nou fè chanjman sa yo, n ap gen lapè ak kè kontan paske n se yon zanmi fidèl pou Bondye (Ezayi 48:17, 18). Ki jan nou fè konnen li posib pou n fè chanjman sa yo?

¹⁹ Jewova pa janm mande nou fè anyen nou pa ka fè (Detewonòm 30:11-14). Antanke vrè Zanmi nou, li konnen nou pi byen pase nou konnen tèt nou. Li konnen fòs nou ak feblès nou (Sòm 103:14). Men ankourajman apot Pòl ban nou: “Bondye fidèl, li pap kite nou tante depase sa nou ka sipòte. Men, lè nou jwenn tantasyon an, l ap ouvri yon chemen tou, dekwa pou nou ka andire l.” ​(1 Korentyen 10:13). Nou kapab gen konfyans Jewova ap toujou ban nou fòs pou nou fè sa ki dwat. L ap ba w “pisans ki depase yon pisans nòmal” pou ede w andire sitiyasyon difisil yo (2 Korentyen 4:7). Men sa Pòl te di apre Jewova te ede l nan plizyè sitiyasyon difisil: “Mwen gen fòs pou tout bagay grasa Sila a ki ban m pisans lan.” — Filipyen 4:13.

20. Ki kalite ou dwe imite, e poukisa?

²⁰ Si nou vle zanmi Jewova, nou dwe sispann fè sa Jewova fè konnen ki pa bon, men nou dwe fè plis toujou (Women 12:9). Zanmi Bondye yo renmen sa Bondye renmen. Labib bay detay sou sa nan Sòm 15:1-5. (Li vèsè yo.) Zanmi Jewova yo imite kalite l yo e yo demontre “lanmou, lajwa, lapè, pasyans, byenveyans, bonte, lafwa, dousè, [ak] metriz”. — Galat 5:22, 23.

21. Ki jan w ka aprann demontre kalite Bondye renmen yo?

²¹ Ki jan w ka aprann demontre bèl kalite sa yo? Ou bezwen aprann ki sa Jewova renmen lè w li Labib ak lè w etidye l regilyèman (Ezayi 30:20, 21). Toutpandan w ap fè sa, lanmou w pou Jewova ap grandi, e tank lanmou w pou li ap grandi, w ap vle obeyi l.

22. Ki sa w ap jwenn si w obeyi Jewova?

²² Ou kapab konpare chanjman ou ka bezwen fè nan lavi w ak lè yon moun retire yon vye rad sou li epi li mete yon rad nèf. Labib di ou bezwen “retire ansyen pèsonalite a” epi abiye w ak “nouvo pèsonalite a”. (Kolosyen 3:9, 10.) Malgre sa ka pa fasil, lè nou fè chanjman sa yo e nou obeyi Jewova, li pwomèt n ap jwenn “anpil avantaj”. (Sòm 19:11.) Wi, se pou w chwazi obeyi Jewova, konsa w ap montre Satan se yon mantè. Se pa paske ou konnen w ap jwenn avantaj ki fè w dwe sèvi Jewova, men, se paske ou renmen l, san se pa yon enterè w ap chèche. Konsa, w ap vin zanmi Bondye toutbonvre!