EPU 2

Omuano omusemba wokuhungira

2 Ovakorinte 2:17

OUSUPI: Hungira momuano mbu u hungira aruhe nu okuza komutima, amo raisa kutja u noumune uṋe ohunga nepu ndo novapuratene voye.

Kumba nu u rirongerise nawa. Kumba kutja u yandje ombango kombuze, nu ka kove omuini. Tjiwa kutja omapu yeṋe ngu mo sokuhungirira ko. Hungira momambo woye omuini, nu o lese omambo otja tji ya tjangwa membo.

Tji wa tye okulesa okuza mOmbeibela poo membo rarwe, rirongerisa nawa kokutja u ye lese oukahu. Tji pe nomambo nga hungirwa i ovandu, ṋunisa omambo ngo nawa tji mo lese, tjimuna ovandu tji ve hungira aruhe.
Hungira okuza komutima. Ripura kutja ongwaye ovapuratene voye tji mave hepa okuzuva ombuze ndjo. Yandja ombango ku wo. Nu omuano mbu wa kurama, nomuano mbu mo ungurisa omake noviṱuve vyoye, nongaro yomurungu woye, ngavi raise orusuvero, nohange, nokutja imbi mbi mo hungire ouatjiri.

Okuhungira momuano mbu u hungira aruhe, kaku nakuheya kutja ko sokuraisa ondengero. Raisa ondengero kombuze yoye mokuungurisa eraka ekahu nomuano omusemba wokuhungira.
Tara kovapuratene voye. Indu tje he ri navi okutjita nao, tara komupuratene woye tji mo hungire kuna ye. Indu tji mo yandja ehungi, tara komundu umwe potjikando, pendje nokutara kovandu avehe moruveze rumwe.