EPU 10

Omarundurukiro wombosiro yeraka

Omiano 8:4, 7

OUSUPI: Kahurura omapu nawa nu u kondje okuṱuna komitima vyovandu, mokuyera eraka nokuwisa eraka roye pu pe ri ohepero nokuhina okuhungira nohakahana poo okuhungira nongono.

OMUANO WOKUTJITA NAO:

Rundurura ombosiro yeraka. Yera eraka indu tji mo ṋunisa omapu omananḓengu na tji mo tunduuza ovapuratene voye. Tjita nao wina indu tji mo lese Omatjangwa ngu maye hungire ohunga nombanguriro. Yarura eraka pehi indu tji mo vanga okukuna omaundjiro movapuratene voye, poo tji mo hungirire koviṋa mbi eta emuma poo ozongendo.

O yere eraka roye oruveze aruhe nga ovapuratene voye tji mave utu okumuna aayo mo ve rokohere. O nanene ombango tjinene kove omuini, mokuritjinda nokuhungira momuano mbu mau tjiti kutja ovandu ve ute okuhimisiwa i ongaro yoye.
Eraka roye nga ri panguke. Indu meraka roye tji tji ri otjiṋa otjiyakurwa, rundurura ombosiro yeraka roye otjomuano wokuhungira nonḓero poo okuraisa ounene noure wotjiṋa. Hungira neraka etarazu otjomuano wokuraisa oruhoze poo ongendo.
Rundurura omuano woye wokuhungira. Tji mo hungire ohunga noviṋa vyondjoroka hungira nohakahana kaṱiṱi. Tji mo hungire ohunga nomapu omananḓengu o hakahana.

Tji mo hungire o hakahana okurundurura ombosiro yeraka roye, kutja oha urumisa ovapuratene voye. O hungire hakahana tjinene nga ovapuratene tji ve hi nokuzuva oviṋa mbi mo hungire.