EPU 14

Ṋunisa omapu omananḓengu nawa

Ovaheberi 8:1

OUSUPI: Vatera ovapuratene voye kutja ve kongorere nawa ehungi roye, nu raisa oukahu kutja epu arihe mari ṱunu vi kondando nepu rehungi roye.

Kara nondando. Ripurira kehungi roye kutja mari sokuyandja ondjivisiro uriri, mari sokurundurura omeripura wovapuratene, poo mari sokuhinga ovapuratene voye okutjita otjiṋa, okuzambo u yandje momuano mbu mau hitasana nondando ndjo. Ungurisa omapu aehe omananḓengu mehungi roye okuyenenisa ondando yehungi roye.

Ripura omuini kutja: ‘Omapuriro yeṋe poo omakeyakeyero waye ovapuratene vandje ngu ve na wo ohunga nepu ndi? Nu omongongorasaneno iṋe mu mape ya ave ripurire komapu ngo?’ Okuzambo rongerisa omapu ngo mongongorasaneno ndjo, kutja ovapuratene voye ve yenene okukongorera nawa, okuzuva nawa, nokuyakura ondjivisiro yehungi roye nawa.
Ṋunisa epu rehungi roye. Momakayendero wehungi roye, tamuna epu rehungi mokuyarukira po omambo omananḓengu mepu rehungi poo nge nomaheero yemwe.
Kondja kutja omapu omananḓengu ye zuvake oukahu. Toorora omapu omananḓengu porwawo ngu maye tjama nepu rehungi roye, nu ngu mo yenene okuhonga nawa moruveze ndu wa pewa. O hungirire komapu omengi, ṋunisa epu arihe nawa, hekana pokati komapu, nu hungirira kepu rimwe nawa amoo i ku rarwe.

Mo yenene okutamuna omapu omananḓengu pomautiro wehungi roye okuvatera ovapuratene voye okukongorera nawa, poo ye tamuna rukwao pomaandero wehungi roye okuvevatera okuyezemburuka nawa.