EPU 18

Ondjivisiro ovapuratene ndji mave yenene okuungurisa

1 Ovakorinte 9:19-23

OUSUPI: Tjita kutja ovapuratene voye ve ripurire ko oveni kepu, kokutja ve mune kutja ve rihongo otjiṋa otjinanḓengu.

Ripurira ku imbi ovapuratene voye mbi mave tjiwa rukuru. Ve vatera kutja ve hare oumune oupe ohunga nepu ndi mo hungirire ko nandarire kutja otjiṋa tji va zuva rukuru.

O hungirire tjinene komapu ovapuratene voye ngu mave tjiwa rukuru, nungwari kambura oruveze tji mo hungirire koviṋa ovipe ku wo.
Tjita omakonḓononeno nu ripurira ko oukoto. Tji mape sora, hungirira koviṋa ovapuratene voye mbi ve hi nokutjiwa nawa poo oviṋa mbya tjitwa oupe okukahurura omapu omananḓengu. Ripurira oukoto koviṋa mbi mo kahungirira ko nombwaneno ndji ri pokati kondjivisiro ndji, nepu ndi mo vanga okukahungirira ko.

Otja tji mo konḓonona ondjivisiro ndji mo kahungirira ko, rongerisa ourizemburuka woye mokuripura omuini omapuriro tjimuna ‘otjikeṋa, ongwaye, oruṋe, opi, ouṋe, nu omomuano uṋe. Kondja okuyandja omuinyo ku imbi mbi mo hongo, mokupura nokuzira omapuriro tjiva mu ingo ngunda amo yandja ehungi roye.
Raisa ounanḓengu wombuze yoye. Kahurura kutja omapu nge ri mOmatjangwa maye yenene vi okuvatera ovapuratene voye mongaro yeyuva arihe. Hungirira kozongaro, kovikaro novitjitwa ovinanḓengu kovapuratene voye.