EPU 19
Kondja okuṱuna komitima vyovapuratene
Omiano 3:1
OUSUPI: Vatera ovapuratene voye okuzuva nawa ounanḓengu wehungi roye nokutjita imbi mbi mave rihongo.
OMUANO WOKUTJITA NAO:
Vatera ovapuratene voye okurikonḓonona oveni. Pura omapuriro nge hinga ovandu okuripura oukoto, okuvatera ovapuratene voye okurikonḓonona oveni.
Vatera ovapuratene voye okumuna kutja ondando yawo yokutjita ouwa oyatjike. Ningira ovapuratene voye ve ripure kutja ongwaye tji ve tjita ouwa. Ve vatera okumuna kutja ouwa auhe mbu mave tjiti mau sokuhingwa i orusuvero rwawo ku Jehova, kovakambure ovakwao, na komahongero wOmbeibela. Vatera ovapuratene voye okumuna ounongo mbu u ri mOmbeibela, nu o ve raere kutja mave sokutjita vi. Moruveze rokuveṱisa ohoṋi nokutjita kutja ve rivere, komaandero wehungi roye ve sa ava yanḓiparisiwa nave nonḓero yokutjita ouwa.
Nanena ombango yawo ku Jehova. Ṋunisa kutja omahongero wOmbeibela, omirari, nomatwako vi raisa ovikaṋena vya Mukuru norusuvero rwe kweṱe. Tunga onḓero movapuratene voye yokuripurira koumune wa Jehova nokutjita imbi mbi tjata ku ye.