Ouvara wovanene vombongo mombongo

1. Ongwaye ovakarere va Jehova tji ve ungura kumwe nawa?

EṰE tu nondjoroka okurira orupa rovandu mbe karera Jehova. Ongwaye eṱe tji tu nohange nombwaneno? Epu rimwe orondi rokutja eṱe tu ungura oukukutu okuraisa ondengero ku imba Jehova mba yandja ko ouvara. Nu tji twa tjiti nao, ku tjita kutja tu kare nomaunguriro omawa wa kumwe.

2. Omapuriro yeṋe ngu matu ka zira morupa ndwi?

² Morupa ndwi matu ka hungirira kokutja oouṋe mbe nouvara mombongo. Nu wina matu ka zira omapuriro nga: Ovakazendu ovakambure ve nomerizirira yeṋe? Hapo owatjiri kutja omurumendu auhe omukambure, otjiuru tjomukazendu auhe mombongo? Hapo omunene wombongo u nouvara umwe tjimuna imbwi wotjiuru tjeṱunḓu? Rutenga matu ka hungirira komuano mu matu sokuvara ovakazendu ovakambure.

3. Otjikeṋa tji matji tu vatere okuvara ounanḓengu woviungura ovakazendu ovakambure mbi ve ungura?

³ Eṱe tu nondangi komuano ovakazendu ovakambure mu ve ungura oukukutu okuṱakamisa omaṱunḓu wawo, okuzuvarisa ombuze ombwa nokuvatera varwe mombongo. Nu tu ve vara tjinene indu tji matu ripura nomuano Jehova na Jesus mu ve ve vara. Nu wina matu ke rihonga ohunga nomuano mu matu sokutjinda ovakazendu mokutara komuano omuapostele Paulus mee ve tjindi.

4. Ombeibela i raisa vi kutja Jehova u vara ovakazendu novarumendu pu pe ṱa pamwe?

⁴ Ombeibela i raisa kutja Jehova u vara ovakazendu novarumendu pu pe ṱa pamwe. Moruveze rwovaapostele, Jehova wa yandja ombepo ondjapuke kovakazendu novarumendu kokutja ve tjite ovihimise, tjimuna okuhungira momaraka pekepeke. (Oviung. 2:1-4, 15-18) Owo va twirisiwa nombepo ondjapuke kutja ve ka honapare puna Kristus. (Gal. 3:26-29) Ovimbumba aviyevari mbyo mavi ka hupa nga aruhe kombanda yehi. (Omavan. 7:9, 10, 13-15) Nu wina otjiungura tjokuzuvarisa nokuhonga ombuze ombwa tja yandjewa kovarumendu novakazendu. (Mat. 28:19, 20) Otjotjihorera, embo rOviungura ri hungira ohunga nomukazendu omukambure wena Priskila. Eye nomurumendu we Akuila, va kahurura ouatjiri komurumendu ngwa hongerwe wena Apolos.—Oviung. 18:24-26.

5. Omambo nge ri mu Lukas 10:38, 39, 42 ye raisa vi kutja Jesus wa tengere ovakazendu?

⁵ Jesus aa raisa ondengero kovakazendu. Eye kaa horere kOvafarisei mbaave munu kutja ovarumendu ovananḓengu povakazendu. Owo kaave hungirisa ovakazendu mokati kovandu, nu nandarire okuhungira kuna wo ohunga nOmatjangwa. Nungwari, Jesus aa hungire ohunga nOmatjangwa ku novakazendu novarumendu.b (Lesa Lukas 10:38, 39, 42.) Eye wina aa yandjere ovakazendu okuyenda puna ye motjiungura tjokuzuvarisa. (Luk. 8:1-3) Nu Jesus we ve yandjera kutja ve ka raere ovaapostele kutja eye wa pendurwa movakoke.—Joh. 20:16-18.

6. Omomuano uṋe omuapostele Paulus ma raisa ondengero kovakazendu?

⁶ Omuapostele Paulus wa zemburukisa Timoteus okuraisa ondengero kovakazendu. Paulus we mu raera kutja nga tjinde ‘ovakurukaze aayo owo ooina’ nokuvara ‘ovakazendu omitanda aayo owo ovaṱena kwe.’ (1 Tim. 5:1, 2) Nandarire kutja Paulus ongwa vatera Timoteus okuzikama mongamburiro, eye aa tjiwa kutja ina ya Timoteus na ina omukurukaze omba tenga po okumuhonga “Omatjangwa omayapuke.” (2 Tim. 1:5; 3:14, 15) Paulus wa tamuna omana wovakazendu ovakambure morutuu rwe ndwa tjanga kOvaroma. Eye wa muna oviungura ovakazendu ovakambure mbo mbi va ungura, nu wina wa raisa ondangi koviungura vyawo otjovazuvarise vombuze ombwa.—Rom. 16:1-4, 6, 12; Fil. 4:3.

7. Matu katara komapuriro yeṋe?

⁷ Ozoparagrafa nḓa kapita, za raisa kutja Omatjangwa ye ṋunisa kutja ovakazendu ovakambure ovananḓengu tjimuna ovarumendu ovakambure. Ovakazendu ovakambure vorusuvero nu ozondjandje ve vatera ombongo tjinene. Nu ovanene vombongo ve yakura ombatero yawo yokukurisa ohange nombwaneno mombongo. Posi yokutja pe nomapuriro tjiva ngu maye hepwa okuzirwa. Otjotjihorera, ongwaye Jehova tje undjira ko omukazendu omukambure okuzara otjiṋa kotjiuru mozongaro tjiva? Nu hapo mena rokutja ovarumendu ovakambure ombe zikwa otjovanene novavatere vombongo uriri, iho matji hee kutja owo otjiuru tjomukazendu auhe mombongo?

8. Otja kOvaefese 5:23, hapo omurumendu auhe omukambure, otjiuru tjomukazendu auhe? Kahurura.

⁸ Hapo omurumendu auhe omukambure, otjiuru tjomukazendu auhe? Kako katjiperi. Nungwari Kristus ongu ri otjiuru. (Lesa Ovaefese 5:23.) Omurumendu ngwa kupa u nouvara kombanda yomukazendu we. Omuatje omuzandu ngwa papitisiwa ka tjiuru tja ina. (Ef. 6:1, 2) Nu ovanene vombongo ve nouvara tjiva uriri kombanda yovarumendu novakazendu mombongo. (1 Tes. 5:12; Hebr. 13:17) Ovakazendu ovakombe mbe ha kara pu novanene vawo rukwao, ve kayenda komurungu okuraisa ondengero kovanene vawo na wina kovanene vombongo. Posi yokutja, otjiuru tjawo oJesus tjimuna omurumendu omukambure auhe mombongo.

9. Ongwaye ovakazendu ovakambure povikando tjiva tji ve hepa okuzara otjiṋa kotjiuru?

⁹ Otjingaperi kutja Jehova wa zika ovarumendu okuhongorera po mombongo nokuhonga, nungwari ovakazendu kave perwe ouvara mbwo. (1 Tim. 2:12) Omena ratjike? Omena repu otjingero nda zikira Jesus otjotjiuru tjovarumendu, kokutja oviṋa vi kayende mouhirona mombongo. Indu omukazendu omukambure tji ma sokuungura otjiungura tji matji sokuungurwa i omurumendu omukambure, Jehova u undjira ko kutja ma zare otjiṋa kotjiuru.c (1 Kor. 11:4-7) Jehova u ningira ovakazendu ovakambure okutjita nao, kokutja ve raise ondengero ku imba Jehova ka yandja ko ouvara. Nu u vanga kutja ve raise ondengero komirari vye, nungwari ka ku tjita kutja ve rimune okuhinonḓengu. Nai matu katara keziriro repuriro ndi, oviuru vyomaṱunḓu novanene vombongo ve nouvara mbu ṱa pi?

10. Ongwaye tji mape ya omunene wombongo povikando a vanga okutwapo ozoveta mombongo?

¹⁰ Ovanene vombongo va suvera Kristus, nu va suvera “ozonḓu” Jehova na Jesus nḓu ve vepa okutjevera. (Joh. 21:15-17) Mena rokutja omunene wombongo u rikendera ombongo, eye mape ya a munu kutja uri tjimuna ihe kovakambure mombongo. Nu a munu kutja, indu otjiuru tjeṱunḓu tji matji yenene okutwapo ozoveta okutjevera eṱunḓu, eye wina ma yenene okutwapo ozoveta nḓu ma munu kutja maze tjevere ozonḓu za Mukuru. Nu ovakambure tjiva mape ya ave ningire ovanene vombongo okuvetjitira ozondando. Hapo ovanene vombongo noviuru vyomaṱunḓu, ve nouvara umwe?

11. Omomuano uṋe oviuru vyomaṱunḓu novanene vombongo mu ve nouvara umwe?

¹¹ Paulus wa raisa kutja oviuru vyomaṱunḓu vi nomerizirira tjiva nge ri tjimwe tjimuna inga wovanene vombongo. (1 Tim. 3:4, 5) Otjotjihorera, Jehova u vanga kutja ouṋepo auhe meṱunḓu u riwise kehi yotjiuru tjeṱunḓu. (Kol. 3:20) Nu u vanga kutja ovakambure mombongo ve riwise kehi yovanene vombongo. Jehova u undjira ko kutja oviuru vyomaṱunḓu novanene vombongo ve honge imba mbe ri kehi yawo okumusuvera. Nu owo wina ve tjita kutja imba mbe ri kehi yawo ve rimune kutja va suverwa. Oviuru vyomaṱunḓu novanene vombongo, vi tjita kutja imba mbe ri kehi yawo ve mune ombatero indu tji ve ri kehi yomauzeu. (Jak. 2:15-17) Jehova wina u ve rakiza kutja ve vatere varwe okuṱakamisa omatwako we, nokuverakiza kutja ave ha “katuka ko omaraerero Ndjambi nga zikamisa” mOmbeibela.—1 Kor. 4:6.

12-13. Otja kOvaroma 7:2, omomuano uṋe omerizirira woviuru vyomaṱunḓu mu ya panguka ku inga wovanene vombongo?

¹² Omerizirira ovanene vombongo ngu ve nawo wina ya panguka tjinene ku inga woviuru vyomaṱunḓu. Otjotjihorera, Jehova wa yandja omerizirira kovanene vombongo yokurira ovapangure, nu we ve pa ouyara wokukonda ovakambure kombongo mbe hi nokuritanaura. Nungwari ka yandjere omerizirira ngo koviuru vyomaṱunḓu.—1 Kor. 5:11-13.

¹³ Posi yokutja, Jehova wina wa yandja omerizirira tjiva koviuru vyomaṱunḓu nu a ha yandja kovanene vombongo. Otjotjihorera, eye we ve pa ousemba wokutwapo ozoveta meṱunḓu nokutjita kutja omundu auhe meṱunḓu ma kongorere ozoveta nḓo. (Lesa Ovaroma 7:2.) Otjotjihorera, otjiuru tjeṱunḓu tji nouyara wokutwapo kutja oiri iṋe ovanatje ndji mave sokukara ponganda. Eye wina u nomerizirira wokuvyura ovanatje ve indu tji va zunḓa. (Ef. 6:1) Otjingaperi kutja omurumendu omukambure ngu ri otjiuru tjeṱunḓu nu ngwa suvera eṱunḓu re, u hungira ku nomukazendu we ngunda e hiya twapo ozoveta ponganda mena rokutja owo “onyama imwe.”d—Mat. 19:6.

14. (a) Otja ku Markus 10:45, ongwaye Jesus tja pwa okurira otjiuru tjombongo? (b) Orutu Orunane ru nomerizirira yeṋe? (Lesa okaongo nga “Omerizirira wOrutu Orunane.”)

¹⁴ Okupitira motjisuta tjonguturiro, Jehova wa tjita kutja omundu auhe mombongo nomundu auhe ngu nongamburiro mu Jesus, ma ka mune omuinyo waaruhe. (Lesa Markus 10:45; Oviung. 20:28; 1 Kor. 15:21, 22) Kunao, matu munu kutja Jesus wa pwa okuzikwa otjotjiuru tjombongo mena rokutja wa yandja omuinyo we otjotjisuta tjonguturiro. Nu mena ranao, Jesus u nouyara wokutwapo kutja ovikwaye ovandu, omaṱunḓu nombongo aihe mbi mave sokutjita. Nu u nousemba wokutjita kutja eṱe tu ṱakamise ozoveta nḓo. (Gal. 6:2) Posi yokutja, Jesus ka twapo ozoveta uriri, nungwari u rikendera eṱe nu we tu suvera.—Ef. 5:29.

15-16. Ove we rihongo tjike okuza komambo womukazendu omukambure wena Marley, nomurumendu omukambure wena Benjamin?

¹⁵ Ovakazendu ovakambure ve raisa ondengero ku Kristus, mokukongorera omirari mbi va pewa i ovarumendu mba zikwa i Jesus okuvetjevera. Ovakazendu ovengi ovakambure ve yenda kumwe ku nomambo wa Marley, omukazendu omukambure ngwa tura moUnited States. Eye wa tja: “Tjiri omerizirira wandje otjomukazendu ngwa kupwa nomukazendu omukambure mombongo omananḓengu kwami. Ami aruhe mbi hepa okuungura oukukutu okuraisa ondengero kouvara Jehova mbwa yandja komurumendu wandje na kovanene vombongo. Nungwari, omurumendu wandje novarumendu ovakambure mombongo ve tjita kutja irire oupupu kwami, mena rokutja ve ndji raisira ondengero nondangi koviungura mbi mbi ungura.”

¹⁶ Ovarumendu ovakambure ve raisa ondengero kouvara Jehova mbwa twapo, mokuraisa ondengero kovakazendu ovakambure. Omurumendu omukambure wena Benjamin, ngwa tura moEngland, wa tja: “Ami mbe rihonga oviṋa ovingi okuza komaziriro ovakazendu ovakambure ngu ve yandja pozombongarero zombongo, nomapu ngu ve yandja ohunga nokurira ovazuvarise novahonge ovawa motjiungura tjokuzuvarisa. Tjiri otjiungura tji ve ungura otjinanḓengu nomasa.”

17. Ongwaye tji matu sokuraisa ondengero ku imba Jehova ka yandja ko ouvara?

¹⁷ Indu ovandu avehe mombongo tji va raisa ondengero ku imba Jehova ka yandja ko ouvara, mamu kara ohange mombongo. Nu tjinenenene, matu hivirike Tate wetu womeyuru worusuvero, Jehova.—Eps. 150:6.