Jesus wa kwizikira ovemukongorere kutja mave rire ovaṋingandu tjiri. Eye wina wa raera imba mbe mu suvera kutja mave munu omarorero. (Mat. 10:22, 23; Luk. 6:20-23) Eṱe tu nondjoroka okurira ovahongewa va Kristus. Nungwari, hapo eṱe tu kara noumune uṋe indu oveṱunḓu retu tji mave tu tjaere kutja atu ha karere Jehova, tji matu tatumisiwa i yohoromende, poo tji matu ṋiṋikiziwa okutjita oviṋa ovivi i imba mbu tu ungura pamwe poo mbu tu hita pamwe oskole? Oviṋa otja imbyo mape ya avi tu kendisa. Ovandu ovengi ve muna kutja kamaave yenene okukara nondjoroka indu tji ve ri kehi yondatumisire. Nungwari Embo ra Mukuru ri tu raera okutjita nao. Otjotjihorera, Jakobus wa tjanga kutja, indu tji matu munu omauzeu atu rihahiza posi yokutja ngatu kare nondjoroka. (Jak. 1:2, 12) Nu Jesus wa tja, eṱe matu sokukara nondjoroka nandarire kehi yondatumisire. (Mat. 5:11) Jehova wa hinga Jakobus okutjanga kOvakriste mbo omiano mbi mavi ve vatere kutja ve kare nondjoroka nandarire kehi yomauzeu. w21.02 26 ¶1-2; 27 ¶5

Moruveze rwa Timoteus, Ovakriste tjiva kaave raisa ondangi kondjingonekero yokurira ovaungure va pamwe na Mukuru. Tjimuna Demas, Figelus, Hermogenes, Imeneus, Aleksander na Filetus. (1 Tim. 1:19, 20; 2 Tim. 1:15; 2:16-18; 4:10) Ovandu avehe mbo va suverere Jehova, posi yokutja va uta okuripura kutja oviṋa Jehova mbye vepa kavi nanḓengu. Satan u kondja vi kutja tu ise oviṋa ovinanḓengu Jehova mbye tupa? Tara komiano tjiva mbye ungurisa. Eye u ungurisa oviṋa tjimuna ozotiivi, ozomuvi, otungovi, ozongoramambo nomambo warwe okutjita kutja tu ute okuripura nokuungura oviṋa momuano mbu mau tjiti kutja tu ise okusuvera Jehova nokukara nonḓuviro komirari vye. Nu u kondja kutja tu ise okuzuvarisa mena rokutira omambo poo oṋiṋikizire okuza kovandu. Eye u kondja kutja tu puratene komambo wovandu mba isa okurikotamena ku Jehova ngu ve “hungira posyo ave tja: ‘Ondjiviro.’” Indu tji tu hina okukengeza mape ya atu isa ouatjiri kouṱiṱiṱiṱi.—1 Tim. 6:21. w20.09 27 ¶6-8

Hapo ove wa rora okuhihamisiwa i epanga roye poo omuzamumwe woye? Tji pe ri nao, mo rihongo ovingi okuza mehungi rOmbara David nomuzandu we Absalom. (2 Sam. 15:5-14, 31; 18:6-14) Raera Jehova kutja omuano mbu wa tjindwa navi we ku ṱuna vi, otja tji mo ripurire kehongwa ndo. (Eps. 6:6-8) Ripura kutja David wa ri noumune uṋe, indu tjaa munu oviṋa avihe mbi tji mavi tjitwa ku ye. Eye wa suverere Absalom nu wa ri nongamburiro mu Ahitofel. Posiya, ovandu mba aveyevari ve mu tjita ovineya. Owo ve mu hihamisa tjinene nu wina aave kondjo okumuzepa. David a tja pandjarisa ongamburiro momapanga we warwe nokumuna kutja owo wina ve rikutu ku na Absalom. Eye e tje ripurira ku ye omuini, nu a vanga okutaurira kehi rarwe erike. Poo atja yumba ohama opuwo. Posiya, ka tjitire nao nungwari wa kumba ku Jehova okumuvatera. Eye wina wa ningira ombatero okuza komapanga we. Nu wa hakahana okutoorera ko omukambo ku imbi mbya tya okutjita. David wa kayenda komurungu okukara nongamburiro mu Jehova na movakwao. w21.03 15 ¶7-8; 17 ¶10-11