Matthew

16 Orang Parisi enggau orang Saduki datai ngagai Jesus, lalu deka nguji iya. Sida minta iya ngayanka ngagai sida siti tanda ari Petara. 2 Ku Jesus nyaut sida: “Lebuh hari nyau lemai, kita nyebut, ‘Manah hari pagila, laban langit mirah.’ 3 Lalu lebuh pagi hari kita nyebut, ‘Ka ujan hari tu, laban langit mirah sereta petang laban mua hari.’ Kita nemu madahka gaya hari ari utai ti dipeda kita ba langit, tang kita enda nemu nerangka tanda utai ke nyadi diatu. 4 Rebak ti jai sereta enda taluk ngagai Petara* suah minta tanda. Tang nadai tanda deka diberi ngagai rebak tu, kelimpah ari tanda Jonah.” Udah nya, iya ninggalka sida.

5 Lebuh bala murid Jesus mupuk ke seberai danau nya, sida enda ingat mai roti. 6 Ku Jesus bejaku enggau sida: “Bejimat sereta bejaga ari ragi orang Parisi enggau ragi orang Saduki.” 7 Sida lalu berandau enggau pangan diri. Ku sida: “Iya engka munyi nya laban kitai nadai mai roti.” 8 Tang Jesus nemu utai ke dikerandauka sida. Lalu ku iya: “Mit amat pengarap kita. Nama kebuah kita berandauka pasal nadai mai roti? 9 Kati kita lalu bedau mereti? Kati kita enda ingat? Berapa bakul teda pemakai digumpul kita pengudah lima iti tuku roti diberi ngagai 5,000 iku lelaki? 10 Tauka berapa bakul besai teda pemakai digumpul kita pengudah tujuh iti tuku roti diberi ngagai 4,000 iku lelaki? 11 Nama kebuah kita lalu enda mereti? Aku ukai bejaku pasal roti. Aku bejaku pasal kita ke patut bejaga ari ragi orang Parisi enggau ragi orang Saduki.” 12 Nya baru sida nemu utai ku iya. Iya ukai ngasuh sida bejaga ari ragi ti dikena ngaga roti, tang bejaga ari ajar orang Parisi enggau ari ajar orang Saduki.

13 Lebuh Jesus datai ba menua Kaisaria Pilipi, iya lalu nanya bala murid iya: “Ba penemu orang, sapa Anak Mensia?” 14 Ku sida nyaut: “Bisi orang ngumbai iya John Pemaptisa. Sekeda ngumbai iya Elijah. Lalu sida ke bukai, ngumbai iya Jeremiah tauka siku ari nabi ti bukai. 15 Iya lalu nanya sida: “Ba kita, sapa aku tu deh?” 16 Simon Peter nyaut: “Nuan tu Kristus, Anak Petara ti idup.” 17 Ku Jesus bejaku ngagai iya: “Gaga ati meh nuan, Simon anak Jonah. Laban ukai mensia ti madahka utai tu ngagai nuan, tang Apai aku ti ba serega. 18 Aku mega madah ngagai nuan: Nuan tu Peter. Ba atas batu tu, aku deka nirika raban gempuru* aku. Lalu pintu Kubur* enda ulih ngalahka iya. 19 Aku deka meri nuan kunchi Perintah serega. Sebarang utai ditanchang nuan ba dunya tu, udah ditanchang ba serega. Lalu sebarang utai dilepaska nuan ba dunya tu, udah dilepaska ba serega.” 20 Udah nya, Jesus bebendar nagang bala murid iya madah ngagai orang iya nya meh Kristus.

21 Berengkah ari nya, Jesus lalu belabuh madah ngagai bala murid iya, iya patut mansang ngagai Jerusalem, lalu deka balat diperinsa bala tuai bansa orang Judah, bala tuai imam, enggau bala penulis Adat. Iya mega madahka, iya deka dibunuh. Tang ba hari ti ketiga, iya deka diidupka baru. 22 Peter lalu mai iya ke tisi, lalu belabuh ngerara iya. Ku Peter: “Anang munyi nya, Tuan.* Utai nya enda sekali-kali nyadi ba nuan.” 23 Tang Jesus nguing lalu bejaku ngagai Peter: “Rari ari aku, Sitan! Nuan ngempang jalai aku,* laban nuan nitihka runding mensia, ukai runding Petara.”

24 Jesus lalu madah ngagai bala murid iya: “Barang sapa deka nitihka aku, awakka iya nulak pengingin diri empu,* ngesan tiang perinsa* iya, lalu enda ngetu nitihka aku. 25 Laban barang sapa ke deka ngidupka nyawa diri, deka ngelenyauka nyawa iya, tang barang sapa ke ngelenyauka nyawa diri ketegal aku, deka idup baru. 26 Nama penguntung orang enti iya bempu semua dunya, tang ngelenyauka nyawa diri? Tauka nama utai ti deka diberi orang kena iya nyelamatka nyawa diri? 27 Ba maya ti deka datai, Anak Mensia deka datai dalam mulia Apai iya. Iya deka datai enggau bala melikat iya ngakim genap iku orang, nitihka utai ti udah dikereja sida siku-siku. 28 Enggau bendar aku madah ngagai kita: Sekeda orang ke bediri ditu, enda mati seagi-agi sida bedau meda Anak Mensia datai dalam Perintah iya.”