Dua Korint

6 Kami bekereja begulai enggau Petara. Nya alai, kami minta kita ngambika enda masau pemanah ati Petara ti besai ke udah diterima kita. 2 Ku Petara bejaku: “Ba maya ti ngena, Aku ningaka nuan. Ba hari pengelepas, Aku nulung nuan.” Peda kita! Diatu meh maya ti ngena nya. Diatu meh hari pengelepas nya.

3 Ba semua pekara, kami enggai ngasuh orang labuh ba pengarap, ngambika orang enda bejaika pengawa kami ke Petara. 4 Tang kami deka nunjukka diri ulun Petara ba semua pekara. Kami ngenatka diri napi mayuh penguji, pemerinsa, penusah, enggau penyuntuk. 5 Kami dipalu, dijil, enggau diserang orang ke begau. Kami bebendar gawa, enda chukup tinduk, lalu kekadang nadai pemakai. 6 Pengidup kami tuchi sereta sejalai enggau penemu. Kami sabar, manah ati, ngayanka pengerindu ti enda pura-pura, sereta nitihka iring kuasa kudus. 7 Kami nyebut utai ti amat sereta bepanggai ba kuasa Petara. Ba jari kiba* enggau kanan,* kami megai senyata pengelurus. 8 Kami dipebasa, tang mega dikelese. Kami dipejai, tang mega dipuji. Kami dikumbai orang bula, tang kebendar iya kami nyebut utai ti amat. 9 Kami dikumbai orang ke enda dikelala, tang kebendar iya kami dikelala orang. Kami nyauka mati, tang kami agi idup. Taja pan kami diukum,* kami enda mati. 10 Kami baka ke tusah ati, tang kami seruran gaga ati. Kami baka ke seranta, tang kami ngasuh mayuh orang nyadi kaya. Kami baka ke nadai nama-nama utai, tang kami bisi semua utai.

11 Bala menyadi ba Korint, kami udah bejaku enggau terus terang ngagai kita, lalu kami udah nukangka* ati kami enggau besai. 12 Kami enda nyekat* pengerindu kami ke kita, tang kita ke nyekat pengerindu kita ke kami. 13 Aku bejaku ngagai kita baka ke bejaku enggau anak aku empu. Kereja meh utai ti sama ngagai kami. Tukangka* meh ati kita enggau besai.

14 Anang ngesan tangkun* enggau orang ke enda arap, laban tangkun ke baka nya deka nyadi berat sepiak. Nama kaul entara pemanah enggau penyai? Tauka nama kaul entara penampak enggau pemetang? 15 Nambahka nya, kati Kristus sejalai enggau Belial?* Tauka kati orang ke arap sejalai enggau orang ke enda arap? 16 Nama kaul entara Rumah Sembiang Petara enggau engkeramba? Kitai meh Rumah Sembiang Petara ti idup. Petara udah bejaku: “Aku deka diau begulai enggau sida, lalu bejalai enggau sida. Aku deka nyadi Petara sida, lalu sida deka nyadi nembiak Aku.” 17 “‘Nya alai, pansut ari bala sida lalu seraraka diri ari sida,’ ku Jehovah bejaku, ‘badu agi negu utai ti kamah’”; “‘lalu Aku deka nerima kita.’” 18 “‘Aku deka nyadi apai kita, lalu kita deka nyadi anak lelaki enggau anak indu Aku,’ ku Jehovah, Petara ti Pemadu Bekuasa.”