Dua Tesalonika

2 Taja pia, bala menyadi, bekaul enggau Tuan kitai, Jesus Kristus, ke pulai baru* sereta bekaul enggau kitai ke digempuruka sama enggau iya, kami minta 2 ngambika runding kita enda jampat charut enti orang madahka hari Jehovah* udah datai. Anang irau enti pesan nya baka ke datai ari Petara, datai ari jaku orang, tauka ari surat ke baka ke datai ari kami.

3 Anang nejuka orang nesatka* kita ngena sebarang chara, laban hari nya enda datai enti orang ti limpang ke ngelaban Petara* enda dulu datai, lalu orang ke jai ke deka dipunaska enda dulu dipandangka. 4 Iya nya meh orang ke ngelaban lalu ngumbai diri tinggi ari sapa-sapa ke dikumbai petara tauka utai ke disembah orang. Iya indah duduk ba Rumah Sembiang Petara, lalu nunjukka diri baka petara ba mua orang mayuh. 5 Kati kita enda ingat, lebuh aku agi enggau kita, aku suah madah ngagai kita pasal tu?

6 Diatu, kita nemu bisi utai ke nagang orang ke jai nya ari dipandangka, sebedau maya ke ditetapka datai. 7 Sigi amat, penyai orang nya benung dikereja belalai, lalu deka terus dilalaika nyentuk ngagai maya utai ke nagang iya nadai agi. 8 Pengudah nya, orang ke jai nya deka dipandangka. Lebuh maya Tuan Jesus pulai baru* nyadi nyata, orang ke jai nya deka dibuai lalu dipunaska ngena kuasa ke pansut ari mulut Jesus. 9 Ketegal Sitan meh orang ke jai nya bisi. Kuasa Sitan meh ke ngasuh iya ngereja semua macham pengawa ti bekuasa, kereja ajih, enggau kereja nyelai ti ngalitka ati ke nesatka orang, 10 sereta ngena semua macham pemula nipu orang. Semua sida ke kena tipu nya deka dipunaska. Baka nya meh sida deka diukum, laban sida enda nerima sereta enda rinduka pemendar ti ulih nyelamatka sida. 11 Nya meh kebuah Petara nejuka sida ditipu ajar ti salah, nyentukka sida arapka pemula nya. 12 Enggau nya, semua sida deka diukum, laban sida enda arapka pemendar tang rinduka utai ti enda lurus.

13 Taja pia, bala menyadi ti dikerinduka Jehovah, kami mesti beterima kasihka Petara ke kita, laban kenyau ari pun, Petara udah milih kita ngambika diselamatka. Iya nguduska kita ngena kuasa kudus* Iya, laban kita arapka pemendar. 14 Ketegal nya meh Petara ngangauka kita nengah Berita Manah ke ditusui kami, ngambika kita bulih mulia Tuan kitai, Jesus Kristus. 15 Nya alai, bala menyadi, awakka kita bediri tegap, lalu terus bepegai ba utai ke diajar ngagai kita, sekalika kita nerima nya nengah pesan ke ditusui orang tauka ari surat kami. 16 Petara ti Apai kitai rinduka kitai, lalu nengah pemanah ati Iya ti besai, Iya meri kitai pengelantang ti meruan belama iya sereta utai ti manah ke ulih dianti kitai enggau andal. Kami besampi ngambika Iya enggau Tuan kitai, Jesus Kristus, 17 ngelantangka ati kita sereta negapka* kita, ngambika kita seruran ngereja sereta nyebut utai ti manah.