Kolosi

1 Aku, Paul, ke nyadi rasul Jesus Kristus nitihka peneka Petara, enggau menyadi kitai Timoti, 2 nulis surat tu ngagai nembiak Petara ti kudus sereta bala menyadi ke tetap ati ba Kolosi, ke beserakup enggau Kristus:

Ngarapka semua kita diberi pemanah ati ti besai sereta pengelantang ari Petara ti Apai kitai.

3 Lebuh kami besampi ke kita, kami seruran beterima kasih ngagai Petara, iya nya Apai Tuan kitai, Jesus Kristus, 4 laban kami ninga pasal pengarap ke diayanka kita ngagai Jesus Kristus sereta pengerindu kita ke semua nembiak Petara ti kudus. 5 Kita ngereja nya ketegal utai ke dianti kita enggau andal, ke udah diungkup ke kita ba serega. Sebedau tu, kita udah ninga pasal utai ke dianti kita nya nengah pemendar Berita Manah 6 ke ditusui ngagai kita. Berita Manah tu mansutka asil sereta ngelekai ngagai serata dunya. Nya mega nyadi ba bala kita, kenyau ari maya kita ninga sereta nemu enggau betul pasal nama kebendar iya pemanah ati Petara ti besai. 7 Nya meh utai ke dipelajar kita ari Epafras, siku ulun ke baka kami, ti dikerinduka kami. Iya enggau tetap ati bekereja ke Kristus ngarika kami. 8 Iya mega madah ngagai kami pasal kuasa kudus* nulung kita ngayanka pengerindu.

9 Nya meh kebuah kenyau ari maya kami ninga pasal nya, kami enda kala ngetu besampi ke kita. Kami besampi ngambika kita penuh laban penemu ti betul pasal peneka Petara sereta ngembuan semua penemu-dalam enggau pemereti ati ke diberi kuasa kudus. 10 Enggau nya, kita deka idup baka orang ke nyembah Jehovah* sereta ngelantangka ati Iya enggau pengabis iya. Kita deka mansutka asil ba tiap iti pengawa manah ke digaga kita, lalu penemu kita ti betul pasal Petara deka majak nambah. 11 Arapka kuasa Petara ti besai sereta bemulia ngeringka kita, ngambika kita betan napi semua utai enggau sabar sereta gaga ati. 12 Beri terima kasih mega ngagai Apai, ke ngasuh kita layak nerima sebagi ari pesaka ke diberi ngagai nembiak Petara ti kudus, ke bejalai dalam penampak.

13 Iya udah nyelamatka kitai ari kuasa pemetang, lalu mindahka kitai ngagai perintah Anak Iya ke dikerinduka Iya. 14 Nengah Anak Iya, kitai ditebus sereta dilepaska, lalu dosa kitai diampunka. 15 Anak nya ngambarka Petara ke enda ulih dipeda, lalu iya meh anak tuai entara semua utai ke udah ditempa.* 16 Nengah iya meh semua utai ba serega enggau ba dunya ditempa, sekalika nya utai ke ulih dipeda tauka enda ulih dipeda, sekalika nya kerusi diraja, bala pemesai, bala perintah, tauka sida ti bekuasa. Semua utai bukai ditempa nengah iya lalu ditempa ke iya. 17 Iya udah dulu bisi sebedau semua utai bukai, lalu nengah iya meh semua utai bukai bisi. 18 Iya meh kepala tubuh, iya nya raban gempuru.* Iya meh pun semua utai sereta anak tuai ari bala orang mati. Enggau nya, iya nyadi orang keterubah ba semua pekara, 19 laban Petara gaga ati ngasuh semua utai chukup magang ba Anak Iya. 20 Nengah Anak Iya, Petara bebaik baru enggau semua utai bukai, sekalika nya ba dunya tauka ba serega. Petara bebaik enggau sida nengah darah Anak Iya ke dituangka ba tiang perinsa.*

21 Suba, kita diseraraka ari Petara lalu nyadi munsuh Iya, laban kita seruran berundingka utai ti jai. 22 Tang diatu, Petara udah bebaik baru enggau kita nengah pemati Anak Iya ke nyerahka tubuh diri, ngambika ba mua Petara, kita nyadi kudus, tuchi, sereta bibas ari sebarang jaku tuduh. 23 Tang kita patut terus ngayanka diri arap, tegap ba pugu nya, entap, sereta enda bekinsit ari utai ke dianti kita enggau andal ke datai ari Berita Manah. Berita Manah nya udah didinga kita sereta udah ditusui ngagai semua utai ke udah ditempa ba baruh langit. Aku, Paul, nyadi ulun ke nusui Berita Manah nya.

24 Diatu, aku gaga ati taja pan aku merinsa ke penguntung kita. Aku merinsa baka Kristus, tang aku patut merinsa nyentuk ke pengujung iya ke penguntung tubuh Kristus, iya nya raban gempuru. 25 Aku nyadi ulun ke raban gempuru tu, sejalai enggau tanggung pengawa ke diberi Petara ngagai aku, ngambika aku ulih nusui jaku Petara enggau pengabis iya ke penguntung kita, 26 iya nya nusui pasal resia ti kudus ke dilalaika ari jeman* kelia menya sereta ari rebak ke suba. Tang diatu, resia nya udah dipandangka ngagai nembiak Petara ti kudus. 27 Petara gaga ati mandangka ngagai sida resia ti kudus nya, ke udah dipandangka Iya ngagai bansa bukai. Resia ti kudus ke bemulia sereta berega nya, Kristus beserakup enggau kita, lalu tu reti iya kita andal nganti deka dimuliaka enggau iya. 28 Iya meh ke ditusui kitai, lalu kitai nangkan sereta ngajar semua orang ngena semua penemu-dalam, ngambika kitai ulih nulung tiap iku orang ke beserakup enggau Kristus nyadi tegap ba pengarap ba mua Petara. 29 Ketegal nya meh aku enggau naka ulih bebendar gawa ngena pengering sereta kuasa ke diberi Petara ngagai aku.