Beterima Kasih ke Pengasih Petara

1, 2. (a) Padahka sempama Jesus pasal orang ke bempu kebun anggur. (b) Baka ni cherita nya ngambarka kualiti baka gerah mudah enggau pengasih?

TUMU pagi, seiku orang ke bempu kebun anggur mupuk ngagai pasar ngiga orang ke ulih gawa ke iya. Iya deka meri sida penyampau gaji ke patut, lalu sida setuju. Tang ketegal orang ke bempu kebun nya begunaka mayuh agi pekereja, iya mupuk baru ke pasar berapa kali dalam sehari ngambika ulih ngaji mayuh agi orang. Iya meri penyampau upah ke sama bela ngagai sida. Lebuh hari nyau lemai, orang ke bempu kebun nya ngangau semua pekereja laban deka mayar gaji sida. Lalu sekalika sida gawa apus hari tauka semina sejam aja, iya meri sida gaji ti sama penyampau. Taja pia, lebuh sida ke gawa apus hari nya berengkah mut-mut, orang ke bempu kebun nya madahka: ‘Ukai enda nuan empu ke besetujuka gaji ke diberi aku? Kati aku enda tau ngena duit aku sepeneka ati aku? Tauka nuan kepapas meda aku gerah mudah meri utai ngagai orang?’—Mat. 20:1-15.

² Cherita Jesus ngajar kitai pekara ti beguna pasal “pengasih” Jehovah. (Bacha 2 Korint 6:1.) Baka ni? Sekeda orang engka ngumbai orang ke gawa apus hari patut nerima mayuh agi gaji ari sida ke bukai. Tang, orang ke bempu kebun nya mandangka pengasih ngagai sida ke enda gawa apus hari. Seiku pakar nerangka pasal leka jaku “pengasih” ke dikena dalam Bup Kudus: “Reti leka jaku tu iya nya pemeri ti pechuma sereta enda patut diterima orang nya, utai ke diberi ngagai seiku-seiku orang ke enda ibuh bebendar ngulihka utai nya.”

3, 4. Nama kebuah, lalu baka ni Jehovah udah mandangka pengasih ngagai semua mensia?

³ Bup Kudus madah ngagai kitai, pengasih Petara nya “pemeri ti pechuma.” (Eps. 3:7, NW) Ketegal kitai enda ulih ngasika Jehovah enggau pengabis manah, kitai enda patut nerima sebarang pengasih ari Iya. Iya ke amat, kitai enda patut idup. Raja Solomon madahka: “Nadai orang di dunya tu ti nadai kala ngereja utai ti salah.” (P-jar. 7:20) Udah nya, rasul Paul madahka: ‘Semua bela udah bedosa magang lalu jauh ari mulia Petara,’ lalu “upah dosa nya pemati.”—Rom. 3:23; 6:23a.

⁴ Ketegal Jehovah balat rinduka mensia, Iya ngirumka “Anak Tunggal Iya” ngambika mati ke kitai. Nya meh pengasih ti pemadu besai. (Jhn. 3:16) Paul madahka, Jesus diatu ‘diberi makota mulia enggau basa laban iya udah merinsa natka pemati, ngambika, ulih pengasih Petara, iya mati ke semua mensia.’ (Heb. 2:9) Amat, ‘pemeri ti diberi Petara pechuma nya pengidup ti meruan belama iya dalam Jesus Kristus Tuan kitai.’—Rom. 6:23b.

5, 6. Nama nyadi enti kitai diperintah (a) dosa? (b) pengasih?

⁵ Nama kebuah kitai bedosa sereta mati? Bup Kudus madahka, “ketegal dosa orang siku, pemati merintah ulih orang siku nya.” Nya alai, ketegal kitai peturun Adam, kitai enda sempurna sereta ulih mati. (Rom. 5:12, 14, 17) Taja pia, kitai agi ulih milih enda diperintah tauka dikuasa dosa. Baka ni tu ulih? Lebuh kitai ngayanka pengarap ngagai genselan tebus Kristus, kitai bulih penguntung ari pengasih Jehovah. Bup Kudus madahka: ‘Lebuh dosa betambah, pengasih Petara betambah mayuh agi, ngambika, baka dosa ti merintah ngena pemati, baka nya mega pengasih merintah ngena pengelurus lalu mai ngagai pengidup ti meruan belama iya, ulih Jesus Kristus Tuan kitai.’—Rom. 5:20, 21.

⁶ Taja pan kitai agi bedosa, kitai enda patut ngelakka dosa merintah atas kitai. Nya alai, lebuh kitai ngereja penyalah, kitai minta pengampun ari Jehovah. Paul madahka: “Dosa nadai agi merintah kita, laban kita ukai di baruh Adat, tang di baruh pengasih.” (Rom. 6:14) Nya alai, baka ni kitai tau bulih penguntung ari pengasih Petara? Paul madah ngagai kitai: ‘Pengasih Petara . . . ngajar kitai muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Petara dalam dunya tu.’—Tit. 2:11, 12.

7, 8. Nama reti pengasih Jehovah “dipandangka ngena mayuh chara”? (Peda gambar ba pun artikel.)

⁷ Rasul Peter nulis: ‘Laban kita udah diasuh Petara ngibun pemeri ti diberi Iya, kena meh pemeri nya nulung pangan diri, baka ulun ke manah ti nerima pengasih Petara ke dipandangka ngena mayuh macham chara.’ (1 Pet. 4:10, NW) Nama reti pengasih Jehovah “ke dipandangka ngena mayuh macham chara”? Reti nya, enda ngira nama penanggul ke ditapi kitai ba pengidup, Jehovah deka meri kitai utai ti diguna ngambika kitai ulih tan. (1 Pet. 1:6) Iya seruran deka meri kitai utai ti amat diguna kitai ngambika kitai ulih mutarka tiap iti penguji.

⁸ Rasul John nulis: “Semua kitai udah nerima pengasih ti nambah-menambah.” (Jhn. 1:16) Ketegal Jehovah mandangka pengasih Iya ngena mayuh chara, kitai nerima mayuh berekat. Nama sekeda ari berekat nya?

 9. Nama berekat ke diulih kitai ari pengasih Jehovah, lalu baka ni kitai mandangka diri beterima kasih ke pengasih Iya?

⁹ Jehovah ngampun dosa kitai. Kitai beterima kasih ke pengasih Jehovah, laban Iya ngampun dosa kitai. Tang Iya semina ngampun dosa kitai, enti kitai nesal ati, lalu terus ngelaban pengingin kitai ti bedosa. (Bacha 1 John 1:8, 9.) Paul madah ngagai orang Kristian ke diiri ngena roh kudus maya jeman iya, pasal chara Jehovah ngampun dosa. Ku Paul madahka: “[Petara] udah ngelepaska kitai ari kuasa pemetang, lalu mindahka kitai ngagai Perintah Anak ke dikerinduka Iya, ke udah nebus kitai, reti nya, udah ngampun dosa kitai.” (Kol. 1:13, 14) Kitai amat beterima kasih ke pengasih Petara, nya alai kitai deka muji Iya. Lalu ketegal Jehovah ngampun dosa kitai, kitai mega ulih nerima mayuh berekat ti ngerinduka ati.

10. Nama diulih kitai ketegal pengasih ari Petara?

¹⁰ Kitai ulih bebaik enggau Petara. Kitai enda sempuna, nya alai kenyau ari ada, kitai nyadi munsuh Petara. Tang Paul madahka: ‘Lebuh kitai agi nyadi munsuh Petara, dibai bebaik enggau Iya ulih pemati Anak Iya.’ (Rom. 5:10) Ketegal tebus, kitai ulih bebaik enggau Petara, lalu nyadi kawan Iya. Paul nerangka tu lalu baka ni utai nya bekaul enggau pengasih Jehovah lebuh iya madah ngagai bala menyadi Kristian iya ke diiri ngena roh kudus: ‘Laban kitai digaga lurus ulih pengarap, kitai diau dalam pemaik enggau Petara ulih Jesus Kristus Tuan kitai. Ulih iya kitai udah ulih datai ngagai pengasih ti alai kitai bediri diatu.’ (Rom. 5:1, 2) Kitai amat gaga ati laban ulih bebaik enggau Jehovah!

11. Baka ni orang ke diiri ngena roh kudus ngajar “bedus ti bukai” ngereja utai ti lurus?

¹¹ Kitai ulih lurus ba mua Petara. Nabi Daniel madahka, maya pengujung dunya, “bala tuai ti bepenemu-dalam” iya nya orang ke diiri ngena roh kudus deka “ngajar orang ngereja utai ti ngena [“lurus,” NW].” (Bacha Daniel 12:3.) Baka ni orang ke diiri ngena roh kudus ngereja nya? Sida nusui berita manah, lalu ngajar bejuta iku “bedus ti bukai” pasal Adat Jehovah. (Jhn. 10:16) Sida nulung “bedus ti bukai” nyadi lurus ba mua Jehovah, lalu tu semina ulih dipejalai ketegal pengasih Iya. Paul nerangka: “Diatu sida digaga lurus ulih pengasih ti diberi Iya pechuma, lebuh sida ditebus Jesus Kristus.”—Rom. 3:23, 24.

12. Baka ni sampi bekaul enggau pengasih Petara?

¹² Kitai ulih semak ngagai Petara nengah sampi. Ketegal pengasih Jehovah, kitai ulih besampi ngagai Iya. Paul ngumbai kerusi diraja Jehovah nya ‘kerusi diraja Petara ti kasih,’ lalu Iya mai kitai mansang ngagai kerusi diraja Iya “bejaku enggau berani.” (Heb. 4:16a, NW) Kitai ulih besampi ba sebarang maya ngagai Jehovah nengah Jesus. Tu endang basa ti amat besai! Paul madahka: ‘Kitai bejaku enggau berani sereta ulih ngadap Petara enggau pengandal nengah pengarap kitai ngagai Iya.’—Eps. 3:12, NW.

13. Baka ni pengasih ulih “nulung kitai lebuh kitai begunaka iya”?

¹³ Kitai bulih tulung lebuh kitai begunaka iya. Paul meransang kitai besampi ngagai Jehovah ba sebarang maya lebuh kitai begunaka iya, “ngambika kitai ulih nerima pengasih lalu nemu berekat, kena nulung kitai lebuh kitai begunaka iya.” (Heb. 4:16b) Genap kali kitai bisi penguji tauka penanggul ba pengidup, kitai ulih minta tulung ari Jehovah. Lalu Iya deka nyaut sampi kitai, taja pan Iya tau enda ibuh ngereja nya. Iya suah ngena bala menyadi Kristian nyaut sampi kitai. Jehovah nyaut sampi kitai “nya alai, kitai kempang ati nyebut, ‘Jehovah endang penyaup aku, nya alai aku enda takut. Nama utai ulih dikereja orang ngagai aku?’”—Heb. 13:6.

14. Nama berekat pengasih Jehovah ngagai ati kitai?

¹⁴ Kitai ulih nerima pengelantang ba ati. Endang berekat ti besai, Jehovah ngelantangka ati kitai tiap kali kitai balat tusah ati. (Mas. 51:17) Lebuh orang Kristian ba Tesalonika balat diperinsa, Paul nulis: ‘Awakka Jesus Kristus Tuan kitai, enggau Petara ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya, meransang sereta ngeringka ati kita ngereja enggau nyebut semua utai ti manah.’ (2 Tes. 2:16, 17) Endang ngelantangka ati lebuh nemu, ketegal pengasih, Jehovah rindu sereta ibuh ke kitai!

15. Nama pengadang ke diulih kitai ketegal pengasih Petara?

¹⁵ Kitai bisi pengadang idup meruan belama iya. Ketegal kitai orang ti bedosa, kitai nadai pengadang enti nadai tulung ari Jehovah. (Bacha Masmur 49:7, 8.) Tang Jehovah udah meri kitai pengadang ti ngerinduka ati. Nama pengadang nya? Jesus madahka: ‘Tu meh peneka Apai aku, iya nya, semua orang ke meda Anak, lalu arapka iya, bulih pengidup ti meruan belama iya.’ (Jhn. 6:40) Nya alai, kitai bisi pengadang idup belama iya ketegal pengasih Jehovah. Paul madahka: ‘Laban pengasih Petara udah pegari, mai pengelepas ngagai semua mensia.’—Tit. 2:11.

16. Baka ni sekeda orang Kristian ti keterubah nyalah guna pengasih Petara?

¹⁶ Kitai nerima mayuh berekat ketegal pengasih Jehovah. Taja pia, kitai enda patut nyalah guna pengasih Iya, iya nya nyadika pengasih nya peluang kena ngereja dosa. Ari semua orang Kristian ti keterubah, bisi sekeda orang ke nguji ‘nyarutka pesan pasal pengasih Petara, lalu ngaga nya nyadika peluang kena sida ngereja pengawa ti kamah.’ (Jud. 4) Orang Kristian ke enda tetap ati tu ngumbai sida tau ngereja dosa, lalu ngumbai Jehovah seruran deka ngampun sida. Sida indah nguji mai bala menyadi Kristian ke bukai enggau sida ngereja dosa. Kemaya hari tu mega, barang sapa ke ngereja nya ‘udah ngeleseka roh kudus ti meri pengasih.’—Heb. 10:29.

17. Nama jaku tangkan berat ti diberi Peter?

¹⁷ Sitan udah nipu sekeda orang Kristian kemaya hari tu enggau ngasuh sida berunding, sida tau ngereja dosa, lalu ngumbai Jehovah deka terus ngampun sida. Endang amat, Jehovah sigi deka ngampun orang ti bedosa ke nesal ati; taja pia, Iya ngarapka kitai ngelaban pengingin kitai ke bedosa. Jehovah ngasuh Peter nulis: ‘Nya alai, menyadi, laban kita udah diberi jaku tangkan tu, anang enda bejaga, enggai ke kita dibai orang ke enda beradat ngereja penyalah, lalu labuh ari penuduk kita ti likun. Tang mansang kita dalam pengasih enggau penemu pasal Jesus Kristus ti Tuan enggau Juruselamat kitai.’—2 Pet. 3:17, 18.

18. Ketegal pengasih Jehovah, nama tanggung pengawa ke dikemisi kitai?

¹⁸ Kitai amat beterima kasih ke pengasih Jehovah. Nya alai, kitai patut ngena pemeri kitai ngemuliaka Jehovah sereta nulung orang bukai. Kitai berutang pengasih ba sida. Baka ni kitai ulih ngena pemeri nya? Paul madahka: “Kitai bisi pemeri ti enda sebaka, tang nitihka pengasih ti udah diberi ngagai kitai. . . . enti kitai bisi pemeri mela orang, awakka kitai mela orang; enti kitai bisi pemeri ngajar orang, awakka kitai ngajar orang; enti kitai bisi pemeri meransang orang, awakka kitai meransang orang; . . . enti kitai bisi pemeri ngayanka pengasih ngagai orang, awakka kitai ngereja nya enggau ati ti gaga.” (Rom. 12:6-8) Nya alai, ketegal pengasih Jehovah, kitai bisi tanggung pengawa bebendar gawa ba pengawa nginjil, ngajar orang bukai pasal Bup Kudus, meransang bala menyadi Kristian kitai, sereta ngampun orang ke ngasuh kitai pedis ati.

19. Nama tanggung pengawa ke deka dikerandauka kitai ba artikel pengudah tu?

¹⁹ Ketegal udah diberekat enggau pengasih Jehovah, kitai patut enggau naka ulih ‘besaksika Berita Manah pasal pengasih Petara.’ (SKR. 20:24) Kitai deka berandauka tanggung pengawa tu ba artikel pengudah tu.