Alɔ cika ō dɔka ɔwɛ ɛyɛɛyɛyi nɛ alɔ géē mafu uce ogbonɛnɛ klla lɛ ojilima ce aɔya ku Ujehofa. (Uróm 12:10) Ɛgɛnyá a? Ɔwɛ éyi nɛ alɔ lɔfu ya ɛnyā néē kɛla lɛyikwu ɔ ipu ɔkpá ku Aíjē Kú Ɛ̄gbā 15:4 a, wɛ ka ugbɔga ipu aklɔkpɛ ku Ujehofa gē “yá okónu nɛ̄ ó cē ā piíí, ɛ́gɛ́ dúú nɛ̄ ó lɛ ɔnɔ tū ɔ̄ lɛ ā.” Ɔdaŋ ku alɔ i gē ya okonu nɛ alɔ ce a ŋ, alɔ géē lɔfu biya ācɛ ɔhá ɔtu. (Umát. 5:37) Ocabɔ mafu, Ujehofa leyice ku aɔba mla anya géē lɛ okonu néē ce mla iyi uwa eko néē lɛ iyi uwa a tu. Ó klla gē gweeye eko duuma nɛ ó má aɛ́nɛ́ mla aadā gē ceyitikwu lɔfu lɔfu ō lɛ okonu néē ce lɛ ayi uwa a tu. Ohigbu ka alɔ yihɔtu Ɔwɔico mla ācɛ ɔhá a, alɔ géē ya ɔdā duuma nɛ alɔ ya gla a ō lɛ aokonu nɛ alɔ ce a tu. Ɔwɛ ɔhá nɛ alɔ lɔfu lɛ ojilima ce aɔya ku Ɔwɔico a wɛ ō mafu uce ogbonɛnɛ lɛ uwa mla ō nwula abɔ lɛ uwa. (Uróm 12:13) Ɔdaŋ ku alɔ gē le eko taajɛ ō jɔɔnyɛ ō yɔ tɔha mla ayinɛ alɔ nōó wɛ eko ku ōjila ku ujɔ amāŋ ipu uklɔ ku ɔna ō ta foofunu ŋ, alɔ géē tubla uwa mla Ujehofa ajaajɛ fiyɛ. O ka tu ɔ, ɔdaŋ ku alɔ gē mafu uce ogbonɛnɛ, alɔ gē gbla Ujehofa ya. w24.06 12 ¶15-16

Ujehofa mafu ɔkwɛyi a lɛ ācɛ nōo gē tu iyi uwa waajɛ a. (Umát. 11:25) Alɔ tu iyi alɔ waajɛ miyɛ otabɔ ō nwu ɛlā ɔkwɛyi a. (Ācot. 8:​30, 31) Naana kpɔ a, alɔ cɛgbá ō leyi kwɛɛcɛ lɔɔlɔhi ku alɔ je piya ācɛ o yɔbɔɔcɛ ŋ. Ɔdaŋ ka alɔ gbɔɔ ō yɔbɔɔcɛ, alɔ lɔfu gbɔɔ ō gbɛla ka ɛlá ō gbo ku alɔ le kpaakpa bɛɛka aukɔ́ ŋma ipu Ubáyíbu, mla ɔwɛ o mafu nōo gē ŋma ɛgiyi ɔwa ku Ujehofa a. O ya ɛɛ ku alɔ gɔbu ō wɛ ācɛ o tu iyi alɔ waajɛ, alɔ cɛgbá ō bla ɛgɛ nɛ alɔ nyɛɛ nɛɛnɛhi lɛ ɛgiyi Ujehofa a. (Aíjē 8:​3, 4) Alɔ lɔfu ba Ujehofa ɛba kóō ta alɔ abɔ ō wɛ ācɛ o tu iyi alɔ waajɛ fiyɛ, mla ācɛ néē lɔfu nwu uwa ɛlā gla. Ujehofa géē ta alɔ abɔ ku ɛlá ō gbo ku nu nɛ alɔ nwu ŋma ipu Ɛlā mla ɔwa ku nu a, kóō jɛ alɔ eyī fiyɛ ɛlá ō gbo ku abɔyi alɔ. Ipu Ubáyíbu ō jé ku uwɔ, dɔka aɔdā nōo mafu ka Ujehofa yihɔtu uce kóō tu iyi ɔcɛ waajɛ klla gē wɔtu ɔbɔɔcɛ ō ya, ikpɛyi olɔfu ō ya, mla ō jɛ iyi ɔcɛ eyī fiyɛ ɔfu. Ó klla cɛgbá ku a ceyitikwu ō wɛ ɔcɛ tu iyi uwɔ waajɛ, ofluflu eko nɛ a miyɛ uklɔ nōo géē je íkwu ōhī gā uwɔ, amāŋ nōo géē ya ku ācɛ ɔhá kéē jé lɛyikwu uwɔ. w24.07 10 ¶8-9

Ŋmiifi ihayi ku 1919 mla otabɔ ku Ujehofa, Ujisɔsi humayi bi ígwu ligii ku acɛnyilɔ néē lɛ anɔ tu uwa ɛyi a le ma ɔwɛ fu lɛ alɔ, ɛgɛ nɛ alɔ géē piyatɔha ō yuklɔ ku ɔna ō ta a, mla ō je ɔdole ku Ɛlā Ɔwɔico lɛ alɔ eko okpaakpa a. (Ulúk. 12:42) Ó kē teyi peee ka Ujehofa yɔ i hɔha ce uklɔ nɛ ígwu ɔɔma yɔ i ya a. (Ayis. 65:​13, 14) Ɔdaŋ ku alɔ i gē yɛ i piyatɔha ŋ, ó gē yɛ i tɔɔtɛ lɛ alɔ ō yuklɔ nɛ Ujisɔsi je lɛ alɔ ō ya a ŋ. (Umát. 28:​19, 20) Ocabɔ mafu, ɔdaŋ ku ayinɛ nōo yɔ i bi alɔ jé ɔwɛ a i gē yɛ i ya ku alɔ piyatɔha ō yuklɔ ku ɔna ō ta a ɛjɛɛji ɛga nɛ ujɔ ku alɔ cika ō tɔɔna a ŋ, ɔɔma lé ka alɔ lɔfu tɔɔna ɛga duuma nōo he alɔ ɔtu a. Alɔ lɔfu yɔ i tɔɔna ɔwɛ ɛga éyi foofunu ŋma eko teeko, ó kē lɛ ɛga ɔhá nɛ alɔ i kóō gáā lɔfu tɔɔna ŋ duudu. A lɔfu gbɛla lɛyikwu aɔwɛ ɔhá nɛ alɔ gē lɛ itene ohigbu ku alɔ piyatɔha a? Ɛgɛ nɛ Ujisɔsi ya ku ayikpo ku nu kéē piyatɔha eko nɛ ó yɔ ipu ɛcɛ nyā a, ó gɔbu yɔ i piya ācɛ ɔlɛ Ɔwɔico tɔha icɛ duu. w24.04 8-9 ¶2-4