Eko duuma nɛ ācɛ ɔhá lɛ ɛpɔ nōó kpaakpa ŋ ka tu alɔ amāŋ ya ɛlā mla alɔ ɔwɛ obɔbi, alɔ lɔtuce ka Ujehofa jé ɔkwɛyi a. Ō jé ka igbihaajɛ Ujehofa géē ya ka ɛjɛɛji ɛlā a kóō le ya tu ɔwɛ okpaakpa a, géē ta alɔ abɔ lé ɔtu ɔwɛ obɔbi néē gē ya ɛlā mla alɔ a. Ɔdaŋ ka alɔ lɔtuce Ujehofa klla gbeyi nu kóō lɛ ɛjɛɛji unwalu bi wa oŋmɛyi, alɔ i gáā gɔbu yɔ i cɔnu amāŋ wɔtu ācɛ ɔhá ŋ. Ō gɔbu yɔ i cɔnu mla ācɛ ɔhá lɔfu ya ku alɔ ya ɔdobɔbi, ya ku eeye ku alɔ kóō hɛ alɔ abɔ, klla lɔfu biya ɛma nɛ alɔ lɛ mla Ujehofa a. Ku ɛlā ɔkwɛyi a, ó gáā tɔɔtɛ lɛ alɔ ō yɛce ocabɔ ku Ujisɔsi mɛɛlɛ gla ŋ. Ekoohi, alɔ lɔfu kɛla amāŋ ya odee nɛ alɔ géē hijema ku nu igbihaajɛ. (Ujɛ́m. 3:2) Ekoohi, ɔwɛ nɛ ācɛ ɔhá ya ɛlā mla alɔ ɔwɛ obɔbi lɛ a, lɔfu ya ku alɔ jɔnɔ amāŋ ku ɔtu kóō gbenyi lɛ alɔ ipu ɛjɛɛji oyeeyi ku alɔ ipu ɛcɛ nyā. Ɔdaŋ ka ɔɔma wɛ āhɔ̄ ku uwɔ a, le jé kpɔcii ka Ujehofa jé ɔdā nɛ a yɔ i má a. Ujisɔsi abɔyi nu jé ɛgɛ nɛ ɔtu yɔ i ya uwɔ lɛ a, ohigbu ka é ya ɛlā mla anu ɔwɛ obɔbi duu ɛ. (Uhíb. 4:​15, 16) Alɔ gweeye nɛhi ka Ujehofa je aukɔ́ ocɛgbá lɛ alɔ ipu ɛlā ku nu, nōo gēé ta alɔ abɔ eko duuma néē yɔ i ya ɛlā mla alɔ ɔwɛ obɔbi. w24.11 6 ¶12-13

Ō kpɔtuce Ujisɔsi cɛgbá o ya ɛɛ ku alɔ lɛ “oyēeyī opiyóó” lɛ. (Ujɔ́n. 3:​16-18, 36; 17:3) Alɛwa ku ācɛ Ujiyu a i miyɛ cɛ ka é cika ō kpɔtuce Ujisɔsi ŋ. É da ɔ ɔka kahinii: “Ɔdā ō hídáagó nyá nāa géē yá cɛ́ɛ́ kú alɔ cɛ̄ɛ̄lā kú uwɔ ā?” (Ujɔ́n. 6:30) É klla ka ka ācɛ ɛpleeko ku Umosisi a gē miyɛ umana ɔwɛ ohidaago, ɔɔma ka é wɛ ɔdole néē gē lé ɛ̄cī doodu a. (Uneh. 9:15; Aíjē 105:40) Ó teyi peee, ka ɔdole ɔlamu ɛ̄nɛ̄ é géē lé a nɛ ɔtu ku uwa kwu ɔ kpɔ a. Eko nɛ Ujisɔsi kē kɛla lɛyikwu ‘igbo ɔkwɛ̄yi nōo ŋmá ɔkpáncō’ nōo lɔfu je eyiyoce lɛ uwa nōó lɛbɛɛka umana ŋ ma, é kóō da ɔ ɔka ku ɔdā nōo wɛyi nu a ŋ. (Ujɔ́n. 6:32) É lɛ ɔtu ku uwa kwu ɛgbá ku ɔkpiye ku uwa, néē kóō jahɔ tu ɛlā nɛ Ujisɔsi yɔ i ceyitikwu nwu uwa lɛyikwu ɛgɛ néē géē lɛ oyeeyi opiyoo a ŋ. w24.12 5-6 ¶10-11

Ɔyi uwɔ lɔfu nwu ɔdā alɛwa fiyɛ ipu inɔkpa lɛyikwu aɔdā nɛ Ɔwɔico ya, nɛ ō má eyī ku uwa gbla iyi uwa a. Ocabɔ mafu, ō má eyī ku ɛyinɛhi ku aɔcí gē gbla iyi uwa. Ɔcí a lɔfu yɔ i jɛ kpaakpa, cɛɛ ó kwu hɛ ɛpa ɔwɛ gáā lɛ abɔ ɔhá lɛ. Abɔ alɛwa géē gbɔɔ ō jɛ ŋma abɔ eyeeye ku uwa, oŋma ɔɔma, abɔ alɛwa a klla géē gbɔɔ ō lɛ abɔ ɔcí ligii ligii alɛwa aku uwa kpɔ. Aubeke gē hi ɛnyā ku fractals. Ó kē lɛ a ɔwɛ ɛgɛnyā ipu aɔdā alɛwa ɔhá kpɔ. Amáŋ ɔnyɛ ya kóō má eyī ku uwa kóō lɔhi nɛhi lɛ a? Ɔdaŋ ka ɔyi uwɔ gbɛla lipu lipu tu ɛnɛɛnɛ aɔdā nɛ Ujehofa ya a, ó lɔfu ta ɔ abɔ kóō kpɔtuce lɔfu lɔfu ka Ɔwɔico ya ɛjɛɛji odee a. Abɔ ɔyi uwɔ yɔ i jɛ a, a klla cɛgbá ō ta ɔ abɔ kóō jé ɔdā nōo ya ɛɛ nɛ ó cɛgbá ō lɛyitaajɛ lɛ íne ku Ɔwɔico a. O ya ɛɛ ku a ya ɛnyā, a lɔfu da ɔ ɔka kahinii: “Ɔdaŋ ka Ɔwɔico ya alɔ a, á gbɛla ka ó jé ɔwɛ olɔhi fiyɛ duu nɛ alɔ cika ō ya uce lɛ, o ya ɛɛ ku alɔ lɛ eeye ŋ?” Oŋma ɔɔma, a lɔfu lɛ ɔ ta ɔ eyī peee ka Ɔwɔico je Ubáyíbu lɛ alɔ, kóō bi ɔ le mafu lɛ alɔ ɛgɛ nɛ alɔ lɔfu lɛ eeye a. w24.12 16 ¶8