Aluji nyahị kpa oja ịnịịkịla u-uhye nya aanahị ịlẹ kị kaa kpa ịlahị ẹ-ẹpwụ nya ogu nya iJihova. (Eje. 31:13) Ị kaa wu aanahị ịhyẹ bala ọ-chị ẹla baa nyori nyị ri ala uguru-ẹla. Angịnyị nya ịKịrayịsị ịla oyi ọhọhẹ la akama ụma ọlịịwẹ nyọlẹ kị chị ẹla ba ọlẹrụ ịPọlụ ododu bala o-woo. Angịhyẹ hwabwọ la ọ-da ọlẹrụ ịPọlụ ụbwọ ụka kị woo ju agba i-iRom. (2 Tim. 1:8, 15; 2:8, 9) Kụ irya nya abwọlẹ kọ ka la ịPọlụ wẹẹ. Ọ chịpwụrụ bwu ẹpwụ nya akama lụmẹ-lụmẹ lẹ, ọ tị hu ọhịhị nyamwụ ju odo chajị nyaa ịnyịnyị. (Ụkụr. 20:18-21; 2 Kọr. 1:8) Ahị lala angịlẹ kị nyẹẹkpẹ da ịPọlụ ka! Lẹ ọ́ ka lahị ẹbyẹbyị nyọlẹ ká Olegu Onyobyi wẹẹ ya ahị da angịlẹ kị wẹẹ kpa ịlahị gụgụụgụ ka. Ọ tịtọ ká aanahị ịwẹ ka nyẹẹkpẹ da iJihova bala ọ-ka chị uhi juhi ịnyị. (1 Pit. 5:8) Kịnyaa la ọ-da aanang ụbwọ, a nyẹẹkpẹ daa ẹnẹnẹhẹ ka.—2 Tim. 1:16-18. w22.11 16-17 ¶8-11

Oloyi ọlẹ kọ yẹ irya da kị gwoo iloo ba okoji wẹ ịkịka nya iJisọsị ene kọọ gbu ka ri ọla iJuu myị́. Ala iJuu kaa gbịgba ha Ohe ookpokpo, ma ala ẹpwụma ịkịla tị myị la ihye lụmẹ-lụmẹ. (Ehe. 20:2, 3; 1 Kọr. 8:5, 6) Kori ká oleyi ọwẹ á ri ala iJuu ka ịnọ, ịtọ ọlẹ kị tọ ẹ-ẹpwụ nya ang ọjẹ́jẹ ọlalẹ ka ri “Á juhi nya ihye kpong-kpong ka?” Ọ́ ba ọ-ọwẹ ka, Ohe-é du iJisọsị warị chajị nya ala ẹpwụma wuu ka, ma ọ doo wẹ ẹga nya “ala Isirẹlụ ịlẹ kị hwahị ị-ịlahị nya Ohe Oluhye lala ịkpịlọ ịlẹ kị byibyi” ịnyị. (Mat. 15:24) Ohe họ ká ala Isirẹlụ jẹ́ nyori ọwa nyị ka wule egu eji. Lẹ ọ chịkpẹẹ ká oloyi ọlẹ kọ yẹ irya da wẹ ka jẹ́ ẹlẹwẹ ịnyịnyị, chajị ẹla ọlẹ kọ ya mẹjẹ nyori ọ me irya ká iJihova ka wule iJisọsị eji bwula igu kaka kpeji ị-Ịpyị-Adịrahụ nya Ohe. Ọ la ahị ọdahile nyori Ohe ka wuloo ọwa eji bwula igu ịnyịnyị myị́. Nyọlẹ ká oloyi ọlẹ kọ yẹ irya da ri ọla iJuu wẹẹ, ọ ka jẹ́ ẹla u-uhye nya Adam bala Iivu. Lẹ oloyi ọwẹ la ọ-jẹ́ myị̀myị̀ nyori ịParadayịsị ọlẹ ká iJisọsị ya ẹla rụ ẹ-ẹpwụ nya iLuku 23:43 nyị ka ri ẹga ọ-há ụhị yẹẹyẹẹ ám̀ odehe ọlẹ.—Ọmwụ. 2:15. w22.12 8-9 ¶2-3

Olegu nya Ohe à wẹẹ dahị ụbwọ du kahị jẹ́ wẹẹ ya ẹla nya Ohe myị́ alẹ ịnyịnyị lẹ. Ịyẹ tị́ du? Chajị Olegu Onyobyi wẹẹ dẹwụ tahị chajị ká ụkụrwọ nya ẹla nya Ohe oyaya nyahị ka dayi. (Ọwụ. 12:17) Ẹ-ẹhị nya ọngịnyị ehe lẹ, ọ lala o-ri ahị nyị́ nwà ịngịhyẹ ẹ-ẹga nya Olegu Onyobyi ka. Ma bwula ụkụrwọ nya ẹla Ohe oyaya nyahị, ahị wẹẹ kụrọọ myị́! (Ọwụ. 12:9-11) Ụ-ụgbẹyị oyina tị́? Ụka kahị ya ẹla nya Ohe, ahị wẹẹ mẹjẹ nyori áhị ju uhi nya Olegu Onyobyi ka. Ụka ọnyị myị́ ọnyị kahị ya ẹla nya Ohe, Olegu Onyobyi kaa mịleji. Ahị ka jẹ́-ẹ ya nyori olegu ịgọgọ à wẹẹ juhi ọngịrị lẹ bala o-ri iJihova chẹkpẹ juhi. (Mat. 5:10-12; 1 Pit. 4:14) Olegu nya Ohe ka jẹ́-ẹ ya ọngịrị hahị nyọka kụrụ akama ọnyị myị́ ọnyị kahị ka la ẹ-ẹpwụ nya ẹrụ ọnyịịla ọ-kpa pyẹ myị́. (2 Kọr. 4:7-9) Ịyẹ ahị tị́ tịtị ka họ chajị ká olegu nya Ohe ka ji uhye nyahị kịnyaa? Ahị baba nyọka raabwọ nyịlẹhị-ịlẹhị bịlẹ iJihova chajị nya olegu ịgọgọ, la ọ-jẹ́ myị̀myị̀ nyori Ọ ka wo abwọ ọrịrị nyahị. w22.11 5 ¶10-11