NIEBE

Puraw a kristal ti nagbalay a danum a nagtaud iti alibungubong ti danum iti atmospera. No agtinnag ti tunggal kristal ti niebe, dalusanna ti atmospera ken ikuyogna ti naglalaok nga elemento a kas iti asupre ken nitrohena, ngarud mapadam-egna ti daga bayat a babasaenna. (Isa 55:10, 11) Ti niebe ket mabalin a pagtaudan ti nadalus a danum a pagbuggo. (Job 9:30) Nupay manmano wenno saan pay ketdi nga agniebe iti sumagmamano a lugar ti Palestina, no dadduma agniebe iti Enero ken Pebrero iti naturod a luglugar, kas idiay Jerusalem. (Idiligyo ti 2Sm 23:20; 1Cr 11:22.) Bayat ti kaaduan a paset ti tawen agniebe kadagiti kangatuan a disso ken baw-ang ti Kabambantayan ti Libano; iti gistay intero a makatawen, maabbongan iti niebe ti tuktok ti nangato a Bantay Hermon. (Jer 18:14) Tukoyen ti Salmo 68:14 ti niebe idiay Zalmon, a paset ti Bantay Hauran (Jebel ed Druz), masarakan iti daya ti Jordan.

Kabaelan met nga imaniobra dayta ni Jehova, ti Namataud iti niebe. (Job 37:6; Sal 147:16) Nagipempem ti Dios iti niebe ken uraro “maipaay iti aldaw ti dangadang ken gubat,” tapno maitungpal ti panggepna.​—Job 38:22, 23.

Mangiladawan nga Usar. Iti Kasuratan, naaramat ti niebe kas pangyaspingan tapno mailadawan ti kinapuraw ti maysa a banag. (Ex 4:6; Nu 12:10; 2Ar 5:27; Da 7:9; Mt 28:3; Apo 1:14) No dadduma nainaig dayta iti kinasin-aw. (Isa 1:18; Un 4:7) Kas pagarigan, impakaasi ni David nga isu gugoran koma ti Dios manipud basol, a bugguanna tapno agbalin a “napudpudaw pay ngem iti niebe.”​—Sal 51:7.

Gapu ta saan a mangipapaay ti tallo a kakadua ni Job iti pudpudno a liwliwa kenkuana, nayaspingda iti ayus iti tiempo ti lam-ek, a ti danumna ket pinadakkel ti marunrunaw a yelo ken niebe ti bambantay ngem mamagaan gapu iti pudot ti kalgaw. (Job 6:15-17) Naikuna a rabsuten ti Sheol dagiti managbasol kas iti panangrabsut wenno panangipanaw ti tikag ken pudot kadagiti danum ti niebe. (Job 24:19) No kasano a saan a natural ken makadangran iti apit no agniebe iti kalgaw, kasta met a ti “dayag saan a mayanatup iti maysa a maag.” (Pr 26:1) Nupay kasta, ti matalek a babaonen, a mangitungpal iti rebbengenna iti wagas a makaay-ayo kadagidiay nangibaon kenkuana, ket nayasping iti inumen a pinalamiis ti niebe manipud bambantay ken makapabang-ar bayat ti napudot nga aldaw ti panagani.​—Pr 25:13.