Dagiti Pastor a “Pagulidanan ti Arban”

“Ipastoranyo ti arban ti Dios nga adda iti aywanyo . . . situtulok . . . , sigagagar . . . , [nga] agbalinkayo a pagulidanan ti arban.”​—1 PEDRO 5:2, 3.

1, 2. (a) Ania a pribilehio ti intalek ni Jesus ken ni apostol Pedro, ken apay a maiparbeng dayta a panagtalek? (b) Ania ti panangmatmat ni Jehova kadagiti nadutokan a pastor?

SAKBAY ti Pentecostes 33 K.P., ni Pedro ken ti innem pay nga adalan madamada idi a mangmangan iti pammigat nga insagana ni Jesus iti takdang ti Baybay ti Galilea. Saan a dayta ti damo a pannakakita ni Pedro iti napagungar a ni Jesus, ken awan duadua a magagaran a makakita a napagungar daytoy. Ngem mabalin nga alusiisen met idi ni Pedro. Sumagmamano ngamin nga aldaw sakbayna, inlibakna nga am-ammona ni Jesus. (Lucas 22:55-60; 24:34; Juan 18:25-27; 21:1-14) Tinubngar kadi ni Jesus ti agbabbabawi a ni Pedro gapu iti nagkurang a pammatina? Saan. Imbes ketdi, intalekna ken ni Pedro ti pribilehio a panangpakan ken panangipastor kadagiti ‘babassit a karnero’ ni Jesus. (Juan 21:15-17) Kas paneknekan ti salaysay ti Biblia maipapan iti kongregasion Kristiano idi umuna a siglo, saan a nagkamali ni Jesus a nagtalek ken ni Pedro. Kabayatan ti panawen ti nakaro a pannubok ken napartak a panagrang-ay, ni Pedro ken ti dadduma nga apostol ken lallakay iti Jerusalem sipapasnek nga impastoranda ti kongregasion Kristiano.​—Aramid 1:15-26; 2:14; 15:6-9.

² Iti panawentayo, babaen ken ni Jesu-Kristo nangdutok ni Jehova kadagiti kualipikado a lallaki nga agserbi kas naespirituan a pastor a mangiturong kadagiti karnerona kabayatan ti karigatan a panawen iti intero a pakasaritaan ti tao. (Efeso 4:11, 12; 2 Timoteo 3:1) Maiparbeng kadi ti kasta a panagtalek kadagita a lallaki? Wen, kas paneknekan ti talna nga agraraira iti tengnga ti Nakristianuan a panagkakabsat iti sangalubongan. Pudno, agkamali dagitoy a pastor gapu ta tattaoda laeng kas ken Pedro. (Galacia 2:11-14; Santiago 3:2) Kaskasdi, agtalek ni Jehova nga aywananda dagiti karnero a “ginatangna babaen ti dara ti bukodna nga Anak.” (Aramid 20:28) Dungdungnguen unay ni Jehova dagitoy a lallaki, nga ibilangna ida a “maikari iti mapamindua a dayaw.”―1 Timoteo 5:17.

 3. Kasano a makapagtalinaed a situtulok ken naregta dagiti naespirituan a pastor?

³ Kasano a makapagtalinaed a situtulok ken naregta dagiti naespirituan a pastor, iti kasta agbalinda a pagulidanan ti arban? Kas ken Pedro ken kadagiti dadduma a pastor idi umuna a siglo, agpannurayda iti nasantuan nga espiritu ti Dios, a mangipaay kadakuada iti bileg a kasapulanda tapno maibaklayda ti responsabilidadda. (2 Corinto 4:7) Ti nasantuan nga espiritu patanorenna met kadakuada dagiti bunga ti espiritu―ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, ken panagteppel. (Galacia 5:22, 23) Usigentayo ita ti sumagmamano nga espesipiko a pamay-an a maipakita dagiti pastor ti nasayaat nga ulidan no iti panangiparangarang kadagita a bunga bayat nga ipastoranda ti arban ti Dios a naitalek kadakuada.

Ayatenyo Agpadpada ti Arban ken ti Tunggal Karnero

4, 5. (a) Kasano nga ipakpakita da Jehova ken Jesus ti panagayatda iti arban? (b) Ania ti sumagmamano a pamay-an nga ipakpakita dagiti naespirituan a pastor ti panagayatda iti arban?

⁴ Ti ayat ti kangrunaan a galad a bunga ti espiritu ti Dios. Iparparangarang ni Jehova ti panagayatna iti arban kas maysa a grupo babaen ti panangiburayna iti aglaplapusanan a naespirituan a taraon. (Isaias 65:13, 14; Mateo 24:45-47) Ngem saanna laeng a taraonan ti arban. Isu ket sidudungngo a maseknan iti tunggal karnero. (1 Pedro 5:6, 7) Uray ni Jesus ay-ayatenna met ti arban. Insakripisiona ti biagna maigapu kadakuada, ken personal nga ammona ti tunggal karnero, nga ‘inagananna’ ida.―Juan 10:3, 14-16.

⁵ Dagiti naespirituan a pastor tuladenda ni Jehova ken ni Jesus. Ipakitada nga ay-ayatenda ti arban ti Dios babaen ti ‘panangigaedda a mangisuro’ iti kongregasion. Mataraonan ken masalakniban ti arban babaen kadagiti palawagda a naibatay iti Biblia, ket makitkita ti isuamin dagita a panagreggetda. (1 Timoteo 4:13, 16) Adda met dagiti saan a nakakadkadlaw a pangus-usaranda iti tiempoda, kas iti panangtaginayon kadagiti rekord, panagaramid kadagiti surat, panageskediul, ken panangasikaso kadagiti adu a dadduma pay a bambanag tapno masiguradoda a “sitatakneng ken sigun iti urnos” a maangay dagiti gimong ti kongregasion ken dadduma nga aktibidad. (1 Corinto 14:40) Adu kadagita a trabaho ti saan a makitkita ti kongregasion ken nalabit a saan unay a maipapaayan iti komendasion. Dagita ket pudno a gapuanan ti ayat.―Galacia 5:13.

6, 7. (a) Ania ti maysa a pamay-an a dagiti pastor ad-adda a maam-ammoda dagiti karnero? (b) Apay nga adda pagimbaganna no iyebkastayo ti riknatayo iti maysa a panglakayen?

⁶ Dagiti naayat a Kristiano a pastor ikagumaanda nga ipakita ti personal a pannakaseknanda iti tunggal karnero iti kongregasion. (Filipos 2:4) Ti maysa a pamay-an nga ad-adda a maam-ammo dagiti pastor ti indibidual a karnero isu ti pannakipagtrabahoda kadagitoy iti tay-ak ti pangasabaan. Masansan a kadua ni Jesus a nangasaba dagiti pasurotna ken inusarna dagita a kanito tapno paregtaenna ida. (Lucas 8:1) Kuna ti maysa a Kristiano a pastor nga aduan iti kapadasan: “Nakitak a ti maysa a kasayaatan a pamay-an tapno ad-adda a maam-ammo ken maparegtak ti maysa a kabsat isu ti pannakipagtrabaho kenkuana iti tay-ak ti ministerio.” No nabayagen a dimo nakadua ti maysa a panglakayen iti tay-ak ti ministerio, apay a dimo ikagumaan ti makikadua kadakuada iti tay-ak ti ministerio iti kabiitan a panawen?

⁷ Ti ayat ti nangtignay ken ni Jesus a makipagrag-o ken makipagladingit kadagiti pasurotna. Kas pagarigan, idi sirarag-o a nagsubli dagiti 70 nga adalanna manipud iti panangasaba, ‘aglaplapusanan ti rag-o’ ni Jesus. (Lucas 10:17-21) Ngem idi nakitana ti panagleddaang ni Maria ken ti pamilia ken gagayyemna gapu iti ipupusay ni Lazaro, “nagarubos dagiti lua ni Jesus.” (Juan 11:33-35) Umasping iti dayta, dagiti naayat a pastor ammoda ti makipagrikna kadagiti karnero. Ti ayat ti mangtignay kadakuada a ‘makipagrag-o kadagiti tattao nga agrag-o’ ken ‘makipagsangit kadagiti tattao nga agsangit.’ (Roma 12:15) No mapasaranyo dagiti rag-o wenno ladingit iti biagyo, dikay koma alusiisen a mangyebkas iti riknayo kadagiti Kristiano a pastor. Makaparegta kadakuada no mangngegda ti rag-oyo. (Roma 1:11, 12) No maammuanda dagiti pakasuotanyo, maipaayandakayo met iti pammabileg ken liwliwa.―1 Tesalonica 1:6; 3:1-3.

8, 9. (a) Kasano nga impakita ti maysa a panglakayen ti panagayatna ken ni baketna? (b) Kasano kapateg iti maysa a pastor ti panagayatna iti pamiliana?

⁸ Ti panagayat ti pastor iti arban ket nangnangruna nga agminar iti wagas ti panangtratona iti mismo a pamiliana. (1 Timoteo 3:1, 4) No adda asawana, ti panagayat ken panangpadayawna ken ni baketna ti agserbi a pagtuladan dagiti assawa a lallaki. (Efeso 5:25; 1 Pedro 3:7) Usigenyo ti komento ti maysa a Kristiano a babai nga agnagan iti Linda. Nagserbi ni lakayna kas maysa a manangaywan iti nasurok a 20 a tawen sakbay a pimmusay. Kunana: “Kanayon nga okupado ni lakayko iti panangaywanna iti kongregasion. Ngem impariknana kaniak nga adda pasetko kadagiti magapgapuananna. Masansan nga iyebkasna ti apresasionna iti suporta nga ipapaayko, ken kanayon nga adda panawenna kaniak. Kas resultana, nariknak ti panagayatna ken saanak a nagimon iti panawen a busbusbosenna iti kongregasion.”

⁹ No maysa nga ama ti Kristiano a pastor, agserbi a pagtuladan dagiti dadduma a nagannak ti wagas ti naayat a panangdisiplina ken regular a panangkomendarna kadagiti annakna. (Efeso 6:4) Kinapudnona, ti panagayatna iti pamiliana ket agtultuloy a pammaneknek a tungtungpalenna ti naitalek kenkuana idi isu ket nadutokan babaen ti nasantuan nga espiritu.―1 Timoteo 3:4, 5.

Maitandudo ti Rag-o Ken Talna Babaen ti Komunikasion

10. (a) Ania ti mabalin a mangapektar iti rag-o ken talna ti kongregasion? (b) Ania nga isyu ti gistay nangkibur iti talna ti kongregasion idi umuna a siglo, ken kasano a narisut dayta nga isyu?

¹⁰ Ti nasantuan nga espiritu patanorenna ti rag-o ken talna iti puso ti maysa a Kristiano, iti nagbabaetan dagiti panglakayen, ken iti uneg ti kongregasion. Nupay kasta, mabalin a maapektaran ti rag-o ken talna no awan ti silulukat a komunikasion. Napaliiw ti nagkauna a ni Solomon: “Adda pannakapaay dagiti gakat no sadino nga awan ti kompidensial a saritaan.” (Proverbio 15:22) Iti sabali a bangir, matagiragsak ti rag-o ken talna no adda nadayaw ken prangka a panagsasarita. Kas pagarigan, idi gistay makibur ti talna ti kongregasion idi umuna a siglo gapu iti isyu ti panagkugit, ti bagi a manarawidwid idiay Jerusalem nagpaidalan iti nasantuan nga espiritu. Dagitoy a panglakayen inyebkasda met dagiti nagduduma a kapanunotanda mainaig iti isyu. Kalpasan ti narayray a panagpapatang, nabukelda ti maysa a desision. Idi inyallatiwda kadagiti kongregasion ti nagkaykaysaanda a desision, ‘nagrag-o dagiti kakabsat gapu iti pammaregta.’ (Aramid 15:6-23, 25, 31; 16:4, 5) Iti kasta, naitandudo ti rag-o ken talna.

11. Kasano a maitandudo dagiti panglakayen ti rag-o ken talna iti kongregasion?

¹¹ Umasping iti dayta, dagiti pastor ita maitandudoda ti rag-o ken talna babaen ti nasayaat a komunikasion. No agpegpeggad ti talna ti kongregasion gapu kadagiti parikut, pagsasaritaanda dayta ket siwayawaya nga iyebkasda ti kapanunotanda. Siraraem nga imdenganda no ania ti makuna dagiti kakaduada a pastor. (Proverbio 13:10; 18:13) Kalpasan nga ikararagda ti panangiwanwan ti nasantuan nga espiritu, ibatayda dagiti desisionda kadagiti prinsipio ti Biblia ken kadagiti pagalagadan nga impablaak “ti matalek ken masirib nga adipen.” (Mateo 24:45-47; 1 Corinto 4:6) Apaman a ti bagi dagiti panglakayen natinongda ti maysa a Nainkasuratan a desision, tunggal panglakayen ti agpasakup iti panangiwanwan ti nasantuan nga espiritu babaen ti panangsuportana iti dayta a desision uray pay no saan a dayta ti personal nga opinionna. Ti kasta a kinaemma itandudona ti rag-o ken talna ken mangipasdek iti nasayaat a pagwadan kadagiti karnero no kasano ti makipagna iti Dios. (Mikias 6:8) Sipapakumbaba kadi a makituntunoskayo kadagiti naibatay iti Biblia a desision dagiti panglakayen iti kongregasion?

Naanus ken Naasikayo Koma

12. Apay a masapul a naanus ken naasi ni Jesus kadagiti apostolna?

¹² Siaanus ken siaasi a trinato ni Jesus dagiti apostolna iti laksid dagiti maulit-ulit a panagkamalida. Kas pagarigan, maulit-ulit nga insuro kadakuada ni Jesus ti kinapateg ti kinapakumbaba. (Mateo 18:1-4; 20:25-27) Kaskasdi, iti maudi a rabii ni Jesus ditoy daga kas tao, a kalkalpasna pay laeng nga impaay ti maysa a leksion maipapan iti kinapakumbaba babaen ti panangbuggona kadagiti sakada, “adda met timmaud a nabara a supiat iti nagtetengngaanda no siasino kadakuada ti kasla kadakkelan.” (Lucas 22:24; Juan 13:1-5) Pinagsasawan kadi ni Jesus dagiti apostol? Saan. Siaasi ketdi a nakirinnason kadakuada, a kunkunana: “Siasino ti dakdakkel, daydiay sisasadag iti panganan wenno daydiay agserserbi? Saan aya a daydiay sisasadag iti panganan? Ngem addaak iti tengngayo a kas daydiay agserserbi.” (Lucas 22:27) Idi agangay, natukay met laeng ti puso dagiti apostol ni Jesus gapu iti kinaanus ken kinamanangngaasina.

13, 14. Kaano a nangnangruna a masapul a naasi dagiti pastor?

¹³ Umasping iti dayta, ti naespirituan a pastor nalabit a kasapulan a maulit-ulit a balakadanna ti maysa a nakaaramid iti kamali. Mabalin a mauma ti pastor iti dayta nga indibidual. Ngem no kanayon a silalagip ti pastor kadagiti bukodna a pagkapuyan, ‘mabagbagaanna daydiay nagulo’ buyogen ti kinaanus ken kinamanangngaasi. Iti kasta a pamay-an, tultuladenna ni Jesus ken ni Jehova, a mangiparparangarang kadagita a galad kadagiti amin a Kristiano―agraman kadagiti pastor.​—1 Tesalonica 5:14; Santiago 2:13.

¹⁴ No dadduma, nalabit a kasapulan a mangipaay dagiti pastor iti nadagsen a pannubngar iti maysa a nakaaramid iti serioso a basol. No saan nga agbabawi ti nakabasol, masapul a dagiti pastor ilaksidda dayta manipud iti kongregasion. (1 Corinto 5:11-13) Ngem uray pay kasta, ti wagas ti panangtratoda iti dayta a tao ket mangipakita koma a kagurada ti naaramid a basol, saan a ti mismo a nakabasol. (Judas 23) Ti naasi a kababalin dagiti pastor ti nalabit a nalaklaka a mangtignay iti maysa a naiwawa a karnero tapno agsubli iti arban.―Lucas 15:11-24.

Pammati ti Mangtignay Kadatayo a Mangaramid iti Naimbag

15. Ania ti maysa a pamay-an a matulad dagiti pastor ti kinaimbag ni Jehova, ken ania ti mangtignay kadakuada a mangaramid iti kasta?

¹⁵ “Ni Jehova naimbag iti isuamin,” uray kadagidiay saan a mangap-apresiar kadagiti ar-aramidenna agpaay kadakuada. (Salmo 145:9; Mateo 5:45) Nangnangruna nga impakita ni Jehova ti kinaimbagna babaen ti panangibaonna kadagiti adipenna tapno ikasabada ti “naimbag a damag ti pagarian.” (Mateo 24:14) Maiparangarang dagiti pastor ti kinaimbag ti Dios babaen ti panangidauloda iti dayta a trabaho. Ania ti mangtigtignay kadakuada nga agregget? Ti nabileg a pammatida ken ni Jehova ken kadagiti karina.​—Roma 10:10, 13, 14.

16. Kasano a dagiti pastor ‘makaaramidda iti naimbag’ kadagiti karnero?

¹⁶ Nupay pakitaanda iti ‘kinaimbag ti isuamin’ babaen ti panangasabada, adda responsabilidad dagiti pastor a mangipakita iti kinaimbag ‘nangnangruna kadagidiay nainaig kadakuada iti pammati.’ (Galacia 6:10) Ti maysa a pamay-an nga ar-aramidenda dayta ket babaen ti makaparegta a panangipastor a panagsarungkarda. “Pakaragsakak ti mangaramid kadagiti panangipastor a panagsarungkar,” kuna ti maysa a panglakayen. “Mangted dagita iti gundaway tapno makomendarak dagiti kakabsat gapu kadagiti panagreggetda ken tapno maammuanda a maipatpateg dagiti panangikagumaanda.” No dadduma, mabalin a mangisingasing dagiti pastor kadagiti pamay-an a makatulong iti indibidual a mangparang-ay iti panagserbina ken ni Jehova. Babaen ti panangaramidda iti kasta, dagiti masirib a pastor tultuladenda ni apostol Pablo. Usigenyo ti pamay-anna a nakisarita kadagiti kakabsat idiay Tesalonica: “Adda panagtalekmi iti Apo maipapan kadakayo, nga ar-aramidenyo ken itultuloyyonto nga aramiden ti bambanag nga ibilinmi.” (2 Tesalonica 3:4) Magustuan dagiti karnero ti kakasta nga ebkas ti panagtalek ket dayta ti mamagbalin kadakuada a nalaklaka nga ‘agtulnog kadagidiay mangidadaulo.’ (Hebreo 13:17) No mangaramid dagiti panglakayen iti makaparegta a panangipastor a panagsarungkar kadakayo, apay a diyo iyebkas ti panangapresiaryo iti dayta?

Ti Kinaalumamay Kalikagumanna ti Panagteppel

17. Ania ti nasursuro ni Pedro manipud ken Jesus?

¹⁷ Naalumamay ti kababalin ni Jesus, uray no makaparurod ti kasasaad. (Mateo 11:29) Idi naliputan ken naarestar, imparangarang ni Jesus ti kinaalumamay ken nabileg a panagteppel. Sidadarasudos a nangasut ni Pedro iti kampilan ket bimmales. Ngem pinalagipan ni Jesus: “Pagarupem kadi a saanko a mabalin ti agkiddaw ken Amak tapno mangipaay kaniak ita a kanito iti nasurok a sangapulo ket dua a lehion dagiti anghel?” (Mateo 26:51-53; Juan 18:10) Nakasursuro iti dayta ni Pedro isu nga idi agangay, pinalagipanna dagiti Kristiano: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna. . . . Idi narabrabngis, saanna a sinubadan iti panangrabngis. Idi agsagsagaba, saan a nagipangpangta.”​—1 Pedro 2:21-23.

18, 19. (a) Kaano a nangnangruna a masapul nga iparangarang dagiti pastor ti kinaalumamay ken panagteppel? (b) Ania a salsaludsod ti sumaganad nga usigentayo?

¹⁸ Naalumamay met dagiti epektibo a pastor uray no saan a nainkalintegan ti pannakatratoda. Kas pagarigan, mabalin nga awan ti panagtignay ti dadduma a kakabsat nga ikagkagumaanda a tulongan. No nakapuy wenno masakit iti naespirituan ti indibidual a matultulongan, nalabit nga agsao a “siaaleng-aleng a kas kadagiti panangsugat ti kampilan” no mabalakadan. (Proverbio 12:18) Ngem kas ken Jesus, saan nga agibales dagiti pastor babaen kadagiti nasakit a sasao wenno tignay. Imbes ketdi, agteppelda ken itultuloyda ti agbalin a mannakaawat, a mabalin nga agresulta iti pagimbagan daydiay matultulongan. (1 Pedro 3:8, 9) Makasursurokayo kadi manipud iti ulidan dagiti panglakayen ket iparangarangyo ti kinaalumamay ti kababalin ken panagteppel no mabalakadankayo?

¹⁹ Awan duadua a ni Jehova ken ni Jesus ipatpategda ti panagregget dagiti rinibu a pastor a situtulok a mangay-aywan iti sangalubongan nga arban. Nasged met ti panagayat ni Jehova ken ti Anakna kadagiti rinibu a ministerial nga adipen a mangsupsuporta kadagiti panglakayen iti ‘panagserbida kadagiti sasanto.’ (Hebreo 6:10) Apay ngarud a ti dadduma a bautisado a kakabsat a lallaki bumdengda a mangragpat iti daytoy a “nasayaat nga aramid”? (1 Timoteo 3:1) Kasano ti panangsanay ni Jehova kadagidiay dutokanna nga agserbi kas pastor? Usigentayo dagitoy a saludsod iti sumaganad nga artikulo.

Malagipyo Kadi?

• Ania ti sumagmamano a pamay-an a maipakita dagiti pastor ti panagayatda iti arban?

• Kasano a ti amin a kameng ti kongregasion maitandudoda ti rag-o ken talna?

• Apay a rumbeng a naasi ken naanus dagiti pastor no mangbalbalakadda?

• Kasano a maiparangarang dagiti pastor ti kinaimbag ken pammati?

[Ladawan iti panid 18]

Ti ayat ti mangtigtignay kadagiti panglakayen nga agserbi iti kongregasion

[Dagiti Ladawan iti panid 18]

Mangipaayda met iti panawen iti pamiliada agpadpada iti panaglinglingay . . .

. . ken iti ministerio

[Ladawan iti panid 20]

Ti nasayaat a komunikasion dagiti panglakayen itandudona ti rag-o ken talna iti kongregasion