Apay a Surotentayo “ti Kristo”?

“No ti asinoman kayatna ti sumurot kaniak, paglikudanna koma ti bagina . . . ket agtultuloy a surotennak.”​—Luc. 9:23.

1, 2. Apay a napateg nga usigentayo dagiti rason no apay a surotentayo “ti Kristo”?

MARAGSAKAN la ketdi ni Jehova a makakita kadagidiay kabbaro ken agtutubo a naitimpuyog kadagiti agdaydayaw kenkuana ditoy daga! Bayat nga itultuloyyo ti agadal iti Biblia, regular a tumabuno kadagiti Nakristianuan a gimong, ken rumangrang-ay iti pannakaammo iti mangispal-biag a kinapudno iti Sao ti Dios, nasken nga ipapusoyo daytoy nga awis ni Jesus: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotennak.” (Luc. 9:23) Ibagbaga ni Jesus a ti panangtallikud iti bagim ken panagbalin a pasurotna ket maysa a banag a rumbeng a tarigagayan nga aramiden. Napateg ngarud nga usigentayo no apay a rumbeng a surotentayo “ti Kristo.”​—Mat. 16:13-16.

² Komusta met dagiti sumursuroten kadagiti addang ni Jesu-Kristo? Naidagadag kadatayo nga ‘itultuloytayo nga aramiden dayta nga ad-adda pay a naan-anay.’ (1 Tes. 4:1, 2) Nabiit man wenno nabayagen nga addatayo iti pudno a panagdayaw, ti panangmennamenna kadagiti rason no apay a sursurotentayo ti Kristo ket makatulong kadatayo a mangyaplikar iti balakad ni Pablo ken ad-adda a sumurot ken Kristo iti inaldaw a panagbiagtayo. Usigentayo ti lima a rason no apay a rumbeng a tarigagayantayo a suroten ti Kristo.

Tapno Nasingsinged ti Relasiontayo ken Jehova

 3. Mabalin a maam-ammotayo ni Jehova iti ania a dua a pamay-an?

³ Idi nagpalawag kadagiti taga-Atenas bayat a “timmakder iti tengnga ti Areopago,” kinuna ni apostol Pablo: “[Ti Dios] inkeddengna dagiti naituding a tiempo ken dagiti naipasdek a pagpatinggaan ti pagnaedan dagiti tattao, tapno sapulenda ti Dios, no isu maarikapda ket pudno a masarakanda, nupay, iti kinapudnona, saan nga adayo iti tunggal maysa kadatayo.” (Ara. 17:22, 26, 27) Mabalintay a sapulen ti Dios ket talaga a maam-ammotayo. Kas pagarigan, nagadu ti ibaga ti libro ti panamarsua maipapan kadagiti galad ken abilidad ti Dios. No buyogen panagyaman nga utobentayo dagiti pinarsuana, adu ti maadaltayo maipapan iti Namarsua. (Roma 1:20) Iti naisurat a Saona a ti Biblia, impalgak met ni Jehova dagiti detalye maipapan kenkuana. (2 Tim. 3:16, 17) No ad-adda a ‘mennamennaentayo ti isuamin nga aramidna’ ken ‘pakaseknantayo dagiti pannakilangenna,’ ad-adda a maam-ammotayo ni Jehova.​—Sal. 77:12.

 4. Kasano a ti panangsurot ken Kristo matulongannatayo nga ad-adda a mangam-ammo ken Jehova ken agbalin a nasinged kenkuana?

⁴ Ti panangsurot iti Kristo ti maysa a nagsayaat a pamay-an tapno maam-ammotayo a naimbag ni Jehova. Panunotenyo laengen ti kinadayag ni Jesus idi adda iti sibay ni Amana “sakbay a naadda ti lubong”! (Juan 17:5) Isu “ti pangrugian ti panamarsua ti Dios.” (Apoc. 3:14) Kas “ti inauna iti isuamin a parsua,” nagbiag ni Jesus idiay langit a kadua ni Jehova nga Amana iti di mabilang a tawen. Sakbay a nagbalin a tao, saan laeng a nakikadua ni Jesus ken Amana. Isu ti nasinged a kaduana, a siraragsak a nakipagtrabaho iti Mannakabalin-amin. Ti relasionda nga agama ti katibkeran pay laeng a singgalut ti ayat. Saan laeng a pinaliiw ni Jesus ti wagas a panangaramid ni Amana kadagiti bambanag, nga inkabilanganna dagiti rikna ken galadna, no di ket naan-anay nga inagsepna dagiti nasursurona ken Amana ken nagbiag maitunos kadagita. Kas resulta, daytoy natulnog nga Anak nagbalin a kas ken Amana isu a tinukoy ti Biblia kas “ti ladawan ti di makita a Dios.” (Col. 1:15) Babaen ti panangsurottayo a naimbag ken Kristo, ad-adda a maam-ammo ken sumingedtayo ken Jehova.

Tapno Ad-adda a Matuladtayo ni Jehova

 5. Ania ti makatulong kadatayo nga ad-adda a mangtulad ken Jehova, ken apay?

⁵ Yantangay ‘naaramidtayo iti ladawan ti Dios, sigun iti langana,’ kabaelantayo nga iparangarang dagiti galad ti Dios. (Gen. 1:26) Binagbagaan ni apostol Pablo dagiti Kristiano nga ‘agbalinda a tumutulad iti Dios, kas annak a dungdunguen.’ (Efe. 5:1) Matulongantayo a mangtulad iti nailangitan nga Amatayo no surotentayo ti Kristo. Ngamin, ni Jesus ti kangrunaan a nangiparangarang iti panagpampanunot, rikna, ken personalidad ti Dios ken isu laeng ti ad-adda a makailawlawag iti maipapan Kenkuana. Idi adda ni Jesus ditoy daga, saanna laeng nga impakaammo ti nagan ni Jehova. Imbes ketdi, impalgakna pay ti kinasiasino Daydiay makinnagan iti dayta. (Basaen ti Mateo 11:27.) Inaramid ni Jesus dayta babaen iti sasao ken ar-aramidna, dagiti pannursuro ken ulidanna.

 6. Ania ti ipalgak dagiti pannursuro ni Jesus maipapan ken Jehova?

⁶ Babaen kadagiti pannursuro ni Jesus, impakitana no ania ti kalikaguman ti Dios kadatayo ken no ania ti panangmatmatna kadagiti agdaydayaw kenkuana. (Mat. 22:36-40; Luc. 12:6, 7; 15:4-7) Kas pagarigan, kalpasan ti panangdakamatna iti maysa kadagiti Sangapulo a Bilin nga agkuna a “dika makikamalala,” inlawlawag ni Jesus ti panangmatmat ti Dios iti panagem ti puso ti maysa a tao mabayag pay sakbay a makaaramid iti pannakikamalala. Kinunana: “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Ex. 20:14; Mat. 5:27, 28) Kalpasan ti panangdakamatna iti pannakaawat dagiti Fariseo iti maysa a sagudayen ti Linteg, a kunkunada a “masapul nga ayatem ti padam a tao ket guraem ti kabusormo,” impakaammo ni Jesus ti panagpampanunot ni Jehova. Kinunana: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo.” (Mat. 5:43, 44; Ex. 23:4; Lev. 19:18) Ad-adda a matuladtayo ti Dios no tarusantayo a naimbag ti panagpampanunot ken riknana, agraman dagiti kalikagumanna kadatayo.

7, 8. Ania ti maadaltayo maipapan ken Jehova manipud iti ulidan ni Jesus?

⁷ Impalgak met ni Jesus ti kinasiasino ni Amana babaen ti ulidanna. No mabasatayo kadagiti Ebanghelio a naasian ni Jesus kadagiti agkasapulan, nakipagrikna kadagiti agsagsagaba, narurod kadagiti adalanna idi tininggarda dagiti ubbing, kasta la ketdi ti narikna ni Amana. (Mar. 1:40-42; 10:13, 14; Juan 11:32-35) Panunotenyo no kasano a dagiti tignay ni Jesus ibatadda dagiti kangrunaan a galad ti Dios. Saan aya a dagiti milagro nga inaramid ni Kristo ipakitada ti kinabileg ti pannakabalinna? Ngem saanna nga inusar dayta a pannakabalin para iti personal a pagimbaganna wenno iti pakadangranan ti sabsabali. (Luc. 4:1-4) Anian a panangipateg ni Jesus iti hustisia kas ibatad ti panangpapanawna kadagiti naagum a komersiante manipud iti templo! (Mar. 11:15-17; Juan 2:13-16) Dagiti pannursurona ken dagiti makaay-ayo a sasao nga inusarna a mangdanon iti puso dagiti tattao ipakitada nga isu ket nasirsirib ngem ni Solomon. (Mat. 12:42) Ti ayat nga impakita ni Jesus babaen ti panangisakripisiona iti biagna maipaay iti sabsabali ket nagsayaat ti pannakadeskribirna idi kinuna ti Biblia: “Awan asinoman nga addaan dakdakkel nga ayat ngem iti daytoy.” ​—Juan 15:13.

⁸ Ti Anak ti Dios inyanninawna a naan-anay ti kinasiasino ni Jehova iti amin nga imbaga ken inaramidna, isu a naikunana: “Ti nakakita kaniak nakitana met ti Ama.” (Basaen ti Juan 14:9-11.) No sursurotentayo ti Kristo, tultuladentayo met ni Jehova.

Ni Jesus Daydiay Pinulotan ni Jehova

 9. Kaano ken kasano a nagbalin ni Jesus a Daydiay Pinulotan ti Dios?

⁹ Usigentayo ti napasamak idi otonio ti 29 K.P. idi a ti agtawen iti 30 a ni Jesus napan ken Juan a Mammautisar. “Kalpasan a nabautisaran dagus a simmang-at ni Jesus manipud iti danum; ket, adtoy! naluktan ti langlangit, ket nakitana ti espiritu ti Dios a bumabbaba a kasla kalapati nga um-umay kenkuana.” Iti dayta a kanito, ni Jesus nagbalin a Kristo wenno Mesias. Iti dayta met laeng a gundaway, impakaammo ni Jehova a ni Jesus Daydiay Napulotan, a kunkunana: “Daytoy ti Anakko, ti dungdungnguen, nga inanamongak.” (Mat. 3:13-17) Anian a nagsayaat dayta a rason no apay a tarigagayantayo a suroten ti Kristo!

10, 11. (a) Kadagiti ania a pamay-an a nausar ti titulo a “Kristo” kas pangtukoy ken Jesus? (b) Apay a masapul a surotentayo ni Jesu-Kristo?

¹⁰ Iti Biblia, nausar ti titulo a “Kristo” a pangtukoy ken Jesus iti nagduduma a pamay-an, kas iti Jesu-Kristo, Kristo Jesus, ken ti Kristo. Ni Jesus a mismo inusarna ti awag a “Jesu-Kristo”​—ti nagan a sarunuen ti titulo. Inkararagna ken Amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Dayta a panangawag nabatad nga iturongna ti atensiontayo iti imbaon ti Dios ken nagbalin a Daydiay Napulotan. No madakamat ti titulo sakbay ti nagan, kas iti “Kristo Jesus,” saanen a ti persona ti maipagpaganetget no di ket ti akemna. (2 Cor. 4:5) Ti panangusar iti awag a “ti Kristo,” ti titulo kalpasan ti sao a “ti,” ket maysa pay a pamay-an a mangipaganetget iti akem ni Jesus kas ti Mesias.​—Ara. 5:42.

¹¹ Kasano man ti pannakausar ti titulo a “Kristo” kas pangtukoy ken Jesus, itampokna daytoy a napateg a kinapudno: Uray no immay ditoy daga ti Anak ti Dios kas maysa a tao ken impakaammona ti pagayatan ni Amana, isu saan laeng a maysa nga ordinario a tao wenno propeta; nagbalin kas Daydiay Pinulotan ni Jehova. Masapul ngarud a sumurottayo kenkuana.

Ni Jesus ti Kakaisuna a Dalan nga Agturong iti Pannakaisalakan

12. Ania ti naibaga iti apostol a ni Tomas a napateg met kadatayo?

¹² Iti sasao ni Jesus kadagiti matalek nga apostolna, sumagmamano nga oras sakbay ti ipapatayna, nadakamatna ti sabali pay a napateg a rason no apay nga itultuloytayo a suroten ti Mesias. Iti sungbat ni Jesus iti saludsod ni Tomas maipapan iti ipapanawna ken panangisaganana iti lugar para kadakuada, kinunana: “Siak ti dalan ken ti kinapudno ken ti biag. Awan ti umay iti Ama malaksid no baeten kaniak.” (Juan 14:1-6) Dagiti 11 a matalek nga apostol ti kasasao idi ni Jesus, nga ikarkarina nga addanto lugarda idiay langit. Nupay kasta, napateg met dayta a sasaona kadagidiay mangnamnama nga agbiag nga agnanayon ditoy daga. (Apoc. 7:9, 10; 21:1-4) Apay a kasta?

13. Iti ania nga anag a ni Jesus “ti dalan”?

¹³ Ni Jesu-Kristo “ti dalan.” Kayat a sawen dayta a babaen laeng kenkuana a makaadanitayo iti Dios. Pudno dayta no agkararagtayo, ta babaen laeng iti panagkararagtayo iti nagan ni Jesus a manamnamatayo nga itden ni Amana ti aniaman a kiddawentayo a maitunos iti pagayatanna. (Juan 15:16) Ngem adda pay sabali nga anag a ni Jesus “ti dalan.” Nayadayo ti sangatauan iti Dios gapu iti basol. (Isa. 59:2) Inted ni Jesus ti “kararuana kas subbot a kasukat dagiti adu.” (Mat. 20:28) Gapuna, kinuna ti Biblia: “Ti dara ni Jesus . . . dalusannatayo manipud iti amin a basol.” (1 Juan 1:7) Ti ngarud Anak ti nanglukat iti dalan tapno maikappiatayo iti Dios. (Roma 5:8-10) Maaddaantayo laeng iti nasayaat a relasion iti Dios no alagadentayo ti pammati ken Jesus ken agtulnogtayo kenkuana.​—Juan 3:36.

14. Kasano a ni Jesus “ti kinapudno”?

¹⁴ Ni Jesus “ti kinapudno” saan laeng a gapu ta kanayon a nagsao ken nagbiag maitunos iti kinapudno no di ket gapu ta adu a padto maipapan iti Mesias ti natungpal kenkuana. “Ta uray pay no kasano ti kaadu dagiti kari ti Dios,” insurat ni apostol Pablo, “nagbalinda a Wen babaen kenkuana.” (2 Cor. 1:20) Nagbalin met a pudpudno ken Kristo Jesus ti “anniniwan ti naimbag a bambanag nga umay” a linaon ti Mosaiko a Linteg. (Heb. 10:1; Col. 2:17) Naipamaysa ken Jesus dagiti amin a padto, ken lawlawaganda ti napateg nga akemna maipapan iti pannakaibanag ti panggep ni Jehova. (Apoc. 19:10) Tapno magunggonaantayo iti kaitungpalan ti panggep ti Dios agpaay kadatayo, nasken a surotentayo ti Mesias.

15. Iti ania nga anag a ni Jesus “ti biag”?

¹⁵ Ni Jesus “ti biag” agsipud ta ginatangna ti sangatauan babaen ti darana, ket biag nga agnanayon ti sagut nga inted ti Dios “babaen ken Kristo Jesus nga Apotayo.” (Roma 6:23) Ni Jesus met “ti biag” kadagidiay a natayen. (Juan 5:28, 29) Kanayonanna, panunotenyo ti aramidennanto kas Nangato a Padi kabayatan ti Sangaribu a Tawen a Panagturayna. Agasenyo, ipaayannanto dagiti iturayanna ditoy daga iti agnanayon a pannakaispal iti basol ken ipapatay!​—Heb. 9:11, 12, 28.

16. Ania ti rason a surotentayo ni Jesus?

¹⁶ No kasta, nakapatpateg kadatayo ti sungbat idi ni Jesus ken Tomas. Ni Jesus ti dalan ken ti kinapudno ken ti biag. Isu ti imbaon ti Dios ditoy lubong tapno maispal ti sangatauan babaen kenkuana. (Juan 3:17) Ken awan ti makaadani iti Amana malaksid no babaen kenkuana. Nabatad a kunaen ti Biblia: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Ara. 4:12) Aniaman ti dati a naisuro kadatayo, nainsiriban ngarud a mamati ken sumurottayo ken Jesus tapno iturongnatayo iti biag.​—Juan 20:31.

Naibilin nga Imdengantayo ti Kristo

17. Apay a napateg nga umimdengtayo iti Anak ti Dios?

¹⁷ Nasaksian da Pedro, Juan, ken Santiago ti panagbalbaliw ti langa ni Jesus. Iti dayta a kanito, adda nangngegda a timek manipud langit a nagkuna: “Daytoy ti Anakko, daydiay napili. Agimdengkayo kenkuana.” (Luc. 9:28, 29, 35) Nakapatpateg ngarud nga agtulnogtayo iti Mesias.​—Basaen ti Aramid 3:22, 23.

18. Kasanotayo nga umimdeng ken Jesu-Kristo?

¹⁸ Ti panagimdengtayo ken Jesus ramanenna a ‘kumitatayo a sipapasnek kenkuana, nga utobentayo’ a naimbag ti ulidanna. (Heb. 12:2, 3) Nasken ngarud nga ‘ipangagtayo nga ad-adda ngem iti gagangay’ dagiti banag maipapan kenkuana a mabasatayo iti Biblia ken kadagiti publikasion nga impablaak “ti matalek ken masirib nga adipen,” agraman dagiti mangngegantayo maipapan kenkuana kadagiti Nakristianuan a gimong. (Heb. 2:1; Mat. 24:45) Kas dagiti karnerona, sigagagar koma nga umimdeng ken sumurottayo ken Jesus.​—Juan 10:27.

19. Ania ti makatulong kadatayo tapno agtultuloy a masurottayo ti Kristo?

¹⁹ Kabaelantayo kadi ti agtultuloy a sumurot iti Kristo aniaman ti mapasamak? Wen, kabaelantayo, la ketdi no ‘salimetmetantayo ti pagtuladan iti makapasalun-at a sasao’ babaen ti panangyaplikar iti nasursurotayo “agraman ti pammati ken ayat a mainaig ken Kristo Jesus.”​—2 Tim. 1:13.

Ania ti Naadalmo?

• Apay a ti panangsurot ken Kristo makatulong kadatayo nga agbalin a nasingsinged ken Jehova?

• Apay a ti panangtulad ken Jesus kaipapananna ti panangtulad ken Jehova?

• Iti ania nga anag a ni Jesus “ti dalan ken ti kinapudno ken ti biag”?

• Apay a nasken nga imdengantayo Daydiay Pinulotan ni Jehova?

[Ladawan iti panid 29]

Dagiti pannursuro ni Jesus inyanninawna ti natan-ok a panagpampanunot ni Jehova

[Ladawan iti panid 30]

Nasken a simamatalek a surotentayo Daydiay Pinulotan ni Jehova

[Ladawan iti panid 32]

Impakaammo ni Jehova: “Daytoy ti Anakko . . . agimdengkayo kenkuana”