Agsursuroka iti Sao ti Dios

Kasanom a Mailasin ti Pudno a Relihion?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

 1. Maymaysa kadi ti pudno a relihion?

Maymaysa laeng ti pudno a relihion nga insuro ni Jesus kadagiti pasurotna. Mayarig dayta iti dalan nga agturong iti biag. Kinuna ni Jesus maipapan iti dayta a dalan: “Bassit dagidiay makasarak iti dayta.” (Mateo 7:14) Awaten laeng ti Dios ti panagdayaw a naibatay iti kinapudno a linaon ti Saona. Nagkaykaysa ti pammati ti isuamin a mangan-annurot iti pudno a panagdayaw.​—Basaem ti Juan 4:23, 24; 14:6; Efeso 4:4, 5.

 2. Apay nga akuen ti adu a nagduduma a relihion a Kristianoda?

Minulitan dagiti palso a mammadto ti Nakristianuan a sursuro ken inaramatda dayta para iti bukodda a pagimbagan. Kas impadto ni Jesus, agpammarangda kas “karnero” ngem agtignayda kas mabisin a lobo. (Mateo 7:13-15, 21, 23) Timmaud dagiti palso a Kristiano nangnangruna kalpasan ti ipapatay dagiti apostol ni Jesus.​—Basaem ti Aramid 20:29, 30.

 3. Ania ti sumagmamano a pakabigbigan ti pudno a relihion?

Dagiti mangan-annurot iti pudno a relihion raemenda ti Biblia kas Sao ti Dios. Ikagumaanda nga iyaplikar dagiti prinsipio a linaonna. Ti pudno a relihion naiduma ngarud iti relihion a naibatay laeng iti kapanunotan ti tao. (Mateo 15:7-9) Dagiti kameng ti pudno a relihion an-annurotenda ti ikaskasabada.​—Basaem ti Juan 17:17; 2 Timoteo 3:16, 17.

Ti pudno a relihion idayawna ti nagan ti Dios a Jehova. Impakaammo ni Jesus ti nagan ti Dios. Tinulonganna dagiti tattao a mangammo iti Dios ken sinuruanna ida a mangikararag iti pannakasantipikar ti nagan ti Dios. (Mateo 6:9) Iti lugaryo, ania a relihion ti mangitantandudo iti panangaramat iti nagan ti Dios?​—Basaem ti Juan 17:26; Roma 10:13, 14.

 4. Kasanom a mabigbig dagiti pudno nga agdaydayaw iti Dios?

Ikaskasaba dagiti pudno a Kristiano ti Pagarian ti Dios. Ti Dios imbaonna ni Jesus a mangikasaba iti Pagarian, ti kakaisuna a namnama ti sangatauan. Kanayon a sawen ni Jesus ti maipapan iti dayta, uray idi dandanin matay. (Lucas 4:43; 8:1; 23:42, 43) Binilinna dagiti pasurotna nga ikasabada ti Pagarian ti Dios. No adda makisarita kenka maipapan iti Pagarian ti Dios, ania ti pagarupem a relihion dayta a tao?​—Basaem ti Mateo 10:7; 24:14.

Dagiti pasurot ni Jesus saanda a paset daytoy nadangkes a lubong. Saanda a makinamnamin iti politika wenno kadagiti isyu iti kagimongan. (Juan 17:16) Saanda met a tultuladen ti makadangran nga ar-aramid ken kababalin ti lubong.​—Basaem ti Santiago 1:27; 4:4.

 5. Ania ti kangrunaan a pakabigbigan dagiti pudno a Kristiano?

Nagpaiduma ti panagiinnayat dagiti Kristiano. Nasursuroda iti Sao ti Dios a raemenda dagiti tattao aniaman ti pulida. Saanda met a supsuportaran ti panaggugubat dagiti nasion nupay ar-aramiden dayta ti palso a relihion. (Mikias 4:1-4) Imbes ketdi, us-usaren dagiti miembro ti pudno a relihion ti panawen ken sanikuada tapno tulongan ken liwliwaenda ti sabsabali.​—Basaem ti Juan 13:34, 35; 1 Juan 4:20, 21.

Ania a grupo ti addaan kadagiti sursuro a naan-anay a naibatay iti Sao ti Dios, mangidaydayaw iti nagan ti Dios, ken mangipakpakaammo iti Pagarian ti Dios kas kakaisuna a namnama ti sangatauan? Ania a grupo ti mangipakpakita iti ayat ken saan a mangsupsuporta iti gubat? Nabatad a dagiti Saksi ni Jehova.​—1 Juan 3:10-12.

Para iti kanayonan nga impormasion, kitaem ti kapitulo 15 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 16]

“Silalatak nga ideklarada nga ammoda ti Dios, ngem paglikudanda babaen kadagiti aramidda.”​—Tito 1:16