ANAKIM

[Dagidiay Naikameng ken (Kukua ni) Anak].

Puli dagiti tattao a nalablabes ti kadakkelda a nagnaed kadagiti bambantay a rehion ti Canaan kasta met iti sumagmamano a lugar iti igid ti baybay, nangnangruna iti abagatan dayta. Adda tiempo a nagtaeng idiay Hebron ti tallo a mabigbigbig a lallaki kadagiti Anakim, nga isu da Ahiman, Sesai, ken Talmai. (Nu 13:22) Ditoy a nakita dagiti 12 a Hebreo a managsimisim dagiti Anakim iti damo a gundaway, ket kalpasanna 10 kadagiti managsimisim ti nangipadamag iti makapakullayaw a nakitada ket imbagada a dagitoy a lallaki ket kaputotan dagidi Nefilim a nagbiag sakbay ti Layus, ket dagiti Hebreo kaslada “kadagiti rumsa” no maidilig kadakuada. (Nu 13:28-33; De 1:28) Gapu iti kinatayagda, naipadis kadakuada dagiti kasla higante a lallaki ti Emim ken ti Refaim. Nalawag a gapu ta napigsada, timmaud ti pagkukuna a: “Siasino ti makapagtakder a sititibker iti sanguanan ti annak ni Anak?”​—De 2:10, 11, 20, 21; 9:1-3.

Idi sipapartak a rinaut ni Josue ti intero a Canaan, nagballigi maibusor kadagiti Anakim nga agnanaed iti kabambantayan a rehion, a dinadaelna dagiti siudadda, ngem ti dadduma nagtalinaedda kadagiti siudad dagiti Filisteo nga isu ti Gaza, Asdod, ken Gat. Saan a nadakamat iti rekord no dagiti Anakim ket kabagian kadagiti Filisteo, kas kunaen ti dadduma, wenno naitimpuyogda laeng kadakuada. (Jos 11:21, 22) Idi agangay, kiniddaw ni Caleb ti siudad ti Hebron (Kiriat-arba) ken ti teritoria dayta, kas inkari kenkuana ti Dios. (Jos 14:12-15; Nu 14:24) Agparang a nagnaed manen dagiti Anakim iti daytoy a disso, nalabit bayat a ni Josue ken ti buyotna intultuloyda ti panagparmekda iti makin-amianan a paspaset ti Canaan, isu a kasapulan manen parmeken ni Caleb dayta a teritoria.​—Uk 1:10, 20.

Dagiti Egipcio a teksto iti panangilunod (manipud kadagiti damili a nakaisuratan ti nagnagan dagiti kabusor ti faraon ket kalpasanna naburak kas maysa a lunod) ket mabalin a tumukoy iti maysa a tribu ni Anak idiay Palestina kas Iy-ʽanaq.