SAGSAGUT, RANGKAP

Nanipud pay idi un-unana a tiempo nakapatpategen a paset ti inaldaw a panagbiag ti panagisagut. Ti lakayen nga adipen ni Abraham ket nangted ken Rebecca iti sagsagut nga alahas idi nakitanan ti pammaneknek nga isu ti intuding ni Jehova nga asawaen ni Isaac. (Ge 24:13-22) Kalpasanna, apaman a nagun-odna ti iyaanamong da Laban ken Betuel iti panagasawa, ti adipen ni Abraham nangted iti kanayonan a sagsagut ken Rebecca ken kasta met iti “napili a bambanag iti kabsatna a lalaki ken iti inana.” (Ge 24:50-53) Dimteng ti panawen nga inyawat ni Abraham ti amin a sanikuana ken Isaac, ngem nangted iti sagsagut iti annak dagiti kamalalana sana pinalubosan ida a pumanaw.​—Ge 25:5, 6; idiligyo ti 2Cr 21:3.

Mabalin a kaugalian kadagidi tiempo dagiti patriarka ti panangted iti sagsagut kadagidiay nagsagaba iti rigat. Idi imbaw-ing ni Jehova ti kautibo a kasasaad ni Job, saan laeng nga immay mangliwliwa kenkuana ti kakabsatna a lallaki, kakabsatna a babbai, ken sigud nga am-ammona no di ket nangted kenkuana ti tunggal maysa “iti sangkapisi a kuarta ken tunggal maysa iti balitok a singsing.”​—Job 42:10, 11.

Naited ti Sagsagut Tapno Makagun-od Kadagiti Gunggona. Masansan nga agisagutda idi tapno magun-odanda ti banag a tartarigagayanda. Nangisagana ni Jacob iti nakaad-adu a sagut a dinguen maipaay ken Esau tapno makagun-od iti pabor kadagiti mata ti kabsatna. (Ge 32:13-18; 33:8) Nalaklaka a matarusan no apay nga impapilit ni Jacob nga awaten ni Esau daytoy a sagut no laglagipen a ti di panangawat iti sagut ipamatmatna nga awan ti maited a pabor, sigun iti kaugalian iti Dumaya. (Ge 33:10) Kasta met, tapno magun-odda ti naimbag a nakem ti nagubsang-panagsasaona nga administrador iti taraon ti Egipto (nga iti kinapudnona isu ti mismo a kabsatda a ni Jose), sinurot dagiti annak ni Jacob ti singasing ni amada a mangitugotda iti sagut a kasayaatan a bunga ti daga. (Ge 42:30; 43:11, 25, 26) Ni Ari Asa nangipatulod iti rangkap a pirak ken balitok agpaay ken Ben-hadad tapno mauyotanna a mangrakrak iti tulagna ken Baasa, ti ari ti Israel.​—1Ar 15:18, 19.

Maipapan kadagiti gunggona ti manangted, kuna ti proverbio: “Ti sagut ti maysa a tao mangaramidto iti dakkel a ruangan maipaay kenkuana, ket isu iturongto dayta uray iti sanguanan dagiti naindaklan a tattao.” (Pr 18:16) Ti maysa a sagut maparukmana ti unget, ngem saanna a maep-ep ti panagpungtot ti maysa a nabaneg a lalaki iti daydiay makikamalala iti asawana, uray kasano kadakkel ti rangkap nga itukon ti lalaki a nakikamalala.​—Pr 21:14; 6:32-35.

Sagsagut iti Ar-ari, Mammadto, ken Dadduma Pay. Adda dagiti mangipatuldo a kaugalian idi a mangitugot iti sagsagut dagidiay sumarungkar iti ari. Dagiti “awan kaes-eskanna a lallaki” nga awanan panagraem ken Saul ket naipabigbig a saanda a nangyeg kenkuana iti aniaman a sagut. Nangnangruna ni Solomon, nakawadwadwad a sagut ti impaay kenkuana dagidiay um-umay manipud adayo a dagdaga tapno dumngegda iti siribna. Dagiti astrologo nga immay mangkita iti “daydiay nayanak nga ari dagiti Judio” nangidiayada iti sagsagut iti ubing a ni Jesus kas panangannurot laeng iti daytoy a kaugalian. (1Sm 10:27; 1Ar 10:10, 24, 25; Mt 2:1, 2, 11; kitaenyo met ti 2Ar 20:12; 2Cr 17:5.) Umasping iti dayta, adda dagiti gundaway a dagidiay mapan agimtuod iti maysa a mammadto ket agitugotda iti sagut. (1Sm 9:7; 2Ar 8:8, 9) Ngem dagiti mammadto ti Dios saanda idi a mangin-inanama wenno agsapsapul iti sagut maipaay kadagiti serbisioda, kas nabatad nga ipakita ti saan a panangawat ni Eliseo iti “maysa a bendision a sagut” manipud iti ima ni Naaman.​—2Ar 5:15, 16.

Masansan a dagidiay sibaballigi a nakairingpas iti maysa nga annong ket maipaayan kadagiti sagut kas panggunggona kadakuada. (2Sm 18:11; Da 2:6, 48; 5:16, 17, 29) Sigun iti Linteg, ti maysa a nawayawayaan nga adipen saan a mapapanaw nga ima-ima no di ket umawat iti sagut, maysa a banag nga aggapu iti arban, iti pagirikan, ken iti pagpespesan iti lana ken ubas. (De 15:13, 14) Kasta met, mabalin nga adda panagited kadagiti rangkap no maangay dagiti nararagsak nga okasion.​—Est 9:20-22; idiligyo ti Apo 11:10.

Mainaig iti Santuario. Ti Dios innalana dagiti Levita kas sagut nga agpaay iti balay ni Aaron, a kaslada naited ken Jehova tapno agserbida iti santuario. (Nu 18:6, 7) Kasta met, dagiti Gabaonita ken ti dadduma pay a napagbalin nga ad-adipen iti santuario ket naawagan iti Netineo, kaipapananna ti “Dagidiay Naipaay.” (Jos 9:27; 1Cr 9:2; Esd 8:20) Kanayonanna pay, natukoy kas sagsagut dagiti kontribusion a maipaay iti panangaramid iti panagserbi iti santuario ken kasta met dagiti sakripisio.​— Ex 28:38; Le 23:37, 38; Nu 18:29; Mt 5:23, 24; Lu 21:1.

Gapu ta isu ti Namarsua, kukua ni Jehova ti isuamin a banag. Ngarud, no mangted ti maysa a tao iti namaterialan a bambanag maipaay iti pannakaidur-as ti pudno a panagdaydayaw, isubsublina laeng ti sangkapaset ti sigud nga inawatna manipud iti Dios.​—Sal 50:10; 1Cr 29:14.

Balakad Mainaig Kadagiti Sagut. Yantangay dagiti sagut a maited kas pasuksok madadaelda ti puso ken maballikugda ti hustisia, ibalakad ti Kasuratan ti pananggura iti kakasta a sagut. Makondenar dagidiay kanayon a mangal-alman kadagiti sagut. (De 16:19, 20; Ec 7:7; Pr 15:27; Isa 1:23; kitaenyo ti PASUKSOK.) Mainayon pay, ti “tao a mangipaspasindayag iti bagina maipapan iti sagut iti kinaulbod,” a saanna nga ar-aramiden ti maitunos iti ipaspasindayagna, ket kas iti naalibungubong nga ul-ulep ken iti angin nga awanan iti aniaman a bayakabak. (Pr 25:14) Ti tao a managisagut ket maaddaan iti adu a kakadua, ngem ti panangtedna saan a mangipasigurado iti manayon a panaggayyem.​—Pr 19:6.

Sibibileg a kondenaren ti Kristiano a Griego a Kasuratan ti sumagmamano nga ar-aramid mainaig iti panangted iti sagsagut. Kinondenar ni Jesus dagiti eskriba ken Fariseo gapu ta sinalungasingda ti bilin a panangdayaw iti ama ken ina. Sigun kadakuada, no indeklara ti maysa a tao a ti namaterialan a sanikuana ket sagut a naidedikar iti Dios, saanen nga obligado a mangaramat kadagita a pangtulong kadagiti nagannakna, nupay isu a mismo mabalinna latta nga usaren dagita. (Mt 15:1-6; kitaenyo ti KORBAN.) Awan pateg ti panangted no ti maysa in-inanamaenna a masubadan koma dayta. (Lu 6:30-36; 14:12-14) Tapno makaay-ayo ken Jehova, masapul a mangted nga awan panagimbubukodan ken saan a pinaparammag.​—Mt 6:2-4; 1Co 13:3.

Nakristianuan a Panangted. Dagiti nagkauna a Kristiano nangipaayda kadagiti sagut, wenno kontribusion, maipaay kadagiti marigrigat a kakabsatda. (Ro 15:26; 1Co 16:1, 2) Nupay kasta, boluntario amin ti kakasta a sagut, kas impatuldo ti sasao ni Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2Co 9:7) Kanayonanna pay, tinulonganda dagidiay naan-anay a nangipamaysa iti Nakristianuan a ministerio, kas ken apostol Pablo. Ngem, nupay tinagipateg unay ni Pablo dagiti sagut nga impatulod kenkuana ti kakabsatna, saan a nagkidkiddaw iti sagut.​—Fil 4:15-17.

Adda maited dagiti Kristiano a napatpateg pay ngem kadagiti namaterialan a rangkap. Mabalinda nga ipaay ti tiempo ken dagiti abilidadda tapno mapatibkerda ken mapabilegda ti sabsabali iti mental a pamay-an ken kasta met iti naespirituan, a mangyeg iti dakdakkel a kinaragsak. Ti kadakkelan a sagut a maitukon ti maysa iti sabali isu ti pannakatarus iti Sao ti Dios, ta ti tao nga umawat iti dayta maiturongna iti agnanayon a biag.​—Jn 6:26, 27; 17:3; Ara 20:35; 2Co 12:15; Apo 22:17; kitaenyo ti SAGSAGUT TI ASI.