SAKLOT

Iti maysa a pangngarig, dinakamat ni Jesus ti maysa nga agpalpalama nga agnagan Lazaro nga idi natay naipan iti “ayan ti saklot ni Abraham”; kasta met, tinukoy ni Juan nga adda ni Jesus iti ‘saklot ti Ama.’ (Lu 16:22, 23; Jn 1:18) Ti sasao nga “ayan ti saklot” wenno ‘adda iti saklot’ ipasimudaagna ti kaadda ti maysa a tao iti sanguanan ti barukong ti sabali a tao a nakasadag iti panganan.

Insadag dagiti sangaili ti kannigid a sikoda iti maysa a pungan, iti kasta nawaya ti kannawan nga imada. Gagangay a tallo a tao ti agyan iti tunggal sopa, ngem adda met dagiti sopa a makalaon iti lima. Arigna a ti ulo ti maysa ket nakasadag iti tao iti likudanna, wenno adda ti ulona iti denna ti barukong wenno saklot daydiay a tao. Ti tao nga awan asinoman a nakasadag iti likudanna ket naibilang a kangatuan, ket naibilang a maikadua a kangatuan ti tao iti sanguananna. Gapu ta nasinged dagiti sangaili iti maysa ken maysa, kadawyanna nga agaabay dagiti aggayyem tapno nalaklaka a makapagsaritada iti pribado no kayatda. Pudno a naisangsangayan ken napaboran ti saad ti tao nga adda iti saklot ti sabali a tao iti maysa a bangkete. Isu a ni apostol Juan a dinungdungngo unay ni Jesus ket “sisasadag idi iti sanguanan ti barukong ni Jesus,” iti kasta “nagsadag iti barukong ni Jesus” ken pribado nga inyimtuodna ken Jesus ti maysa a saludsod bayat a maramrambakan ti maudi a Paskua.​—Jn 13:23, 25; 21:20.

Maigapu kadagitoy a rason, idi dineskribir ni Juan ti naisangsangayan unay ken napaboran a saad a tinagiragsak ni Jesus, kinunana nga adda ni Jesus iti “saklot” ni Amana a Jehova. Kasta met, iti pangngarig ni Jesus, naipan ni Lazaro iti “ayan ti saklot” ni Abraham, a mangipasimudaag a naaddaan daytoy nga agpalpalama iti naisangsangayan ken napaboran a saad iti sanguanan daydiay natantan-ok ngem isu.​—Kitaenyo ti PANNANGAN.