Dagiti Manangitandudo iti Pudno a Panagdayaw​—Idi ken Ita

MALAGIPMO kadi ti nagan daydi lalaki a nangsangit iti nagkauna a siudad ti Jerusalem? ‘Ni Jesus,’ nalabit kunam​—ket pudno dayta. (Lucas 19:28, 41) Nupay kasta, sinigsiglo sakbay ti panagbiag ni Jesus ditoy daga, ti Jerusalem ket sinangitan ti maysa pay a matalek nga adipen ti Dios. Nehemias ti naganna.​—Nehemias 1:3, 4.

Apay a naldaangan iti kasta unay ni Nehemias nga uray la a sinangitanna ti Jerusalem? Ania ti inaramidna nga agpaay iti pagimbagan ti siudad ken dagiti umilina? Ken ania ti maadaltayo iti inaramidna? Tapno masungbatan dagita, repasuentayo ti sumagmamano a pasamak idi kaaldawanna.

Lalaki a Mannakipagrikna ken Determinado nga Agtignay

Nadutokan ni Nehemias a gobernador ti Jerusalem, ngem sakbay dayta, isu ket maysa a nangato ti saadna nga opisial iti palasio ti Persia iti siudad ti Susan. Ngem uray no nanam-ay ti biagna, maseknan iti pagimbagan dagiti kakabsatna a Judio idiay adayo a Jerusalem. Kinapudnona, idi simmarungkar idiay Susan ti maysa a bunggoy dagiti Judio a naggapu idiay Jerusalem, ‘inimtuodna nga umuna kadakuada ti maipapan kadagiti Judio, dagidiay nakatalaw, a

nabati iti pannakakautibo, ken kasta met ti maipapan iti Jerusalem.’ (Nehemias 1:2) Idi imbagada kenkuana a ‘dakes unay ti sasaaden’ dagiti umili ti Jerusalem ken “narba” ti pader ti siudad, ‘nagtugaw ni Nehemias ket nangrugi nga agsangit ken agleddaang iti adu nga aldaw.’ Kalpasanna, inyebkasna ti ladingitna iti naimpusuan a kararag ken Jehova. (Nehemias 1:3-11) Apay a napalalo ti ladingit ni Nehemias? Agsipud ta idiay Jerusalem idi ti pagdaydayawan ken ni Jehova ditoy daga, ngem nabaybay-anen. (1 Ar-ari 11:36) Maysa pay, ti di pay natarimaan a pader ti siudad iyanninawna ti saan a nasayaat nga espiritualidad dagiti umili.​—Nehemias 1:6, 7.

Ti pannakaseknan ni Nehemias iti Jerusalem ken ti panangngaasina kadagiti Judio nga agnanaed sadiay ti nangtignay kenkuana nga agserbi. Apaman a pinalubosan ti ari ti Persia a mapan idiay Jerusalem, nagsagana ni Nehemias para iti nawatiwat a panagdaliasatna. (Nehemias 2:5, 6) Kayatna nga usaren ti pigsa, panawen, ken pannakaammona kas panangsuporta iti nasken a trabaho a panangtarimaan. Iti las-ud ti sumagmamano nga aldaw manipud iti isasangpetna, nakaisaganan iti plano para iti pannakatarimaan ti intero a pader ti Jerusalem.​—Nehemias 2:11-18.

Biningbingay ni Nehemias ti dakkel a trabaho a panangtarimaan iti pader kadagiti adu a pamilia, a nagtitinnulong a nagtrabaho.a Nasurok nga 40 a nagduduma a grupo ti natudingan a mangtarimaan iti saggaysa a “narukod a benneg.” Ania ti resultana? Gapu iti kaadu dagiti nagtrabaho​—a pakairamanan dagiti nagannak a kinuyog dagiti annakda​—nga inusarda ti panawen ken pigsada, naaramid ti kasla imposible a trabaho. (Nehemias 3:11, 12, 19, 20) Iti las-ud ti dua a bulan a naganetget a panagtrabaho, natarimaan ti intero a pader! Insurat ni Nehemias nga uray dagidiay bimmusor iti pannakatarimaan ti pader napilitanda a nangbigbig a “ti Diosmi ti nagtaudan ti pannakaaramid daytoy a trabaho.”​—Nehemias 6:15, 16.

Di Malipatan a Pagwadan

Nakatulong ni Nehemias saan laeng a babaen ti panawen ken ti abilidadna a mangorganisar. Inusarna met dagiti sanikuana a pangsuporta iti pudno a panagdayaw. Inusarna ti bukodna a kuarta a pangsubbot kadagiti tagabo a kakabsatna a Judio. Nagpautang nga awan ti interes. Pulos a dina ‘pinadagsenan’ dagiti Judio babaen ti panangkalikagum iti sustento a pakaikarianna kas gobernador. Imbes ketdi, pinakanna ti “sangagasut ket limapulo a lallaki, ken dagidiay um-umay kadakami manipud kadagiti nasion nga adda iti aglikmutmi.” Inaldaw a nagparti iti “maysa a toro, innem a napili a karnero ken dagiti tumatayab” nga agpaay kadagiti sangailina. Malaksid iti dayta, maminsan kada sangapulo nga aldaw, painumenna ida iti “isuamin a kita ti arak a naruay”​—iti bukodna a gastos.​—Nehemias 5:8, 10, 14-18.

Anian a naisangsangayan nga ulidan iti kinaparabur ti impasdek ni Nehemias nga agpaay kadagiti amin nga adipen ti Dios idi ken ita! Daytoy natured nga adipen ti Dios sibubulos ken situtulok nga inusarna ti sanikuana a tumulong kadagiti trabahador tapno maitandudo ti pudno a panagdayaw. Maitutop laeng a mabalinna nga idawat ken Jehova: “Lagipem . . . O Diosko, maipaay iti pagimbagan, ti amin nga inaramidko maigapu iti daytoy nga ili.” (Nehemias 5:19) Sigurado a kasta ti aramiden ni Jehova.​—Hebreo 6:10.

Adda Dagiti kas ken Nehemias Ita

Makaparagsak a maimatangan nga ipakpakita dagiti adipen ni Jehova ti umasping a kinadungngo, kinatulok nga agtignay, ken kinamanagsakripisio maipuon iti pudno a panagdayaw. No madamagtayo ti maipapan kadagiti rigat a sagsagabaen dagiti kapammatiantayo, maseknantayo unay iti kasasaadda. (Roma 12:15) Kas ken Nehemias, ikararagtayo ken Jehova nga andingayenna dagiti marigrigatan a kakabsattayo iti pammati, nga idawattayo kenkuana: “Pangngaasim, ta lapayagmo sititimud koma iti kararag ti adipenmo ken iti kararag dagiti adipenmo a maragsakan iti panagbuteng iti naganmo.”​—Nehemias 1:11; Colosas 4:2.

Nupay kasta, saan laeng a ti riknatayo ti apektaran ti pannakaseknantayo iti naespirituan ken pisikal a pagimbagan dagiti Kristiano a kakabsattayo ken iti pannakaitandudo ti pudno a panagdayaw. Gutugotennatayo met nga agtignay. No ipalubos ti kasasaadda, gapu iti ayat adu dagidiay kas ken Nehemias a mapan iti dadduma a lugar tapno tumulong kadagidiay agkasapulan nupay nanam-ay ti biagda iti mismo a lugarda. Iti baet ti kinarigat ti biag a nalabit mapasaran dagiti kasta a boluntario iti dadduma a paset ti lubong, tumulongda a mangitandudo iti pudno a panagdayaw sadiay, a makibinnuligda kadagiti Kristiano a kakabsatda. Pudno a makomendaran ti panagsakripisioda.

Itutulong iti Mismo a Lugartayo

Siempre, saan a kabaelan ti kaaduan kadatayo ti umakar iti sabali a lugar. Supsuportarantayo ti pudno a panagdayaw iti mismo a lugartayo. Nayilustrar met dayta iti libro a Nehemias. Imutektekanyo ti detalye nga innayon ni Nehemias maipapan iti dadduma kadagiti matalek a pamilia a timmulong a nagtarimaan. Insuratna: “Inaramid ni Jedaias nga anak ni Harumaf ti panagtarimaan iti sanguanan ti bukodna a balay . . . Inaramid da Benjamin ken Hassub ti panagtarimaan iti sango ti bukodda a balay. Simmaruno kadakuada inaramid ni Azarias nga anak ni Maasias nga anak ni Anania ti panagtarimaan iti asideg ti bukodna a balay.” (Nehemias 3:10, 23, 28-30) Dakkel ti naitulong dagita a lallaki ken dagiti pamiliada tapno maitandudo ti pudno a panagdayaw babaen ti panagtarimaanda iti asideg ti pagtaenganda.

Iti kaaldawantayo, adu kadatayo ti mangsupsuporta iti pudno a panagdayaw iti mismo a lugartayo iti nadumaduma a wagas. Makiramantayo kadagiti proyekto a panagibangon kadagiti Kingdom Hall, panangsaranay kadagiti biktima ti didigra ken, kapatgan iti amin, iti trabaho a panangikasaba iti Pagarian. Maysa pay, kabaelantay man wenno saan ti personal a makiraman nga agibangon wenno mangsaranay, naimpusuan a tarigagayantayo amin nga usaren dagiti sanikuatayo a mangsuporta iti pudno a panagdayaw, kas iti sipaparabur nga inaramid ni Nehemias idi kaaldawanna.​—Kitaenyo ti kahon a napauluan “Dagiti Banag a Mainaig iti Boluntario a Panangted.”

No dadduma, mabalin a kasla narigat a patauden ti kasapulan a pondo a mausar iti dumakdakkel a trabaho a panagimprenta, panangsaranay kadagiti biktima ti didigra, ken adu a dadduma pay a serbisio a maar-aramid iti intero a lubong. Nupay kasta, laglagipenyo a kasla imposible met idi a tarimnen ti dakkel a pader ti Jerusalem. (Nehemias 4:10) Ngem nairingpas dayta gapu ta nabingbingay ti trabaho kadagiti adu a natulok a pamilia. Kasta met itatta, mapaadda dagiti banag a kasapulan tapno maitungpal dagiti aktibidadtayo iti intero a lubong no agtultuloy a makitinnulong ti tunggal maysa kadatayo.

Ipakita ti kahon a napauluan “Dagiti Pamay-an ti Dadduma a Mangted” ti sumagmamano a pamay-an no kasano a suportaran iti pinansial ti trabaho ti Pagarian. Idi napan a tawen, adu iti ili ti Dios ti nangipaay iti kasta a tulong, ket kayat ti Bagi a Manarawidwid dagiti Saksi ni Jehova nga iyebkas ti nauneg a panagyamanda kadagiti amin a naimpusuan a nakiraman iti kastoy a boluntario a panangted. Kangrunaan iti amin, agyamantayo ken ni Jehova gapu iti nabaknang a pamendisionna iti naimpusuan a panagregget ti ilina a mangitandudo iti pudno a panagdayaw iti intero a lubong. Wen, no panunotentayo no kasano nga iwanwanwannatayo ni Jehova iti panaglabas dagiti tawen, matignaytayo a mangyebkas met iti sasao ni Nehemias, a siyayaman a nagkuna: ‘Ti ima ti Diosko, no kasano a naimbag kaniak.’​—Nehemias 2:18.

[Footnote]

[Kahon/Dagiti Ladawan iti panid 28, 29]

Dagiti Pamay-an ti Dadduma a Mangted

KADAGITI KONTRIBUSION ITI SANGALUBONGAN A TRABAHO

Adu ti mangilasin, wenno mangibadyet, iti kantidad nga itinnagda kadagiti kahon ti kontribusion a namarkaan iti “Contributions for the Worldwide Work​—Matthew 24:14.”

Binulan nga ipatulod dagiti kongregasion dagitoy a kantidad iti sangalubongan a hedkuarter dagiti Saksi ni Jehova wenno iti lokal a sanga nga opisina. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1060 Manila, wenno iti sanga nga opisina iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibagbaga a dayta ket direkta a sagut.

KONDISIONAL A DONASION

Mabalin nga idonar ti kuarta babaen ti naisangsangayan nga urnos a, no agkasapulan ti nagidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANAGIDONAR

Malaksid pay kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar nga agpaay iti panagserbi iti Pagarian iti intero a lubong. Mairaman kadagitoy ti:

Insurance: Mabalin a ti Watch Tower Society ti mapanaganan a benepisario ti life insurance policy wenno ti retirement/pension plan.

Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maibayad iti Watch Tower Society inton matay ti nagidonar, a mayannurot kadagiti paglintegan ti lokal a banko.

Stock ken Bond: Mabalin nga idonar dagiti stock ken bond iti Watch Tower Society kas direkta a sagut.

Daga ken Pasdek: Mabalin nga idonar iti Watch Tower Society ti mailako a daga, balay, ken pasdek kas direkta a sagut wenno babaen ti panangireserba iti pagtaengan ti nagidonar, a makapagtultuloy nga agnaed sadiay bayat a sibibiag. Makiumankayo iti sanga nga opisina iti pagilianyo sakbay a legal nga iyallatiwyo dagiti papeles ti aniaman a daga, balay, wenno pasdek.

Gift Annuity: Iti daytoy nga urnos, ti nagidonar iyallatiwna ti kuarta wenno dagiti security iti Watch Tower Society. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti income tax a bayadan ti nagidonar iti tawen a mapatalgedan ti gift annuity.

Testamento ken Bambanag a Maitalek (Trusts): Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Watch Tower Society ti mapanaganan a benepisario ti katulagan mainaig kadagiti bambanag a maitalek. Mabalin nga addada bentahana iti buis no relihioso nga organisasion ti benepisario ti trust.

Kas ipasimudaag ti termino a “naiplano a panagidonar,” kalikaguman dagitoy a kita ti donasion ti panagplano daydiay agidonar. Tapno matulongan dagiti indibidual nga agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Español a broshur a napauluan Charitable Planning to Benefit Kingdom Service Worldwide. Naisurat daytoy a broshur a pangsungbat kadagiti adu a naawat a saludsod maipapan kadagiti sagut, testamento, ken trust. Naglaon met daytoy iti kanayonan a makatulong nga impormasion maipapan iti panagplano mainaig kadagiti sanikua, kuarta, ken buis. Ibagana kadagiti indibidual no ania dagiti nadumaduma a wagas a dagiti sagut ket mabalin nga ited ita wenno ipatawid no pumusayda. Magun-odan daytoy a broshur babaen ti direkta a panagkiddaw iti kopia iti sanga nga opisina dagiti Saksi ni Jehova.

Kalpasan a nabasada ti broshur ken nakiumanda iti sanga nga opisina dagiti Saksi ni Jehova, adu dagidiay nakatulong kadagiti Saksi ni Jehova iti sangalubongan ken naaprobetsarda pay dagiti benepisio mainaig iti panagbuis gapu iti panangaramidda iti kasta. Rumbeng a mapakaammuan ti sanga nga opisina dagiti Saksi ni Jehova ken maikkan iti kopia ti aniaman a nesesita a dokumento maipapan iti uray ania kadagitoy nga urnos. No interesadokayo iti aniaman kadagitoy nga urnos a naiplano a panagidonar, makiumankayo iti sanga nga opisina dagiti Saksi ni Jehova, babaen ti surat man wenno telepono, iti direksion a nailista iti baba wenno iti opisina dagiti Saksi ni Jehova iti pagilianyo.

Sanga nga Opisina Dagiti Saksi ni Jehova

Watch Tower Bible and Tract Society

186 Roosevelt Avenue San Francisco del Monte

1105 Quezon City

Telepono: 411-6090

[Kahon iti panid 30]

Dagiti Banag a Mainaig iti Boluntario a Panangted

Kadagiti suratna kadagiti taga Corinto, dinakamat ni apostol Pablo ti tallo a napateg a banag a mainaig iti boluntario a panangted. (1) Idi nagsurat maipapan iti panagur-or iti kuarta, imbilin ni Pablo: “Tunggal umuna nga aldaw ti lawas tunggal maysa kadakayo mangilasin koma iti bukodna a balay iti idulinna a banag.” (1 Corinto 16:2a) No kasta, masapul a maiplano a nasakbay ti panangted, ken rumbeng a sistematiko. (2) Insurat met ni Pablo a tunggal maysa mangted koma “sigun iti sapulna.” (1 Corinto 16:2b, New International Version) Iti sabali a pannao, tunggal maysa a situtulok a mangted mabalinna nga aramiden dayta sigun iti kabaelanna. Uray no bassit ti sapul ti maysa a Kristiano, napateg ken Jehova ti bassit a kantidad a maitedna. (Lucas 21:1-4) (3) Insurat pay ni Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Naimpusuan​—siraragsak​—ti panangted dagiti napasnek a Kristiano.

[Dagiti Ladawan iti panid 26]

Maysa ni Nehemias a lalaki a mannakipagrikna ken determinado nga agtignay

[Dagiti Ladawan iti panid 30]

Mausar dagiti boluntario a kontribusion iti panagimprenta, panangsaranay kadagiti biktima ti didigra, panagibangon kadagiti Kingdom Hall, ken dadduma pay a makagunggona a serbisio iti intero a lubong