“Kastoy ti Panangayat ti Dios Kadatayo”

“No kastoy ti panangayat ti Dios kadatayo, ngarud pagrebbengantayo a mismo nga ayaten ti maysa ken maysa.”​—1 JUAN 4:11.

 1. Inton Marso 23 kalpasan ti ilelennek ti init, apay nga agtataripnong ti minilion a tattao kadagiti Kingdom Hall ken dadduma pay a paggigimongan iti aglikmut ti lubong?

INTON Domingo, Marso 23, 1997, kalpasan ti ilelennek ti init, sigurado nga addanto nasurok a 13,000,000 a tattao iti sangalubongan nga agtataripnong kadagiti Kingdom Hall ken dadduma pay a paggigimongan nga us-usaren dagiti Saksi ni Jehova. Apay? Gapu ta natukay ti pusoda iti kadakkelan nga ebkas ti ayat ti Dios iti sangatauan. Impamaysa ni Jesu-Kristo ti atension iti dayta a nadayag a pammaneknek iti ayat ti Dios, a kunkunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.”​—Juan 3:16.

 2. Ania dagiti saludsod a makagunggona nga iyimtuodtay amin iti bagbagitayo maipanggep iti panangsubadtayo iti ayat ti Dios?

² Bayat nga usigentayo ti ayat nga impakita ti Dios, rumbeng nga iyimtuodtay iti bagbagitayo, ‘Talaga kadi nga apresiarek ti naaramidan ti Dios? Ti kadi wagas ti panagbiagko mangted ti pammaneknek iti dayta a panangapresiar?’

“Ti Dios ket Ayat”

 3. (a) Apay a saan a karkarna iti Dios ti panangipakita iti ayat? (b) Kasano a maiparangarang ti pannakabalin ken sirib kadagiti pinarsuana?

³ Saan a karkarna iti Dios ti panangipakita iti ayat ta “ti Dios ket ayat.” (1 Juan 4:8) Ayat ti kangrunaan a galadna. Idi isagsaganana ti daga a pagtaengan ti tao, ti panangbangonna kadagiti bantay ken panangurnongna iti danum kadagiti dan-aw ken taaw ket nakaskasdaaw a pannakaiparangarang ti pannakabalin. (Genesis 1:9, 10) Idi pinagandar ti Dios ti siklo ti danum ken siklo ti oksihena, idi diniseniona dagiti di mabilang a mikroorganismo ken nagduduma a mulmula tapno dagiti kemikal nga elemento ti daga agbalinda a taraon a mabalin nga ipauneg ti tao tapno agtultuloy nga agbiag, idi impasdekna dagiti biolohikal a pagorasantayo a tumutop iti kaatiddog dagiti aldaw ken bulan iti planeta a Daga, imparangarang daytoy ti dakkel a kinasirib. (Salmo 104:24; Jeremias 10:12) Nupay kasta, ti nangnangruna a naisangsangayan iti pisikal a panamarsua ket ti pammaneknek iti ayat ti Dios.

 4. Iti pisikal a panamarsua, ania a pammaneknek iti ayat ti Dios ti rumbeng a makita ken apresiarentay amin?

⁴ Dagiti ngadastayo ibagana kadatayo ti ayat ti Dios no kittabentayo ti natubbog, naluom a prutas a nabatad a nairanta saan laeng a pagtaraontayo no di pay ket mangparagsak kadatayo. Makita dagiti matatayo ti nabatad nga ebidensia iti dayta kadagiti nakaskasdaaw nga ilelennek ti init, ti namituen a langit iti naariwanas a rabii, ti nadumaduma a kita ken natayengteng a maris dagiti sabong, ti panaggagantil dagiti urbon nga animal, ken ti nabara nga isem dagiti gagayyem. Ti agongtayo ipakaammona dayta kadatayo no malang-abtayo ti sayamusom dagiti sabong iti primavera. Maallingag dayta dagiti lapayagtayo bayat nga imdengantayo ti panagdissuor ti danum, ti panagkanta dagiti tumatayab, ken ti timek dagiti ipatpategtayo. Mariknatay dayta no arakupennatay iti nabara ti maysa nga ipatpateg. Adda dagiti animal a naipaayan kadagiti abilidad a kumita, dumngeg, wenno mangangot kadagiti banag a di kabaelan dagiti tao. Ngem ti sangatauan, a naaramid a kaladladawan ti Dios, kabaelanna a riknaen ti ayat ti Dios iti wagas a di maaramidan ti aniaman nga animal.​—Genesis 1:27.

 5. Kasano nga impakita ni Jehova ti aglaplapusanan nga ayat kada Adan ken Eva?

⁵ Idi pinarsua ni Jehova a Dios dagiti immuna a tao, da Adan ken Eva, pinalikmutanna ida iti ebidensia ti ayatna. Nangimula iti minuyongan, maysa a paraiso, ken pinagtubona amin a kita ti kayo iti dayta. Nangipaay iti karayan a mangsibug iti dayta ken pinunnona kadagiti makaay-ayo a tumatayab ken animal. Intedna amin daytoy kada Adan ken Eva kas taengda. (Genesis 2:8-10, 19) Nakilangen ni Jehova kadakuada kas annakna, a paset ti sapasap a pamiliana. (Lucas 3:38) Gapu ta naisagananan ti Eden kas padron, ti nailangitan nga Ama daytoy immuna a natauan a pagassawaan intedna kadakuada ti makapnek nga annongen a panangisaknap iti Paraiso iti intero a daga. Mapunno ti intero a daga kadagiti annakda.​—Genesis 1:28.

 6. (a) Kasanot’ panagriknayo iti iyaalsa da Adan ken Eva? (b) Aniat’ mangipakita a nakaadaltayo iti napasamak idiay Eden ken nagunggonaantayo iti dayta a pannakaammo?

⁶ Nupay kasta, di nagbayag naipasango da Adan ken Eva iti suot ti panagtulnog, maysa a suot iti kinasungdo. Nagsarunoda a di nangipakita iti panangapresiar iti ayat a naiparabur kadakuada. Makapaaligaget ti inaramidda. Di maikalintegan! Kas banagna, napukawda ti relasionda iti Dios, nailaksidda iti pamiliana, ken napagtalawda idiay Eden. Mariknatay pay laeng ita dagiti epekto ti basolda. (Genesis 2:16, 17; 3:1-6, 16-19, 24; Roma 5:12) Ngem nakaadaltay kadi iti napasamak? Kasanotay a subsubadan ti ayat ti Dios? Dagiti kadi pangngeddengtayo iti kada aldaw ipakitada nga apresiarentayo ti ayatna?​—1 Juan 5:3.

 7. Iti laksid ti inaramid da Adan ken Eva, kasano nga impakita ni Jehova ti ayatna kadagiti annakda?

⁷ Uray ti naan-anay a kinaawan panangapresiar dagiti immuna a natauan a nagannak kadatayo iti amin nga inaramid ti Dios kadakuada saan nga isut’ nangmedmed iti mismo nga ayat ti Dios. Gapu iti asina kadagiti tao a saan pay idi a nayanak​—a pakairamanantay a sibibiag ita​—pinalubosan ti Dios da Adan ken Eva nga agpamilia sakbay a matayda. (Genesis 5:1-5; Mateo 5:44, 45) No dina inaramid dayta, awantayo koma. Babaen ti progresibo a pannakaipalgak ti pagayatanna, nangipaay met ni Jehova iti pakaibatayan ti namnama agpaay kadagiti amin a kaputotan ni Adan a mangipakita iti pammati. (Genesis 3:15; 22:18; Isaias 9:6, 7) Nairaman iti urnosna ti pamay-an a babaen iti dayta dagiti tattao iti amin a nasion mapasublida ti napukaw ni Adan, kayatna a sawen, ti perpekto a biag kas naanamongan a kameng ti sapasap a pamilia ti Dios. Inaramidna daytoy babaen ti panangipaayna iti subbot.

Apay a Kasapulan ti Subbot?

 8. Apay a di mabalin nga inkeddeng koma lattan ti Dios a nupay masapul a matay da Adan ken Eva, awan matay kadagiti natulnog nga annakda?

⁸ Talaga kadi a kasapulan ti biag ti tao a maibayad kas subbot? Di ngata mabalin nga inkeddeng koma lattan ti Dios a nupay masapul a matay da Adan ken Eva gapu iti iyaalsada, makapagbiag nga agnanayon amin nga annakda nga agtulnog iti Dios? No iti limitado a panangmatmat ti tao, kasla nainkalintegan dayta. Nupay kasta, ni Jehova “ayatenna ti kinasingpet ken kinalinteg.” (Salmo 33:5) Nakapataud da Adan ken Eva iti annak kalpasan laeng a nagbasolda; isu nga awan naipasngay a perpekto kadagidiay nga annak. (Salmo 51:5) Naaddaanda amin iti tawid a basol, ket patay ti dusa iti basol. No di inkankano ni Jehova daytoy, ania koma a kita ti ehemplo ti impasdekna kadagiti kameng ti sapasap a pamiliana? Dina mabalin a baybay-an dagiti mismo a nalinteg a pagalagadanna. Rinaemna dagiti kalikaguman ti hustisia. Awan asinoman nga addaan iti nainkalintegan a rason a mangbabalaw iti wagas a panangtaming ti Dios kadagiti isyu a nairaman.​—Roma 3:21-23.

 9. Sigun iti nadibinuan a pagalagadan ti hustisia, ania a kita ti subbot ti kasapulan?

⁹ No kasta, kasano a maipaay ti maikanatad a pakaibatayan iti panangisalakan kadagidiay kaputotan ni Adan a mangipakita iti naayat a panagtulnog ken Jehova? No maisakripisio a matay ti maysa a perpekto a tao, ti hustisia palubosanna ti pateg dayta a perpekto a biag a mangipaay iti pangabbong kadagiti basol dagidiay mamati ken mangawat iti subbot. Yantangay ti basol ti maysa a tao, a ni Adan, ti makagapu iti panagbalin ti sangatauan a managbasol, ti maiparukpok a dara ti sabali pay a perpekto a tao, tangay agkatupagda iti pateg, mabalinna a balansien ti pagtimbangan ti hustisia. (1 Timoteo 2:5, 6) Ngem pakasarakan iti kasta a tao?

Kasanot’ Kadakkel ti Gatadna?

10. Apay a di makaipaay dagiti annak ni Adan iti subbot a kasapulan?

¹⁰ Kadagiti annak ni managbasol nga Adan, awan makaipaay iti kasapulan tapno maisubli ti namnama a biag a napukaw ni Adan. “Awan kadakuada ti makabalin babaen iti ania man a pamuspusan a manubbot iti kabsatna, ken mangted man iti Dios iti supapakna. (Ta ti pannakasubbot ti biagda nangina, ket saan a magawidan), Tapno agbiag koma laeng nga agnanayon, a dina koma makita ti pannakarupsa.” (Salmo 49:7-9) Imbes a baybay-anna ti sangatauan nga awanan namnama, ni Jehova a mismo ti siaasi a nangipaay iti probision.

11. Babaen ti ania a pamay-an nga impaay ni Jehova ti perpekto a natauan a biag a kasapulan para iti maitutop a subbot?

¹¹ Di nangibaon ni Jehova iti anghel ditoy daga nga agpammarang a matay babaen ti panangisukona iti pisikal a bagi idinto ta sibibiag kas espiritu. Imbes ketdi, babaen ti panangaramidna iti milagro a ti laeng Dios a Namarsua ti makaaramid, inyalisna ti puersa ti biag ken personalidad ti maysa a nailangitan nga anak iti aanakan ti babai, ni Maria nga anak ni Heli, iti tribu ni Juda. Ti aktibo a puersa ti Dios, ti nasantuan nga espirituna, inaywananna ti idadakkel ti ubing iti aanakan ni inana, ket nayanak a perpekto a tao. (Lucas 1:35; 1 Pedro 2:22) Adda idi iti daytoy a tao ti gatad a kasapulan tapno maipaay ti subbot a naan-anay a mangtungpal kadagiti kalikaguman ti nadibinuan a hustisia.​—Hebreo 10:5.

12. (a) Kasano a maikuna a ni Jesus ket “bugbugtong nga Anak” ti Dios? (b) Kasano a ti panangibaon ti Dios kenkuana tapno mangipaay iti subbot ipaganetgetna ti ayatna kadatayo?

¹² Asino kadagiti linaklaksa a nailangitan nga annakna ti nangtedan ni Jehova iti daytoy nga annongen? Iti daydiay nadeskribir iti Kasuratan kas “bugbugtong nga Anakna.” (1 Juan 4:9) Nausar daytoy a sao a pangdeskribir, saan a ti nagbalinanna idi mayanak kas tao, no di ket ti kinasiasinona sakbay dayta idiay langit. Isu ti kakaisuna a direkta a pinarsua ni Jehova nga awan asinoman a timmulong. Isu ti Inauna kadagiti amin a parsua. Isu ti inusar ti Dios a nangpaadda iti amin a sabsabali pay a parsua. Dagiti anghel ket annak ti Dios, a kas ken Adan nga anak ti Dios. Ngem nadeskribir ni Jesus kas addaan iti “dayag a kas iti kukua ti maysa a bugbugtong nga anak manipud iti maysa nga ama.” Naikuna a nagnaed “iti saklot a saad iti Ama.” (Juan 1:14, 18) Nasinged, nadekket, nadungngo ti relasionna iti Ama. Ti ayatna iti sangatauan ket kas met iti panagayat ti Amana. Dakamaten ti Proverbio 8:30, 31 no kasanot’ panagrikna ni Amana iti daytoy nga Anak ken no kasanot’ panagrikna ti Anak iti sangatauan: “Siak ti pagrag-oanna [ni Jehova], nga inaldaw siraragsakak a kanayon iti sangona, . . . ket pagrag-oak [agsasao ni Jesus, ti Nasigo a Trabahador ni Jehova, ti personipikasion ti sirib] ti pannakiadda kadagiti annak dagiti tao.” Daytoy kapatgan nga Anak ti imbaon ti Dios ditoy daga a mangipaay iti subbot. Gapuna, anian a nagbagas ti sasao ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna”!​—Juan 3:16.

13, 14. Ti rekord ti Biblia maipapan iti pananggandat ni Abraham a mangidaton ken Isaac rumbeng a tulongannatayo a mangapresiar iti ania maipapan iti inaramid ni Jehova? (1 Juan 4:10)

¹³ Tapno matulongannatay bassit a mangtarus iti kaipapanan dayta, nabayag pay sakbay nga immay ni Jesus ditoy daga, imbilin ti Dios ken Abraham, agarup 3,890 a tawenen ti napalabas: “Alaem ita ti anakmo, ti anakmo a bugbugtong, a dungdungnguem, a ni Isaac, ket inka iti daga ti Moria; ket isu idatagmo idiay a maysa a daton a mapuoran, iti rabaw ti maysa kadagiti bambantay nga ibagakto kenka.” (Genesis 22:1, 2) Gapu iti pammati, nagtulnog ni Abraham. Aglugarka iti sasaaden ni Abraham. Ania ngay no anakmo dayta, ti kakaisuna nga anakmo nga ipatpategmo unay? Ania ngata ti mariknam bayat a pispisiem dagiti kayo a pangpuor iti daton, agbiahe iti sumagmamano nga aldaw a mapan idiay daga ti Moria, sa iparabawmo ti anakmo iti altar?

¹⁴ Apay nga adda kasta a rikna ti naasi a naganak? Kuna ti Genesis 1:27 a pinarsua ti Dios ti tao a kaladladawanna. Ti mariknatayo nga ayat ken asi iyanninawna iti limitado unay a wagas ti mismo nga ayat ken asi ni Jehova. Iti kaso ni Abraham, nakibiang ti Dios, isu a di naituloy ti pannakaidaton ni Isaac. (Genesis 22:12, 13; Hebreo 11:17-19) Nupay kasta, iti mismo a kasona, di imbabawi ni Jehova ti panangipaayna iti subbot, nupay dakkel a sakripisio dayta kenkuana ken iti Anakna. Naaramid dayta, saan a gapu iti aniaman nga obligasion iti biang ti Dios, no di ket kas ebkas ti naisangsangayan a di kaikarian a kinamanangngaasi. Naan-anay kadi ti panangapresiartay iti dayta?​—Hebreo 2:9.

No Aniat’ Pagbalinenna a Posible

15. Kasano a ti subbot inapektaranna dagiti biag uray iti daytoy agdama a sistema ti bambanag?

¹⁵ Dayta a naayat a probision nga inaramid ti Dios adda dakkel nga epektona iti biag dagidiay mangawat iti dayta buyogen ti pammati. Dati a naisinada iti Dios gapu iti basol. Kas kuna ti Saona, datida a ‘kabkabusor agsipud ta dagiti panunotda addada kadagiti aramid a nadangkes.’ (Colosas 1:21-23) Ngem ‘naikappia[da] iti Dios babaen ti ipapatay ti Anakna.’ (Roma 5:8-10) Yantangay binalbaliwandan ti panagbiagda ken inawatdan ti pannakapakawan a pagbalinen ti Dios a posible kadagidiay mamati iti daton ni Kristo, naparaburanda iti nadalus a konsiensia.​—Hebreo 9:14; 1 Pedro 3:21.

16. Ania dagiti parabur a maited iti bassit nga ipastoran gapu iti pammatida iti subbot?

¹⁶ Impakita ni Jehova ti di kaikarian a parabur iti sumagmamano kadagitoy, maysa a “bassit nga ipastoran,” a makikadua iti Anakna iti nailangitan a Pagarian, tapno ipatungpalda ti orihinal a panggep ti Dios iti daga. (Lucas 12:32) Naala dagitoy ‘manipud iti tunggal tribo ken pagsasao ken ili ken nasion . . . nga agbalin a kas pagarian ken papadi iti Diostayo, ket agturaydanto a kas ar-ari iti daga.’ (Apocalipsis 5:9, 10) Kadagitoy, insurat ni apostol Pablo: “Inawatyo ti espiritu ti pannakaibilang nga annak, a babaen iti dayta nga espiritu ipukkawtayo: ‘Abba, Ama!’ Ti espiritu met laeng mangsaksi buyogen ti espiritutayo a datayo ket annak ti Dios. Ngarud, no datayo ket annak, agtawidtayo met: pudno a dagiti agtawid ti Dios, ngem makipagtawid ken Kristo.” (Roma 8:15-17) Iti pannakaibilangda nga annak ti Dios, naited kadakuada ti napateg a relasion a napukaw ni Adan; ngem maited kadagitoy nga annak ti kanayonan a pribilehio nga agserbi idiay langit​—banag a di pulos napadasan ni Adan. Di pakasdaawan a naikuna ni apostol Juan: “Kitaenyo no ania a kita ti ayat ti inted kadatayo ti Ama, tapno iti kasta maawagantayo iti annak ti Dios”! (1 Juan 3:1) Kadagiti kakasta a tattao ipakpakita ti Dios saan laeng a ti ayat nga addaan prinsipio (a·gaʹpe) no di pay ket ti nadungngo a panangipateg (phi·liʹa), a makita iti singgalut dagiti napudno nga aggayyem.​—Juan 16:27.

17. (a) Kadagiti amin a mamati iti subbot, ania a gundaway ti maited? (b) Anianto ti kaipapananna kadakuada ti “nadayag a wayawaya dagiti annak ti Dios”?

¹⁷ Iti met sabsabali​—amin a mamati iti naparabur a probision ti Dios agpaay iti biag baeten ken Jesu-Kristo​—ikkan ni Jehova iti gundaway a manggun-od iti napateg a relasion a napukaw ni Adan. Inlawlawag ni apostol Pablo: “Ti sigagagar a panangsegga ti sangaparsuaan [ti sangatauan a nagtaud ken Adan] ket agur-uray iti pannakaipanayag dagiti annak ti Dios [kayatna a sawen, ur-urayenda ti tiempo inton agbalin a nabatad a dagiti annak ti Dios a makipagtawid ken Kristo iti nailangitan a Pagarian agtignaydan a sipopositibo agpaay iti sangatauan]. Ta ti sangaparsuaan naipasakop iti kinabarengbareng [nayanakda iti basol a mangnamnamada a matay, ket awan pamay-an a maluk-atanda ti bagbagida], saan a babaen ti kabukbukodanna a nakem no di ket babaen kenkuana a nangipasakop iti dayta, a maibatay iti namnama [nga inted ti Dios] a ti sangaparsuaan a mismo mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.” (Roma 8:19-21) Anianto ti kaipapanan dayta a wayawaya? A nawayawayaandan iti pannakaadipen iti basol ken ipapatay. Maaddaanda iti perpekto nga isip ken bagi, pagtaengan a Paraiso, ken biag nga agnanayon a pangtagiragsakanda iti kinaperpektoda ken iyebkasda ti panangapresiarda ken Jehova, ti kakaisuna a pudno a Dios. Ket kasano a nagbalin amin a posible daytoy? Babaen ti daton a subbot ti bugbugtong nga Anak ti Dios.

18. Inton Marso 23 kalpasan ti ilelennek ti init, anianto ti aramidentayo, ken apay?

¹⁸ Idi Nisan 14, 33 K.P., iti makingngato a siled idiay Jerusalem, inyussuat ni Jesus ti Panglaglagip iti ipapatayna. Ti tinawen a pannakalagip ti ipapatayna nagbalin a napateg a pasamak iti biag dagiti amin a pudno a Kristiano. Imbilin a mismo ni Jesus: “Itultuloyyo nga aramiden daytoy kas panglaglagip kaniak.” (Lucas 22:19) Iti 1997 maangay ti Panglaglagip kalpasan ti ilelennek ti init inton Marso 23 (a pangrugian ti Nisan 14). Iti dayta nga aldaw, awanen ti napatpateg a banag no di ti itatabuno iti daytoy nga okasion iti Panglaglagip.

Kasanoyo a Sungbatan?

◻ Kadagiti ania a pamay-an nga ipakpakita ti Dios ti aglaplapusanan nga ayat iti sangatauan?

◻ Apay a kasapulan ti perpekto a natauan a biag a pangsubbot kadagiti annak ni Adan?

◻ Aniat’ nagdakkel a sakripisio iti panangipaay ni Jehova iti subbot?

◻ Aniat’ pagbalinen a posible ti subbot?

[Ladawan iti panid 10]

Inted ti Dios ti bugbugtong nga Anakna