Orọ Ọsosuọ Ro Se Ahwo Kọrint

15 Inievo, mẹ be kareghẹhọ owhai usi uwoma nọ me whowho kẹ owhai,+ onọ wha jẹrehọ je bi ru lele na. 2 A be rọ ẹkwoma riẹ siwi owhai re thakpinọ wha kru usi uwoma nọ me whowho kẹ owhai na ga, ajokpanọ wha zihe ruọ ilele Jesu* kufiẹ.

3 Keme usu eware ọsosuọ nọ me wuhrẹ owhai họ onọ a wuhrẹ omẹ re, inọ Kristi o whu fiki izieraha mai wọhọ epanọ Ikereakere na e ta;+ 4 inọ a ki rie,+ ẹhẹ, inọ a kpare riẹ no uwhu ze+ evaọ ẹdẹ avọ esa+ wọhọ epanọ Ikereakere na e ta;+ 5 inọ ọ romavia kẹ Sifas,*+ kẹsena ọ tẹ romavia kẹ Ikpegbivẹ na.+ 6 U no oyena no, ọ romavia kẹ inievo nọ i bu vi egba isoi (500) ẹsiẹvo,+ yọ ibuobu rai a gbẹ rrọ kugbe omai, rekọ ejọ rai i kie ruọ owezẹ uwhu no. 7 Ọ tẹ te romavia kẹ Jemis,+ kẹsena ọ tẹ romavia kẹ ikọ na kpobi.+ 8 Rekọ ukuhọ riẹ, ọ tẹ romavia kẹ omẹ re+ wọhọ ọmọ nọ a yẹ nọ emerae riẹ e gba ha.

9 Keme mẹ họ ọnọ ọ mae kawo evaọ usu ikọ na, yọ me te ọnọ a re se ukọ họ, keme me je kpokpo ukoko Ọghẹnẹ.+ 10 Rekọ fiki uwowou ulogbo Ọghẹnẹ mẹ rọ rrọ ohwo nọ mẹ rrọ na. Yọ uwowou ulogbo nọ o dhesẹ kẹ omẹ o rrọ uvrẹvru hu, keme me ru iruo vi aikpobi; ghele na orọnikọ ẹgba mẹ hẹ, rekọ uwowou ulogbo Ọghẹnẹ nọ o dhesẹ kẹ omẹ. 11 O tẹ make rọnọ mẹ hayo ikọ edekọ na a whowho i rie, enẹ ma bi whowho ovuẹ na, yọ enẹ wha rọwo nọ o rrọ.

12 Whaọ otẹrọnọ ma bi whowho nọ a kpare Kristi no uwhu ze,+ ẹvẹ ejọ evaọ udevie rai a be rọ ta nọ ẹkparomatha enọ i whu no ọ rrọ họ? 13 O tẹ ginẹ rọnọ ẹkparomatha enọ i whu no ọ rrọ họ, kiyọ a kpare Kristi no uwhu ze he. 14 Rekọ otẹrọnọ a kpare Kristi no uwhu ze he, kiyọ usi uwoma nọ ma be ta na ufofe, yọ ẹrọwọ rai ufofe re. 15 Ofariẹ, ma te jẹ jọ enọ i bi se isẹri ọrue kpahe Ọghẹnẹ,+ keme ma bi se isẹri kpe Ọghẹnẹ inọ ọ kpare Kristi no uwhu ze+ kpakiyọ ọ kpare riẹ no uwhu ze he o tẹ ginẹ rọnọ a te kpare enọ i whu no ze he. 16 Keme otẹrọnọ a te kpare enọ i whu no ze he, kiyọ a kpare Kristi no uwhu ze gbe he. 17 Ofariẹ, otẹrọnọ a kpare Kristi no uwhu ze he, kiyọ ẹrọwọ rai u wo iruo ho; wha gbẹ rrọ evaọ izieraha rai.+ 18 Ofariẹ, koyehọ enọ e rrọ usu kugbe Kristi nọ i kie ruọ owezẹ uwhu no a whu kufiẹ no.+ 19 Otẹrọnọ fiki uzuazọ nana ọvo ma ro fi ẹruore họ Kristi, ohrọ mai o te mae re ahwo vi omọfa kpobi.

20 Rekọ evaọ uzẹme, a kpare Kristi no uwhu ze, ọye họ ubi* ọsosuọ evaọ usu enọ i kie ruọ owezẹ uwhu no.+ 21 Keme epanọ ọzae ọvo ọ wha uwhu ze na,+ ere ọvona re ọzae ọvo ọ wha ẹkparomatha enọ i whu no ze.+ 22 Wọhọ epanọ ahwo kpobi a bi whu fiki Adamu na,+ ere ọvona re ahwo kpobi a ti wo uzuazọ fiki Kristi.+ 23 Rekọ omomọvo evaọ utu riẹ othotha: Kristi họ ubi ọsosuọ,+ kẹsena u ve te enọ e rrọ erọ Kristi evaọ oke ọzino* riẹ.+ 24 Kẹsena evaọ ekuhọ, ọ vẹ te rehọ Uvie na kẹ Ọghẹnẹ riẹ gbe Ọsẹ riẹ, nọ ọ tẹ raha egọmeti kpobi gbe udu-esuo gbe ogaga kpobi no.+ 25 Keme ọ te jọ ovie nọ o ti su hrọ bẹsenọ Ọghẹnẹ o re fi ewegrẹ kpobi họ otọ awọ riẹ no.+ 26 Yọ a ti si uwhu, ọwegrẹ urere na no otọ.+ 27 Keme Ọghẹnẹ “o fi eware kpobi họ otọ awọ riẹ.”+ Rekọ nọ ọ ta nọ ‘a fi eware kpobi họ otọ riẹ na,’+ u muẹro inọ orọnikọ u kugbe Ọnọ o fi eware kpobi họ otọ riẹ na ha.+ 28 Rekọ nọ a te fi eware kpobi họ otọ riẹ no, Ọmọ na omariẹ o ti fi omariẹ họ otọ Ọnọ o fi eware kpobi họ otọ riẹ na,+ re Ọghẹnẹ ọ ruẹse jọ eware kpobi kẹ ohwo kpobi.+

29 O gbẹ rrọ ere he, didi erere o rrọ kẹ enọ e be họ-ame avọ ẹjiroro nọ a ti whu?+ Otẹrọnọ a te kpare enọ i whu no vievie he, emejabọ nọ a be rọ họ-ame fiki ẹjiroro yena? 30 Kọ fikieme ma be rọ rẹriẹ ovao dhe ọza evaọ auwa kpobi* re?+ 31 Kẹdẹ kẹdẹ mẹ be rẹriẹ ovao dhe uwhu. Inievo, onana u muẹro wọhọ epanọ oghọghọ nọ me bi wo fiki rai evaọ Kristi Jesu Olori mai u muẹro na. 32 Otẹrọnọ wọhọ ezae efa,* me lele erao ijihẹ họre evaọ Ẹfisọs,+ didi erere o rrọ kẹ omẹ? Otẹrọnọ a te kpare enọ i whu no ho, “joma re jẹ da, keme odẹnotha ma ti whu.”+ 33 Jọ a su owhai thọ họ. Usu uyoma o rẹ raha uruemu ezi.*+ 34 Wha jaja aro vi re wha ru oware nọ u kiẹrẹe, wha ruabọhọ uzioraha ha, keme otujọ a wo eriariẹ Ọghẹnẹ hẹ. Mẹ be ta onana re me ru oma vuọ owhai.

35 Rekọ, ohwo jọ ọ sae nọ inọ: “Oghẹrẹ vẹ a te rọ kpare enọ i whu no na ze? Ẹhẹ, oghẹrẹ ugboma vẹ a te rọ kpare ai ze?”+ 36 Whẹ ọnọ ọ kare iroro! Oware nọ whọ kọ o rẹ dhẹ ze he ajokpanọ o re gbo no tao. 37 Yọ whọ tẹ be kọ oware, orọnikọ okakọ* nọ o be te dhẹ ze na whọ rẹ kọ họ rekọ ubi gheghe, makọ iwhiti hayo oghẹrẹ ubi ofa jọ; 38 rekọ Ọghẹnẹ ọ rẹ kẹe oma nọ o were riẹ, yọ ọ rẹ kẹ ibi na kpobi ọvuọ oma riẹ. 39 Orọnikọ oghẹrẹ ovona uwo kpobi o rrọ họ, ọrọ ohwo-akpọ o riẹ, uwo ofa orọ eruẹ, uwo ofa ọrọ evra, ọfa kọ ọrọ iyei. 40 Oma obọ odhiwu o riẹ,+ oma otọakpọ o riẹ;+ rekọ oma obọ odhiwu na u wo oghẹrẹ oruaro riẹ, yọ oma otọakpọ na u wo oghẹrẹ oruaro riẹ sa. 41 Ọre o wo oghẹrẹ elo riẹ, ọvẹre o wo oghẹrẹ elo riẹ sa,+ isi i wo oghẹrẹ elo ọfa; evaọ uzẹme, elo esi jọ o wo ohẹriẹ no elo esi ọfa.

42 Ere ẹkparomatha enọ i whu no na o rrọ re. A rẹ kọe avọ oma nọ u re gbo; a rẹ kpare iẹe ze avọ oma nọ u re gbo ho.+ 43 A rẹ kọe ababọ ọghọ; a rẹ kpare iẹe ze avọ oruaro.+ A rẹ kọe avọ oma nọ o ga ha; a rẹ kpare iẹe ze avọ ogaga.+ 44 A rẹ kọe avọ oma uwo; a rẹ kpare iẹe ze avọ oma ẹzi. Otẹrọnọ oma uwo o riẹ, kiyọ orọ ẹzi o riẹ re. 45 Fikiere a kere nọ: “Ọzae ọsosuọ na Adamu o zihe ruọ ohwo* nọ ọ rrọ uzuazọ.”+ Adamu urere na o zihe ruọ ẹzi nọ ọ rẹ kẹ uzuazọ.+ 46 Rekọ, ọrọ ẹzi na họ ọrọ ọsosuọ họ. Ọrọ uwo na họ ọrọ ọsosuọ, kẹsena kọ ọrọ ẹzi na. 47 Otọakpọ na ọzae ọsosuọ na o no ze, yọ ẹkpẹ a rọ mae;+ rekọ obọ odhiwu ọzae avọ ivẹ na o no ze.+ 48 Epanọ ọnọ a rọ ẹkpẹ ma na ọ rrọ, ere enọ a rọ ẹkpẹ ma a rrọ re; yọ epanọ ọrọ obọ odhiwu na ọ rrọ, ere enọ e rrọ obọ odhiwu a rrọ re.+ 49 Yọ wọhọ epanọ ma wo oghẹrẹ oma ọnọ a rọ ẹkpẹ ma na,+ ere ma ti wo oghẹrẹ oma ọrọ obọ odhiwu na re.+

50 Rekọ inievo, mẹ be ta kẹ owhai nọ, uwo gbe azẹ e rẹ sae reuku Uvie Ọghẹnẹ hẹ, yọ onọ u re gbo o rẹ reuku onọ u re gbo ho ho. 51 Rri! Mẹ be ta oware udidi ọrẹri jọ kẹ owhai: Mai kpobi ma ti kie ruọ owezẹ uwhu hu, rekọ a ti nwene omai kpobi,+ 52 ababọ oke oraha, evaọ emaharo, okenọ ọgba urere na o ti do. Keme ọgba na o ti do,+ a vẹ te kpare enọ i whu no ze avọ oma nọ u re gbo ho, a ve ti nwene omai. 53 Keme oma nana nọ u re gbo na o te whẹ oma nọ u re gbo ho họ,+ yọ oma nana nọ u re whu na o vẹ te whẹ oma nọ u re whu hu họ.+ 54 Rekọ nọ oma nana nọ u re gbo na o tẹ whẹ oma nọ u re gbo ho họ no, yọ oma nana nọ u re whu na o tẹ whẹ oma nọ u re whu hu họ no, ẹme nana nọ a kere na o ve ti rugba: “A lọ uwhu no bẹdẹ bẹdẹ.”+ 55 “Uwhu, obokparọ ra o rrọ? Uwhu, obi ra ọ rrọ?”+ 56 Obi nọ ọ be wha uwhu ze họ uzioraha,+ yọ ogaga uzioraha họ Uzi na.*+ 57 Rekọ uyere u te Ọghẹnẹ, keme ọye ọ be kẹ omai obokparọ na ẹkwoma Olori mai Jesu Kristi!+

58 Fikiere, inievo iyoyou mẹ, wha dikihẹ ga,+ wha no ẹta ha, wha wo eware buobu nọ wha re ru ẹsikpobi+ evaọ iruo Olori na, keme oma nọ wha be dawo evaọ iruo Olori na o te jọ uvrẹvru hu.+