Orọ Ọsosuọ Ro Se Ahwo Kọrint

9 Kọ me gbe wo udu nọ me re ro ru oware nọ mẹ gwọlọ? Kọ mẹ gbẹ rrọ ukọ? Kọ mẹ gbẹ ruẹ Jesu Olori mai?+ Kọ ogbẹrọnọ whai họ iruo mẹ evaọ Olori na? 2 Mẹ gbẹ make rrọ ukọ kẹ amọfa ha, ababọ avro, mẹ yọ ukọ kẹ owhai. Keme whai họ oka nọ u bi dhesẹ nọ mẹ yọ ukọ evaọ Olori na.

3 Onana họ ẹkẹ-unu mẹ rọkẹ enọ i bi gu omẹ ẹdhọ: 4 Ma wo udu nọ ma rẹ rọ re jẹ da, o gbẹ rrọ ere? 5 Ma wo udu nọ ma re ro wo aye nọ ọ rrọ Oleleikristi nọ o re lele omai,*+ wọhọ ikọ edekọ gbe inievo Olori na+ gbe Sifas,*+ o gbẹ rrọ ere? 6 Hayo kọ mẹ avọ Banabas ọvo+ họ enọ i wo udu na ha, nọ a rẹ rọ siọ okọ ba? 7 Kọ osoja vẹ o re ru iruo yọ ọye ọvo ọ be kuọ omariẹ? Ono ọ rẹ kọ ọgbọ nọ ọ rẹ re ibi riẹ hẹ?+ Hayo kọ ono o re thuru erao nọ ọ rẹ jọ ame-ivie uthuru erao na da ha?

8 Kọ eriwo ohwo-akpọ mẹ be rọ ta eme nana? Kọ Uzi na o gbẹ ta kpahe eware nana re? 9 Keme a kere evaọ Uzi Mosis na nọ: “Wha rẹ gba unu eruẹ vievie he nọ o te bi si ibi no igbe ekakọ.”+ Kọ iruẹ eye e rrọ Ọghẹnẹ oja? 10 Manikọ ginọ fiki mai ọ rọ ta onana? Evaọ uzẹme, fiki mai a ro kere iei, keme ohwo nọ o bi kporo udhu gbe ọnọ ọ be kpare eka o re ru ere avọ irẹro inọ oware jọ u ti tei obọ.

11 Otẹrọnọ ma kọ eware nọ i no obọ Ọghẹnẹ ze evaọ udevie rai, kọ o rro hrọ re ma vu eware nọ ma rẹ rọ rẹrote omamai mi owhai?+ 12 Otẹrọnọ amọfa a wo udu nọ a re ro wo obufihọ nana mi owhai, kọ ma gbe wo udu yena vi ae dede? Ghele na, ma rehọ udu nana ruiruo ho,+ rekọ ma bi thihakọ eware kpobi, re ma gbẹ rehọ edhere ọvuọvo fi ọzadhe họ usi uwoma kpahe Kristi na ha.+ 13 Kọ wha gbẹ riẹ nọ ezae nọ i re ru iruo ọrẹri na a re wo emu rai no etẹmpol na ze, yọ ahwo nọ a be gbodibo kẹse kẹse evaọ agbada-idhe na a re wo ẹkẹ jọ no agbada-idhe na ze?+ 14 Ere ọvona re, Olori na ọ kẹ ujaje inọ enọ i bi whowho usi uwoma na a rẹ rọ ẹkwoma usi uwoma na kuọ omarai.+

15 Rekọ mẹ rehọ eruẹrẹfihotọ nana ọvuọvo ruiruo ho.+ Evaọ uzẹme, orọnikọ me bi kere eware nana re wha ruẹsi ru onana kẹ omẹ hẹ, keme o te mai woma re me whu,—ohwo ọvo o re mi omẹ uvẹ nọ me bi ro seha na ha!+ 16 Whaọ, me te bi whowho usi uwoma na, yọ oware nọ o rẹ lẹliẹ omẹ seha ha, keme o gba omẹ họ. Evaọ uzẹme, uye u te omẹ nọ me gbe whowho usi uwoma na ha!+ 17 Mẹ tẹ be rọ unevaze ru onana, me re wo osohwa; rekọ mẹ tẹ maki bi ru ei dede nọ o were omẹ hẹ, o gbẹ rrọ iruo nọ a mu họ omẹ obọ.+ 18 Nọ o rrọ ere na, kọ eme họ osohwa mẹ? Nọ me bi whowho usi uwoma na, me bi whowho iei ọvọvẹ, re mẹ gbẹ rehọ udu nọ me wo evaọ usi uwoma na ruiruo thọthọ họ.

19 Keme dede nọ mẹ rrọ ọmuyẹ kẹ ahwo kpobi, me ru omamẹ fihọ ọrigbo kẹ ahwo kpobi no, re mẹ ruẹsi wo ahwo kpobi nọ mẹ sai wo tobọ. 20 Rọkẹ ahwo Ju, me ru omamẹ wọhọ ohwo Ju re mẹ sai wo ahwo Ju tobọ;+ rọkẹ enọ e rrọ otọ uzi, me ru omamẹ wọhọ ọnọ ọ rrọ otọ uzi, dede nọ mẹ rrọ otọ uzi hi, re mẹ sai wo enọ e rrọ otọ uzi tobọ.+ 21 Rọkẹ enọ e rrọ ababọ uzi, me ru omamẹ wọhọ ẹsenọ mẹ rrọ ababọ uzi, dede nọ mẹ rrọ ababọ uzi Ọghẹnẹ hẹ rekọ mẹ rrọ otọ uzi Kristi,+ re mẹ sai wo enọ e rrọ ababọ uzi tobọ. 22 Rọkẹ enọ e ga ha, me zihe ruọ ọnọ ọ ga ha re mẹ sai wo enọ e ga ha tobọ.+ Me zihe ruọ eware kpobi no kẹ oghẹrẹ ahwo kpobi, re mẹ sae rehọ edhere kpobi nọ o rẹ sae lọhọ siwi ejọ. 23 Rekọ me bi ru eware kpobi fiki usi uwoma na, re mẹ sai whowho iei kẹ amọfa.+

24 Kọ wha gbẹ riẹ nọ evaọ ohrẹ-odhẹ, edhẹ-ohrẹ na kpobi a rẹ dhẹ, rekọ ọvo o re wo osa na? Wha dhẹ evaọ oghẹrẹ nọ wha sai ro wo osa na.+ 25 Ohwo kpobi nọ o bi wobọ evaọ arozaha oma-uhrowo* ọ rẹ nyẹ oma evaọ eware kpobi. Whaọ, a re ru onana re a wo etu-ọghọ* nọ o rẹ sae raha,+ rekọ mai kọ onọ o rẹ raha ha.+ 26 Fikiere, oghẹrẹ nọ mẹ be dhẹ o rrọ ugbẹdhẹ hẹ;+ oghẹrẹ nọ mẹ be bọwo ego mẹ o rrọ oghẹrẹ nọ mẹ rẹ rọ bọwo ofou hu; 27 rekọ mẹ be gba oma mẹ*+ je bi su ei wọhọ ọrigbo, re nọ mẹ tẹ ta usi uwoma kẹ amọfa no, oware ovuovo o gbẹ whae ze nọ a rẹ rọ siọ omẹ hẹ.*