Samuẹle Ọsosuọ

25 Nọ u te oke jọ, Samuẹle+ o te whu; ahwo Izrẹl kpobi a te kokohọ re a weri fiki riẹ, re a je ki ei fihọ uwou riẹ evaọ Rema.+ Kẹsena Devidi ọ tẹ wọ, o te kpobọ udhude Peran.

2 Whaọ ọzae jọ ọ jọ Meọn+ nọ ọ jẹ kọ okọ evaọ obọ Kamẹl.*+ Ọzae na o fe gaga; o wo igodẹ idu esa (3,000) gbe ewe odu ọvo (1,000), yọ evaọ oke yena o je bru eto igodẹ riẹ evaọ Kamẹl. 3 Odẹ ọzae na Nebale,+ odẹ aye riẹ kọ Abigẹle.+ Aye na o wo areghẹ gaga o te je wo erru, rekọ ọzae riẹ nọ o no uyẹ Kelẹb+ ze ọ jẹ hai dhuaro, o te je wo ekpehre uruemu.+ 4 Devidi ọ tẹ jọ obọ udhude na yo nọ Nebale o bi bru eto igodẹ riẹ. 5 Fikiere Devidi o te vi emoha ikpe bru ei, Devidi ọ ta kẹ emoha na nọ: “Wha nya kpobọ Kamẹl, nọ wha te te oria Nebale, wha ta kẹe nọ me vi owhai ze te nọe epanọ eware e rrọ kẹe. 6 Wha vẹ ta nọ, ‘Jọ whọ rria tọ, jọ udhedhẹ u te owhẹ je te ahwo uwou ra gbe eware kpobi nọ who wo. 7 Whaọ me yo nọ who bi bru eto igodẹ ra. Yọ okenọ ithuru-igodẹ ra e jọ kugbe omai, ma ru rai oware uyoma ovo ho,+ uvumọ oware rai u vru hu evaọ etoke nọ a jọ obọ Kamẹl na. 8 Whọ tẹ nọ emoha ra, a te vuẹ owhẹ. Rri emoha mẹ aro keme oke evawere* ma rọ nyaze na. Ivie, kẹ idibo ra gbe Devidi ọmọzae ra oware kpobi nọ whọ sai siobọno.’”+

9 Emoha nọ Devidi o vi na a tẹ nya, a tẹ rehọ odẹ Devidi ta eme nana kpobi kẹ Nebale. Nọ a ta re no, 10 Nebale ọ tẹ kpahe kẹ idibo Devidi nọ: “Ono họ Devidi, kọ ono họ ọmọzae Jẹsi? Idibo ọgbọna buobu a be dhẹ siọ ega rai ba.+ 11 Kọ mẹ rẹ rehọ ebrẹdi mẹ gbe ame mẹ gbe erao nọ me kpe kẹ ahwo nọ a bi bru eto igodẹ mẹ, mẹ vẹ rehọ ai kẹ ahwo jọ nọ a ghoro no obojọ nọ mẹ riẹ hẹ ze?”

12 Emoha nọ Devidi o vi na a te zihe, a tẹ vuẹ Devidi eme nana kpobi. 13 Devidi ọ tẹ nwane ta kẹ ahwo riẹ nọ: “Ohwo kpobi ọ gba ọgbọdọ riẹ fihọ oma!”+ Aikpobi a tẹ gba egbọdọ rai fihọ oma, Devidi omariẹ ọ tẹ gba ọgbọdọ riẹ fihọ oma re, ezae nọ i bu te oware wọhọ egba ene (400) i te lele Devidi, yọ ezae egba ivẹ (200) e jọ kugbe ekwakwa rai.

14 Evaọ oke yena, omọvo idibo na jọ ọ tẹ vuẹ Abigẹle, aye Nebale nọ: “Binọ Devidi o vi enyukọ no obọ udhude na ze ti yere ọga mai, rekọ ọga mai o te je ku eka họ ai oma.+ 15 Ezae yena e jẹ riẹ omai ru gaga. Evaọ etoke nọ ma rọ jọ kugbe ai evaọ obọ ẹwọ na, a ru omai oware uyoma ovo ho, yọ uvumọ oware mai u vru hu.+ 16 A jẹ thọ omai wọhọ ugbẹhẹ nọ o wariẹ omai họ te aso te uvo evaọ etoke nọ ma jọ kugbe ai nọ ma jẹ rẹrote uthuru na. 17 Jiroro oware nọ who ti ru obọnana keme okpẹtu o bi ti te ọga mai gbe uwou riẹ soso,+ yọ whọ riẹ nọ ọga mai o re yo ẹme ohwo ho keme o fioka ohwo ho.”*+

18 Fikiere Abigẹle+ ọ tẹ nwane rehọ ikulu ebrẹdi egba ivẹ (200), ekana udi ilogbo ivẹ, igodẹ isoi nọ a va no, eka nọ a sasa* nọ e rẹ vọ owawọ siya* isoi, ikeki resin udhusoi (100), gbe ikeki ifigi egba ivẹ (200), ọ tẹ wọ aikpobi fihọ ehru eketekete.+ 19 Kẹsena Abigẹle ọ tẹ ta kẹ idibo riẹ nọ: “Wha kobaro; me ti lele owhai.” Rekọ ọ vuẹ Nebale, ọzae riẹ oware ovo ho.

20 Nọ ọ rrọ ehru eketekete na be nyavrẹ na, yọ Devidi avọ ahwo riẹ a be nya rri obonọ ọ rrọ na, rekọ ugbehru na u ru nọ a gbẹ jẹ ruẹ e riẹ hẹ, ẹsiẹvo na o te zere ai. 21 Whaọ Devidi ọ jẹ ta nọ: “Uye nọ mẹ ruẹ rọ rẹrote eware ọzae nana evaọ obọ udhude na kọ uvrẹvru. Uvumọ oware riẹ u vru hu,+ rekọ ọ be rọ eyoma hwosa ewoma nọ me ru kẹe.+ 22 Jọ Ọghẹnẹ o ru epọvo na kẹ ewegrẹ Devidi* je ru vrẹ ere otẹrọnọ mẹ tẹ kuvẹ re ọzae* jọ evaọ uwou riẹ ọ gbẹ jọ uzuazọ rite ohiohiẹ odẹnotha.”

23 Nọ Abigẹle ọ nwane kparo ruẹ Devidi, ọ tẹ rọ ovovẹrẹ no eketekete na ruọ otọ, o te kigwẹ vovao tuotọ evaọ aro Devidi. 24 Kẹsena o te kie fihọ awọ riẹ, ọ tẹ ta nọ: “Olori mẹ, jọ afuẹwẹ na ọ jọ uzou mẹ; jọ odibo ọmọtẹ ra ọ ta ẹme kẹ owhẹ, re whọ jẹ gaviezọ kẹ eme odibo ọmọtẹ ra. 25 Ivie, jọ olori mẹ ọ daezọ Nebale nana nọ o fioka ha na ha,+ keme ọ nwane rrọ wọhọ odẹ riẹ. Nebale* họ odẹ riẹ, yọ ugheghẹ o da riẹ oma fia. Rekọ mẹ odibo ọmọtẹ ra, mẹ ruẹ emoha nọ olori mẹ o vi ze na ha. 26 Whaọ, olori mẹ, nọ Jihova ọ rrọ uzuazọ na, whẹ omara* ọ tẹ jẹ rrọ uzuazọ na, Jihova họ ọnọ ọ whaha owhẹ na+ re whọ siọ abe azẹ ba ẹriọ,+ ọ tẹ jẹ whaha owhẹ re whọ gbẹ rọ obọ ra kioja ha.* Jọ ewegrẹ ra gbe enọ e be gwọlọ ru olori mẹ oware uyoma a jọ wọhọ Nebale. 27 Jọ a rehọ okẹ*+ nana nọ odibo ọmọtẹ ra o ro se olori mẹ na kẹ emoha nọ i bi lele olori mẹ na.+ 28 Ivie, rehọ oruthọ odibo ọmọtẹ ra rọvrẹ riẹ, keme Jihova ọ te siọ uwou ebẹdẹ bẹdẹ ba ẹbọ kẹ olori mẹ hẹ,+ fikinọ olori mẹ o bi fi emo Jihova,+ yọ a re jọ oma ra ruẹ eyoma ọvo ẹdẹvo ho.+ 29 Nọ ohwo jọ o te bi le owhẹ, be gwọlọ uzuazọ* ra kpe, Jihova Ọghẹnẹ ra ọ te nabe fare uzuazọ* olori mẹ uko fihọ ẹkpa uzuazọ, rekọ a ti gbolo uzuazọ* ewegrẹ ra kufiẹ wọhọ ibitho nọ a rọ udeme veghe kufiẹ.* 30 Nọ Jihova o te ru eware iwoma kpobi nọ ọ ya eyaa rai kẹ olori mẹ no, jẹ rehọ owhẹ mu osu Izrẹl no,+ 31 o te da owhẹ hẹ hayo whọ te vioja* evaọ udu ra ha inọ who kpe azẹ ọhaha gbe nọ olori mẹ ọ rehọ obọ riẹ kioja.*+ Nọ Jihova o te ru ewoma kẹ olori mẹ no, kareghẹhọ odibo ọmọtẹ ra.”

32 Devidi ọ tẹ ta kẹ Abigẹle nọ: “Ujiro u te Jihova Ọghẹnẹ Izrẹl, ọnọ o vi owhẹ ze ti zere omẹ nẹnẹ na! 33 Oghale u te owhẹ fiki areghẹ ra! Oghale u te owhẹ nọ whọ rọ whaha omẹ nẹnẹ na nọ mẹ gbẹ rọ reabe azẹ+ jẹ rehọ obọ mẹ kioja ha.* 34 Nọ Jihova Ọghẹnẹ Izrẹl nọ ọ whaha omẹ nọ me gbe ro kpe owhẹ hẹ+ ọ rrọ uzuazọ na, whọ gbẹ kake nyaze ti zere omẹ hẹ,+ ohiohiẹ odẹnotha ọzae* ọvuọvo ọ hai ti kiọkọ uwou Nebale he.”+ 35 Fikiere Devidi o te mi ei eware nọ ọ wha sei na, ọ tẹ ta kẹe nọ: “Nya kpobọ uwou ra dhedhẹ. Me yo ẹme nọ whọ ta na, me ti ru ayare ra na gba kẹ owhẹ.”

36 Uwhremu na Abigẹle o te zihe bru Nebale nọ o je ru ehaa emuọriọ wọhọ ovie evaọ uwou riẹ, yọ eva e jẹ were Nebale,* ọ tẹ jẹ da idi bẹ no. Abigẹle ọ ta ẹme ọvo kẹe he bẹsenọ oke o rọ ke. 37 Evaọ ohiohiẹ nọ udi o hiẹ no Nebale aro no, aye riẹ ọ tẹ vuẹe eware nana. Udu riẹ o tẹ wọhọ orọ ohwo nọ o whu no, o te kiẹzẹ oria ọvo wọhọ utho. 38 Nọ oware wọhọ edẹ ikpe e vrẹ no, Jihova ọ tẹ tehe Nebale kpe.

39 Nọ Devidi o yo nọ Nebale o whu no, ọ tẹ ta nọ: “Ujiro u te Jihova, ọnọ ọ thothọ mẹ+ okenọ Nebale ọ poviẹ omẹ,+ ọ tẹ jẹ whaha odibo riẹ nọ o gbe ro ru oware uyoma ovo ho,+ Jihova o te je zihe eyoma Nebale fihọ uzou obọriẹ!” Kẹsena Devidi o te vi ahwo bru Abigẹle re a ta kẹe nọ ọ gwọlọ nọ ọ jọ aye riẹ. 40 Fikiere idibo Devidi a tẹ nyabru Abigẹle evaọ obọ Kamẹl, a tẹ ta kẹe nọ: “Devidi o vi omai ze re ma rehọ owhẹ sei, re whọ jọ aye riẹ.” 41 Ọ tẹ nwane kpama, o te kigwẹ vovao tuotọ jẹ ta nọ: “O ruọ ọrigbo ra nọ ọ rẹ jọ odibo nọ ọ rẹ wozẹ awọ+ idibo olori mẹ.” 42 Kẹsena Abigẹle+ ọ tẹ kpama vẹrẹ vẹrẹ, ọ tẹ ruọ eketekete riẹ avọ idibo emetẹ isoi riẹ nọ e be nya lele iei; o te lele enyukọ nọ Devidi o vi ze na nyavrẹ, ọ tẹ jọ aye riẹ.

43 Oke yena Devidi ọ rehọ Ahinoam+ ohwo Jezrẹl+ na no re, aimava a tẹ jọ eyae riẹ.+

44 Rekọ Sọl ọ rehọ Maekal,+ aye Devidi kẹ Pọltae+ no, ọmọzae Leish nọ o no Galim ze.