Orọ Ọsosuọ Ro Se Ahwo Kọrint

2 Fikiere nọ mẹ nyabru owhai ze, inievo, mẹ jẹ ta eme ilogbo+ hayo rehọ areghẹ mẹ ro dhesẹ oma kẹ owhai hi nọ me je whowho ovuẹ oware udidi ọrẹri+ Ọghẹnẹ kẹ owhai. 2 Keme mẹ gba riẹ mu nọ mẹ rẹ tẹrovi oware ofa ha ajokpaọ ẹme kpahe Jesu Kristi gbe epanọ a rọ kare iẹe fihọ ure kpe.+ 3 Yọ mẹ nyabru owhai ze avọ oma oyẹlẹ gbe ozọ, gbe enuhu ọgaga; 4 yọ ẹmeunu mẹ gbe eme nọ me whowho orọnikọ avọ eme areghẹ erọ ẹtẹzẹ hẹ rekọ avọ odhesẹvia ogaga gbe ẹzi Ọghẹnẹ,+ 5 re ẹrọwọ rai ọ gbẹ roma hwa areghẹ ahwo-akpọ họ rekọ ogaga Ọghẹnẹ.

6 Whaọ ma be ta eme areghẹ evaọ udevie enọ e kpako,+ orọnikọ areghẹ uyero-akpọ* nana ha hayo orọ isu uyero-akpọ nana ha, enọ a be te raha no.+ 7 Rekọ ma be ta ẹme kpahe areghẹ Ọghẹnẹ onọ o rrọ oware udidi ọrẹri,+ areghẹ Ọghẹnẹ nọ a ko dhere, onọ Ọghẹnẹ ọ jiroro riẹ no rọkẹ oruaro mai anwẹdẹ taure uyero-akpọ sa-sa e tẹ te romavia. 8 Areghẹ nana họ onọ isu uyero-akpọ* nana ọvuọvo ọ riẹ hẹ na,+ keme orọnọ a hae te riẹ areghẹ nana, a hai ti kpe Olori nọ o wo oruaro na ha.* 9 Rekọ nwane wọhọ epanọ a kere nọ: “Ubiẹro o re ruẹ hẹ yọ ozọ u ri yo ho, yọ ohwo ọvo ọ re jọ udu riẹ roro eware nọ Ọghẹnẹ ọ ruẹrẹhọ no kẹ enọ i you rie he.”+ 10 Keme mai Ọghẹnẹ ọ rọ ẹkwoma ẹzi+ riẹ rovie ai via kẹ no,+ keme ẹzi na ọ rẹ kiotọ eware kpobi, makọ eware ididi Ọghẹnẹ.+

11 Kọ ohwo-akpọ vẹ ọ rẹ riẹ oware nọ o rrọ eva ohwo?* Ohwo* na ọvo ọ rẹ riẹ. Ere re, ohwo ọvo ọ rẹ riẹ eware Ọghẹnẹ hẹ ajokpaọ ẹzi Ọghẹnẹ. 12 Whaọ orọnikọ ẹzi akpọ na a kẹ omai hi, rekọ ẹzi nọ o no obọ Ọghẹnẹ ze,+ re ma sae riẹ eware nọ Ọghẹnẹ ọ kẹ omai no fiki uwowou riẹ. 13 Ma be ta eware nana re, orọnikọ avọ eme nọ ma wuhrẹ no areghẹ ahwo-akpọ ze he,+ rekọ eme nọ ẹzi ọfuafo na o wuhrẹ omai,+ keme ma be rehọ eme nọ i no obọ Ọghẹnẹ ze ro ru eware nọ i no obọ Ọghẹnẹ ze vẹ.*

14 Rekọ ohwo nọ ọ romakẹ isiuru ohwo-akpọ ọ rẹ jẹ eware ẹzi Ọghẹnẹ rehọ họ,* keme e rrọ eware igheghẹ rọ kẹe; yọ ọ rẹ sai wo otoriẹ rai hi keme ẹkwoma ẹzi* Ọghẹnẹ a rẹ rọ kiẹ ae riwi. 15 Rekọ, ohwo nọ ẹzi Ọghẹnẹ ọ be kpọ ọ rẹ kiẹ eware kpobi riwi,+ yọ ohwo ọvo ọ rẹ kiẹ ọyomariẹ riwi hi. 16 Keme “ono ọ riẹ iroro Jihova,* re ọ kẹe ohrẹ?”+ Rekọ ma wo iroro Kristi.+