Kpahe Solomọn.
72 O Ọghẹnẹ, wuhrẹ ovie na uvioziẹ ra,
Re who ru ọmọzae ovie na riẹ ẹrẹreokie ra.+
2 Jọ ọ rọ ẹrẹreokie bruoziẹ ahwo ra,
Je bru uvioziẹ kẹ iruori ra.+
3 Jọ igbehru na e rehọ udhedhẹ se ahwo na,
Re ikpehru na e rehọ ẹrẹreokie ze.
4 Jọ ọ thothọ iruori nọ e rrọ udevie ahwo na,
Jọ o siwi emezae iyogbe na,
Re ọ jẹ guọghọ ofiwhayo na.+
5 A te dhozọ ra ẹsikpobi wọhọ epanọ ọre na ọ rẹ jọ ẹsikpobi na
Jẹ wọhọ epanọ ọvẹre na ọ rrọ ẹsikpobi na,
No oge ruọ oge.+
6 Ọ te jọ wọhọ oso nọ ọ be rrọ fihọ ẹbe nọ a gbẹre,
Wọhọ oso nọ o bi yoyo re o ru otọ na vo.+
7 Evaọ oke riẹ, ikiẹrẹe na e te gbọ bọbọbọ,+
Yọ udhedhẹ o te dafia+ bẹsenọ ọvẹre na ọ gbẹ te jọ họ.
8 O ti wo ahwo nọ o ti su no abade rite abade
Je no Ethẹ na rite oka avọ oka otọakpọ na.+
9 Enọ e be rria udhude na a ti guzou kpotọ kẹe,
Yọ ewegrẹ riẹ a te lalọ ẹkpẹ.+
10 Ivie Tashish gbe erọ ikoliko na a te hwa azọhọ.+
Ivie Shiba gbe erọ Siba a te rọ ekẹ ze.+
11 Ivie na kpobi a ti guzou kpotọ kẹe,
Yọ erẹwho na kpobi a te gbodibo kẹe.
12 Keme o ti siwi oyogbe nọ o bi bo kẹ obufihọ na,
Te oruori na avọ ohwo kpobi nọ o wo ofiobọhọ họ.
13 Ọ te re ohrọ oruori na gbe oyogbe na,
Yọ o ti siwi uzuazọ iyogbe na.
14 O ti siwi ai no okienyẹ gbe ozighi,
Yọ azẹ rai ọ te jọ ghaghae evaọ aro riẹ.
15 Jọ ọ rria tọ re a kẹe igoru Shiba.+
Jọ a lẹ roro iei ẹsikpobi,
Jọ a lẹ ẹro eghale kẹe ẹsikpobi.
16 Emu ọ te dafia evaọ otọakpọ na;+
Obọ ehru igbehru na o te vọ kpọhọhwẹ.
Ibi riẹ e te jọ bọbọbọ wọhọ erọ Lebanọn,+
Yọ evaọ ikpewho na ahwo a ti vihọ wọhọ ẹbe otọ na.+
17 Jọ odẹ riẹ o jọ bẹdẹ bẹdẹ,+
Jọ odẹ riẹ u do ẹsikpobi wọhọ epanọ ọre na ọ rẹ jọ ẹsikpobi na.
Jọ ahwo a rọ ẹkwoma riẹ wo oghale kẹ omarai;+
Jọ erẹwho na kpobi a sei ọnọ o wo evawere.
18 Jọ a jiri Jihova Ọghẹnẹ, Ọghẹnẹ Izrẹl,+
Ọnọ ọye ọvo o re ru eware igbunu na.+
19 Jọ a jiri odẹ oruaro riẹ bẹdẹ bẹdẹ,+
Jọ oruaro riẹ o vọ otọakpọ na soso.+
Ami, Ami.
20 Onana u ku elẹ Devidi, ọmọzae Jẹsi+ họ.