Uzou Avọ 3

Ọnọ Ọ Ma Eware Kpobi

MẸ RIẸ oware igbunu jọ. Kọ whọ gwọlọ yo i?— Rri obọ ra. Kpiri iziabọ ra. Tọlọ oware jọ. Obọ ra o sai ru eware buobu, yọ o sai ru ai ziezi re. Kọ whọ riẹ ohwo nọ ọ ma abọ mai?—

E, Omọvo na nọ ọ ma unu mai, inwe mai, gbe ibiaro mai na. Ohwo na họ Ọghẹnẹ, Ọsẹ Owuhrẹ Ologbo na. Kọ o gbẹ were omai inọ Ọghẹnẹ ọ kẹ omai ibiaro?— Ma sae rọ ibiaro mai ruẹ eware buobu. Ma sai rri idodo. Ma sai rri ẹbe gbe ehru ekọlọ uburu na. Ma sae tubẹ ruẹ evra esese nọ e be re emu wọhọ enọ e rrọ uwoho na. Evaọ uzẹme, o rẹ were omai re ma ruẹ eware enana, ogbẹrọ ere?—

Rekọ ono ọ ma eware nana? Kọ ohwo-akpọ jọ ọ ma rae? Ijo. Ahwo-akpọ a rẹ sae bọ uwou. Rekọ ohwo-akpọ ọvuọvo ọ rẹ sai ru ẹbe nọ ọ rẹ rro ho. Ahwo-akpọ a rẹ sae ma ọmọvrae, ododo, hayo oware ofa nọ o rrọ uzuazọ họ. Kọ whọ riẹ ere?—

Ọghẹnẹ họ ọnọ ọ ma eware nana kpobi. Ọghẹnẹ ọ ma odhiwu gbe otọakpọ na. Ọye ọ ma ahwo re. Ọye ọ ma ọzae ọsosuọ gbe aye ọsosuọ na. Ere Jesu, Owuhrẹ Ologbo na, o wuhrẹ omai.—Matiu 19:4-6.

Ẹvẹ Jesu ọ rọ riẹ nnọ Ọghẹnẹ ọ ma ọzae gbe aye na? Kọ Jesu ọ ruẹ Ọghẹnẹ nọ ọ jẹ ma ai?— E. Jesu ọ jọ kugbe Ọghẹnẹ evaọ okenọ Ọghẹnẹ ọ ma ọzae gbe aye na. Jesu họ ohwo ọsosuọ nọ Ọghẹnẹ ọ ma. Jesu ọ jọ ẹnjẹle, yọ ọ jẹ rria obọ odhiwu kugbe Ọsẹ riẹ.

Ebaibol na e ta kẹ omai nnọ Ọghẹnẹ ọ ta nọ: ‘Joma ma ohwo.’ (Emuhọ 1:26) Kọ whọ riẹ ohwo nọ Ọghẹnẹ ọ jẹ ta ẹme kẹ na?— Ọmọ riẹ ọ jẹ ta ẹme kẹ na. Ọ jẹ ta ẹme kẹ ọnọ ọ ziọ otọakpọ je zihe ruọ Jesu uwhremu na.

Kọ oyena u gbe siuru? Dai roro iei! Ma tẹ be gaviezọ kẹ Jesu, koyehọ ma bi wuhrẹ mi ọnọ ọ jọ kugbe Ọghẹnẹ evaọ okenọ Ọghẹnẹ ọ ma otọakpọ na gbe eware edekọ kpobi. Jesu o wuhrẹ eware buobu no iruo nọ o ru kugbe Ọsẹ riẹ evaọ obọ odhiwu ze. Agbẹta nọ Jesu ọ rọ rrọ Owuhrẹ Ologbo na!

Kọ who roro nọ Ọghẹnẹ ọ jọ ọkora fikinọ ọye ọvo ọ jọ taure ọ tẹ te ma Ọmọ riẹ?— Ijo, ọ jọ ọkora ha. Kọ otẹrọnọ ọ jọ ọkora ha, fikieme ọ rọ ma eware efa nọ i wo uzuazọ?— O ru ere fikinọ Ọghẹnẹ uyoyou ọ rrọ. Ọ gwọlọ re amọfa a rria jẹ reawere uzuazọ. Ma re yere Ọghẹnẹ fikinọ ọ kẹ omai uzuazọ.

Eware nọ Ọghẹnẹ ọ ma kpobi i dhesẹ uyoyou riẹ via. Ọghẹnẹ ọ ma ọre na. Ọre na ọ rẹ kẹ omai elo je ru oma mai sasa. Ma gbe he wo ọre na ha, eware kpobi e hẹ jọ dhedhẹ yọ uzuazọ o hẹ jọ otọakpọ na ha. Kọ eva e gbẹ be were owhẹ inọ Ọghẹnẹ ọ ma ọre?—

Ọghẹnẹ o re je ru oso rrọ. Ẹsejọ oso ọ rẹ dha owhẹ eva keme whọ sai kpohọ otafe zaro ho. Rekọ oso ọ rẹ lẹliẹ idodo na rro. Fikiere okenọ whọ tẹ ruẹ idodo iwoma, ono whọ rẹ rọ uyere kẹ?— Ọghẹnẹ. Kọ ono ma re yere evaọ okenọ ma tẹ re ibi-ire gbe ẹbe nọ ọ were gaga?— Ma re yere Ọghẹnẹ keme ọre gbe oso riẹ i bi ru eware enana rro.

Otẹrọnọ ohwo jọ ọ nọ owhẹ nnọ, ‘Kọ Ọghẹnẹ họ ọnọ ọ ma ahwo gbe erao na re?’ Didi uyo whọ rẹ kẹ?— Uyo ogbagba riẹ họ: “E, Ọghẹnẹ họ ọnọ ọ ma ahwo gbe erao na.” Rekọ ẹvẹ otẹrọnọ ohwo jọ ọ rọwo nọ Ọghẹnẹ họ ọnọ ọ ma ahwo ho? Kọ ọ tẹ ta nnọ ohwo o nwene no erao ruọ ohwo? Ebaibol na i wuhrẹ ere he. Ebaibol na e ta nọ Ọghẹnẹ họ ọnọ ọ ma eware nọ e rrọ uzuazọ kpobi.—Emuhọ 1:26-31.

Rekọ ohwo jọ ọ sae ta kẹ owhẹ nọ ọ rọwo Ọghẹnẹ hẹ. Kọ eme whọ rẹ ta?— Eme jabọ whọ gbẹ riobọhọ uwou hu? Nọ ohwo na nọ: “Ono ọ bọ uwou na?” Ohwo kpobi ọ riẹ nọ ohwo jọ ọ bọ uwou na. Uwou na ọvo o bọ oma riẹ hẹ!—Ahwo Hibru 3:4.

Whọ vẹ rehọ ohwo na ruọ otafe re who dhesẹ ododo kẹe. Nọ e nọ: “Ono ọ ma ọnana?” Uvumọ ohwo-akpọ ọ ma riẹ hẹ. Yọ wọhọ epanọ uwou na o bọ omobọ riẹ hẹ na, ere ododo nana ọ ma omobọ riẹ hẹ re. Ohwo jọ ọ ma riẹe. Ọghẹnẹ họ ọnọ ọ ma riẹe.

Ta kẹ ohwo na nnọ ọ fọ re ọ gaviezọ kẹ ole ọvra. Whọ vẹ nọ e nọ: “Ono ọ ma evra na je wuhrẹ ai epanọ a rẹ so ile?” Ọghẹnẹ. Ọghẹnẹ họ ọnọ ọ ma idhiwu gbe otọakpọ na gbe eware nọ e rrọ uzuazọ kpobi! Ọye họ Ọnọ ọ kẹ rae uzuazọ.

Ghele na, ohwo jọ ọ sae ta nnọ oware nọ ọ rẹ sae ruẹ ọvo ọ rẹ rọwo. Ọ sae ta nnọ: ‘Otẹrọnọ mẹ sae rue riẹe he, mẹ rẹ rọwo iẹe he.’ Fikiere ahwo jọ a rẹ ta nnọ a rọwo Ọghẹnẹ hẹ keme a sae rue riẹ hẹ.

Uzẹme o rrọ inọ ma rẹ sae ruẹ Ọghẹnẹ hẹ. Ebaibol na e ta nnọ: ‘Ohwo ọ sae ruẹ Ọghẹnẹ hẹ.’ Uvumọ ọzae, aye, hayo ọmọ evaọ otọakpọ ọ rẹ sae ruẹ Ọghẹnẹ hẹ. Fikiere u du fo ho re ohwo jọ ọ gwọlọ drọ uwoho Ọghẹnẹ hayo ru ẹmema riẹ. Ọghẹnẹ ọ tubẹ ta kẹ omai nnọ ma ru uwoho riẹ hẹ. Fikiere o rẹ were Ọghẹnẹ hẹ re ma wo eware itieye na fihọ uwou mai.—Ọnyano 20:4, 5; 33:20; Jọn 1:18.

Rekọ otẹrọnọ ma sae ruẹ Ọghẹnẹ hẹ, ẹvẹ ma rẹ rọ riẹ nnọ Ọghẹnẹ ọ ghinẹ rrọ? Roro onana. Kọ whọ rẹ sae ruẹ ofou na?— Ijo. Uvumọ ohwo ọ rẹ sae ruẹ ofou hu. Rekọ whọ rẹ sae ruẹ eware nọ ofou na o re ru. Whọ rẹ sae ruẹ ebe nọ i re nuhu evaọ okenọ ofou na o te bi fou egha ure. Enẹ u ro mu owhẹ ẹro inọ ofou ọ rrọ.

Whọ rẹ sae ruẹ eware nọ Ọghẹnẹ o ru re. Whọ tẹ ruẹ ododo nọ ọ rrọ uzuazọ hayo ọvra, yọ whọ ruẹ oware nọ Ọghẹnẹ ọ ma no. Enẹ whọ rẹ rọ rọwo inọ Ọghẹnẹ ọ ghinẹ rrọ.

Ohwo jọ ọ rẹ sae nọ owhẹ inọ, ‘Ono ọ ma ọre gbe otọakpọ na?’ Ebaibol na e ta nọ: “Ọghẹnẹ ọ ma odhiwu gbe akpọ.” (Emuhọ 1:1) Ẹhẹ, Ọghẹnẹ ọ ma eware igbunu enana kpobi! Oyena o gbẹ were owhẹ?—

Kọ u gbe woma nọ ma rrọ uzuazọ? Ma rẹ sai yo ile awere ọ evra. Ma rẹ sae ruẹ idodo gbe eware efa nọ Ọghẹnẹ ọ ma. Yọ ma rẹ sae re emu nọ Ọghẹnẹ ọ rọ kẹ omai.

Ma re yere Ọghẹnẹ fiki eware enana kpobi. Maero, ma re yere iei fikinọ ọ kẹ omai uzuazọ. Otẹrọnọ oware nọ Ọghẹnẹ o ru o ghinẹ were omai, ma re ru oware jọ. Didi oware?— Ma rẹ gaviezọ kẹ Ọghẹnẹ ma ve je ru oware nọ ọ ta kẹ omai evaọ Ebaibol na. Ere ma sai ro dhesẹ nnọ ma you Ọnọ ọ ma eware kpobi na.

Ma re yere Ọghẹnẹ fiki eware kpobi nọ ọ ma . Evaọ oghẹrẹ vẹ? Se ẹme nọ a kere fihọ Olezi 139:14; Jọn 4:23, 24; 1 Jọn 5:21; gbe Eviavia 4:11.

[Uwoho nọ o rrọ ẹwẹ-obe avọ 21]

Ono ọ ma eware kpobi nọ e rrọ uzuazọ na?

[Iwoho nọ e rrọ ẹwẹ-obe avọ 22, 23]

Nọ o rọnọ ohwo jọ ọ bọ uwou na, ono ọ ma idodo, ire, gbe erao na?

[Uwoho nọ o rrọ ẹwẹ-obe avọ 25]

Ẹvẹ whọ rọ riẹ nnọ ofou ọ rrọ?