Uzou Avọ 24

Who Zihe Ruọ Oji Hi!

KỌ OHWO jọ o tho oware ra no ẹdẹjọ?— Ẹvẹ oma u ru owhẹ?— Ohwo nọ o tho rie kpobi yọ oji, yọ oji ọ rẹ were uvumọ ohwo ho. Ẹvẹ who roro nọ ohwo o re ro zihe ruọ oji? Kọ a re yẹ i oji?—

U ri kri hi nọ ma wuhrẹ nọ a yẹ ahwo avọ uzioraha. Fikiere mai kpobi ma gba ha. Rekọ a re yẹ uvumọ ohwo oji hi. Oji ọ sai no emamọ uviuwou ze. Ọsẹgboni gbe inievo riẹ a sae jọ emamọ ahwo. Rekọ isiuru ohwo kẹ eware wọhọ ugho gbe eware nọ ugho o rẹ sae dẹ o sai ru ei zihe ruọ oji.

Ono who roro nọ ọ jọ oji ọsosuọ?— Joma roro kpahe iẹe. Owuhrẹ Ologbo na ọ riẹ ohwo na evaọ okenọ ọye omariẹ ọ gbẹ jọ obọ odhiwu. Oji ọyena yọ ẹnjẹle. Rekọ nọ Ọghẹnẹ ọ ma enjẹle na kpobi gbagba na, ẹvẹ ẹnjẹle ọyena o ro zihe ruọ oji?— Whaọ, wọhọ epanọ ma wuhrẹ evaọ Uzou avọ 8 orọ obe nana, ọ gwọlọ oware nọ o rrọ oriẹ hẹ. Kọ whọ riẹ oware na?—

Nọ Ọghẹnẹ ọ ma ọzae gbe aye ọsosuọ na no, ẹnjẹle yena ọ gwọlọ re a gọ e. O wo udu nọ a rẹ rọ gọ e he. Egagọ rai e rrọ kẹ Ọghẹnẹ. Rekọ o te tho egagọ na! Fikinọ o ru Adamu avọ Ivi gọ e, ẹnjẹle na o te zihe ruọ oji. O zihe ruọ Setan Ẹdhọ na.

Eme o re ru ohwo zihe ruọ oji?— Isiuru kẹ oware nọ o rrọ oriẹ hẹ. Isiuru nana e ga te epanọ e sai ro ru ahwo nọ a woma dede ru ekpehre eware. Ẹsejọ, ahwo nọ a zihe ruọ iji a re gbe kurẹriẹ re a ru oware uwoma ofa ha. Ohwo otiọye na jọ omọvo ikọ Jesu. Odẹ riẹ họ Judas Iskariọt.

Judas ọ riẹ nnọ o thọ re a tho uji keme a wuhrẹ i rie Uzi Ọghẹnẹ no oke emaha riẹ ze. Ọ riẹ nnọ okejọ o jariẹ nọ Ọghẹnẹ ọ tubẹ rọ ta ẹme no odhiwu ze kẹ ahwo riẹ nnọ: “Who tho uji hi.” (Ọnyano 20:15) Nọ Judas ọ rro te ohwo no, ọ tẹ nyaku Owuhrẹ Ologbo na je zihe ruọ omọvo ilele riẹ. Uwhremu na, Jesu ọ tubẹ salọ Judas re ọ jọ omọvo ikọ 12 riẹ.

Jesu avọ ikọ riẹ a je kperẹ kugbe. A jẹ re emu kugbe. A je he fi ugho nọ aikpobi a wo họ etehe. Jesu ọ rọ etehe na kẹ Judas kru. Orọnikọ Judas o wo ugho na ha. Rekọ whọ riẹ oware nọ Judas o ru nọ omoke jọ o vrẹ no?—

Judas o te mu ugho họ ẹtọlọ no etehe na dede nọ a kẹ riẹ udu hu. Ọ rẹ tọlọ ugho na evaọ okenọ amọfa a bi rri rie he, yọ ọ tubẹ jẹ gwọlọ edhere nọ o re ro wo ugho viere dede. O te mu ugho họ eroro kpahe kẹse kẹse. Joma rri oware nọ isiuru ethọthọ nana e wọ riẹ ru emedẹ jọ taure a te ti kpe Owuhrẹ Ologbo na.

Meri, oniọvo-ọmọtẹ Lazarọs, ogbẹnyusu Jesu, ọ rehọ udẹ oghaghae jọ o te ku ei fihọ awọ Jesu. Rekọ onana o were Judas he. Kọ whọ riẹ oware nọ o soriẹ ze?— Ọ ta nọ a hae zẹ ewhri na re a rọ ugho na kẹ iyogbere. Rekọ oware nọ ọ ghinẹ gwọlọ họ re a fi igho buobu họ etehe na re o tho.—Jọn 12:1-6.

Jesu ọ ta kẹ Judas nọ o kpokpo Meri hi, ọnọ o dhesẹ uruemu uwowou nana. Ẹme nọ Jesu ọ ta na ọ dha Judas eva, fikiere ọ tẹ nya bru ilori izerẹ na, enọ e rrọ ewegrẹ Jesu. A gwọlọ mu Jesu, rekọ a gwọlọ ru ei evaọ aso re ahwo a se ae ba ẹruẹ.

Judas ọ ta kẹ izerẹ na nọ: ‘Me ti dhesẹ epanọ wha re ro mu Jesu kẹ owhai otẹrọnọ wha rẹ kẹ omẹ ugho. Bro igho wha rẹ kẹ omẹ?’

Izerẹ na i te yo nọ: ‘Ma rẹ kẹ owhẹ ewẹ isiliva ọgba.’—Matiu 26:14-16.

Judas o te mi igho na. O wọhọ ẹsenọ ọ be zẹ Owuhrẹ Ologbo na kẹ ezae eyena! Kinọ oware nọ o rẹ jọ ohwo ru?— Whaọ, oye họ oghẹrẹ oware nọ o rẹ via okenọ ohwo o te zihe ruọ oji je bi tho igho. O re you ugho vi amọfa, tube vi Ọghẹnẹ dede.

Ẹsejọhọ whọ rẹ sae ta nọ, ‘Mẹ rẹ sai you uvumọ oware vi Jihova Ọghẹnẹ hẹ.’ Otẹrọnọ ere who roro, kiyọ u woma. Okenọ Jesu ọ salọ Judas wọhọ ukọ, ẹsejọhọ ere Judas o je roro re. Ẹsejọhọ epọvo na amọfa nọ a rrọ iji nẹnẹ na a roro oke jọ re. Joma ta ẹme kpahe ejọ rai.

Ọvo jọ họ odibo Ọghẹnẹ jọ nọ a re se Ekan, ọ rria oke krẹkri kpemu no taure a te ti yẹ Owuhrẹ Ologbo na. Ekan ọ ruẹ ewu owoma jọ, igoru, gbe ewẹ isiliva jọ. Orọnikọ ọye o wo rai hi. Ebaibol na e ta nọ Jihova o wo rai keme a rehọ e rae mi ewegrẹ ahwo Ọghẹnẹ. Rekọ Ekan ọ gwọlọ e rai te epanọ o ro tho ai.—Joshua 6:19; 7:11, 20-22.

Oriruo ọfa ọna. Evaọ oke anwae, Jihova ọ salọ Devidi re ọ jọ ovie ahwo Izrẹl. Ẹdẹjọ, Devidi o te muọ aye owoma na Batshẹba họ erri. O te je rri Batshẹba oke krẹkri je bi roro epanọ ọ rẹ rọ rehọ iẹe ziọ uwou riẹ. Dede na, aye Uraya ọ jọ. Eme Devidi ọ hai ru?—

Devidi ọ hai siọ iroro epanọ ọ sae rọ rehọ Batshẹba no udu riẹ. Rekọ o ru ere he. Devidi ọ tẹ rehọ aye na kpo. O te ru re a kpe Uraya. Fikieme Devidi o ro ru eware iyoma enana?— Fikinọ o fi ẹro họ aye omọfa.—2 Samuẹle 11:2-27.

Fikinọ oware nọ o via na o da Devidi, Jihova o kpe rie he. Rekọ onana o wha riẹ ze nọ Devidi ọ rọ nya ku ebẹbẹ buobu. Ọmọ riẹ Absalọm ọ jẹ gwọlọ mi Devidi uvie na. Fikiere okenọ ahwo a tẹ nya bru Devidi ze, Absalọm ọ vẹ gbalọ ai jẹ viọlọ ai unu. Ebaibol na e ta nọ: ‘Ere Absalọm ọ rọ dẹ ahwo Izrẹl kpobi rehọ.’ O te ru re ahwo na a gwọlọ ru ei họ ovie viukpọ Devidi.—2 Samuẹle 15:1-12.

Kọ whọ gwọlọ oware jọ gaga te ere no ẹdẹjọ, wọhọ Ekan, Devidi, gbe Absalọm?— Otẹrọnọ omọfa o wo oware na, re whọ rehọ iẹe ababọ uvẹ nọ a kẹ owhẹ yọ ujitho. Kọ whọ kareghẹhọ oware nọ oji ọsosuọ na, Setan, ọ gwọlọ?— Ọ gwọlọ re ahwo a gọ e ukpenọ a gọ Ọghẹnẹ. Fikiere uji Setan o je tho na okenọ o ru re Adamu avọ Ivi a yo ẹme kẹe.

Ohwo o te wo oware, o wo udu nọ ọ rẹ rọ rehọ iẹe kẹ ohwo nọ u je rie. Wọhọ oriruo, whọ sae nya i lele emọ efa zaro evaọ uwou rai. Kọ u woma re whọ rehọ oware rai jọ kpo?— Ajokpanọ ọsẹ hayo oni emọ na a kẹ owhẹ uvẹ. Whọ tẹ rehọ iroro obọ ra rehọ oware na kpo, yọ ujitho.

Fikieme iroro ujitho i je bru owhẹ ze?— Fikinọ whọ gwọlọ oware nọ o rrọ ora ha. Uvumọ ohwo ọ gbẹ make ruẹ owhẹ nọ whọ be rehọ oware na ha, ono ọ be ruẹ owhẹ?— Jihova Ọghẹnẹ. Yọ ma rẹ kareghẹhọ inọ Ọghẹnẹ o mukpahe ujitho. Fikiere uyoyou kẹ Ọghẹnẹ jẹ rọ kẹ ọrivẹ ra u re fi obọ họ kẹ owhẹ re whọ siọ oji ba ẹjọ.

Ebaibol i dhesẹ vevẹ inọ o thọ re a tho uji. Iviena se Mak 10:17-19; Ahwo Rom 13:9; gbe Ahwo Ẹfẹsọs 4:28.

[Uwoho nọ o rrọ ẹwẹ-obe avọ 129]

Fikieme Judas o ro tho uji?

[Iwoho nọ e rrọ ẹwẹ-obe avọ 130]

Eware iyoma vẹ Ekan avọ Devidi a bi roro kpahe na?

[Uwoho nọ o rrọ ẹwẹ-obe avọ 130]

Edhere vẹ Absalọm ọ rọ jọ oji?