Uzou Avọ 35

Ma Rẹ Sae Kpare Oma No Uwhu Tha!

MA TE whu, kọ o te were Ọghẹnẹ re ọ kpare omai zihe ziọ uzuazọ?— Job, ọzae owoma na, ọ rọwo nnọ o rẹ were Ọghẹnẹ. Fikiere nọ Job o roro nnọ ọ kẹle uwhu no, ọ tẹ ta kẹ Ọghẹnẹ nọ: ‘Who re ti se, me ve ti yo kẹ owhẹ.’ Job ọ ta nnọ o te were Jihova Ọghẹnẹ re ọ kpare iẹe ze.—Job 14:14, 15.

Jesu ọ wọhọ Ọsẹ riẹ, Jihova Ọghẹnẹ. Jesu ọ gwọlọ fi obọ họ kẹ omai. Okenọ ọzae nọ ọ jẹ mọ oti ọ ta kẹ e nọ, ‘O tẹ ruọ owhẹ, whọ rẹ sai ru omẹ fua,’ Jesu o te yo nọ: ‘O ruọ omẹ.’ O te siwi oti nọ ọzae na ọ jẹ mọ na.—Mak 1:40-42.

Jesu o wuhrẹ mi Ọsẹ riẹ re o you emaha na. Isiava evaọ oke krẹkri nọ u kpemu no, Jihova ọ rehọ idibo riẹ kpare emaha jọ. Elaeja ọ lẹ Jihova re ọ kpare ọmọ aye jọ nọ o ru ọghọ ologbo kẹ e. Jihova ọ tẹ ghinẹ kpare iẹe. Jihova ọ rehọ Elaesha odibo riẹ kpare ọmọzae ọsese jọ re.—1 Ivie 17:17-24; 2 Ivie 4:32-37.

Kọ u gbe woma nọ ma rọ riẹ nọ Jihova o you omai gaga?— Orọnikọ okenọ ma rrọ uzuazọ ọvo o re roro kpahe omai hi. Ọ rẹ jẹ kareghẹhọ omai ma tẹ maki whu no. Jesu ọ ta nnọ Ọsẹ na o tube rri iwhuowhu nọ o you wọhọ nnọ a rrọ uzuazọ! (Luk 20:38) Ebaibol na e ta nnọ ‘makọ uwhu hayo uzuazọ hayo eware nọ e rrọ etenẹ hayo eware nọ e be tha e rẹ sae hẹriẹ omai no uyoyou Ọghẹnẹ hẹ.’—Ahwo Rom 8:38, 39.

Okenọ Jesu ọ jọ otọakpọ, o dhesẹ nnọ Jihova ọ be daezọ emaha. Whọ rẹ sae kareghẹhọ nnọ Jesu ọ rehọ oke rọ ta ẹme kẹ emaha kpahe Ọghẹnẹ. Kọ whọ riẹ nọ Ọghẹnẹ ọ kẹ Jesu ogaga nọ ọ rẹ rọ kpare emaha nọ i whu no ze?— Joma ta ẹme kpahe okenọ Jesu ọ rọ kpare ọmọtẹ ikpe 12 ọ ọzae nọ a re se Jairọs.

Jairọs avọ aye gbe ọmọtẹ ọvo rai a jẹ rria kẹle Abade Galili. Ẹdẹjọ ọmọtẹ na ọ tẹ jẹ mọ gaga, Jairọs ọ tẹ ruẹ nọ ọ kẹle uwhu no. O te ti roro kpahe Jesu, ọzae igbunu nọ o yo kpahe no nọ ọ rẹ sai siwi ahwo na. Fikiere Jairọs ọ tẹ nya e gwọlọ iẹe. Ọ tẹ ruẹ Jesu evaọ unueri Abade Galili, nọ o bi wuhrẹ ahwo buobu.

Jairọs ọ tẹ keke oma ruọ udevie ogbotu na vrẹ nyai kie fihọ aro Jesu. Ọ tẹ ta kẹ Jesu nọ: ‘Ọmọtẹ ọsese mẹ ọ be mọ gaga. Ivie, kọ whọ sae nya ze ti fi obọ họ kẹ e? Ivie, nya ze.’ Jesu ọ tẹ nwane ruọ edhere lele Jairọs. Ogbotu nọ ọ nya ze te ruẹ Owuhrẹ Ologbo na a rọ kpahe iẹe re. Rekọ nọ a nya te oria jọ no, ezae jọ i te no obọ uwou Jairọs ze a tẹ ta kẹ e nọ: “Ọmọtẹ ra o whu no; fikieme whọ jẹ gbẹ be lahiẹ owuhrẹ?”

Jesu o yo ẹme nọ ezae na e ta na. Ọ riẹ epanọ oware na o da Jairọs te re ọmọ ọvo riẹ o whu. Ọ tẹ ta kẹ e nọ: ‘Whọ dhẹ ozọ họ. Thakpi fi ẹrọwọ họ Ọghẹnẹ, ọmọtẹ ra ọ rẹ te sasa.’ A tẹ gbẹ be nya bẹsenọ a ro te uwou Jairọs. A tẹ ruẹ egbẹnyusu uviuwou na nọ e be viẹ. O be dae keme ogbẹnyusu ọmaha rai o whu no. Rekọ Jesu ọ tẹ ta kẹ ae nọ: ‘Wha viẹ hẹ. Ọmọ na o whu hu, rekọ ọ be wezẹ.’

Nọ Jesu ọ ta ere, ahwo na a te muhọ ẹhwẹ, keme a riẹ nọ ọmọtẹ na o whu no. Kọ eme who roro nnọ o lẹliẹ Jesu ta nọ ọmọtẹ na ọ be wezẹ? Didi oware who roro nnọ ọ gwọlọ wuhrẹ ahwo na?— Ọ gwọlọ re a riẹ nnọ uwhu o wọhọ owezẹ udidi. Ọ gwọlọ wuhrẹ ai inọ ẹkwoma ogaga Ọghẹnẹ, ọ rẹ sae kpare ohwo nọ o whu no ziọ uzuazọ wọhọ epanọ o lọhọ te re a rọwo ohwo nọ ọ rrọ owezẹ na.

Jesu ọ tẹ ta re ahwo na kpobi a ruọ otafe ajokpa ọ ikọ riẹ Pita, Jemis, gbe Jọn avọ ọsẹ gbe oni ọmọtẹ na. O te kpohọ oria nọ ọmọ na ọ rrọ. O te kru obọ riẹ, jẹ ta nọ: ‘Ọmọtẹ, kpama!’ Ọ tẹ nwane sa kpama o te muhọ ẹnya! Ọsẹ gbe oni riẹ a ghọghọ gaga.—Mak 5:21-24, 35-43; Luk 8:40-42, 49-56.

Roro kpahe onana. Nọ Jesu ọ sae kpare ọmọtẹ yena ziọ uzuazọ na, kọ ọ sai ru ere kẹ amọfa re?— Kọ who roro nọ o ti ghine ru ere?— E, o ti ru ere. Jesu omariẹ ọ ta nọ: ‘Oke o be tha nọ enọ e rrọ uki ekareghẹhọ a ti yo urru mẹ a vẹ nya via.’—Jọn 5:28, 29.

Kọ who roro nọ Jesu ọ gwọlọ kpare ahwo ze?— Oriruo ọfa evaọ Ebaibol na i re fi obọ họ kẹ omai za onọ na. Oware nọ o via ẹdẹjọ kẹle okpẹwho Nein u dhesẹ epanọ o rẹ jọ Jesu oma ọ tẹ ruẹ ahwo nọ a bi weri eva oria uwhori.

Aye na ọ jọ udevie ogbotu nọ o bi su ọmọ riẹ kpohọ oria ukio kẹle Nein. Ọzae riẹ ọ kaki whu no, obọnana ọmọ ọvo riẹ o te je whu no. Roro epanọ edada riẹ e ga te! Ahwo Nein buobu a rrọ usu na nọ a be wọ ori ọmọ riẹ kpohọ otafe okpẹwho na. Aye na ọ be viẹ, yọ u wo uvumọ oware nọ ahwo na a rẹ sai ru ro whrehe iei hi.

Evaọ ẹdẹ ọnana, Jesu avọ ilele riẹ a jẹ nya ziọ okpẹwho Nein. Kẹle unuẹthẹ okpẹwho na, a te zere ogbotu nọ ọ be nya i ki ọmọ aye na. Nọ Jesu ọ ruẹ aye nọ ọ be viẹ na, ohrọ riẹ o tẹ riẹ e. Uweri aye na o da riẹ gaga. Ọ gwọlọ fi obọ họ kẹ e.

Fikiere avọ ẹwo gbe ẹgba nọ o lẹliẹ aye na gaviezọ, Jesu ọ ta nọ: “Whọ viẹ hẹ.” Uruemu gbe owojẹ riẹ o lẹliẹ ahwo na kpobi tọ ẹro vi ei avọ isiuru. Nọ Jesu ọ nya kẹle ugboma ọmọ nọ o whu no na, u je gbe ahwo kpobi unu oware nọ ọ gwọlọ ru. Jesu ọ tẹ ta ẹme avọ ẹgba inọ: “Ẹghele mẹ ta kẹ owhẹ nọ, Kparoma.” Ọmọzae na ọ tẹ nwane kpama keria! O te mu ẹme họ ẹta.—Luk 7:11-17.

Dai roro epanọ udu aye na o jọ! Ẹvẹ udu o rẹ jọ owhẹ otẹrọnọ ohwo nọ who you nọ o whu no ọ kpare oma ze?— Kọ onana u gbe dhesẹ nnọ Jesu o ghine you ahwo jẹ gwọlọ fi obọ họ kẹ ai?— Dai roro epanọ u ti gbunu te evaọ akpọ ọkpokpọ Ọghẹnẹ re ma dede ahwo zihe ziọ uzuazọ!—2 Pita 3:13; Eviavia 21:3, 4.

Eva oke yena otujọ nọ a te kpare ze na yọ ahwo nọ ma riẹ vẹre, kugbe emaha. Ma ti vuhu ai wọhọ epanọ Jairọs o vuhu ọmọtẹ riẹ okenọ Jesu ọ kpare iẹe ze na. Amọfa a te jọ ahwo nọ a whu ikpe udhusoi hayo ikpe idu buobu nọ e vrẹ. Rekọ a rẹ thọ Ọghẹnẹ ẹro ho fikinọ a whu kri no ọvo.

Kọ u gbe gbunu inọ Jihova Ọghẹnẹ gbe Ọmọ riẹ, Jesu, a you omai te ere?— A gwọlọ re ma jọ uzuazọ, orọnikọ evaọ umutho ikpe jọ ọvo ho, rekọ bẹdẹ bẹdẹ!

Kpahe ẹruore igbunu ọrọ Ebaibol kẹ iwhuowhu na, iviena se Aizaya 25:8; Iruẹru 24:15; gbe 1 Ahwo Kọrint 15:20-22.

[Iwoho nọ e rrọ ẹwẹ-obe avọ 182]

Ẹvẹ Jihova o ro dhesẹ nọ o you emaha na?

[Uwoho nọ o rrọ ẹwẹ-obe avọ 184]

Eme ma wuhrẹ no ọmọtẹ Jairọs nọ Jesu ọ kpare na ze?

[Uwoho nọ o rrọ ẹwẹ-obe avọ 186]

Eme ẹkparomatha ọrọ ọmọ ọvuọvo aye ọnana o dhesẹ?