Okokohọ Ubrotọ Evẹrẹ Ivẹ Evaọ England

EVAỌ ikpe na kpobi, ikokohọ e rọ abọ ologbo evaọ izuazọ ahwo Jihova. Evaọ okejọ, a rehọ iredio kpeze obọdẹ eme okokohọ jọ nọ prẹsidẹnte ọ Watch Tower Society na ọ kẹ kpohọ ekwotọ efa no oria okokohọ London na ze. Ahwo nọ a no ekwotọ efa nọ i bu vi 50 ze a kpohọ ikokohọ evaọ London evaọ etoke ikpe 1950 gbe 1960. Rekọ Oyibo a je ro ru ọruẹrẹfihotọ na kpobi. Oyena u nwene evaọ 1971.

Evaọ ukpe oyena, eruẹrẹfihotọ e j’otọ kẹ Okokohọ Ubrotọ “Odẹ Ẹri” na, onọ a ru evaọ Twickenham, London. Evaọ Europe, Isẹri na e jẹ ruẹrẹ oma kpahe re a kpohọ ikokohọ nọ i wo uzoẹme ovo na. Dede nọ a gbẹ whaha iruo Uvie na evaọ Portugal, idu ahwo buobu a ruẹrẹ oma kpahe re a nya ofẹ Spain kpohọ Toulouse, France. Ọwhọ ọ jọ rai oma. A te yo usi nọ ẹyao ekọlẹra ọ rọ Spain. Enọ a se imu ekọlẹra fihọ oma no ọvo a rẹ sai kperẹ fa orẹwho na vrẹ. Dede na, imu e jariẹ buobu hu rọkẹ ahwo kpobi evaọ Portugal nọ e gwọlọ kpohọ okokohọ na. Nọ a viẹro ku ẹyao ekọlẹra evaọ Toulouse omariẹ, egọmeti ọ tẹ whaha okokohọ na. Kọ eme inievo obọ Portugal na a re ru enẹna? Oniọvo jọ ọ ta nọ: “Ẹmm, London ọ rọ etẹe k’omai.”

W. J. (Bill) Bull, ọsẹro okokohọ obọ Twickenham, oniọvo nọ a riẹ fiki uruemu ewolẹ, owhẹwhẹtiẹ riẹ, ọ kareghẹhọ oware nọ o via. “Ahwo nọ a bu te 800 hayo 900 e rueva Britain, ahwo 112 e rọ arupre ra ze, enọ i kiọkọ kọ itreni. Ma wo kao vi oka ovo nọ ma rẹ rọ ruẹrẹ oma kpahe kẹ ogbotu ahwo nana. Inievo e dhẹ kpohọ Dover re a nyai dede inievo Portugal nọ e dhẹ orọ okọ ze, udugaga ibuobu rai i bi ro yo Oyibo.” A gwọlọ iwou kẹ ai kpobi, ibuobu evaọ iwou inievo London na. A rẹriẹ uwou emuọriọ ulogbo jọ kpohọ oria ẹkeria kẹ ẹvẹrẹ ọ Portuguese, ahwo Portugal na avọ evawere a te kuomagbe inievo Britain rai riwi edrama okokohọ wọhọ Jehovah Blesses the Loyal Ones gbe Make Jehovah’s Purpose Your Way of Life jẹ kezọ kẹ abọ ọfa ọrọ ọruẹrẹfihotọ na. Obeusi ẹwho na, Middlesex Chronicle, o niyẹrẹ nana evaọ August 13, 1971: “Ẹnyaze rai o ru onana fihọ okokohọ evẹrẹ ivẹ ọsosuọ ọrọ Isẹri na nọ a jọ orẹwho nana ru.”

Inievo Portugal na a kẹ iyẹrẹ evawere ọrọ ẹnyaharo iruo Uvie na evaọ orẹwho rai, kẹsena oniọvo nọ ọ be jọ Portugal sẹro iruo na ọ tẹ t’ẹme jiri inievo Britain kẹ ọghoruo rai. Ọ ta nọ: “Wha siobọno eware buobu k’omai no, oke rai, iwou, ẹruorote, ẹwo, gbe ọdawẹ evaọ okpẹwho nana yọ, maero dede, uyoyou rai. Jọ u mu owhai ẹro, inievo, inọ ma te kareghẹhọ London avọ isiuru ẹsikpobi.” Okenọ inievo Portugal a rehọ ole dhesẹ uyere rai, irui i je su no aro ọ enwenọ ogbotu na kpobi ze, edhesẹ uyere nana nọ u n’udu ze na u duobọte ohwo kpobi.