Fi Ẹruore Họ Jihova Re Who Kru Udu Ga

“Hẹrẹ ỌNOWO; kru oma ga, jọ udu u kie owhẹ vi; uzẹme, hẹrẹ ỌNOWO!”—OLEZI 27:14.

 1. Ẹvẹ ẹruore o wuzou te, kọ ẹvẹ a rehọ ẹme na ru iruo evaọ Ebaibol na?

UVI ẹruore o wọhọ elo ọnwranwra. U re fi obọ họ kẹ omai ruẹ thabọ vi edawọ nọ ma be rẹriẹ ovao ku nẹnẹ, je ru omai rri kpohọ obaro avọ udu gbe oghọghọ. Jihova ọvo ọ rẹ sae kẹ omai ẹruore nọ o muẹro, yọ o bi ru ere ẹkwoma Ẹme riẹ nọ a rehọ ẹgba ẹzi kere na. (2 Timoti 3:16) Evaọ uzẹme, ẹme na “ẹruore,” “rẹro,” gbe “irẹro” e roma via unuẹse buobu evaọ Ebaibol na, yọ a rehọ e rai ta ẹme dhesẹ ọwhọ avọ imuẹro nọ ohwo o re ro rẹro oware uwoma gbe oware nọ ohwo o bi rẹro riẹ na.a Ẹruore otiọye na okpehru vi irẹro gheghe, onọ o kare otọhotọ hayo nọ o rẹ rehọ ọthobọ rugba kẹ ohwo.

 2. Abọ vẹ ẹruore o wo evaọ uzuazọ Jesu?

² Okenọ Jesu ọ rẹriẹ ovao ku edawọ gbe ebẹbẹ, ọ ruẹ thabọ vrẹ eware nọ ọ jẹ ruẹ uye rai ẹsiẹsiẹ je fi ẹruore họ Jihova. “Ọ rehọ fiki oghọghọ nọ a kẹ riẹ ro thihakọ [ure oja, NW ], ọ daozọ omovuọ họ, ọ tẹ keria obọze akaba uvie Ọghẹnẹ.” (Ahwo Hibru 12:2) Fikinọ ọ tẹrovi epanọ a rẹ rọ kpare esuo Jihova kpehru je ru odẹ Riẹ fua, Jesu ọ nya no edhere uzuazọ ẹme-oyo riẹ kẹ Ọghẹnẹ hẹ, ghelọ oware nọ o rehọ mi ei kpobi kẹhẹ.

 3. Abọ vẹ ẹruore o wo evaọ uzuazọ idibo Ọghẹnẹ?

³ Devidi Ovie na o dhunu te epanọ ẹruore gbe udu e rọ jẹhọ ohwohwo ta nọ: “Hẹrẹ ỌNOWO; kru oma ga, jọ udu u kie owhẹ vi; uzẹme, hẹrẹ ỌNOWO!” (Olezi 27:14) Ma rẹ hẹrẹ, hayo fi ẹruore họ Jihova. Ma tẹ gwọlọ kru udu ga, ma rẹ kuvẹ re ẹruore mai ọ jọ ọrọ evere vievie he, rekọ ma re roro kpahe iẹ ẹsikpobi je fi iei họ udu mai. Ere oruo u ti fi obọ họ kẹ omai raro kele Jesu wo udu gbe ajọwha nọ ma bi ru iruo nọ o muhọ ilele riẹ obọ na. (Matiu 24:14; 28:19, 20) Evaọ uzẹme, a kele ẹruore kugbe ẹrọwọ gbe uyoyou wọhọ ekwakwa-aghae nọ i wuzou nọ idibo Ọghẹnẹ a re wo.—1 Ahwo Kọrint 13:13.

Kọ Whọ ‘Vọ Avọ Ẹruore’?

 4. Eme Ileleikristi nọ a wholo na gbe erivẹ rai “igodẹ efa” na a be rọ ọwhọ rẹro riẹ?

⁴ Idibo Ọghẹnẹ a bi rẹro obaro akpọ evawere. Ileleikristi nọ a wholo na a be rehọ ọwhọ hẹrẹ epanọ a ti ro lele Kristi su evaọ obọ odhiwu, yọ “igodẹ efa” na a wo ẹruore ọrọ epanọ a ti ro “si [ai] no igbo egbogbo eruọ eva uvẹ oruaro emọ Ọghẹnẹ” erọ otọakpọ. (Jọn 10:16; Ahwo Rom 8:19-21; Ahwo Filipai 3:20) “Uvẹ oruaro” yena o kẹre te ufuoma rono uzioraha gbe okpẹtu nọ o lele i rie kpobi. Evaọ uzẹme, eware iwoma ọvo Jihova—Ọnọ “kokẹ uwoma avọ okẹ nọ o gba kiete kpobi” u re no obọ riẹ tha na—o ti ru kẹ idibo omurokpotọ riẹ.—Jemis 1:17; Aizaya 25:8.

 5. Ẹvẹ ma sae rọ ‘vọ avọ ẹruore’?

⁵ Ẹvẹ u fo nọ ẹruore Ileleikristi o re kpomahọ uzuazọ mai te? Eva Ahwo Rom 15:13, ma se nọ: ‘Jọ Ọghẹnẹ ẹruore ọrehọ oghọghọ gbe udhedhẹ vọ eva rai eva ẹrọwọ, re wha vọ avọ ẹruore eva ogaga Ẹzi Ẹri.’ Ẹhẹ, orọnikọ ekandoro nọ o rrọ ebi lo a rẹ sae rehọ ẹruore dhesẹ hẹ, rekọ elo ọnwranwra ọrọ ọre ohiohiẹ, nọ ọ rẹ lẹliẹ udu ohwo totọ, vọ avọ evawere, ẹjiroro gbe udu. Muẹrohọ inọ ma rẹ ‘vọ avọ ẹruore’ nọ ma tẹ rọwo Ẹme Ọghẹnẹ nọ a rehọ ẹgba ẹzi kere na je wo ẹzi ọfuafo Riẹ. Obe Ahwo Rom 15:4 o ta nọ: “Eware kpobi nọ a kere oke anwae, a kere ai rọ kẹ omai ohrẹ, re ma rehọ fiki odiri gbe eri ikereakere na, wo ẹruore.” Fikiere nọ omara nọ: ‘Kọ me bi ru ẹruore mẹ kpokpọ ẹkwoma Ebaibol na nọ me bi wuhrẹ ziezi, je sei kẹdẹ kẹdẹ? Kọ mẹ be hae lẹ kẹ ẹzi Ọghẹnẹ ẹsikpobi?’—Luk 11:13.

 6. Re ma sai ru ẹruore mai kpokpọ ẹsikpobi, eme ma rẹ yọrọ oma kẹ hrọ?

⁶ Jesu, ọnọ ọ rrọ Oriwiruo mai na o wo ọbọga no Ẹme Ọghẹnẹ ze. Nọ ma tẹ be raro kele iei ziezi o rẹ whae ze nọ ‘oma o te rọ siọ omai ba ẹrrọ hayo ẹlọhọ.’ (Ahwo Hibru 12:3) Uzẹme riẹ họ, otẹrọnọ ẹruore nọ o no obọ Ọghẹnẹ ze na o bi kiekpo evaọ iroro gbe udu mai hayo nọ eriwo mai o te bi rri obọfa—ẹsejọhọ rri ekwakwa efe hayo ele ute akpọ na—ma rẹ sai whrehe no evaọ abọ-ẹzi obọnana, o vẹ whae ze nọ ma gbe ro wo ẹzẹ gbe udu nọ ma sae rọ yọrọ ute uruemu ezi hi. Nọ ma te wo uruemu utioye, o rẹ sai tube ru nọ ma je “zue okọ orọwo [mai] no.” (1 Timoti 1:19) Eva abọdekọ riẹ, uvi ẹruore o rẹ bọ ẹrọwọ mai ga.

Ẹruore—O Wuzou kẹ Ẹrọwọ

 7. Edhere vẹ ẹruore o ro wuzou gaga kẹ ẹrọwọ?

⁷ Ebaibol na e ta nọ: “[Ẹrọwọ] họ umuẹro eware kpobi nọ ma bi rẹro rai na, odhesẹvia eware nọ ma te ruẹ hẹ.” (Ahwo Hibru 11:1) Fikiere, orọnikọ ẹruore ọ roma da ẹrọwọ họ; rekọ abọjọ ẹrọwọ nọ o wuzou. Roro kpahe Abraham. Rono eriwo ohwo-akpọ ze, tei te aye riẹ Sera, a kpako vi ọmọ-oyẹ no evaọ okenọ Jihova ọ ya eyaa kẹ ai nọ a re ti yẹ ọreuku. (Emuhọ 17:15-17) Eme Abraham o ru? ‘Dede nọ ẹruore ọ jọ kẹe he, ọ rọwo eva ẹruore, re nọ uje te urere ọ ruẹse jọ ọsẹ kẹ erẹwho kpobi.’ (Ahwo Rom 4:18) Uzẹme, ẹruore nọ Ọghẹnẹ ọ kẹ Abraham o jọ obọdẹ otọhotọ kẹ ẹrọwọ riẹ inọ o re ti yẹ ọmọ. Ẹrọwọ riẹ o te je fi elo họ jẹ bọ ẹruore riẹ ga. Ẹhẹ, Abraham avọ Sera a gbaudu no ẹwho rai jẹ nya siọ imoni rai ba nyae rria iwou-udhu evaọ ẹkwotọ ọfa evaọ edẹ uzuazọ rai nọ i kiọkọ!

 8. Ẹvẹ akothiho ọ sae rọ bọ ẹruore ga?

⁸ Abraham o ru ẹruore riẹ kpokpọ ẹkwoma eruo oware kpobi nọ Jihova ọ ta, te o make jọ bẹbẹ kẹe re o ru ere. (Emuhọ 22:2, 12) Epọvo na re, ẹkwoma ẹme nọ ma re yo gbe akọ nọ ma re thihi evaọ iruo Jihova, ma rẹ sai wo imuẹro osohwa mai. Pọl o kere nọ: “Akothiho, uruemu u re no tha; uruemu, ẹruore o re no tha. Ẹruore ọ rẹviẹ omai họ họ.” (Ahwo Rom 5:4, 5) Oyejabọ nọ Pọl o ro kere re inọ: ‘Ma guọlọ re ohwo kpobi o dhesẹ ajọwha otiọyena via eva ẹriẹ evavọ imuẹro ẹruore na rite urere.’ (Ahwo Hibru 6:11) Eriwo owoma otiọye, nọ o roma hwa usu okpekpe nọ ohwo o re wo kugbe Jihova o rẹ sai fi obọ họ kẹ omai rehọ udu rẹriẹ ovao dhe ẹbẹbẹ kpobi, avọ oghọghọ.

“Ghọghọ Eva Ẹruore” Na

 9. Eme ma re ru ẹsikpobi nọ u re fi obọ họ kẹ omai “ghọghọ eva ẹruore” na?

⁹ Ẹruore nọ Ọghẹnẹ ọ kẹ omai ọ ghare vi oware kpobi nọ akpọ na ọ rẹ sae kẹ. Olezi 37:34 ọ ta nọ: “Hẹrẹ [hayo, fi ẹruore họ] ỌNOWO whọ nya edhere riẹ, ọ rẹ te kpare owhẹ kpehru re whọ reuku otọ na; nọ a te guọghọ oru-umuomu, whọ te rue riẹ.” Ẹhẹ, ma wo ẹjiroro kpobi nọ ma rẹ rọ “ghọghọ eva ẹruore” na. (Ahwo Rom 12:12) Dede na, re ma ruẹsi ru ere, o gwọlọ nọ ma re roro kpahe ẹruore mai na ẹsikpobi. Kọ whọ be hai roro kpahe ẹruore nọ Ọghẹnẹ ọ kẹ owhẹ na ẹsikpobi? Kọ whọ be ruẹ oma ra wọhọ nọ whọ rrọ Aparadase, avọ oma okpokpọ, ababọ awa-ọruẹ uzuazọ, nọ ahwo nọ who you a wariẹ owhẹ họ, je bi ru iruo nọ e rẹ ginẹ kẹ evawere? Kọ whọ be hai roro didi kpahe iwoho Aparadase nọ a dhesẹ fihọ ebe mai na? Iroro itieye nọ a re wo ẹsikpobi o rẹ sae wọhọ ẹsenọ ohwo o bi ririe ughẹgbe inwido re o ruẹsi fi obọ họ kẹe ruẹ evevẹ ziezi. Wọhọ odẹme, nọ ma gbe ririe ughẹgbe na ha, o rẹ raha oke he ovu o ve ti mu inwido na nọ ma gbẹ sae rọ ruẹ ude lafi vevẹ wowoma ha. Ẹsejọhọ eware efa i ve ti si omai urru. A joma kuvẹ vievie he re oware utioye o via kẹ omai!

10. Fikieme osohwa na nọ ma re rri kpohọ u ro dhesẹ emamọ usu nọ ma wo kugbe Jihova?

¹⁰ Uzẹme o rrọ, uyoyou nọ ma wo kẹ Jihova họ ugogo oware nọ o be wọ omai gọe. (Mak 12:30) Ghele na, u fo nọ ọwhọ ọ rẹ wọ omai tẹrovi osa na. Evaọ uzẹme, Jihova ọ gwọlọ nọ ma ru ere! Obe Ahwo Hibru 11:6 o ta nọ: “O rẹ bẹbẹ re ohwo ọ were Ọghẹnẹ ababọ ẹrọwọ. Keme ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe ọ rẹ te hwosa kẹ e nọ e guọlọ e riẹ.” Fikieme Jihova ọ rọ gwọlọ nọ ma rri rie wọhọ Ọnọ ọ rẹ hwa omai osa? Fikinọ ma te ru ere, yọ ma bi dhesẹ nọ ma riẹ Ọsẹ obọ odhiwu mai na ziezi. Ọ rẹ keke obọ họ, yọ o you emọ riẹ. Dae roro epanọ ma rẹ jọ ọkora te, nọ udu u re je whrehe omai te o hae jọnọ ma wo “ẹruore obaro” ho.—Jerimaya 29:11.

11. Ẹvẹ ẹruore nọ Ọghẹnẹ ọ kẹ Mosis u ro fi obọ họ kẹe salọ oware nọ u fo?

¹¹ Obọdẹ oriruo ọrọ ohwo jọ nọ ọ tẹrovi ẹruore nọ Ọghẹnẹ ọ kẹ riẹ họ Mosis. Wọhọ “ọmọ ọmọtẹ Fẹro,” Mosis o wo ogaga, odẹ-orro, gbe efe Ijipti nọ ọ rẹ sai ro ru epanọ o were riẹ. Kọ eware enana o re le manikọ Jihova ọ rẹ gọ? Mosis ọ gbaudu salọ nọ Jihova ọ rẹ gọ. Fikieme? Fikinọ ọ ‘kparo ruẹ erere.’ (Ahwo Hibru 11:24-26) Ẹhẹ, Mosis ọ rehọ ubiẹro evere rri ẹruore nọ Jihova o fihọ aro kẹe na vievie he.

12. Fikieme ẹruore Ileleikristi ọ rrọ wọhọ etu?

¹² Pọl ukọ na ọ rehọ ẹruore dhesẹ etu. Etu ẹwoho mai na ọ rẹ thọ ẹgba-iroro mai, onọ u re fi obọ họ kẹ omai jẹ emamọ iroro, rehọ eware nọ e mae r’oja karo, jẹ yọrọ ẹgbakiete mai. (1 Ahwo Tẹsalonika 5:8) Kọ whọ be hae rehọ etu ẹwoho ra na tu ẹsikpobi? O tẹ rrọ ere, kiyọ wọhọ Mosis avọ Pọl, whọ te “siọ ẹro ba ẹrọkpahọ efe nọ o muẹro ho, rekọ [whọ te] rẹro kpahe Ọghẹnẹ ọnọ ọ be rehọ eware kpobi nọ e rẹ kẹ evawere kẹ omai.” Uzẹme, re whọ sae whaha eware nọ a bi kie lele ẹkwoma ẹwhaha ilale omobọ ohwo o gwọlọ udu, rekọ irere nọ who re ti wo i vi omodawọ nọ who ro ru ere! Evaọ uzẹme, eme whọ jẹ roma kẹ oware ofa thọ “uvi uzuazọ” na wa, nọ o be hẹrẹ ahwo nọ a you je fi ẹruore rai họ Jihova?—1 Timoti 6:17, 19.

‘Mẹ Sae Se Owhẹ Ba Ha’

13. Imuẹro vẹ Jihova ọ kẹ idibo omurokpotọ riẹ?

¹³ Avro ọ riẹ hẹ, ahwo nọ a fi ẹruore rai họ eyero akpọ nana a re roro kpahe ebẹbẹ nọ a te rẹriẹ ovao ku evaọ obaro nọ “uye” akpọ na u bi dhe eyeyoma na. (Matiu 24:8) Rekọ otu nọ a fi ẹruore rai họ Jihova a wo ozodhẹ utioye he. A rẹ te ruabọhọ uzuazọ uyero rai “evaọ omofọwẹ, . . . jọ udhedhẹ, ababọ ozọ eyoma.” (Itẹ 1:33) Fikinọ a fi ẹruore rai họ uyero akpọ nana ha, a be rehọ evawere ru lele uthubro Pọl na: “Si oma no uyoyou igho, o nọ wha wo o da owhai ẹro; keme ọ ta nọ, ‘Mẹ sae se owhẹ ba hayo kiukeku owhẹ gbehe.’ ”—Ahwo Hibru 13:5.

14. Fikieme Ileleikristi a gbe ro mu ruawa kpahe ẹgwọlọ abọ-iwo rai hi?

¹⁴ Eva oghẹrẹ nọ a fi ẹgba họ eyaa Ikereakere nana, avro ọ riẹ hẹ sọ Ọghẹnẹ ọ te ginẹ sẹro mai. Jesu ọ tẹ jẹ kẹ omai imuẹro ọdawẹ oyoyou nọ Ọghẹnẹ o wo kẹ omai, ta nọ: “Wha kake guọlọ uvie riẹ gbe ẹrẹreokie riẹ, eware enana kpobi [eyero uzuazọ] a reti fi ai họ kẹ owhai. ‘Fikiere wha ruawa odẹ hẹ, keme odẹ ọ rẹ ruawa o riẹ.’ ” (Matiu 6:33, 34) Jihova ọ riẹ nọ o rrọ use-abọ kẹ omai re ma yọrọ ajọwha evaọ odibọgba na jẹ daoma oke ovona epanọ ma rẹ rọ wọ owha orọ ogbodhẹ ẹgwọlọ abọ-iwo mai. Fikiere joma fi eva kpobi họ ẹgba riẹ gbe isiuru nọ o wo kpahe ẹruorote ẹgwọlọ mai.—Matiu 6:25-32; 11:28-30.

15. Ẹvẹ Ileleikristi a rẹ rọ yọrọ ‘ẹro ọlọlọhọ’?

¹⁵ U re dhesẹ nọ ma rẹroso Jihova nọ ma te ru ‘ẹro mai lọhọ.’ (Matiu 6:22, 23) Ohwo nọ o wo ẹro ọlọlọhọ o re wo eva efuafo, jẹ whaha uvo-uthe gbe oriobọ. Re a wo ẹro ọlọlọhọ u dhesẹ nọ ma rẹ nwani yeri uzuazọ uvuhu hu, hayo gbabọkẹ ewha-iruo abọ-ẹzi mai gbe he. Ukpoye, u dhesẹ nọ ma re wo “oma-onyẹ” nọ ma be rehọ iruo Jihova karo evaọ uzuazọ na.—2 Timoti 1:7.

16. Fikieme o rọ gwọlọ ẹrọwọ gbe udu re a yọrọ ẹro ọlọlọhọ?

¹⁶ Re a sae yọrọ ẹro ọlọlọhọ o gwọlọ ẹrọwọ gbe udu. Wọhọ oriruo, nọ ohwo nọ ọ rehọ owhẹ iruo ọ tẹ be suobọhọ nọ ẹsikpobi who re ru iruo eva oke nọ a re ro kpohọ iwuhrẹ Ileleikristi, kọ whọ te gbaudu nya lele iruẹru abọ-ẹzi nọ whọ rọ karo na? Nọ ohwo ọ tẹ be vro inọ otiẹsejọhọ Jihova o ti ru eyaa ẹruọsa nọ Ọ yaa kẹ idibo Riẹ gba ha, Setan o re ti ru ẹbẹbẹ na ga viere nọ ẹsejọhọ ohwo otiọye na ọ rẹ rọ se iwuhrẹ ba ẹnya riẹriẹriẹ. Ẹhẹ, ma gbe wo ẹrọwọ họ o rẹ kẹ Setan uvẹ nọ o re ro su omai, ọ vẹ te jọ ọnọ o re fi itee họ kẹ omai ukpenọ o rẹ jọ Jihova. Okpẹtu nọ oyena o rẹ wha ze o rro kẹhẹ!—2 Ahwo Kọrint 13:5.

‘Fi Ẹruore họ ỌNOWO’

17. Ẹvẹ ahwo nọ a fi eva họ Jihova a bi ro wo oghale makọ enẹna?

¹⁷ Unuẹse buobu Ikereakere na i dhesẹ nọ u re kiekpe ahwo nọ a fi eva gbe ẹruọrọsuọ rai họ Jihova vievie he. (Itẹ 3:5, 6; Jerimaya 17:7) Uzẹme, oke o rẹ sae jọ nọ a rẹ daoma wo edẹro evaọ umutho eware nọ a wo, rekọ a kele onana dhe omolahiẹ ovo ho nọ a tẹ rehọ iẹe wawo eghale nọ e be hẹrẹ ai. A tẹ be rehọ ere dhesẹ nọ a ‘fi ẹruore rai họ ỌNOWO’ avọ imuẹro inọ u kri kẹhẹ, Ọghẹnẹ o ti ru ẹgwọlọ idibo omurokpotọ riẹ kpobi kẹ ai. (Olezi 37:4, 34) Fikiere, a be ginẹ wereva enẹna. “Ẹruore ohwo okiẹrẹe o re kuhọ avọ evawere, rekọ ẹruore ohwo omuomu e rẹ jọ ababọ.” (Itẹ 10:28)

18, 19. (a) Imuẹro esasa vẹ Jihova ọ kẹ omai? (b) Ẹvẹ ma re ro fi Jihova họ “obọze” mai?

¹⁸ Nọ ọmọ avọ ọsẹ riẹ a tẹ rrọ usu, udu u re kie ọmọ na vi. Epọvo na o rrọ kẹ omai nọ ma rrọ usu kugbe Ọsẹ obọ odhiwu mai na. Jihova ọ ta kẹ Izrẹl nọ: “Ozọ umu owhẹ hẹ, keme mẹ avọ owhẹ a gbẹ rọ, . . . me ti fiobọhọ kẹ owhẹ, . . . Keme mẹ, ỌNOWO na Ọghẹnẹ ra, o kru obọze ra na; mẹ họ ọnọ ọ ta kẹ owhẹ, Ozọ umu owhẹ hẹ, me ti fiobọhọ kẹ owhẹ.”—Aizaya 41:10, 13.

¹⁹ Ẹme ọyena ọ sasa oma kẹhẹ—inọ Jihova o kru ohwo obọ! Devidi o kere nọ: “Kẹse kẹse mẹ avọ ỌNOWO na a gbẹ rọ; keme ọ rọ obọze mẹ, mẹ gbẹ sae ti kie he.” (Olezi 16:8) Ẹvẹ ma re ro fi Jihova họ obọze mai? O tẹ kawo, ma re ru ere evaọ idhere ivẹ. Orọ ọsosuọ, ma rẹ kẹ Ẹme riẹ uvẹ re ọ kpọ omai evaọ kabọ kabọ uzuazọ; orọ avivẹ, ma rẹ tẹrovi osohwa ulogbo nọ Jihova o fihọ obaro kẹ omai na. Asaf ọso-ilezi na ọ so nọ: “Mẹ rọ kugbe owhẹ ẹsikpobi; whọ rọ obọze ra kru omẹ. Whọ rehọ areghẹ ra su omẹ, nọ oye o vrẹ no, whọ te rehọ omẹ ze oruaro ra.” (Olezi 73:23, 24) Avọ imuẹro itieye na, ma sae ginẹ tẹrovi obaro na ududu.

‘Esiwo Rai Ọ Kẹle Ino’

20, 21. Eme ọ rrọ obaro hẹrẹ ahwo nọ a fi ẹruore họ Jihova?

²⁰ No ẹdẹ ruọ ẹdẹ, o be mae jọ oware ovẹrẹ kẹ omai enẹna vi epaọ anwẹdẹ re ma fi Jihova họ obọze mai. Kẹlena, nọ ọraha kufiẹ ọ te rehọ egagọ erue muhọ na, uye ulogbo nọ a re ruẹ obọ riẹ ẹdẹvo ho u bi ti te akpọ Setan. (Matiu 24:21) Ozọ u ti mu ahwo-akpọ nọ a wo ẹrọwọ họ. Ghele na, evaọ etoke ozighi yena, idibo Jihova nọ i wo udu a te ghọghọ evaọ ẹruore! Jesu ọ ta nọ: “Nọ eware nana i biti muhọ [eruo], kpare uzou rai wha ri ehru keme ẹta rai ọ kẹle ino.”—Luk 21:28.

²¹ Fikiere, joma ghọghọ evaọ ẹruore nọ Ọghẹnẹ ọ kẹ omai na, ajọ eghẹ Setan e viẹ omai họ hayo jọ odawọ kẹ omai hi. Eva oke ovona, joma daoma gaga bọ ẹrọwọ, uyoyou, gbe ozodhẹ nọ ma wo kẹ Ọghẹnẹ ga. Nọ ma te bi ru ere, ma ti wo udu nọ ma ti ro yo-ẹme kẹ Jihova jẹ wọso Ẹdhọ evaọ otọ uyero kpobi. (Jemis 4:7, 8) Ẹhẹ, “wha kru oma ga, wha thihakọ, whai enọ e be hẹrẹ ỌNOWO na kpobi.”—Olezi 31:24.

[Oruvẹ-obotọ]

Kọ Whọ Sae k’Uyo?

• Edhere vẹ ẹruore nọ Jesu o wo u ro fi obọ họ kẹe wo udu?

• Ẹvẹ ẹrọwọ avọ ẹruore e rọ jẹhọ ohwohwo?

• Ẹvẹ ẹruore kugbe ẹrọwọ e rẹ rọ kẹ Oleleikristi udu rehọ eware nọ e ginẹ mae r’oja karo?

• Fikieme ahwo nọ a ‘fi ẹruore họ ỌNOWO’ a sai ro rri kpohọ obaro na ududu?

[Uwoho nọ o rrọ ẹwẹ-obe avọ 28]

Makọ whẹ yọ ọmaha hayo ọkpako, kọ whọ be ruẹ oma ra wọhọ ẹsenọ whọ rrọ Aparadase?