Ẹdẹ Nọ Emọ Eklase Avọ 123 Ọrọ Isukulu Giliad A Ro Nwrotọ

A Tuduhọ Enọ I Bi Nwrotọ No Isukulu Giliad Awọ Inọ A “Muhọ Ẹtọ”

EVAỌ Ẹdẹ-Ọmaha, September 8, 2007, ahwo 6,352 nọ i no erẹwho 41 ze a kokohọ kẹ ọruẹrẹfihotọ nọ inievo nọ a rrọ eklase avọ 123 a je ro nwrotọ no Isukulu Ebaibol ọ Giliad ọrọ Watchtower. Evaọ ighọjọ ikpe ohiohiẹ, ohwo-agbara ọruẹrẹfihotọ na, Anthony Morris, omọvo Ugboma Esuo na, o te dede ogbotu na rehọ. Nọ ọ ta eme emuhọ no, o te zizie oruẹme ọsosuọ na, Gary Breaux, omọvo Ogbẹgwae Uwou-Ogha ọrọ America.

Brọda Breaux ọ kẹ enọ i bi nwrotọ na imuẹro inọ oghẹrẹ nọ oma rai o rrọ kẹhẹ, enọ i bi ru oreva Jihova a wo erru evaọ aro Riẹ. (Jeri. 13:11) Ọ tuduhọ enọ i bi nwrotọ na awọ inọ a yọrọ erru otiọye na. Kẹsena oniọvo ọfa, Gerrit Lösch, omọvo Ugboma Esuo na, ọ tẹ ta inọ u kiehọ re ma rẹro osohwa nọ ma tẹ be gọ Jihova. (Hib. 11:6) Rekọ, uvi uyoyou o rẹ jọ ẹjiroro nọ o rẹ w’omai gọ Jihova.

Ọsẹro Ẹko-Iruo Isukulu Iruẹru Uvie na, William Samuelson, ọ tẹ t’ẹme nọ ọ rọ tuduhọ enọ i bi nwrotọ na awọ inọ a daji iruo ezi rai orọ ewhowho Ovie nọ o bi su na re a jẹ rehọ uruemu ezi rai dhesẹ onana via.a Sam Roberson, ethabọ ọrọ ọsẹro Ẹko-Iruo Isukulu Iruẹru Uvie na, ọ tuduhọ enọ i bi nwrotọ na awọ re a hae jọ oma amọfa gwọlọ ewoma. Ẹsiẹ a te sai ro “you imoni na” kpobi.—1 Pita 2:17.

Nọ a kẹ evuẹ ejaja yena no, owuhrẹ isukulu Giliad na, Mark Noumair, ọ tẹ kiẹ ejọ nọ i bi nwrotọ na riwi, enọ e nyaku eware isiuru jọ evaọ usiuwoma okenọ a gbẹ jọ isukulu na. Enọ e jọ ogbotu na a ruẹ vevẹ inọ inievo nana a you odibọgba na gbe nnọ a gwọlọ fiobọhọ kẹ amọfa. Kent Fischer, ọnọ o bi ruiruo evaọ Ọfisi Ẹruorote Iruẹru Uwou-Ogha onọ o rrọ Patterson ọ tẹ kiẹ ahwo Ogbẹgwae Uwou-Ogha nọ i no erẹwho esa nọ a vi imishọnare kpohọ no riwi. Eme ọ inievo eghaghae nana e tuduhọ ogbotu na awọ, te esẹgbini enọ i bi nwrotọ no isukulu na nọ e rrọ ogbotu na, inọ a rẹ rẹro te imishọnare ekpokpọ ziezi evaọ ekwotọ nọ a vi rai kpohọ. Izak Marais, ọnọ o bi ruiruo evaọ Ẹko-Iruo Ẹruorote Efafa, ọ tẹ kiẹ enọ i kri iruo imishọnare no riwi, yọ ikuigbe rai e lẹliẹ enọ i bi nwrotọ na riẹ evawere nọ a re ti wo.

Geoffrey Jackson, omọvo Ugboma Esuo na họ ọnọ ọ kẹ ugogo ovuẹ ọrọ ọruẹrẹfihotọ na, onọ uzoẹme riẹ o jọ “Nọ Wha Yo Eme Nana Kpobi no na—Eme Wha Ti Ru?” Brọda Jackson, ọnọ ọ jọ imishọnare te enwenọ ikpe 25 evaọ ofẹ obọ South Pacific, ọ ta kpahe abọ ekuhọ ọrọ Ovuẹ obọ Ugbehru na. Evaọ ovuẹ yena, Jesu ọ ta kpahe ezae ivẹ nọ e bọ iwou, ọzae jọ owareghẹ, ọdekọ ogheghẹ. Oruẹme na ọ ta inọ o sae jọnọ enwenọ oria ọvona a bọ iwou ivẹ na fihọ. Rekọ, ọzae ogheghẹ na ọ bọ uwou riẹ họ ehru uwẹkpẹ, ọzae owareghẹ na ọ tẹ tọ otọ ziezi bẹsenọ ọ rọ tọ ku utho, kọ etẹe ọ wọ otọhotọ uwou riẹ họ. Okenọ okpofou ọ ze, uwou nọ otọhotọ riẹ ọ rrọ ehru utho na o nuhu hu, rekọ ọnọ a bọ họ ehru uwẹkpẹ na o te nwo.—Mat. 7:24-27; Luk 6:48.

Jesu o ru ọtadhesẹ riẹ na vẹ inọ ọzae ogheghẹ na ọ wọhọ enọ i re yo eme Jesu ọvo rekọ a re fi ai họ iruo ho. Ọzae owareghẹ na ọ wọhọ enọ e gaviezọ kẹ eme Jesu a te je fi ai họ iruo. Brọda Jackson ọ tẹ ta kẹ enọ i bi nwrotọ na nọ, “Wha te bi fi eware nọ wha wuhrẹ no Ebaibol ze họ iruo evaọ iruo imishọnare rai, wha te wọhọ ọzae owareghẹ na.” Evaọ ubrobọ urere ẹme riẹ, ọ tẹ tuduhọ ae awọ re a “muhọ ẹtọ” evaọ iruo imishọnare rai.

Ukuhọ riẹ, a tẹ kẹ inievo na ebe nọ i dhesẹ inọ a nwrotọ no isukulu na no, o te je se erẹwho nọ a vi rai kpohọ kẹ ae, kẹsena Brọda Morris ọ tẹ kẹ ae uthubro urere. Ọ tuduhọ inievo na awọ inọ a rọ kpahe Jesu ẹsikpobi re a jẹ rẹroso Jihova kẹ ẹgba. Enẹ ọruẹrẹfihotọ na o ro kuhọ.

[Oruvẹ-obotọ]

[Etehe nọ e rrọ ẹwẹ-obe avọ 31]

AHWO NỌ A JỌ EKLASE NA

Unu erẹwho nọ a no ze: 10

Unu erẹwho nọ a vi rai kpohọ: 24

Unu ahwo nọ e jọ eklase na: 56

A tẹ ghale ikpe rai ẹrẹrẹe: 33.5

A tẹ ghale ikpe nọ a rọ rrọ ukoko na ẹrẹrẹe: 17.9

A tẹ ghale ikpe nọ a rọ rrọ ekobaro ẹrẹrẹe: 13.8

[Uwoho nọ e rrọ ẹwẹ-obe avọ 32]

Eklase avọ 123 ọrọ Isukulu Ebaibol ọ Giliad ọrọ Watchtower

A kele uhie ahwo na no obaro kpobọ emu, yọ a kere edẹ na no ẹkpẹlobọ kpohọ obọze evaọ uhie kpobi.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.