Ileleikristi nọ E Kpako No​—Jihova O Rri Ẹmeoyo gbe Omaurokpotọ Rai Ghaghae

EKPAKO ukoko wariẹ akpọ na soso họ a rri uvẹ-ọghọ iruo nọ a wo evaọ egagọ Ọghẹnẹ ghaghae. Inievo enana yọ oghale kẹ omai kpobi. Rekọ evaọ imikpe jọ nọ e vrẹ, ukoko na u ru inwene jọ. A ta kẹ ekpako ukoko nọ e kpako no, inọ jọ a rehọ ewha-iruo rai jọ kẹ ekpako efa nọ e gbẹ maha. Evaọ oghẹrẹ vẹ?

Ọruẹrẹfihotọ ọkpokpọ na họ, esẹro enyawariẹ gbe inievo nọ i re wuhrẹ evaọ isukulu ukoko na a rẹ siọ iruo nana ba nọ a tẹ kpako te ikpe udhosa-gbikpe no. Yọ ekpako nọ i te ikpe udhone no a rẹ rọ ewha-iruo rai jọ kẹ ekpako nọ e gbẹ maha, wọhọ ọnọ o re koko iruẹru Ogbẹgwae Uwou-Ogha họ hayo ọnọ o re koko iruẹru ugboma ekpako na họ. Eme Ileleikristi nọ e kpako no nọ i wo owha-iruo itienana a ru no kpahe inwene nana? A dhesẹ nọ a bi yoẹme jẹ be romakpotọ kẹ Jihova gbe ukoko riẹ!

Ken nọ ọ jọ ọnọ o re koko iruẹru Ogbẹgwae Uwou-Ogha họ, yọ o ru iruo nana te enwenọ ikpe udhuvẹ gbe ikpegbizii no, ọ ta nọ: “Mẹ rọ udu mẹ kpobi rọwo kugbe ọruẹrẹfihotọ ọkpokpọ nana.” Ọ tẹ jẹ ta nọ: “Evaọ uzẹme, mẹ lẹ se Jihova no vẹre evaọ ohiohiẹ nọ ovuẹ na u ro te omẹ obọ. Mẹ lẹ se Jihova nọ dodokọ oniọvo ọfa nọ ọ gbẹ dina maha ọ rẹ sae rehọ iruo ọnọ o re koko iruẹru Ogbẹgwae Uwou-Ogha họ.” Oware nọ Ken ọ ta na o nwane wọhọ oware nọ Ileleikristi efa buobu nọ e kpako no a ta evaọ akpọ na soso. Evaọ uzẹme, fikinọ iruo nana nọ a be rọ gbodibo kẹ inievo rai na e be were ae oma, o dina jarai oma oghẹrẹ jọ evaọ oke ọsosuọ.

Esperandio nọ ọ rrọ ọnọ o re koko iruẹru ugboma ekpako na họ evaọ ukoko riẹ, ọ ta nọ: “O dina kẹ omẹ uye.” Rekọ o fibae nọ, “Mẹ ginẹ gwọlọ oke ziezi nọ mẹ rẹ rọ rẹrote oma mẹ nọ o gbẹ nwane ga tere he na.” Enẹna, Esperandio ọ ruabọhọ egagọ riẹ kẹ Jihova, yọ o bi gine fiobọhọ gaga evaọ ukoko riẹ.

Kọ ẹvẹ kpahe esẹro enyawariẹ nọ i ru iruo nana oke krẹkri no, nọ a no iruo na no fikinọ a kpako no? Allan nọ o ru iruo ọsẹro ọnyawariẹ te ikpe ọgba-gberee no ọ ta nọ, “U gbe omẹ unu gaga nọ ovuẹ na u te omẹ obọ.” Dede na, Allan o vuhumu nọ irere buobu e riẹ nọ a te bi wuhrẹ inievo nọ e gbẹ maha rọkẹ iruo na, yọ ọ be rọ evawere gọ evaọ uvẹ-iruo nọ ọ rrọ obọnana.

Russell nọ ọ jọ iruo ọsẹro ọnyawariẹ vẹre, jẹ jọ owuhrẹ evaọ isukulu ukoko na te ikpe udhuvẹ no, ọ ta nọ oware na o nwane were ọyomariẹ avọ aye riẹ tere he evaọ oke ọsosuọ. Ọ ta nọ: “Iruo na e were omai gaga yọ ma gbe wo emamọ oma nọ ma gbẹ sai ro ru ai.” Russell avọ aye riẹ a be rọ eriariẹ gbe onaa rai fiobọhọ kẹ ukoko nọ a rrọ, yọ onana o be wha evawere se inievo nọ a gbẹ rrọ ukoko.

O gbẹ nwane rrọ owhẹ oma wọhọ epanọ o rrọ kẹ inievo nọ ma fodẹ na ha, iku jọ nọ e rrọ obe Samuẹle Avivẹ i ti fiobọhọ kẹ owhẹ.

Roro kpahe oware nọ o via okenọ u kpemu nọ Absalọm ọmọ Devidi ọ wọso iẹe. Devidi ọ dhẹ no Jerusalẹm kpobọ Mahanim nọ o rrọ ofẹ ovatha-ọre ethẹ Jọdan. Nọ a te obei, eware buobu e kare Devidi avọ ahwo riẹ. Kọ whọ kareghẹhọ oware nọ o via?

Ezae esa jọ evaọ okogho yena a rehọ ehwa nọ a re kiẹzẹ, oghoghẹrẹ emu, gbe eware efa ze ti ro ru ai ọghọ. Bazilai ọ jọ omọvo rai. (2 Sam. 17:27-29) Nọ ọwọsuọ Absalọm o kuhọ no, Devidi o te je zihe kpobọ Jerusalẹm, Bazilai o te su ei te Jọdan. Devidi ọ tẹ ta kẹe nọ jọ ọ kwa bru ei ziọ Jerusalẹm. Ovie na ọ ta kẹe nọ ọ te ko ẹe, dede nọ Bazilai “o fe gaga” yọ ọ rrọ ohwo nọ a rẹ kẹ re ọ tẹ re he. (2 Sam. 19:31-33) Ẹsejọhọ uruemu Bazilai o were Devidi gaga yọ o rri rie wọhọ ohwo nọ ọ te hae kẹe emamọ ohrẹ nọ ọ tẹ rrọ kugbei. O hae te jọ oware ọghọ ologbo kẹe re ọ rria ighẹ ovie jẹ jọ usu ahwo nọ ovie ọ rẹ hai lele gba ẹgwae!

Rekọ fikinọ Bazilai ọ riẹ utho nọ ọ rẹ sai ru, ọ vuẹ ovie na nọ ọyomariẹ ọ kpako te ikpe udhone no. O te fibae nọ: “Kọ mẹ gbẹ sae vuhu oware nọ u woma hayo onọ u yoma?” Eme họ otọ ẹme riẹ na? Epanọ Bazilai ọ kpako te no na, ọ rẹ jọ ohwo nọ o wareghẹ gaga no. Yọ ohwo otiọye na ọ rẹ sae kẹ emamọ ohrẹ wọhọ epanọ “ekpako na” a je ru kẹ Rehoboam uwhremu na. (1 Iv. 12:6, 7; Ol. 92:12-14; Itẹ 16:31) Fikiere nọ Bazilai ọ ta nọ sọ ọyomariẹ ọ rẹ sai vuhu oware nọ u woma gbe onọ u yoma, ọ jẹ ta kpahe ebẹbẹ nọ owho o wha sei no. Ọ ta nọ fikinọ ọ who no, emu ọ gbẹ be were iẹe unu tere he, yọ o gbe bi yo ẹme te he. (Ọtausi. 12:4, 5) Fikiere Bazilai ọ tẹ ta kẹ Devidi inọ ọ wha ọmoha na Chimham kpobọ Jerusalẹm, yọ o sae jọnọ Chimham yọ ọmọ riẹ.​—2 Sam. 19:35-40.

Enwene nọ ma jọ ukoko na ru nọ ma ta ẹme kpahe evaọ emuhọ uzoẹme nana u dhesẹ nọ ma wo ọkpọ iroro Bazilai na. Rekọ wo ohẹriẹ no orọ Bazilai, ma rri kparo vrẹ uyero gbe ẹgba omomọvo. Ma roro kpahe oware nọ o te mai woma kẹ ekpako ukoko nọ e kpako gaga no evaọ akpọ na soso.

Ekpako ukoko nana nọ e riẹ utho ẹgba rai na a ruẹ vevẹ inọ o te mai fiobọhọ kẹ ukoko Jihova evaọ obaro nọ ma bi dhe evievihọ na, otẹrọnọ a rehọ iruo rai nọ a ru kri no na kẹ inievo-emezae nọ e gbẹ maha. Ekpako ukoko nọ e kpako gaga no na họ enọ i wuhrẹ ibuobu enọ e gbẹ maha na, wọhọ epanọ o rẹ sae jọnọ Bazilai o wuhrẹ ọmọzae riẹ gbe epanọ Pọl ukọ na o wuhrẹ Timoti na. (1 Kọr. 4:17; Fil. 2:20-22) Obọnana inievo-emezae nana nọ e gbẹ maha na a bi dhesẹ via nọ a zihe ruọ “ezae nọ a rọ kẹ ekẹ” no, enọ e be “bọ ugboma Kristi na ga.”​—Ẹf. 4:8-12; wawo Ikelakele 11:16, 17, 29.

Idibo Ọghẹnẹ buobu evaọ akpọ na soso nọ i siobọno ewha-iruo jọ kẹ amọfa no a bi ru eware efa nọ uvẹ rai u rovie fihọ evaọ iruo Jihova.

Marco nọ ọ jọ ọsẹro ọnyawariẹ ikpe ikpegbizii ọ ta nọ: “Obọnana me wo uvẹ nọ me bi ro fiobọhọ kẹ ezae inievo-emetẹ mai nọ e rrọ ukoko ho.”

Geraldo nọ ọ jọ ọsẹro ọnyawariẹ ikpe udhegberee ọ ta nọ: “Utee okpokpọ jọ nọ ma wo họ, re ma fiobọhọ kẹ enọ e siọ iruo Uvie na ba no je wo amọfa nọ ma re wuhrẹ Ebaibol kugbe.” Ọ niyẹrẹ nọ avọ aye riẹ a bi wuhrẹ Ebaibol kugbe ahwo ikpegbisoi, yọ inievo buobu nọ e siọ iruo Uvie na ba no a wariẹ mu ewuhrẹ họ ẹnyaze no.

Allan nọ ma ta ẹme kpahe vẹre na ọ ta nọ: “Enẹna ma wo uvẹ ziezi no nọ ma rẹ rọ romakẹ iruo usiuwoma ota vi epaọ anwẹdẹ. Ma be re omaweromẹ usiuwoma ota ẹgbede, usiuwoma ota evaọ eria ekiọthuọ, gbe usiuwoma ota evaọ okegbe mai, yọ imava jọ evaọ usu ahwo nọ ma gbẹ rrọ okegbe a be ziọ ewuhrẹ.”

Otẹrọnọ whẹ yọ oniọvo-ọmọzae nọ o wo ẹgba jẹ be romakpotọ evaọ ukoko na, nọ a nwene owha-iruo riẹ, edhere obọdẹ ọfa jọ ọ riẹ nọ whọ sae rọ zọhọ fihọ iruo Uvie na. Whọ sae tha iruo Jihova uke nọ who te bi dhesẹ emamọ eware nọ who wuhrẹ no kẹ inievo-emezae nọ e gbẹ maha evaọ ukoko na. Russell nọ ma ta ẹme te no vẹre na ọ ta nọ: “Jihova o bi wuhrẹ emoha nọ i wo onaa jẹ rrọ wowoma, ọ tẹ jẹ be rehọ ae ru iruo.” O fibae nọ: “Inievo mai evaọ akpọ soso a bi wo erere nọ a be rọ ẹzẹ wuhrẹ je ru iruo ẹruọsa rai ziezi na!”​—Rri ẹkpẹti na, “Fiobọhọ kẹ Izoge Emezae Te kẹ Iruo Kpobi nọ A rẹ Sai Ru.”

Otẹrọnọ a nwene iruo ra evaọ ukoko na, jọ eva e were owhẹ. Whọ rehọ iruo nọ whọ be rọ eva efuafo ru na fiobọhọ kẹ ahwo buobu no, yọ u fo re whọ gbẹ ruabọhọ oyena. Eva ra e be were Ukoko na ẹsikpobi, a you owhẹ.

Maero na, emamọ eware nọ who ru e te thọrọ Jihova ẹro vievie he. “Iruo rai gbe uyoyou nọ wha dhesẹ kẹ odẹ riẹ e rẹ . . . thọrọ iẹe ẹro [ho], nọ wha rọ gbodibo jẹ be ruabọhọ gbodibo kẹ erezi na.” (Hib. 6:10) Eme yena nọ a rọ ẹzi Ọghẹnẹ kere na e kẹ omai kpobi imuẹro inọ orọnikọ iruo nọ ma ru kẹ Ọghẹnẹ evaọ okenọ u kpemu no ọvo ọ te kareghẹhọ họ. Whọ rrọ ghaghae kẹ Jihova vi epanọ ọ rẹ rọ kpairoro vrẹ iruo nọ who ru no gbe enọ whọ be ruabọhọ ru re eva e were iẹe!

Kọ ẹvẹ otẹrọnọ ọruẹrẹfihotọ ọkpokpọ nana nọ ma ta kpahe no na o kpomahọ owhẹ hẹ? Ẹme nana o te owhẹ re. Evaọ oghẹrẹ vẹ?

Whọ tẹ rrọ kugbe oniọvo nọ ọ kpako no, nọ a nwene owha-iruo riẹ, whọ sai wo erere no eriariẹ gbe onaa nọ o wo no anwọ ikpe buobu ze na. Nyabru ei kẹ ohrẹ. Nọe re ọ vuẹ owhẹ eriwo riẹ. Hai muẹrohọ oghẹrẹ nọ ọ be rọ rehọ onaa gbe eriariẹ riẹ ru eware enẹna evaọ ukoko na.

Whọ tẹ rrọ oniọvo nọ a nwene owhai-iruo riẹ, hayo ọnọ a kẹ owha-iruo okpokpọ, kareghẹhọ nọ inievo nọ e gọ Jihova kri no gbe enọ e be ruabọhọ egagọ riẹ nẹnẹ a rrọ ghaghae kẹe.