Eruẹaruẹ Kpahe Mesaya Na

FIKINỌ a riẹ eware nọ Aizaya gbe eruẹaro efa a kere kpahe Mesaya na, ahwo Ju a je rẹro ẹtha riẹ evaọ oke krẹkri. Evaọ oke Jesu, ahwo Ju buobu a je “re ẹro” omarọvia Mesaya na. (Luk 3:15) U wuzou gaga inọ eruẹaruẹ Ebaibol e fodẹ ugogo eware jọ kpahe Mesaya na. Ohwo-akpọ ọvuọvo ọ rẹ sae ruẹaro eware itieye na hayo ru nọ eware itieye na e jẹ via kpahe Jesu hu.

Eware nọ A Ta Kpahe Eyẹ Mesaya Na. Aizaya ọ ruẹaro nọ ọmọtẹ nọ ọ riẹ ọzae he o ti yẹ Mesaya hayo Kristi na. Nọ Matiu ukọ na o dhesẹ edhere igbunu nọ a ro yẹ Jesu no, o te kere inọ: “Whaọ enana kpobi e via, re ẹme nọ Ọnowo ọ ta evaọ unu ọruẹaro na ọ gba, a nọ: ‘Gaviezọ, ọmọtẹ nọ ọ riẹ ọzae he o ti dihọ, o ve ti yẹ ọmọzae.’” (Matiu 1:22, 23; Aizaya 7:14) Aizaya ọ ruẹaro re inọ uyẹ Devidi Kristi o ti noze, ọ tubẹ fodẹ Jẹsi nọ ọ rrọ ọsẹ Devidi. Uyẹ Devidi dẹẹ Jesu o gine noze. (Matiu 1:6, 16; Luk 3:23, 31, 32) Fikiere, taure a te ti yẹ Devidi, Gebriẹl ẹnjẹle na ọ vuẹ Meri, oni Jesu inọ: ‘Ọghẹnẹ ọ rẹ te kẹe akaba-uvie Devidi Ọsẹ riẹ.’—Luk 1:32, 33; Aizaya 11:1-5, 10; Ahwo Rom 15:12.

Eware nọ A Ta Kpahe Uzuazọ Mesaya Na. Evaọ uwou-egagọ-ode obọ Nazarẹt, Jesu o se eruẹaruẹ Aizaya, usu eme nọ o se họ: “Ẹzi Ọnowo na ọ rọ omẹ oma, fiki epanọ o ku ewhri ku omẹ re [mẹ] vuẹovuẹ emamọ usi kẹ iruori.” Kẹsena Jesu ọ tẹ ta ẹme na kiekpahe omariẹ inọ: “Nẹnẹna ekere na ọgba eva ezọ rai.” (Luk 4:17-21; Aizaya 61:1, 2) Aizaya ọ ruẹaro re kpahe edhere ẹwo gbe omaurokpotọ nọ Jesu o ro yerikugbe ahwo nọ a gwọlọ usiwo. Matiu o kere nọ: “Ibuobu e tẹ rọ kpahe iẹ; o te siwi ai kpobi. Ọ tẹ vẹvẹ ai unu re a siẹba ẹferevia. Re ẹme nọ Aizaya ọruẹaro ọ ta na ọ gba . . . ‘Ọ rẹ te họre oma ha, o ti bo via ha . . . O re ti wirẹ ukpoko nọ u wiri rẹrẹ hẹ.’”—Matiu 8:16, 17; 12:10-21; Aizaya 42:1-4; 53:4, 5.

Eware nọ A Ta Kpahe Uye-Oruẹ Mesaya Na. Aizaya ọ ruẹaro inọ ahwo buobu evaọ Izrẹl a te jẹe rehọ họ, ukpoye kọ ọ te jọ kẹ ai wọhọ “utho nọ u re ru ahwo zoruẹ.” (1 Pita 2:6-8; Aizaya 8:14, 15) Uzẹme, ghelọ eware igbunu buobu nọ Jesu o ru, ahwo na “a sae rọwo iẹ he: re ẹme nọ Aizaya ọruẹaro, ọ ta, ọ gba, anọ: ‘Ọnowo, ono ọ rọwo ovuẹ mai?’” (Jọn 12:37, 38; Aizaya 53:1) Oware ofa jọ nọ o soriẹ nọ ahwo Ju a gbe ro fi ẹrọwọ họ Jesu hu họ, a wo eriwo ọthọthọ inọ Mesaya na ọ te nwani si orẹwho rai no otọ esuo Rom jẹ rehọ uvie Devidi nọ u ti su otọakpọ soso ze. Fikinọ Jesu ọ ruẹ uye je whu, ahwo Ju buobu a rọwo nọ ọye họ Mesaya na ha. Rekọ uzẹme riẹ họ, Aizaya ọ ruẹaro no vẹre inọ Mesaya na ọ te ruẹ uye taure ọ tẹ te jọ Ovie.

Evaọ obe Aizaya, Mesaya na ọ ta kpahe omariẹ nọ: “Mẹ rẹriẹ uke mẹ [kẹ] otu nọ ọ rẹ họre ahwo . . . mẹ sae si ovao omẹ no dhere omovuọ avọ eya-inwo ho.” Matiu ọ niyẹrẹ oware nọ o via okenọ a jẹ rọ Jesu gu ẹdhọ inọ: “A te nwoeya ku ei ovao, a tẹ jẹ tehe iẹe, otu jọ e tẹ rọ abọ fae.” (Aizaya 50:6; Matiu 26:67) Aizaya o kere nọ: “Ahwo a . . . jẹ kẹe uye, dede o rovie unu riẹ hẹ.” Fikiere okenọ Pailet ọ nọ Jesu onọ kpahe ota nọ ahwo Ju a bọwo e riẹ, Jesu “o yo kẹ e he; makọ ẹme ọvo; [fikiere] urirẹ u te mu ọba na gaga.”—Aizaya 53:7; Matiu 27:12-14; Iruẹru Ikọ Na 8:28, 32-35.

Eware nọ A Ta Kpahe Uwhu Mesaya Na. Eruẹaruẹ Aizaya efa i rugba evaọ etoke uwhu Jesu, gbe eware nọ i lele i rie. Aizaya ọ ruẹaro nọ: “A tọ uki riẹ kugbe irumuomu a te je ki iei kugbe ahwo nọ a [fe].” (Aizaya 53:9) Ẹvẹ eme ivẹ nana nọ o wọhọ nọ e wọso ohwohwo na e sai ro rugba? Nọ Jesu o whu, a kare riẹ fihọ udevie igbulegbu ivẹ. (Matiu 27:38) Rekọ uwhremu na, ọdafe jọ nọ a re se Josẹf ọrọ obọ Arimatia ọ tẹ wọ ori Jesu fihọ uki obọriẹ nọ ọ tọ kẹle. (Matiu 27:57-60) Ukuhọ riẹ, uwhu Jesu u te ru oware jọ nọ u wuzou gaga evaọ eruẹaruẹ Aizaya gba. Aizaya ọ ta kpahe Mesaya na nọ: “Fiki . . . okiẹrẹ ọvo mẹ na; a je ti kele ibuobu gbe enọ ikiẹree, ọ vẹte wha imuomu rai.” Ẹhẹ, uwhu Jesu u ru ẹtanigbo na lọhọ nọ owha uzioraha o te sai ro no ahwo kpobi nọ a wo ẹrọwọ uzou.—Aizaya 53:8, 11; Ahwo Rom 4:25.

Eruẹaruẹ na E te Seba Erugba Ha

Re a ruẹsi dhesẹ vevẹ ohwo nọ Mesaya na ọ rrọ wọhọ epanọ Ikereakere na e ta, eruẹaruẹ obe Aizaya eye ikọ na gbe Jesu omariẹ a jẹ mai se noze vi ebe efa Ebaibol na. Dede na, orọnikọ obe Aizaya ọvo u wo eruẹaruẹ ọrọ eware nọ e te via evaọ obaro ho. Eruẹaruẹ efa buobu e rrọ Ikereakere Hibru na nọ i rugba kpahe Jesu, Uvie riẹ, jẹ ta kpahe eware iwoma nọ Uvie na u ti rugba evaọ obaro.a (Iruẹru Ikọ Na 28:23; Eviavia 19:10) Ẹvẹ u muẹro te inọ eruẹaruẹ nana e te seba erugba ha? Jesu ọ ta kẹ ahwo Ju nọ a jẹ gaviezọ kẹe nọ: “Wha roro nọ mẹ ze te raha uzi na gbe eruẹaro [koyehọ, Ikereakere Hibru] na ha, mẹ nyaze te raha ha, rekọ orugba. Uzẹme mẹ ta kẹ owhai, bẹsenọ ehru gbe akpọ e te vrẹ no, ovẹvẹ ovo hayo ogẹgẹ ovo u re no izi [na ha], bẹsenọ eware kpobi e te gba no.”—Matiu 5:17, 18.

Jesu o dhesẹ inọ eware nọ e jẹ via kẹe na yọ orugba eruẹaruẹ Ebaibol, ọ tẹ jẹ ta kpahe efa nọ i ti rugba evaọ obaro. (Daniẹl 9:27; Matiu 15:7-9; 24:15) Ofariẹ, Jesu avọ ikọ riẹ a ruẹaro kpahe eware nọ e te via evaọ obaro, te eware buobu nọ e be via nẹnẹ na. Uzoẹme nọ o rrọ aro na o te ta ẹme kpahe enana gbe eruẹaruẹ Ebaibol efa nọ i ti rugba evaọ obaro.

[Oruvẹ-obotọ]

[Uwoho nọ e rrọ ẹwẹ-obe avọ 4]

“Ọmọtẹ nọ ọ riẹ ọzae he o ti . . . yẹ ọmọzae”

[Uwoho nọ e rrọ ẹwẹ-obe avọ 5]

‘Me si ovao mẹ no dhere omovuọ họ’