Me You Ebọro nọ A rẹ rọ Umure Fa vi Oware Ofa Kpobi!

Mẹ whẹro evaọ okpẹwho nọ a re se Puerto Limón, ẹwho nọ ọ rrọ akotọ abade evaọ orẹwho Costa Rica. Mẹ họ ọmọ avọ ihrẹ evaọ usu emọ eree nọ ọsẹgboni mẹ a yẹ. Ikpe eree mẹ jọ nọ ọsẹ mẹ o ro whu. Fikiere oni mẹ ọvo ọ rẹrote omai no emaha ze.

Ebọro nọ a rẹ rọ umure fa e jẹ hae were omẹ gaga. E were omẹ no emaha ze. Nọ me te ikpe ikpegbọ no, me te kuomagbe utu ebọro fa jọ nọ a rẹ fa zaharo ọvo. Nọ mẹ kpako te ikpe udhegbọ no, ohwo jọ nọ o re wuhrẹ ahwo ebọro efa, ọ tẹ ta kẹ omẹ nọ me kuomagbe utu ebọro efa jọ evaọ Nicaragua. Rekọ mẹ rọwo ho keme oni mẹ ọ jẹ mọ gaga evaọ oke yena, yọ mẹ jẹ rẹrotei, fikiere mẹ gwọlọ nyase iẹe ba kpobọ Nicaragua ha. Uwhremu na, omọfa jọ nọ o re wuhrẹ ahwo ebọro efa, ọ tẹ wariẹ vuẹ omẹ nọ me kuomagbe utu nọ o rẹ fa kẹ orẹwho Costa Rica soso, yọ ahwo wọhọ omẹ a salọ. Mẹ tẹ ginẹ rọwo evaọ onana. Mẹ jọ utu ebọro efa nana no ukpe 1949 rite 1952, yọ ma kpohọ erẹwho wọhọ Cuba, Mexico, gbe Nicaragua nyae fa. Oria nọ a fi omẹ họ, mẹ jẹ hae riẹ ru ziezi, ẹsejọ dede ma rẹ fa te isia ikpegbihrẹ ababọ oware nọ me re ru thọ. O rẹ were omẹ nọ ogbotu na a tẹ be koyẹ kẹ omẹ, bi se odẹ mẹ!

Rekọ u yoma gaga inọ me je yeri uzuazọ ọfariẹ-ogbe. Dede nọ me wo ogbẹnyusu ọmọtẹ ọvo jọ, me re lele emetẹ efa ghele. Mẹ jẹ hae da idi thomawa re. Ẹdẹjọ nọ mẹ da bẹ no, obọ uwou mẹ jọ ruẹ omamẹ evaọ ehwa nọ oke o ke no, yọ mẹ riẹ epanọ me ro te uwou hu! Mẹ jẹ hai fi edhọ gaga re.

Nọ me je yeri uzuazọ nana, oni mẹ o te kurẹriẹ ruọ ukoko Isẹri Jihova. Oni mẹ ọ jẹ daoma fiobọhọ kẹ omẹ re me zihe ruọ Osẹri Jihova, rekọ evaọ oke ọsosuọ mẹ kẹ riẹ uzou sokpọ họ keme ebọro efa e da ruọ omẹ oma kpobi no. Mẹ tẹ rrọ obọ ogege bi wuhrẹ, ohọo u re kpe omẹ hẹ! Ebọro efa na ọvo iroro mẹ e rẹ jọ. Me you ebọro efa vi oware ofa kpobi!

Rekọ nọ mẹ jọ ikpe udhe gbe izii, mẹ tẹ nwoma ulogbo jọ nọ ma jẹ fa ebọro evaọ ẹdẹjọ. Nọ oma mẹ o ga no, me te siobọno ebọro efa nọ a rẹ jọ hwa ugho kẹ ohwo. Ghele na, me je wuhrẹ utu jọ nọ o jẹ hae fa zaharo ọvo nọ o kẹle uwou mẹ.

Evaọ ukpe 1957, a te zizie omẹ kpohọ okokohọ ubrotọ Isẹri Jihova jọ nọ a ru evaọ ogege ọvona nọ mẹ jẹ hae jọ fa ebọro na, mẹ tẹ ginẹ nya. Nọ mẹ keria udevie ogbotu na be gaviezọ na, me te muẹrohọ nọ uruemu Isẹri Jihova nọ e rrọ okokohọ na u wo ohẹriẹ gaga no orọ ogbotu ahwo nọ a rẹ ziọ etenẹ na kẹ ebọro efa, keme aikpobi a keria dhedhẹ yọ a wo adhẹẹ kẹ ohwohwo. Oware nọ mẹ ruẹ evaọ okokohọ na o tẹ wọ omẹ ta nọ a wuhrẹ Ebaibol na kugbe omẹ, me te je mu iwuhrẹ Isẹri Jihova họ ẹnya.

Eware buobu nọ me wuhrẹ evaọ Ebaibol na i duobọte omẹ gaga. Wọhọ oriruo, Jesu ọ ta nọ evaọ edẹ urere na, ilele riẹ a te ta usiuwoma Uvie Ọghẹnẹ evaọ akpọ na soso. (Matiu 24:14) Me te je wuhrẹ nọ Ileleikristi uzẹme a rẹ ta usiuwoma na orọnọ fiki ugho nọ a rẹ hwa kẹ ae he, keme Jesu ọ ta nọ: “Ọvọvẹ a kẹ owhai, wha kẹ ọvọvẹ.”​—Matiu 10:8.

Nọ me bi wuhrẹ Ebaibol na haro na, mẹ tẹ jẹ rọ eware nọ me bi wuhrẹ na wawọ oghẹrẹ uzuazọ nọ Isẹri Jihova a bi yeri. Ọwhọ nọ a be rọ ta usiuwoma Uvie na, o je si omẹ urru gaga. Mẹ ginẹ jọ omarai ruẹ ẹzi omorọkẹ nọ Jesu o jie uzi riẹ kẹ Ileleikristi inọ a wo na. Fikiere nọ me se obe Mak 10:21 jẹ ruẹ uzizie Jesu na inọ “Nyaze te jọ olele mẹ,” mẹ tẹ ginẹ gwọlọ jọ Osẹri Jihova.

O dina rehọ omẹ oke re me te ti siobọno oghẹrẹ uzuazọ nọ me je yeri vẹre na. Wọhọ oriruo, u kri no nọ me bi ro fi edhọ, yọ koka koka me re fi inọmba jọ nọ ọ rẹ “were” omẹ gaga. Rekọ, mẹ jọ Ebaibol na wuhrẹ nọ Ọghẹnẹ o mukpahe “enọ e rẹ wọ emẹjẹ fihọ hẹrẹ Efe” gbe ahwo nọ a wo uvou-uthei. (Aizaya 65:11; Ahwo Kọlọsi 3:5) Fikiere me te siobọno edhọ-ifio riẹriẹriẹ. Ẹdoka ọsosuọ nọ mẹ rọ siọ edhọ-ifio ba, inọmba nọ o rẹ “were” omẹ gaga na u te nwini! Ahwo a te je se omẹ ẹkoko fikinọ me fi evaọ oka yena ha, yọ a jẹ tuduhọ omẹ awọ re mẹ wariẹ muhọ efi, rekọ mẹ rọwo ho. Me gbe zihe kpohọ edhọ-ifio vievie he.

Mẹ rẹriẹ ovao dhe odawọ ofa nọ o dawo “uruemu okpokpọ” mẹ na evaọ ẹdẹdẹ nọ mẹ rọ họ-ame je zihe ruọ Osẹri Jihova. (Ahwo Ẹfisọs 4:24) Nọ me zihe kpohọ ehọtẹle nọ me wo họ evaọ owọwọ ẹdẹ yena, mẹ tẹ ruẹ ọmọtẹ nọ mẹ avọ iẹe ma jọ ọse vẹre nọ ọ be hẹrẹ omẹ evaọ aro ẹthẹ mẹ. Ọ tẹ ta kẹ omẹ nọ: “Sammy, ma riakpọ kuoma owọwọ na!” Rekọ mẹ tẹ nwane ta kẹe nọ, “Ijo mẹ se!” Mẹ tẹ jẹ ta kẹe nọ enẹna me bi yeri uzuazọ lele izi Ebaibol. (1 Ahwo Kọrint 6:18) Akpọ o te gbei unu, o te bo nọ: “Emejọ?” Rekọ fikinọ o se oware nọ Ebaibol na ọ ta kpahe owezẹ ọzae-avọ-aye gbe oware ovo ho, ọ tẹ jẹ tẹzẹ omẹ re ma wariẹ mu usu na họ. Rekọ mẹ tẹ nyase iẹe ba jẹ rueva ubruwou nọ me wo họ na, mẹ tẹ kare ẹtha na dhe oma. Eva e be were omẹ gaga anwẹnọ me ro kurẹriẹ ruọ ukoko Isẹri Jihova evaọ ukpe 1958 na, yọ mẹ wariẹ zihe kpohọ oghẹrẹ uzuazọ nọ me je yeri na vievie he.

A tẹ ta nọ me kele irere nọ i te omẹ no fiki izi Ebaibol nọ me bi ru lele, e rẹ vọ obe kiọkọ! Wọhọ oriruo, me wo emamọ egbẹnyusu buobu no, me wo uvi ẹruore, yọ eva e be ginẹ were omẹ.

Ebọro nọ a rẹ rọ umure fa e gbẹ be were omẹ, rekọ o gbẹ rrọ oware nọ o mai wuzou kẹ omẹ evaọ uzuazọ họ. Mẹ jọ ebọro efa wo ugho gbe okpodẹ, rekọ eware nana e tọ họ. Rekọ usu mẹ kugbe Ọghẹnẹ gbe inievo ukoko na o te jọ bẹdẹ. Ebaibol na ọ ta nọ: “Akpọ na ọ be vrẹ yọ ere isiuru riẹ re, rekọ ohwo nọ o bi ru oreva Ọghẹnẹ ọ rẹ jọ bẹdẹ bẹdẹ.” (1 Jọn 2:17) Enẹna me you Jihova gbe inievo ukoko na vi oware ofa kpobi!